Edwirɛ Bɔ Ebiemɔ Bisa Ɔ

Nwa yeɛ Yesaya 60:1 ne ka yenwo dwirɛ ne, na atee beni aso yeɛ ‘odwɔso ta hyireinn’ ɔ?

Yesaya 60:1 ka kyɛ: “Dwɔso, ta hyireinn, ofikyɛ wɔ kanea ne wawa, yeɛ AWURADE animnyam ne apukye wɔ so.” Yerusalem anaa Sion bɔ né ɔte Yuda maen ne ahenguro ne, yeɛ tworɔnzɛm he ka yenwo dwirɛ ɔ. (Yes. 60:14; 62:​1, 2) Yerusalem kuro ne gyi berɛ ma maen ne mukoraati. Edwirɛ bɔ ɔwɔ Yesaya nwomaa nanu ne, ɔmaa yebisa yɛnwo edwirɛ nyɔ bie. Ko yeɛ ole kyɛ, mmerɛ beni, ɔne atee beni aso yeɛ Yerusalem ‘dwɔsole,’ ná ɔtale hyireinn ɔ? Bɔ ɔtɔ so nyɔ, edwirɛ bɔ Yesaya hworɔle ne, aso wawa nu paa wɔ yɛ mmerɛ he aso anaa?

Mmerɛ beni, ɔne atee beni aso yeɛ Yerusalem ‘dwɔsole,’ ná ɔtale hyireinn ɔ? Mmerɛ bɔ Yudafoɛ nemɔ hɔle ngoasom nu wɔ Babilɔn afoɛ 70 ne, ɔmaa Yerusalem kakyili kurofoen, na ye asɔre awuro ne koso bubuli. Nakoso mmerɛ bɔ Medesefoɛ ne Pɛsiafoɛ nemɔ lili Babilɔn so ngunim ne, Yisraelfoɛ bɔ né bɛwɔ Babilɔn ahennie nanu ne mukoraati ne, benyane yenwo atee kyɛ bekosa bɛkɔhɔ bekuro, na bafa nahorɛ soen basie berɛ bieku. (Ɛsra 1:​1-4) Yeti ofi afoɛ 537 K.Y.B. (Kora Yeɛ Yesu Ba Ɔ) bɔ ɔkɔ ne, mmenia kaa bɔ bedi nahorɛ bɔ befi Yisrael mmusua kue 12 ne mukoraati nu ne, besa bɛhɔle bekuro. (Yes. 60:4) Bɛhɔle ne, bɛhyɛle yebo kyɛ bɛbɔ afɔleɛ bɛma Yehowa, belili aluolue ahoroɛ ne, na asɔre awuro ne koso, bɛhyɛle yebo besili. (Ɛsra 3:1-4, 7-11; 6:16-22) Ɔwale sɔ ne, Yehowa animnyam hyɛle yebo kyɛ ɔta Yerusalem so, kyire kyɛ ɔta Nyameɛ mmenia bɔ basa bawa bekuro naso bieku. Yeti wɔ atee bie aso ne, bɛɛyɛle kanea bɛmane maen ahoroɛ bɔ né bɛnzo Yehowa ne.

Yesaya ngɔmhyɛ bɔ ɔfa nahorɛ soen bɔ bɛkɔfa bekosie berɛ bieku nanwo ne, ye bue kaa bie yeɛ ɔwale nu bɔ né ɔfa tete Yerusalem nwo ɔ. Yisraelfoɛ nanu pee angɔ so anyɛ sotie amma Nyameɛ. (Neh. 13:27; Mal. 1:​6-8; 2:​13, 14; Mat. 15:​7-9) Odwuli nekaa bie ne, bɛpole Yesu Kristo, bɔ né ɔte Mɛsaya ne po. (Mat. 27:​1, 2) Ayieleɛ koraa ne, wɔ afoɛ 70 Y.B (Yɛ Aberɛ So) nu ne, bɛsɛkyele Yerusalem ne ye asɔre awuro ne ye pɛen nyɔ so.

Né Yehowa alimoa aha ato berɛ kyɛ sɔ yeɛ okosi ɔ. (Dan. 9:​24-27) Ɛhe maa yenwu ye paa kyɛ, ngɔmhyɛ bɔ ɔwɔ Yesaya yeti 60 bɔ ɔfa nahorɛ soen bɔ bɛkɔfa bekosie berɛ bieku nanwo ne, ɔtte Yerusalem bɔ né ɔwɔ aseɛ so ne yeɛ Yehowa nate so kɔmaa ye mukoraati kɔwa nu ɔ.

Edwirɛ bɔ Yesaya hworɔle ne, aso wawa nu paa wɔ yɛ mmerɛ he aso anaa? Yoo, nakoso ɛhene de, ɔfa “nyameɛso Yerusalem” anaa Yerusalem bɔ ɔwɔ anwuro nanwo. Somafoɛ Pɔɔlo hane yenwo dwirɛ kyɛ: “Ɔte yɛ maame.” (Gal. 4:26) Nyameɛso Yerusalem ne yeɛ ole Nyameɛ ahyehyɛdeɛ bɔ ɔwɔ anwuro, bɔ abɔfo bɔ bedi nahorɛ yeɛ bɛwɔ nu ne. Ye mmaamɔ yeɛ ole Yesu ne Kristofoɛ 144, 000 bɔ bafa honhom krongron bapopa bɛ ne. Bɛ koso bele anyelasoɛ kyɛ bɛkɔhɔ anwuro tekyɛ Pɔɔlo. Bɛ yeɛ bele “maen krongron,” “Yisrael bɔ ɔte Nyameɛ deɛ ne.”—1 Pet. 2:9; Gal. 6:16.

Nyameɛso Yerusalem ne, atee beni aso yeɛ ‘odwɔsole’ na ‘ɔtale hyireinn’ ɔ? Ye mmaamɔ bɔ bafa honhom bapopa bɛ, bɔ bɛwɔ aseɛ so ne yeɛ ɔnate bɛso yɛle sɔ ɔ. Ɛmɔma yɛnea kyɛbɔ bɛ dwirɛ ne, ɔne ngɔmhyɛ bɔ ɔwɔ Yesaya yeti 60 ne te ko ɔ.

Asomafoɛ nemɔ wue si ne, né odikyɛ Kristofoɛ bɔ bafa honhom bapopa bɛ ne “dwɔso.” Ofikyɛ ne ngondombo soen akata nahorɛ soen so maa bahɔ awosii nu kyɛbɔ né bahyɛ yenwo ngɔm ne. (Mat. 13:​37-43) Ɛhene maa bɛɛyɛle ngoaa bɛmane Babilɔn Pirikua, bɔ ogyi berɛ ma ewiase mukoraati ngondombo soen ahyehyɛdeɛ ne. Ɛhe hɔle so tonn oodwuli “ewiase ayieleɛ” mmerɛ, bɔ ɔhyɛle yebo afoɛ 1914 ne. (Mat. 13:​39, 40) Ɛhene si ne, wangyɛ biala yeɛ belɛle bɛnwo befili sɔ ngoasom nanu wɔ afoɛ 1919 nu ɔ. Ɔwale sɔ ne, bɛyerele bɛnwo bɛyɛle asɛnga adwuma ne, na bɛnate ɛhene aso bɛtale hyireinn.a Ofi sɔ mmerɛ ne, mmenia bɔ befi maen mukoraati so yeɛ banwu sɔ kanea ne ɔ. Bɛbɔ bɛte Nyameɛ Yisrael nanufoɛ bɔ baha ne koso bokaso. Bɛ yeɛ Yesaya 60:3 ka bɛnwo dwirɛ kyɛ bɛte “ahemvo mɔ” ne.—Nye. 5:​9, 10.

Kristofoɛ bɔ bafa honhom bapopa bɛ ne, kyẽabie Yehowa kɔmaa bɛkɔta paa. Atee beni aso? Sɛ bewu na bɛkɔ anwuro a, bɛkɔɔboka “Yerusalem foforɛ” anaa Kristo atɔmvorɛ braa bɔ yeɛ ole 144, 000 bɔ bɛte ahemvo ne asɔfo naso. Sɔ Yerusalem foforɛ ne, ofi Nyameɛ berɛ wɔ nyameɛso anaa anwuro yeɛ odwu ba ɔ.—Nye. 14:1; 21:​1, 2, 24; 22:​3-5.

Yerusalem foforɛ ne kɔmaa ngɔmhyɛ bɔ ɔwɔ Yesaya 60:1 ne kɔwa nu paa. (Fa Yesaya 60:​1, 3, 5, 11, 19, 20 toto Nyekyire 21:​2, 9-11, 22-26 nanwo.) Tete ne, Yerusalem yeɛ né ahemvo nemɔ tena bu Yisrael maen ne ɔ. Sɔ ala yeɛ Yerusalem foforɛ ne koso, Kristo nate so koli ewiase foforɛ naso ɔ. Yede sɛɛ yeɛ Yerusalem foforɛ ne, ofi Nyameɛ berɛ wɔ nyameɛso odwu ba ɔ? Yeɛ ole kyɛ ɔkɔyɛ nningyein biemɔ bɔ ɔkɔboka bɛbɔ bɛwɔ aseɛ so ne ɔ. Mmenia bɔ befi maen mukoraa so ne, ‘bɛkɔnate ye kanea ne anu,’ na bɛkole bɛ bekofi bɔne ne ewue sa nu po. (Nye. 21:​3, 4, 24) Sɛ ɔba sɔ a, okyire kyɛ ‘bahyehyɛ nningyein amukoraa foforɛ,’ kyɛbɔ Yesaya ne adiyifoɛ nemɔ hyɛle yenwo ngɔm ne. (Aso. 3:21) Sɔ nikyee ne hyɛle yebo mmerɛ bɔ Kristo ɔɔyɛle ɔhene ne, na ɔkɔtoa nu koodwu Afoɛ Apee Ahennie ne ayieleɛ.