Mvale Menwo Ndole Yehowa So, Na Ye Koso Ɔbɔle Menwo Waen

NHYƐLE YEBO NZŨANE YEHOWA NWO NIKYE, NA ƐHẼNE MAA MVALE MENWO NDOLE YE SO

Bɛwole me 1948 wɔ kuro kãamba bie nu wɔ Nigeria. Sɔ mmerɛ nanu ne, né me baba aliema kãa bɔ bɛfrɛ ye Moustapha, ɔne nniema panyi Wahabi babɔ asu baayɛ Yehowa Adanzefoɛ. Mmerɛ bɔ nyane afoɛ 9 ne, me baba wuli, na ye wue ne yɛle me yea paa. Nakoso, nniema Wahabi hãhyirele me kyɛ kyẽabie Nyameɛ kotingye me Baba maa yekonwu ye biekũ. Sɔ dwirɛ ne kyekyele me wora paa, na ɛhẽne yeɛ ɔmaa nhyɛle yebo nzũane Bible ne ɔ. Yeti mmɔle asu wɔ 1963 nu, na nniemamɔ mmrienzua nzã koso bɛbɔle asu.

Wɔ 1965 nu ne, ngɔle nniema panyi bɔ bɛfrɛ Wilson berɛ wɔ Lagos. Né nniema ne wɔ Igbobi Asafo nu, na né atẽepakyelɛfoɛ pẽe wɔ sɔ asafo nanu. Yeti mvale menwo mmɔle bɛ, na ɛhẽne maa menye gyele paa. Anigye ne anwokekã bɔ ne bɛfa bɛyɛ asɛnga adwuma ne, ɔhyɛle me ngunaen maa me koso mmanyɛle atẽepakyelɛniɛ wɔ January 1968 nu.

Ɛhẽne sĩ ne, aliemaa bie bɔ bɛfrɛ ye Albert Olugbebi bɔ ɔyɛ adwuma wɔ Bɛtɛl ne, oyiale mmrandeɛ ne ndaluwa bɔ né yɛwɔ asafo nanu ne. Ɔhãhyirele yɛ kyɛ asafo ne hia atẽepakyelɛfoɛ titire maa bɛkɔyɛ asɛnga adwuma ne wɔ Nigeria maen ne sorɔ dɔ. Mmerɛ bɔ ɔne yɛ yiale nu ne, Aliemaa Olugbebi hãne edwirɛ bie bɔ me wora ngofi ye llé ɔ. Ɔhãne kyɛ: “Ɛmɔte mmrandeɛ ne ndaluwa bɔ ɛmɔle anwoserɛ ɔ. Yeti sɔ mmerɛ he yeɛ ɛmɔkɔhora bɛkɔfa ɛmɔ mmerɛ ne ɛmɔ anwoserɛ bɛkɔsõ Yehowa ɔ. Ofikyɛ behia mmenia pẽe maa bɛyɛ asɛnga adwuma ne.” Sɔ dwirɛ bɔ ɔhãne ne, ɔhyɛle me ngunaen maa nyɛle m’adwene kyɛ ngosuesũa diyifoɛ Yesaya. Yeti, né mepena kyɛ Yehowa fa me kɔ nekaa biala bɔ okuro ɔ. Yesɔ nati, nhyehyɛle fɔɔm kyɛ mepena kyɛ mebayɛ atẽepakyelɛniɛ titire.—Yes. 6:8.

Wɔ May 1968 nu ne, bɛhãne kyɛ ngɔnyɛ atẽepakyelɛniɛ titire wɔ kuro bie bɔ bɛfrɛ ye Kano, bɔ ɔwɔ Nigeria maen ne sorɔ dɔ nanu. Sɔ mmerɛ ne, ɔnate Biafra Kõɛ bɔ né ɔkɔso wɔ berɛ nati, né ɔmaa ɛberɛ ndwo koraa. Sɔ kõɛ ne hyɛle yebo fili 1967 oodwuli 1970. Behũni mmenia, na bɛsɛkyele nningyein pẽe wɔ sɔ kõɛ nanu. Ɛhẽne sĩ ne, bɛfale kõɛ ne bɛhɔle Nigeria maen ne afitéleɛ. Ɔnate bɔ né ɔkɔ so wɔ dɔ nati, aliemaa bie bɔ okuro me dwirɛ paa hãhyirele me kyɛ sɛ ɔkɔyɛ yé a, ahãa nnɛmaa mekɔ. Mmerɛ bɔ ɔhãne sɔ ne, ngã ngyirele ye kyɛ: “Meda w’ase paa kyɛ ɛdwene menwo ɔ, nakoso Yehowa yeɛ wasoma me kyɛ ngɔ ɔ. Yeti medé medi kyɛ ɔkɔbɔ menwo waen.”

MVALE MENWO NDOLE YEHOWA SO WƆ NEKAA BƆ NÉ KÕƐ AMAA ƐBERƐ AYƐ BASAA NE

Mmerɛ bɔ ndwuli Kano kuro nanu ne, né ɔyɛ aworabɔ ofikyɛ né kõɛ ne amaa nningyein pẽe asɛkye wɔ kuro nanu. Sɛ odwu mmerɛ bie na yɛnate asɛnga nu a, né yɛkora yenwu mmenia bɔ ɔnate kõɛ nati bahũ bɛ nemɔ fũin kyɛ ogua kuro nanu ɔ. Ɔwɔ nu kyɛ né asafo pẽe wɔ Kano kuro nanu de, nakoso ɔnate kõɛ nati, né aliemaamɔ pẽe anwati afi berɛ. Yeti, aliemaamɔ bɔ né baha wɔ kuro nanu ne, né bendwu 15 po, na bɛ koso né esuroen ahã bɛ, na ne b’abanu abu paa. Atẽepakyelɛfoɛ titire bɔ yɛhɔle ne, né yɛte mmenia nzia, na mmerɛ bɔ aliemaa nemɔ nye bɔle yɛso ne, bɛnye gyele paa. Yeti yɛ koso yɛkyekyele bɛ wora. Afei koso, nningyein bɔ yɛyɛ ye wɔ Yehowa sõen nu tekyɛ asafo nhyiamu ne asɛnga adwuma bɔ né bayakyi ye yɛlɛ ne, yɛbokale bɛ maa bɛhyɛle yebo biekũ. Yesa yɛbokale bɛ maa bɛfale b’asɛnga tworɔtohɔ bɛhɔle Bɛtɛl, na bɛhyɛle yebo kyɛ bɛkra nwomaa ahoroɛ.

Yɛhyɛle yebo yesũane Hausa dwudwolɛ ne, ofikyɛ ɛhẽne yeɛ né ɔte dwudwolɛ bɔ bɛkã ye paa wɔ kuro nanu ɔ. Mmerɛ bɔ mmenia bɔ bɛwɔ kuro nanu ne tele kyɛ yɛkã ahennie nanwo dwirɛ yekyire bɛ wɔ bɛ kuro dwudwolɛ nu ne, benu pẽe tiele yɛ. Ɛsõen bɔ né mmenia wɔ nu paa wɔ Kano kuro nanu ne, né mmenia bɔ bɛwɔ nu ne nye ngye asɛnga adwuma bɔ yɛyɛ nanwo, na ɛhẽne maa betuli bɛnye besiele yɛ so. Yeti né odikyɛ yɛnea yɛnwo yé. Ɛlɛhõ bie bɔ né yɛnate asɛnga nu ne, bĩaa bie hwẽne yɛ so dadeɛ na ɔhyɛle yebo kyɛ ɔfõa yɛ. Nakoso, yɛmaa yɛnwo yɛle nyera yeti yɛnwatili. Sɛ yaanyɛ sɔ a, ahãa edwirɛ tole yɛ! Ɔmva yenwo kyɛ né kuro nanu tenalɛ yɛ suro ne, Yehowa maa ‘yɛtenane ase asomdwee nu,’ na ɔnate ɛhẽne aso maa mmeni pẽe wale asafo nanu. (Edw. 4:8) Kesaalae asafo 11, ɔne adawurubɔfoɛ kɔbo 500 yeɛ bɛwɔ Kano kuro nanu ɔ.

BƐFALE ƐPƆEN BƐWALE YƐ SO WƆ NIGER

Wɔ August 1968 nu ne, né yayɛ asɛnga adwuma ne bosome kãa wɔ Kano. Nakoso, bɛhãne kyɛ mene atẽepakyelɛfoɛ titire nyɔ biemɔ yɛhɔ Niamey bɔ ɔte Niger maen ne ahenguro nanu, na yɛɛtoa asɛnga adwuma naso wɔ dɔ. Mmerɛ bɔ yeedwuli berɛ ne, wangyɛ yeɛ yenwuni kyɛ sãa bɛkã nekaa bɔ ɛberɛ yɛ hye paa wɔ aseɛ he aso a, Niger maen bɔ ɔwɔ West Africa ne bokaso. Sɛ maen nanu bɔ ɔyɛ hye ne la ahãmeɛ a, né odikyɛ yesũa French dwudwolɛ ne, ofikyɛ ɛhẽne yeɛ né ɔte dwudwolɛ titire bɔ bɛkã ye wɔ maen nanu ɔ, na né ɔlla ase mma yɛ koraa. Sɔ haw hemɔ mukoraati sĩ ne, yɛfale yɛnwo yɛtole Yehowa so, na yɛne aliemaamɔ kãa bie bɔ bɛwɔ Niamey kuro nanu ne, yɛbɔle nu yɛyɛle asɛnga adwuma ne. Yɛhyɛle yebo kyɛ yɛyɛ asɛnga adwuma ne, na yɛkyekyɛle nwomaa bɔ ye dwirɛti yeɛ ole, The Truth That Leads to Eternal Life ne yɛmane mmenia. Yeti wangyɛ biala bɛbɔ bɛwɔ Niamey kuro nanu bɔ bɛse kenga ne, benu biala nyane nwomaa ne bie. Odwu mmerɛ bie po a, mmenia nemɔ bɔbɔ yeɛ né bɛpena yɛsĩ atẽe bɛbadé nwomaa ne bie ɔ.

Nakoso ɛhemɔ sĩ ne, wangyɛ yeɛ yenwuni kyɛ sãa Niger awaen ne, yenye ngye asɛnga adwuma bɔ Yehowa Adanzefoɛ yɛ ye wɔ maen nanu nanwo. Wɔ July 1969 nu ne, yɛyɛle manzini nhyiamu bɔ olimoa koraa wɔ maen nanu, na mmenia bɔ né yɛwɔ nhyiamu nabo ne, né yɛte 20. Né yanya adawurubɔfoɛ nyɔ bɔ bɛkɔbɔ asu wɔ sɔ nhyiamu nabo ɔ, na né yayɛ b’asubɔ nanwo nhyehyɛɛ mukoraati yayie. Nakoso nhyiamu ne kyẽa bɔ olimoa nala ne, polisifoɛ biemɔ wale berɛ bɛhã behyirele yɛ kyɛ yɛyakyi nhyiamu ne. Afei bɛhyele yɛne manzini soneafoɛ ne bɛfale yɛ bɛhɔle police station. Mmerɛ bɔ bɛhworɔle yɛnoa dwirɛ beyiele ne, bɛhã behyirele yɛ kyɛ yɛhɔ, nakoso sɛ aleɛ kyẽ a, yɛfa yɛnwo yeehyire bɛ. Ɔwale sɔ ne, yenwuni kyɛ bɔ polisifoɛ nemɔ yɛ ne ati, aanea a ɔkɔfa edwirɛ kɔbrɛ yɛ. Yeti yɛyɛle nhyehyɛɛ maa bɛmane asubɔ dwudwolɛ ne wɔ aliemaa bie awuro. Ɛhẽne sĩ ne, yɛfale bɛbɔ bɛbaabɔ asu ne yɛhɔle nzue bie nu yɛbɔle bɛ asu bɔ ebiala anwu yesĩ ɔ.

Sɔ dwirɛ ne sili dapɛen kãa bie sĩ ne, awaen mbanyi nemɔ hãhyirele mene atẽepakyelɛfoɛ titire nnu bɔ yɛwɔ maen nanu ne kyɛ bama yɛ dɔnhwere 48 kyɛ yɛfa yefi Niger maen nanu. Bɛhãne kyɛ yɛbɔbɔ yeɛ yɛyɛ y’akwanduo nanwo nhyehyɛɛ ɔ. Yeti yetiele, na yefili Niger maen nanu yɛhɔle Nigeria Bɛtɛl. Mmerɛ bɔ yeedwuli berɛ ne, bɛmane yɛ dwumadié foforɛ.

Bɛmaa ngɔle Nigeria kuro kãamba bie bɔ bɛfrɛ ye Orisunbare nu, na ngɔmmokale aliemaamɔ kãa bɔ bɛwɔ berɛ naso maa yɛbɔle nu yɛyɛle asɛnga adwuma ne, na menye gyele paa. Nakoso, mmerɛ bɔ nyɛle asɛnga adwuma ne kãa wɔ berɛ bosome nzia pɛ sĩ ne, Bɛtɛl hãhyirele me kyɛ me ngome nza ngɔ Niger. Ahyɛaseɛ ne, né ɔyɛ me nwanwa; afei né me kunu tete me. Nakoso ɔnate kyɛ né menye agyina aliemaamɔ bɔ bɛwɔ Niger nati, ngɔle.

Mmerɛ bɔ ngondwuli Niamey bɔ aleɛ hyẽne ne, nyiale bĩaa bie bɔ odi dwaa bɔ ɔte Nigerianiɛ ɔ. Bĩaa ne nwuni kyɛ nde Yehowa Danzeniɛ, yeti ɔhyɛle yebo bisale me dwirɛ pẽe fale Bible nanwo. Mene ye hyɛle yebo sũane Bible ne, na ɛhẽne bokale ye maa ɔyakyili sigaret ne nzãa bɔ né ɔnõ ne, na yesĩ ne, ɔbɔle asu. Mene aliemaamɔ bɔle nu yɛle asɛnga adwuma ne wɔ Niger maen nanu, na ngakãngakã mmenia hyɛle yebo bɛwale asafo nanu. Ɛhẽne maa menye gyele paa. Ngondwuli Niger ne, né Yehowa Adanzefoɛ bɔ bɛwɔ maen nanu ne te 31. Nakoso, mmerɛ bɔ né mefi berɛ ne, né badwu 69.

“ALIEMAAMƆ BƆ BƐWƆ GUINEA NE, YƐNDE BƐ NGÔ

Wɔ December 1977 nu ne, bɛmaa nza ngɔle Nigeria Bɛtɛl maa asafo ne fale dapɛen nzã tetele me. Mmerɛ bɔ ndeteyɛɛ ne wale ayieleɛ ne, aliemaa bɔ ɔla Bɛtɛl Boayikue ne noa bɔ bɛfrɛ ye Malcolm Vigo ne, ɔmaa ngengale krataa bie bɔ né Sierra Leone Bɛtɛl ne ahworɔ abrɛ bɛ ɔ. Bɛhãne wɔ krataa nanu kyɛ bɛpena abrandeɛ sigyaniɛ bɔ ole anwoserɛ bɔ ɔkora kã Borɔfo ne French maa ɔkɔsõ kyɛ manzini soneafoɛ wɔ Guinea. Aliemaa Vigo hãhyirele me kyɛ sɔ adwuma bɔ né bɛpena kyɛ mekɔyɛ ne, ɛhẽne anwo ndeteyɛɛ yeɛ bafa bama me ne. Nakoso ɔmaa nwuni kyɛ ɔtte adwuma bɔ ɔla ase ɔ. Yeti ɔhãhyirele me kyɛ: “Dwene yenwo yé kora né ale ato nu.” Nakoso ngãne kyɛ: “Yehowa yeɛ ɔsõma me ɔ, yeti ngɔhɔ.”

Mmerɛ bɔ ndwuli Sierra Leone ne, mene aliemaamɔ bɔ bɛwɔ Bɛtɛl berɛ ne hãne Guinea bɔ né bɛnwa ngɔ nanwo dwirɛ. Aliemaa kõ bɔ ɔboka Bɛtɛl Boayikue naso ne hãhyirele me kyɛ: “Aliemaamɔ bɔ bɛwɔ Guinea ne, yɛnde bɛ ngã, yeti yɛnze kyɛbɔ asɛnga adwuma ne kɔso wɔ berɛ ɔ.” Ɔwɔ nu kyɛ Sierra Leone Bɛtɛl ne yeɛ né bɛnea asɛnga adwuma bɔ né bɛyɛ ye wɔ Guinea naso ɔ, nakoso ɔnate amanyɔnzɛm ti, né mmenia yɛ basabasa wɔ Guinea maen nanu. Yeti né ɔyɛ se kyɛ bɛkɔte aliemaamɔ ngã na bahora banwu kyɛbɔ asɛnga adwuma ne si kɔ ɔ. Né aliemaamɔ bɔ bɛwɔ Sierra Leone Bɛtɛl ne abɔ mmɔden mmerɛ pẽe kyɛ, bɛkɔsõma ebie maa ɔkɔɔnea aliemaamɔ bɔ bɛwɔ Guinea ne boso. Nakoso ɔnate bɔ né ɔkɔso wɔ Guinea maen nanu nati, né ɔyɛ se kyɛ aliemaa bie kɔhora kɔhɔ dɔ ɔ. Yeti bɛhã behyirele me kyɛ ngɔ Conakry bɔ ɔte Guinea maen ne ahenguro nanu, na mene awaen mbanyi nemɔ yeedwudwo yɛnea kyɛ bɛkɔma m’atẽe maa ngɔtena maen nanu a.

Ngondwuli Conakry ne, mene sona bɔ ogyi Nigeria awaen ne gya nu wɔ Guinea maen nanu ne yeedwudwole wɔ ye ɔfiss. Ngã ngyirele ye kyɛ mepena kyɛ mebayɛ asɛnga adwuma wɔ Guinea. Nakoso ɔhã hyirele me kyɛ nnɛmaa meyɛ sɔ, ofikyɛ mannea yé a, bɛkɔhye me bɛkɔto nu, anaa ebie kopira me mbaen. Yeti otuli me foɛ kyɛ: “Sa kɔ Nigeria na kɔkã wɔ nzɛmba ne wɔ dɔ.” Nakoso ngã ngyirele ye kyɛ: “Guinea wala yeɛ mepena kyɛ metena mekã nzɛmba ne ɔ.” Mmerɛ bɔ ngãne sɔ ne, ɔhworɔle krataa ɔɔmane awaen panyi kõ bɔ ɔwɔ Guinea ne kyɛ ɔboka me maa nnya krataa bɔ ɔkɔmaa ngɔhora ngɔtena maen nanu ɔ, na awaen panyi ne koso yɛle sɔ.

Ɛhẽne sĩ ne, nza ngɔle Sierra Leone Bɛtɛl, na ngã ngyirele aliemaamɔ bɔ bɛwɔ berɛ ne kyɛ, Guinea awaen ne ama m’atẽe kyɛ ngɔhora ngɔtena maen nanu ngɔhã nzɛmba ne. Mmerɛ bɔ bɛtele ne, bɛnye gyele paa kyɛ Yehowa ayira gyinayɛɛ bɔ nzili kyɛ ngɔhɔ Guinea naso ɔ.

Ofi 1978 kodwu 1989 ne, nyɛle adwuma kyɛ manzini soneafoɛ wɔ Guinea ne Sierra Leone maen nanu. Na odwu mmerɛ bie koso a, né mekora mekosi manzini soneafoɛ foforɛ gya nu wɔ Liberia. Nhyɛle adwuma nabo ne, ɔwɔ nu alaa a, né mafokyɛ. Né ɛhe taa si wɔ nguro mmaammaa nemɔ anu, mmerɛ bɔ mahɔ kyɛ mekwaasõ bɛ ne. Sɛ ɔba sɔ a, aliemaamɔ bɔ bɛwɔ berɛ ne, bɛyɛ bɔ bɛkɔhora biala kyɛ bɛkɔfa me bɛkɔhɔ hɔspitel.

Mmerɛ bie po de, ebunu bie hyele me paa. Afei koso sɛ mekɔ bondua a, né esuroen wɔ nu, na né mefe. Né anwonyerɛ nanu yɛ se paa. Mmerɛ bɔ menwo tɔle me ne, ndele kyɛ sãa né aliemaamɔ suro kyɛ ngowu. Yeti né bɛdwene yenwo bɛpena nekaa bɔ sɛ mewu a bekosie me ɔ. Sɔ ɔhaw bɔ ɔyɛ suro hemɔ bɔ ɔtole me ne mukoraati sĩ ne, mannya adwene llé kyɛ ngɔyakyi adwuma bɔ bafa bawura mesa ne. Né nne gyidie kyɛ Nyameɛ ngome yeɛ ɔkɔhora kɔbɔ yɛnwo waen ɔ, na sɛ yewu po a ɔkɔhora kotingye yɛ kɔwa ngõa nu biekũ.

MENE MEYE FALE YƐNWO TOLE YEHOWA SO

Wɔ 1988 nu ne, nyiale aliemaa brasua atẽepakyelɛniɛ bie bɔ ɔbɔ yenwo mmɔden, na ɔbrɛ yenwo ase ɔ. Né ye dumaa li Dorcas, na yegyale wɔ sɔ afoɛ nanu. Yesĩ ne, ɔɔbokale meso maa nyɛle manzini adwuma ne. Né Dorcas te ebie bɔ ɔdɔ Yehowa bɔ né okuro kyɛ ɔfa nningyein pẽe bɔ afɔleɛ fa boka mmenia ɔ. Né yɛbɔ nu yɛpɛ atẽe bɔ ye tendenn te kɔyɛ kilomita 25 (anaa kwanzii 15) yɛkɔsõ asafo ahoroɛ, na sɛ yɛkɔ a, né yɛsoa yɛ nningyein ne wɔ yɛ ti so. Sɛ yɛkwaasõ asafo ahoroɛ bɔ bɛwɔ dede ne a, kar biala bɔ yekonya ye ne, né yɛfo. Atẽe bɔ né kar ne fa yɛ faso ne, né enu pẽe ttemayé, ofikyɛ né esaa wɔ so paa.

Né Dorcas te ebie bɔ ole akokoduro paa, ofikyɛ sɛ odwu mmerɛ bie na yɛkwaasõ asafo biemɔ a, né odikyɛ yɛpɛ asue bɔ ɛlɛngyɛen mɔ wɔ nu ɔ. Wɔ y’akwanduo kõ bie nu ne, né odikyɛ yedi ɛlɛnnu wɔ atẽe so. Bɔ yeti yeɛ ɔwale sɔ yeɛ ole kyɛ, né odikyɛ yɛpɛ nzue bie kora né yahora yadwu asafo bɔ yɛkwaasõ bɛ ne berɛ. Nakoso bakaa bɔ né bafa bayɛ ekyein bɔ ɔla nzue naso ne, né wasɛkye. Yeti né odikyɛ yɛtena ɛlɛen nu kora né yahora yapɛ nzue ne. Mmerɛ bɔ yeedwuli nzue ne noa dɔ bɔ yedwu yefi ɛlɛen nanu ne, Dorcas te tɔle nzue nanu, na nekaa bɔ ɔtɔle ne koso, né ɛberɛ te buma. Nakoso mene Dorcas mukoraati, né yenu biala nze nzue nu bia. Afei koso nzue bɔ ɔte tɔle nu ne, né ɛlɛngyɛen mɔ wɔ nu paa. Yehowa bokale yɛ, ofikyɛ né mmrandeɛ biemɔ pingyé berɛ. Yeti mmerɛ bɔ benwuni sɔ ne, bɛtɔle nzue nanu bɛɛyele Dorcas. Ɔwɔ nu, sɔ dwirɛ bɔ osili ne sɛ odwu mmerɛ bie na yɛda a, ɛyɛ a né ogyigyi yɛnye so, nakoso yamma ɛhẽne ammu y’abanu maa yanyakyi adwuma ne.

Wɔ 1992 afoɛ ne ahyɛaseɛ ne, edwirɛ bie sili maa ɔyɛle yɛ nwanwa paa. Yeɛ ole kyɛ Dorcas nwonzɛle. Mmerɛ bɔ ɔwale sɔ ne, né odikyɛ yesi gyinayɛɛ kyɛ yɛkɔhɔ so yɛkɔyɛ mmerɛ mukoraati sõen adwuma ne, anaakyɛ yɛkɔyakyi. Yesusuli edwirɛ nanwo yɛhɔle sĩɛ, na yɛhã yehyirele yɛnwo kyɛ: “Akwalaa ne te akyɛdeɛ bɔ Yehowa afa ama yɛ ɔ!” Ɛhẽne ati Dorcas wole ne, yɛtole akwalaa ne dumaa Jahgift. Yɛwole Jahgift afoɛ nna sĩ ne, Dorcas sa nwonzɛle na ɔwole yɛwa brienzua, Eric. Yɛtetele yɛ mmaa nemɔ maa bɛɛsõne Yehowa yé. Jahgift ɔɔyɛle adwuma wɔ nekaa bɔ bekyire dwudwolɛ bo wɔ Conakry, na Eric koso, ɔte asafo nu somvoɛ.

Mmerɛ bɔ Dorcas nwonzɛle ne, né odikyɛ ɔyakyi atẽepakyelɛniɛ titire adwuma bɔ ɔyɛ ne. Nakoso ɔhɔle so sõne kyɛ atẽepakyelɛniɛ mmerɛ po bɔ né yɛtete yɛ mmaa nemɔ ne. Me koso ngɔle so nzone kyɛ atẽepakyelɛniɛ titire. Ɛhe maa yenwu kyɛ Yehowa aboka yɛ paa. Mmerɛ bɔ yɛ mmaa nemɔ nyini bɔ bɛtele bɛnwo ne, Dorcas ɔɔbokale me so wɔ atẽepakyelɛfoɛ titire adwuma nanu. Na kesaalae, yɛ munyɔ yɛsõ kyɛ nzɛmbatrɛlɛfoɛ wɔ Conakry.

YEHOWA NGOME YEƐ ƆKƆHORA KƆBƆ YƐNWO WAEN Ɔ

Nekaa biala bɔ Yehowa hãne kyɛ ngɔ ne ngɔle, na ɔnate ɛhẽne ati mene meye yanwu kyɛ Yehowa ayira yɛ paa, na wabɔ yɛnwo waen. Bɛbɔ bɛfa besie bɛnye so kyɛ bekonya anwonyadeɛ pẽe wɔ asetena nu ne, ɛyɛ a bɛnwo ndɔ bɛ. Nakoso yɛde, ɔnate kyɛ yannyɛ sɔ na mmom yɛfale yɛnwo yɛtole Yehowa so nati wamaa yɛnwo atɔ yɛ. Bɔ wahɔso wɔ mene Dorcas asetena nu ne, wamaa yanwu kyɛ Yehowa bɔ ɔte “yɛ ngoalelɛ Nyameɛ” ne ngome, yeɛ ɔkɔhora kɔbɔ yɛnwo waen, na wamaa yɛnye agye ɔ. (1 Abe. 16:35) Medé medi paa kyɛ bɛbɔ bɛfa bɛnwo bɛto Yehowa so ne, ye koso ‘ɔkɔbɔ bɛ ngoa nwo waen maa bɛkɔboka ateasefoɛ so.’—1 Sam. 25:29.