Ɛmɔhyɛ Yehowa Animnyam

1. Mmeni pee bɔ bɛwɔ berɛ ɛnnɛ ne, nzu yeɛ yenwo hia bɛ paa ɔ?

ƐNNƐ mmeni pee ndwene sona nwo, na mmom dumaa bɔ bekole ne, ɛhene yeɛ ohia bɛ ɔ. Ebie yeɛ ole kyɛ, benu biemɔ nate sohyia midia so fa nningyein bɔ bahora bayɛ ne hoahoa bɛnwo. Ɛhene ati, mmenia kãa bie yeɛ bɛhyɛ Yehowa animnyam ɛnnɛ ɔ. Sɛ bɛkã kyɛ ebie hyɛ Yehowa animnyam a, okyire sɛɛ, na nzu yeɛ odikyɛ ɔmaa yɛyɛ sɔ ɔ? Yekosusu ɛhe anwo wɔ adesua he anu. Yekosa yɛkɔnea kyɛbɔ yɛkɔfa animnyam bɔ ɔfata Nyameɛ ne yɛkɔma ye, ɔne kyɛbɔ ye bɔbɔ ɔkɔhyɛ ye dumaa ne animnyam ɛlɛsaen ye ala ɔ.

SƐ BƐKÃ KYƐ YƐHYƐ YEHOWA ANIMNYAM A, OKYIRE SƐƐ?

2. Sɛɛ yeɛ Yehowa yele ye animnyam ali wɔ Sinai Bokaa so ɔ? (Nea foto bɔ ɔwɔ Ɛwɛnelɛ Waen ne nyunu ne koso.)

² Sɛ bɛkã animnyam a, yeɛ ole nzu? Wɔ Bible nanu ne, edwirɛ “animnyam” kora kyire nikyeebiala bɔ ebie kɔyɛ kɔfa kole dumaa ɔ. Yehowa yele Yisraelfoɛ nemɔ fili Egpyt ngoasom nu mmerɛ kãa bie si ne, ɔyɛle nikyeebie maa benwuni ye animnyam. Wɔde nea bɔ ɔhɔle so ɔ: Né Yisrael maen ne aboa bɛnwo noa wɔ Sinai Bokaa nwo kyɛ bɛbaatie Nyameɛ noanu dwirɛ. Afei komapɛ, munungum ɔɔkatale bokaa naso mukoraati. Wangyɛ biala aseɛ wosole, na see ne nwosina pukye fili bokaa naso. Ye si ne, ewienu bɔle frɛlɛfrɛlɛ, agralaa bobɔle nu kurudududu, na né totorobɛndo ne koso teanu serɛserɛ. (Ɛks. 19:​16-18; 24:17; Edw. 68:8) Mmerɛ bɔ Yehowa yele ye animnyam ali hyirele bɛ wɔ sɔ atee naso ne, Yisraelfoɛ nemɔ nwo dwirili bɛ paa.

3. Nzu yeɛ yɛyɛ a, okyire kyɛ yɛhyɛ Yehowa animnyam ɔ?

³ Mmenia kɔhora kɔhyɛ Yehowa animnyam. Atee beni aso? Yeɛ ole kyɛ, yɛkɔhã tumi bɔ Yehowa le ye, ɔne ye subaen bɔ ɔyɛ nyemene nanwo dwirɛ yekohyire mmenia. Nningyein bɔ Nyameɛ aboka yɛ maa yahora yayɛ ne koso, odikyɛ yɛfa yenwo animnyam yɛma ye. (Yes. 26:12) Mmenia bɔ bɛhyɛle Yehowa animnyam paa ne, benu kõ yeɛ ole Ɔhene Dawide. Mbaeɛ bie bɔ ɔbɔle ye wɔ Yisrael asafo ne mukoraati nyunu ne, ɔhane kyɛ: “Ao AWURADE, ɛte piri, na tumi, animnyam, ngonimlilɛ ne ahennie nu animnyam te wɔ deɛ, ofikyɛ anwuro ne aseɛ so nningyein amukoraa bɛte wɔ deɛ.” Mmerɛ bɔ oyiele ye mbaeɛ ne, “mmenia amukoraa bɔ babɔ dwaa ne, bɛyele AWURADE ayɛ.”—1 Abe. 29:​11, 20.

4. Sɛɛ yeɛ Yesu hyɛle Yehowa animnyam ɔ?

⁴ Mmerɛ bɔ né Yesu wɔ aseɛ so ne, ɔmaa mmenia nwuni kyɛ Yehowa yeɛ wama ye tumi bɔ ɔfa yɛ nzɛngyerɛnneɛ ɔ. Ɔnate ɛhene aso hyɛle Yehowa animnyam. (Mak. 5:​18-20) Afei koso, Yesu nate bɔ ɔhã fale Yehowa nwo, ɔne subaen bɔ ɔlale ye ali hyirele mmenia naso hyɛle ye animnyam. Mmerɛ bie, né Yesu kyirekyire mmenia wɔ eyialɛ sua bie nu. Bɛbɔ ne betie ne, ne braa bie bɔ sunzummɔne aha ye afoɛ 18 boka so. Né sunzummɔne ne amaa ye nu akondo bɔ ɔngora ye nu tengyɛ po ɔ, na né ɔfɛ paa! Yenwo yɛle Yesu anwumvo, yeti ɔhɔle yenwo berɛ na ɔhahyirele ye kyɛ: “Mmobraa, wɔ nwo asande wɔ afi w’anwonyerɛ ne anu.” Afei ɔfale ye sa guale ye so, na ɛberɛ ne ala ye nu tengyɛle, “na ɔyele Nyameɛ ayɛ” kyɛ wasa ye anwonyerɛ ɔ. (Luka 13:​10-13) Sɔ braa ne nyane bɔ ne okogyina so kɔhyɛ Yehowa animnyam ɔ, na sɔ ala yeɛ yɛ koso yɛkɔhora yɛkɔyɛ ɔ.

NZU YEƐ ƆMAA YƐHYƐ YEHOWA ANIMNYAM Ɔ?

5. Nningyein benimɔ ati yeɛ yebu Yehowa ɔ?

⁵ Yɛhyɛ Yehowa animnyam ofikyɛ yebu ye paa. Bɔ yeti yeɛ yebu Yehowa yeɛ ole kyɛ, ole tumi paa, na ɔkora fa yɛ bɔ okuro biala. (Edw. 96:​4-7) Nningyein bɔ wabɔ ne koso maa yenwu ye kyɛ ɔse nworɛ paa. Ye yeɛ wama yɛ ngoa ɔ, na ɔnate ye so yeɛ yɛte ase ɔ. (Nye. 4:11) Afei koso odi nahorɛ. (Nye. 15:4) Nikyefee nne berɛ bɔ ɔngora ye yɛ ɔ, na odi ye bɔhyɛ so mmerɛ biala. (Yos. 23:14) Ɛhene ati, diyifoɛ Yeremia hane yenwo dwirɛ kyɛ: “Amaenmaenso nworɛfoɛ amukoraa nu, yeɛ b’ahennie amukoraa nu, ebiala nne berɛ bɔ ɔte kyɛ wɔ ɔ”! (Yer. 10:​6, 7) Amba, yele nningyein pee bɔ yeti odikyɛ yebu yɛ Baba bɔ ɔwɔ anwuro ne ɔ. Nná ɛhene ngome, na mmom yesa yekuro ye dwirɛ.

6. Nzuati yeɛ yɛdɔ Yehowa ɔ?

⁶ Yɛdɔ Yehowa, yeti yɛhyɛ ye animnyam. Subaen ahoroɛ bɔ ɔmaa yɛdɔ Yehowa ne, ɛmɔma yɛnea bie. Ɔse anwumvoin. (Edw. 103:13; Yes. 49:15) Sɛ yɛfa ɔhaw nu koso a, ɔyɛ ye yea. (Sak. 2:8) Ɔma yɛ atee maa yepingye ye, na yɛkora yɛfa ye adamvoa. (Edw. 25:14; Aso. 17:27) Afei koso, ɔbrɛ yenwo ase, ofikyɛ ‘ɔbere ye nye ase nea ewienu ne aseɛ so, na ɔma ehianiɛ so fi mvuturo nu.’ (Edw. 113:​6, 7) Yeti, nwa paa yeɛ onguro kyɛ ɔkɔhyɛ yɛ Nyameɛ bɔ ɔte piri ne animnyam ɔ?—Edw. 86:12.

7. Yenwo atee pirikua beni yeɛ yele ye ɔ?

⁷ Yɛpena kyɛ mmenia nwu Yehowa, yeti yɛhyɛ ye animnyam. Mmeni pee nze nahorɛ bɔ ɔfa Yehowa nwo ɔ. Nzuati ɔ? Ofikyɛ Satan akekã edwirɛ pee bɔ ɔtte nahorɛ wafa Yehowa nwo maa bale bali. (2 Kor. 4:4) Wamaa mmenia anya adwene kyɛ Yehowa mva bɔne ngyɛ, ɔndwene sona nwo, na amaneɛ bɔ yenwu ye ne, pee nala fi ye. Nakoso, yɛde yɛse nahorɛ dwirɛ bɔ ɔfa Nyameɛ nwo ɔ, na yɛpena kyɛ yɛkã yekyire mmenia yɛfa yɛhyɛ ye animnyam! (Yes. 43:10) Edwein 96 ne kã kyɛbɔ yɛkɔhyɛ Yehowa animnyam nanwo dwirɛ. Mmerɛ bɔ yesusu nu dwirɛ biemɔ nwo ne, nea atee ahoroɛ bɔ ɛkɔhora kɔfa so kɔfa animnyam bɔ ɔfata Yehowa ne kɔma ye ɔ.

YƐKƆYƐ SƐƐ NÉ YAFA ANIMNYAM BƆ ƆFATA YEHOWA NE YAMA YE?

8. Atee kõ beni yeɛ yɛkɔhora yɛkɔfa so yɛkɔhyɛ Yehowa animnyam ɔ? (Edwein 96:​1-3)

⁸ Kenga Edwein 96:​1-3. Yɛkɔhora yɛkɔfa bɔ yɛkã yɛfa Yehowa nwo naso yɛkɔhyɛ ye animnyam. Sɔ tworɔnzɛm ne kã kyire bɛbɔ bɛsõ Yehowa ne kyɛ, ‘bɛto dwein bɛye AWURADE ayɛ,’ ‘bɛhã ye ngoalelɛ nwo dwirɛ daa biala,’ na ‘bɛbɔ ye animnyam nwo dawure wɔ maen maen mɔ so.’ Ɛhe mukoraati te atee bɔ yɛkɔhora yɛkɔfa so yɛkɔhyɛ yɛ Baba bɔ ɔwɔ anwuro ne animnyam ɔ. Yudafoɛ bɔ ne bedi nahorɛ, ɔne Kristofoɛ bɔ né bɛwɔ asomafoɛ nemɔ aberɛ so ne, bɛhane nningyein pá bɔ Yehowa ayɛ ama bɛ, ɔne ye subaen ahoroɛ nanwo dwirɛ behyirele mmenia. (Dan. 3:​16-18; Aso. 4:29) Yɛkɔyɛ sɛɛ ne yɛ koso yayɛ sɔ?

9-10. Nzu yeɛ asua afi Angelena dwirɛ nanu ɔ? (Nea foto ne koso.)

⁹ Aliemaa brasua bie wɔ United States, na bɛfrɛ ye Angelena.a Ɛmɔma yɛnea bɔ ɔyɛle ɔ. Onyane akokoduro hyɛle Yehowa animnyam wɔ adwuma nu. Adwumakue ne yɛle nhyehyɛɛ ma adwumayɛfoɛ namu beeyiale nu. Wɔ nhyiamu nabo ne, bɛhane kyɛ bɛbɔ bawa adwuma nanu foforɛ ne, ebiala hã ye asetena nu dwirɛ kãa ohyire adwumayɛfoɛ nemɔ. Né Angelena boka bɛbɔ bawa foforɛ naso, yeti ɔyɛle ye adwene kyɛ sɛ odwu ye so a, nningyein biemɔ bɔ wahɔso wɔ Yehowa soen nu bɔ ɔmaa yenye gyele ne, ɔkɔfa yenwo foto kohyire bɛ. Nakoso, sona bɔ befi ye so a, né bɛba Angelena so ne, ɔhane kyɛ né ɔte Yehowa Danzeniɛ, nakoso bɛ subaen mmɔne ti, wayakyi. Afei ɔhyɛle yebo kyɛ ɔgoro Yehowa Adanzefoɛ nwo. Angelena hane kyɛ: “Ɔwale sɔ ne, mekunu tetele me paa. Nakoso, ngane ye wɔ metianu kyɛ: ‘Aso ngɔhã menoa ngɔtonu maa ebie kɔsɛkye Yehowa dumaa, anaa ngodwudwo ngɔfa ngɔte ye dumaa nanwo?’”

¹⁰ Sona ne noa pene ne, Angelena bɔle mbaeɛ tikaape wɔ yetianu. Afei ɔfale ndoboaseɛ hahyirele ye kyɛ: “Wɔ dwirɛ ne pena ne me deɛ ne yɛ kõ. Me koso bɛtetele me kyɛ Yehowa Danzeniɛ tekyɛ wɔ ala. Na ɔbaadwu ɛnnɛ po, ndɛ te Yehowa Danzeniɛ.” Bɔ sona ne yɛle ne, ahaa ɔkɔhora kɔmaa Angelena kɔfɛ yaa, nakoso wanyɛ sɔ. Na mmom, foto ahoroɛ bɔ ɔne aliemaa biemɔ pɛle bɔ ne bɛnye agye ne, ɔfale bie hyirele bɛ. Afei, ofili anwobrɛaseɛ nu hane ye gyidie nwo dwirɛ hyirele bɛ. (1 Pet. 3:15) Yede, nzu yeɛ ofili nu wale ɔ? Angelena dwudwo yiele ne, ye mmango adwumayɛniɛ ne yakyili bɔ né ɔkekã ne. Na ɔhane nningyein biemɔ po bɔ ɔmaa yenye gyele mmerɛ bɔ né ɔte Yehowa Danzeniɛ nanwo dwirɛ. Angelena hane kyɛ: “Odikyɛ yɛte Yehowa dumaa nanwo, na ɔte yenwo atee bɔ yanya kyɛ yɛkɔyɛ sɔ ɔ.” Yɛ koso odikyɛ yɛhyɛ Yehowa animnyam, mmerɛ bɔ mmenia gua ye nyunu ase ne.

11. Edwirɛ bɔ ɔwɔ Edwein 96:8 ne, nzu yeɛ Yehowa asomvoɛ ayɛ afa ali so ɔ?

¹¹ Kenga Edwein 96:8. Ɛkɔhora kɔfa w’anwonyadeɛ kɔhyɛ Yehowa animnyam. Yehowa asomvoɛ fa b’anwonyadeɛ bɛhyɛ ye animnyam. (Any. 3:9) Yisraelfoɛ nemɔ sɔa, mmerɛ bɔ né besi asɔre awuro ne, ɔne siɛ ye bɔ né besiesie ne, bɛfale b’anwonyadeɛ bɛbokale. (2 Ahe. 12:​4, 5; 1 Abe. 29:​3-9) Yesu Kristo koso, ye asuafoɛ nemɔ bie fale nningyein “bɔ bele ye” ne bie sõne ɔne ye asomafoɛ nemɔ. (Luka 8:​1-3) Asomafoɛ nemɔ aberɛ so koso, Kristofoɛ biemɔ fale bɛ sikaa bɛɛbokale aliemaamɔ bɔ né bɛnwo ahyere bɛ ne. (Aso. 11:​27-29) Ɛnnɛ koso, yɛkɔhora yɛkɔye ndoboa yɛkɔfa yɛkɔhyɛ Yehowa animnyam.

12. Ndoboa bɔ yɛye ne, sɛɛ yeɛ ɔhyɛ Yehowa animnyam ɔ? (Nea foto ne koso.)

¹² Ɛmɔma yɛnea suahu bie bɔ ɔmaa yenwu kyɛ, ndoboa bɔ yɛye ne, ɔhyɛ Yehowa animnyam ɔ. Wɔ 2020 afoɛ nanu ne, wawa bie pene wɔ Zimbabwe maen nanu, na ɔhyɛle paa. Ɛhene fale ɛhɔen pirikua bie wale, yeti né mmeni pee nnya aleɛ nni. Ne aliemaa brasua bie bɔ bɛfrɛ ye Prisca boka sɔ mmenia naso. Mmerɛ bɔ né mmenia nye aboro befundam b’aseɛ ne, Prisca de, Mmenaa ne Yáa biala né ɔfa kɔ asɛnga. Mmerɛ bɔ ye mandanu berɛfoɛ nemɔ nwuni ye sɔ ne, bɛgorole yenwo kyɛ, “Bɔ ɛyɛ ye de, ɛhɔen baahũ wɔ maa ewu.” Bɛkã sɔ a, né ye koso wahã wahyire bɛ kyɛ, “Bɛbɔ bɛsõ Yehowa ne, olilli bɛ hwamɔ lle.” Ɛhene si ne wangyɛ biala, aleɛ bɔ asafo ne kyekyɛ ma aliemaamɔ bɔ bɛnwo ahyere bɛ ne, ye koso bɛmane ye bie. Ndoboa bɔ yɛye ne, yeɛ ɔmaa sɔ nhyehyɛɛ ne kora yɛ yé ɔ. Aleɛ bɔ yesa hane ne, ɔyɛle ye mandanu berɛfoɛ nemɔ nwanwa, yeti bɛhã behyirele ye kyɛ, “Nyameɛ anni wɔ hwamɔ amba. Yeti yɛpena kyɛ yesua yenwo nikyee pee.” Benu nzoo hyɛle yebo hɔle adesua.

13. Yɛkɔyɛ sɛɛ né yafa y’abrabɔ yahyɛ Yehowa animnyam? (Edwein 96:9)

¹³ Kenga Edwein 96:9. Yɛkɔhora yɛkɔfa y’abrabɔ yɛkɔhyɛ Yehowa animnyam. Asɔfo bɔ né bɛsõ wɔ Yehowa asɔre awuro berɛ ne, né odikyɛ benwunzi bɛnwo maa bɛnwo te. (Ɛks. 40:​30-32) Nakoso bɔ yenwo hia paa yeɛ ole kyɛ, ebie kɔmaa ye abrabɔ nwo kɔte ɔ. (Edw. 24:​3, 4; 1 Pet. 1:​15, 16) Odikyɛ yegyi “subaen daa” ne yegua, na yenya “sona sue foforɛ.” Ɛhene kyire kyɛ, yɛkɔyakyi abrabɔ ne subaen biala bɔ Yehowa nye ngye yenwo ne, na yafa yɛ nneyɛɛ ne yɛ nzuzuleɛ yahyire kyɛ yesuesua ye subaen bɔ ɔyɛ nyemene ne. (Kol. 3:​9, 10) Bɛbɔ b’abrabɔ asɛkye koraa ne po, Yehowa kɔhora kɔboka bɛ maa bekonya sona sue foforɛ ne bie.

14. Nzu yeɛ asua afi Jack dwirɛ nanu ɔ? (Nea foto ne koso.)

¹⁴ Ɛmɔma yɛnea biaa bie bɔ bɛfrɛ ye Jack. Né ɔte ebie bɔ odi nzɛmmɔne bɔ yenwo yɛ suro paa ɔ. Ɛhene ati né mmenia frɛ ye Abɔnzam. Ɔnate sɔ subaen bɔ né ɔwɔ nu nati, kɔɔt buale ye kɔmfɔ. Aliemaa bie hɔle prisa berɛ kyɛ ɔkwaahã nzɛmba ne, na Jack penene so kyɛ ɔne ye kosua Bible ne. Jack hora yɛle nzakrayɛɛ, ɔmva yenwo ne abrabɔ bɔ ne ɔwɔ nu ne, na yesi ne, ɔbɔle asu. Ɔnate kyɛbɔ né Jack asesã ye subaen nati, kyẽa bɔ né bɛkwaahũ ye ne, bɛbɔ bɛnea prisa berɛ nanu biemɔ suni mmerɛ bɔ bɛne ye di ngraa ne. Polisiniɛ kõ bɔ ɔwɔ prisa berɛ hane kyɛ: “Jack yeɛ ne yenwo yɛ suro wɔ wa paa ɔ, nakoso kesaalae de, wayɛ sona pá.” Behuni Jack ye dapɛen si ne, aliemaamɔ bɛɛyɛle asafo nhyiamu wɔ prisa berɛ. Prisafoɛ nanu ko hɔle adesua ne bie mmerɛ bɔ olimoa koraa ɔ. Nzu yeɛ ɔmaa ɔhɔle bie ɔ? Kyɛbɔ Jack hora sesane ye subaen ne, ɛhene yeɛ opusuli ye ɔ. Né ɔpena kyɛ onwu bɔ odikyɛ ɔyɛ na wahora wasõ Yehowa ɔ. Amba, yɛkɔhora yɛkɔfa y’abrabɔ so yɛkɔhyɛ Yehowa animnyam!—1 Pet. 2:12.

SƐƐ YEƐ YEHOWA KƆHYƐ YE DUMAA NE ANIMNYAM ƐLƐSAEN ALA Ɔ?

15. Sɛɛ yeɛ Yehowa kɔhyɛ ye dumaa ne animnyam ɛlɛsaen ala ɔ? (Edwein 96:​10-13)

¹⁵ Kenga Edwein 96:​10-13. Edwein 96 nanu dwirɛ bɔ ɔpɛ yebo ne, ɔmaa yenwu kyɛ Yehowa te Ɔhene ne ndɛenbualɛniɛ bɔ obua ndɛen turoloo ɔ. Yede, sɛɛ yeɛ Yehowa kɔhyɛ ye dumaa ne animnyam ɛlɛsaen ala ɔ? Ɔnate ye ndɛenbualɛ bɔ ɔfa ba naso yeɛ ɔkɔyɛ sɔ ɔ. Ɔngɔhyɛ ɔkɔsɛkye Babilɔn Pirikua bɔ wagua ye dumaa nanwo fiɛ ne. (Nye. 17:​5, 16; 19:​1, 2) Sɛ bɛsɛkye Babilɔn Pirikua ne beyie a, ebiaa ebiemɔ kɔɔboka yɛ so maa yɛkɔsõ Yehowa. Ayieleɛ koraa ne, Yehowa nate Amagedon so kɔsɛkye Satan wiase ne, ɔne bɛbɔ bedwɔso betia ye, ná bɛsɛkye ye dumaa ne mukoraati. Nakoso bɛbɔ bɛdɔ ye, bɛyɛ sotie bɛma ye, na bɛhyɛ ye dumaa ne animnyam ne de, okole bɛ ngoa. (Mak. 8:38; 2 Tɛs. 1:​6-10) Kristo Afoɛ Apee Ahennie ne ayieleɛ ne, nzɔhwɛ bɔ ɔpɛ yebo ne kɔwa, na oodwu sɔ mmerɛ ne, né Yehowa ate ye dumaa nanwo koraa. (Nye. 20:​7-10) Sɔ mmerɛ ne, ‘Yehowa animnyam nwo nimdeɛ koyi aseɛ so tɛkyɛ, kyɛbɔ nzue ayi ɛpo nu tɛkyɛ ne.’—Hab. 2:14.

16. Nzu yeɛ asi wɔ hue kyɛ ɛkɔyɛ ɔ? (Nea foto ne koso.)

¹⁶ Mmerɛ bɔ ebiala kɔfa animnyam bɔ ɔfata Yehowa dumaa ne kɔma ye ne, nea kyɛbɔ yɛnye kosi kɔgye ɔ! Nakoso, kodwu kyɛ sɔ mmerɛ ne kɔwa ne, ɛmɔma yɛ nu biala yɛ bɔ ɔkɔhora biala kyɛ ɔkɔhyɛ Nyameɛ animnyam ɛnnɛ. Bɔ ɔkɔyɛ né yɛ wora amvi sɔ dwirɛ bɔ yenwo hia he ne, Akwangyerɛ Kue ne aye edwirɛ bɔ ɔwɔ Edwein 96:8 ne kyɛ 2025 afoɛnoa dwirɛ. Ɛberɛ nwa: “Ɛ́mɔfa animnyam bɔ ɔfata AWURADE dumaa ɔ bɛma ye.”