Hulda Hora Dwuli Bɔ Né Wafa Wasie Yenye So Nanwo

ALIEMAA mmrasua nzã biemɔ te Sangir Besar. Ɔte supɔ kãamba bie bɔ ɔwɔ Indonesia maen nanu ɔ. Afoɛ kãa bɔ wapɛ nu ne, bɛbɔle nu bɛyɛle adwuma bie wɔ ɛpo ne noa. Ɔnate kyɛ sɔ aliemaa mmrasua nzã hemɔ kã Bible nanu dwirɛ bekyire bɛbɔ bɛte supɔ naso ne ati, mmenia se bɛ paa wɔ berɛ. Nakoso ɛlɛhõ bie, bɛyɛle adwuma bie bɔ né ɔte sorongo koraa.

Bɔ bɛyɛle yeɛ ole kyɛ bɛhɔle ɛpo ne noa. Nakoso sɔ mmerɛ he de, nná nzɛmba ne yeɛ né bɛkwaahã ɔ. Na mmom nyɔboɛ bɔ ye mbiri tekyɛ bɔɔl bɔ ɔwɔ ɛpo ne noa ne yeɛ bɛsesale ɔ. Ɛhẽne sĩ ne, bɛtena bia mmaammaa biemɔ so na bɛfale hamma bedwudwale nyɔboɛ nemɔ nu maa ɔyɛle mmaammaa. Beyiele ne, bɛsesa beguale rɔba bakɛt biemɔ nu na bɛfa bɛhɔle awuro. Mmerɛ bɔ bedwuli awuro ne, behwiele nyɔboɛ ne beguale bag mbiri biemɔ nu, na bɛtɔne ye bɛmane mmenia bɔ bɛyɛ kar atẽe ne.

Sɔ aliemaa mmrasua nzã bɔ yɛkã bɛnwo dwirɛ ne, bɛfrɛ kõ Hulda. Yede, ɔnate kyɛ ne ole anwoserɛ tra mmrasua nyɔ bɔ baha nati, né ɔkora fa mmerɛ pẽe yɛ sɔ adwuma ne. Sɛ Hulda kɔtɔne nyɔboɛ ne a, esikaa bɔ okonya ye ne, ɛhẽne yeɛ né ɔfa nea ye abusũa ɔ. Nakoso, nná ɛhẽne ngome yeɛ né yenwo hia Hulda ɔ, na mmom né ɔpena kyɛ ɔtɔ tablɛt kyɛbɔ ɔkɔyɛ a, ɔkɔhora konya JW Library^® app ne wɔ so ɔ. Né ɛhẽne kɔboka ye maa okonya vidio ne nwomaa ahoroɛ bɔ ɔkɔfa kohyirehyire mmenia wɔ asɛnga nu ɔ. Afei koso, né ɔkɔhora kɔfa sɔ tablɛt ne kosũa nikye kyɛbɔ ɔkɔyɛ a, ɔkɔboka ye maa ɔkɔte Bible nabo yé ɔ. Yeti, bɔ ɔyɛle yeɛ ole kyɛ, sɛ ɔkɔtɔne nyɔboɛ ne a, esikaa bɔ okonya ye ne, né ɔfa kãa to berɛ kyɛbɔ ɔkɔyɛ a, ɔkɔhora kɔboɔboa yenoa kɔfa kɔtɔ tablɛt ne ɔ.

Ngyerɛmɔ biala né Hulda kɔpakye nyɔboɛ dɔnhwere nyɔ, na ɔyɛle sɔ alaa bosome kõ ne dapɛen nyɔ. Nyɔboɛ bɔ ɔpakyele ye sɔ mmerɛ ne, né ɔsõne kãa. Yeti ɔfa guale kar bie nu ɔɔtɔne ye. Ɔhɔle so yɛle sɔ oodwuli kyɛ onyane esikaa bɔ né ɔkɔhora kɔfa kɔtɔ tablɛt ne ɔ.

Hulda hãne kyɛ: “Ɔwɔ nu kyɛ nyɔboɛ bɔ né mepakye ne, né ɔmaa mefɛ, na né ɔkora pepɛ mesa nu po. Nakoso, mmerɛ bɔ ngora ndɔle tablɛt ne, ɔbokale me paa. Ofikyɛ né ɔmaa mekora mekyirekyire mmenia yé wɔ asɛnga nu, na afei né mekora mefa mesiesie menwo mema asafo nhyiamu ahoroɛ ne. Ɔnate ɛhẽne ati, me wora fili ɛyealɛ bɔ mvale nu mmerɛ bɔ né mepakye nyɔboɛ ne koraa.” Hulda sa hãne kyɛ, ɔnate kyɛ mmerɛ bɔ COVID-19 anwonyerɛ ne wale ne, né bɛyɛ asafo nhyiamu ne asɛnga adwuma ne mukoraati wɔ fon so nati, tablɛt bɔ ɔtɔle ne bokale ye paa. Ofikyɛ ɔmaa ɔhora hɔle asafo nhyiamu ne asɛnga sɔ mmerɛ ne. Ɔyɛ yɛ fɛ paa kyɛ, Hulda hora dwuli bɔ né wafa wasie yenye so nanwo ɔ.