ADESŨA 2
DWEIN 132 Yɛayɛ Baako
Huɛmɔ, Ɛmɔfa Anidie Bɛma Bɛyemɔ
‘Huɛ mɔ, ɛ́mɔfa anidie bɛ́ma ɛmɔ aye mɔ.’—1 PET. 3:7.
BƆ ADESŨA NE KƆHÃ YENWO DWIRƐ Ɔ
Yekonwu kyɛbɔ brienzua bie kɔhora kɔfa yenoa dwudwolɛ, ɔne ye nneyɛɛ so kohyire kyɛ ɔfa anidie ma ɔye ɔ.
1. Nikyee kõ beni ati yeɛ Yehowa yɛle agyaa nwo nhyehyɛɛ mane sona ɔ?
YEHOWA te ‘anigye Nyameɛ,’ na ɔpena kyɛ yɛ koso yɛnye gye. (1 Tim. 1:11) Wama yɛ akyɛdeɛ pee bɔ ɔkɔmaa yɛnye kɔgye ɔ. (Yak. 1:17) Sɔ akyɛdeɛ nanu kõ yeɛ ole agyaa. Sɛ brienzua ne brasua gya a, bɛhyɛ bɔ kyɛ bɛkɔla ɔdɔ ne obuo ali bekohyire bɛnwo. Sɛ bɛkɔso bɛdodɔ bɛnwo sɔ a, ɔkɔmaa bɛnye kɔgye paa.—Any. 5:18.
2. Nzu yeɛ mmrienzua pee nala fa di bɛyemɔ ɛnnɛ ɔ?
2 Bɔ ɔyɛ aworabɔ yeɛ ole kyɛ, mmeni pee wɔ berɛ a, ɛbɔ bɔ bɛhyɛle ye ɛlɛho bɔ né begya ne, bɛngora benni so. Ɛhene ati bɛnye ngye. Nhwehwɛmuɛ bɔ animdefoɛ biemɔ ayɛ ye ɛlɛsaen kyire kyɛ, mmrienzua pee bo bɛyemɔ, bɛbɔ b’alapaa, anaa bɛteetee bɛ. Sɔ mmrienzua nemɔ, sɛ bedwu mmenia nu a, bɛyɛ bɛnwo kyɛ bekuro bɛyemɔ dwirɛ, nakoso ɔtte sɔ wɔ awuro. Mmrienzua bɔ bagya ne, benu pee nea ponografi, na ɛhene koso maa bɛyemɔ di yealɛ paa.
3. Nzu yeɛ ɔmaa mmrienzua biemɔ teetee bɛyemɔ ɔ?
3 Nzu yeɛ ɔmaa mmrienzua biemɔ teetee bɛye mɔ ɔ? Ebiaa bɛ baba teeteele bɛ maame paa. Yeti benwu ye kyɛ mvomsoɛ nne yenwo kyɛ bɛ koso bɛkɔyɛ sɔ ɔ. Ebiemɔ koso ɔnate b’amammerɛ ti, bele adwene bie bɔ ɔttemaye ɔ; bɛnwa ɔnzɛkyɛ ɛmaa ɛye fa wɔ so, na mmom ma onwu ye kyɛ wɔ yeɛ ɛte brienzua ɔ. Ebiemɔ wora, kyɛbɔ bɛtetele bɛ nati, wamaa bele ahone paa. Mmrienzua biemɔ koso, daa bɛnea ponografi, na ɛhene amaa banya adwene kyɛ mmrasua de, mvasoɛ bɔ ɔwɔ bɛ so alaa yeɛ ole kyɛ bɛne bɛ kɔla ɔ. Afei koso, nhwehwɛmuɛ kyire kyɛ COVID-19 anwonyerɛ ne wale ne, mmrienzua pee teeteele bɛyemɔ paa. Nakoso, nikyeebiala nne berɛ bɔ ebie kɔhora kogyinaso kɔhã kyɛ ɛhene ati, ɔteetee ɔye ɔ.
4. Kristofoɛ mmrienzua bɔ bagya ne, nzu yeɛ odikyɛ bɛnea bɛnwo yé wɔ yenwo ɔ, na nzuati ɔ?
4 Adwene bɔ ɔttemaye bɔ mmenia le ye wɔ mmrasua nwo ne, odikyɛ Kristofoɛ mmrienzua bɔ bagya ne nea yé na bannya bie.a Nzuati ɔ? Ofikyɛ bɔ sona dwene yenwo ne, ɛhene yeɛ ɔtaa yɛ ɔ. Kristofoɛ bɔ bapopa bɛ bɔ né bɛwɔ Rome ne, somafoɛ Pɔɔlo bɔle bɛ kɔkɔ kyɛ: “Nnɛma ɛmɔyɛ ɛmɔ nwo kyɛ wiase he.” (Rom. 12:1, 2) Sɔ aliemaa nemɔ bɔ Pɔɔlo hworɔle krataa ɔɔmane bɛ ne, ɔkɔyɛ kyɛ né batena asafo nanu bahyɛ paa. Nakoso Pɔɔlo dwirɛ ne maa yenwu kyɛ, né benu biemɔ té suesua ewiase ne. Ɛhene ati yeɛ otuli bɛ foɛ kyɛ bɛsesã b’adwene ne bɛ subaen ne. Ɛnnɛ koso, sɔ afutue ne kɔ ma Kristofoɛ mmrienzua bɔ bagya ne. Aworabɔlɛ dwirɛ yeɛ ole kyɛ, benu biemɔ anya ewiase adwene ne bie, na ɛhene amaa bateetee bɛyemɔ.b Yede sɛ egya braa a, sɛɛ yeɛ Yehowa pena kyɛ ɛne ɛye tena ɔ? Mmuayɛɛ ne wɔ tworɔnzɛm bɔ adesua ne gyi so nanu.
5. Kyɛbɔ 1 Petro 3:7 kã ne, sɛɛ yeɛ odikyɛ brienzua ne ɔye tena ɔ?
5 Kenga 1 Petro 3:7. Yehowa pena kyɛ huɛmɔ fa anidie ma bɛyemɔ. Sɛ bɛkã kyɛ ɛfa anidie ma ebie a, okyire kyɛ ɛyɛ nikyeebie fa kyire kyɛ ebu ye. Brienzua bɔ ɔfa anidie ma ɔye ne, ɔne ye kɔtena ɔdɔ nu, na wahyire kyɛ ɔdwene yenwo. Adesua he anu ne, yɛkɔnea nningyein biemɔ bɔ brienzua bie yɛ a, okyire kyɛ ɔfa anidie ma ɔye ɔ. Nakoso, ɛmɔma yelimoa yɛnea nningyein biemɔ bɔ sɛ ɔyɛ a, okyire kyɛ ɔmva anidie mma ɔye ɔ.
NNƐYƐ NNINGYEIN BƆ ƆKƆMAA ƐYE KƆTEETEE Ɔ
6. Mmrienzua bɔ bɛbo bɛyemɔ ne, adwene beni yeɛ Yehowa le ye wɔ bɛnwo ɔ? (Kolosefoɛ 3:19)
6 Nnɛbo ye. Yehowa kyi ebiala bɔ okuro basabasayɛlɛ ɔ. (Edw. 11:5) Wahã ye pefee kyɛ, yenye ngye yenwo kyɛ mmrienzua kɔteetee bɛyemɔ. (Mal. 2:16; kenga Kolosefoɛ 3:19.) Tworɔnzɛm bɔ adesua ne gyi so bɔ yeɛ ole 1 Petro 3:7 ne, ɔmaa yenwu kyɛ sɛ brienzua bie teetee ɔye a, ɔkɔsɛkye ɔne Yehowa afia. Ebiaa Yehowa ngotie ye mbaeɛ po.
7. Kyɛbɔ Ɛfesofoɛ 4:31, 32 ne kã ne, nzu yeɛ ɔnzɛkyɛ brienzua bɔ wagya ne yɛ ɔ? (Sa nea “Edwirɛ Bie Bɔ Bahyirehyire Nu Ɔ” ne.)
7 Nnɛdwudwo tia ye. Mmrienzua biemɔ wɔ berɛ a, sɛ bɛfɛ bɛyemɔ so yaa a, bɛpɛ bɛ nzoaa paa. Nakoso Yehowa kyi ‘ahonetɛɛ, ɛyaafɛlɛ, basabasayɔlɛ, ɔne musue dwirɛ.’c (Kenga Ɛfesofoɛ 4:31, 32.) Yeti, kyɛbɔ brienzua bie ne ɔye dwudwo wɔ awuro mmerɛ po bɔ ebiala nnwu bɛ ne, yenwo dwirɛ hia Yehowa, ofikyɛ ɔte ye mukoraati. Brienzua bɔ ɔkã edwirɛ yeayea kyire ɔye ne, ɔsɛkye ɔne ɔye afia, na sɔ ala yeɛ ɔsɛkye ɔne Nyameɛ koso afia ɔ.—Yak. 1:26.
8. Adwene beni yeɛ Yehowa le ye wɔ ponografi nwo ɔ, na nzuati ɔ?
8 Nnɛnea ponografi. Adwene beni yeɛ Yehowa le ye wɔ ponografi nwo ɔ? Okyi ye koraa. Yeti sɛ brienzua bie nea ponografi a, okyire kyɛ ommu ɔye, na osa sɛkye ɔne Yehowa afia.d Brienzua bɔ ogya braa ne, Yehowa pena kyɛ odi nahorɛ ma ɔye wɔ ye nneyɛɛ ne ye nzusuleɛ mukoraati nu. Yesu hane kyɛ brienzua bɔ ɔnea brasua foforɛ ná onya akɔnnɔ ma ye ne, wasɛkye agyaa wɔ “ye ahone nu.”e—Mat. 5:28, 29.
9. Sɛ brienzua bie hyɛ ɔye kyɛ ɔyɛ nnaa nu nningyein biemɔ bɔ onguro a, nzuati yeɛ Yehowa kyi ɔ?
9 Nnɛhyɛ ɛye kyɛ ɔyɛ nnaa nu nningyein biemɔ bɔ onguro ɔ. Mmrienzua biemɔ hyɛ bɛyemɔ maa bɛyɛ nnaa nu nningyein biemɔ bɔ brasua ne nguro, anaa ɔmaa onya adwene kyɛ ohũ ne ndwene yenwo ɔ. Yehowa kyi sɔ pɛsɛmangomenya ne atianuserɛ nikyee ne. Ɔpena kyɛ brienzua nya ɔdɔ ma ɔye, ɔfa anidie ma ye, na ɔdwene yenwo. (Ɛfe. 5:28, 29) Yede sɛ brienzua bie yɛ sɔ nningyein bɔ yabobɔ so ne bie a, nzu yeɛ ɔkɔboka ye maa ɔkɔsesã ye subaen ɔ?
BƆ ƆKƆBOKA WƆ MAA ƐKƆSESÃ WƆ SUBAEN Ɔ
10. Bɔ Yesu yɛle ne, sɛɛ yeɛ ɔkɔhora kɔboka huɛmɔ ɔ?
10 Sɔ subaen ahoroɛ bɔ yahã yenwo dwirɛ ne, nzu yeɛ ɔkɔboka brienzua bɔ ogya braa maa ɔkɔhwe yenwo kofi yenwo ɔ? Yeɛ ole kyɛ ɔkɔyere yenwo kosuesua Yesu. Ɔwɔ nu, Yesu angya braa lle de, nakoso huɛmɔ kɔhora kosuesua kyɛbɔ ɔne ye asuafoɛ nemɔ tenane ne, na bɛ koso bɛne bɛyemɔ atena sɔ. (Ɛfe. 5:25) Atee bɔ Yesu fale so ne ye asomafoɛ nemɔ tenane, ɔne kyɛbɔ ɔne bɛ dwudwole ne, wɔ de ɛmɔma yɛnea bɔ huɛmɔ kɔhora kosua kofi nu ɔ.
11. Sɛɛ yeɛ Yesu ne ye asomafoɛ nemɔ tenane ɔ?
11 Yesu ne ye asomafoɛ nemɔ tenane kama, na né obu bɛ. Né ye tianu nyɛ se, na wanhyɛ bɛ so koso. Ɔwɔ nu, né ɔte bɛ Mene ne bɛ Awurade, nakoso wamva tumi bɔ ole ye ne wanwunanwuna bɛ, kyɛbɔ ɔkɔyɛ a bekosuro ye ɔ. Mmom ɔbrɛle yenwo ase, na ɔsõne bɛ. (Yoh. 13:12-17) Ɔhahyirele ye asuafoɛ nemɔ kyɛ: “Ɛ́mɔsua me, ofikyɛ medwo na mebrɛ me nwo ase wɔ ahone nu, na ɛmɔkonya nwomeɛlelɛ bɛkɔma ɛmɔ kra.” (Mat. 11:28-30) Tworɔnzɛm ne hane kyɛ Yesu dwo. Nakoso sɛ ebie dwo a, ongyire kyɛ ɔyɛ fo, na mmom okyire kyɛ ɔkora hyɛ yenwo so. Sɛ ebie yɛ nikyee maa ɔfɛ yaa po a, ɔto yeboase, na ɔnyɛ nikyeebiala bɔ ɔttemaye ɔ.
12. Sɛɛ yeɛ Yesu dwudwo hyirele mmenia ɔ?
12 Yesu fale yenoa dwudwolɛ kyekyele mmenia wora, na ɔmaa b’ahone tɔle bɛ kunu. Bɛbɔ né beli yesi ne, ɔne bɛ dwudwole aboterɛ so. (Luka 8:47, 48) Mmerɛ bɔ ye pɔfoɛmɔ yɛle nikyeebie bɔ ahaa ɔkɔmaa ɔkɔfɛ yaa, ná bɛbɔle ye alapaa po ne, “wangakyi wamma bɛ.” (1 Pet. 2:21-23) Odwu mmerɛ bie koso a né omua yenoa, kyɛbɔ ɔkɔyɛ a ɔngɔhã edwirɛ bie bɔ ɔttemaye ɔ. (Mat. 27:12-14) Ɛhe te nneasoɛ kama bɔ huɛmɔ kɔhora kosuesua ɔ.
13. Kyɛbɔ Mateo 19:4-6 kã ne, nzu yeɛ brienzua bie yɛ a, okyire kyɛ wafa ‘yenwo wabata ɔye nwo’ ɔ? (Nea foto ne koso.)
13 Yesu tuli huɛmɔ foɛ kyɛ beli nahorɛ bɛma bɛyemɔ. Ɔhane edwirɛ bɔ ye Baba hane ne bie kyɛ, odikyɛ brienzua ‘fa yenwo bata ɔye nwo.’ (Kenga Mateo 19:4-6.) Greek dwirɛ “fa yenwo bata,” bɔ bɛfa bɛyɛle adwuma wɔ wa ne, bɔ okyire yeɛ ole kyɛ ɛfa gluu sɔ nikyeebie mata so ɔ. Yeti abusuabɔ bɔ ɔla brienzua ne ɔye afia ne, odikyɛ nu yɛse paa tekyɛ bɔ bafa gluu basɔ nikyeebie ne. Ɛhene ati, sɛ benu ko yɛ nikyeebie bɔ ɔttemaye a, ɔkã bɛ munyɔ namu. Brienzua bɔ ɔne ɔye afia te sɔ ne, ɔngɔnea ponografi. Yeti “nningyein bɔ mvasoɛ nne so” ne, sɛ yenye bɔ so a, ɔkɔye yenye ndɛ. (Edw. 119:37) Atee bie aso ne, ɔne yenye ayɛ apam, kyɛbɔ ɔkɔyɛ a ongonya akɔnnɔ ngɔma brasua foforɛ bɔ ɔtte ɔye ɔ.—Yob 31:1.
Brienzua bɔ odi nahorɛ ma ɔye ne, ɔngɔnea ponografi ( Nea ngyekyɛmuɛ 13)g
14. Brienzua bɔ ɔteetee ɔye ne, nningyein benimɔ yeɛ odikyɛ ɔyɛ fasiesie ɔne Yehowa ne ɔye afia ɔ?
14 Brienzua bɔ ɔbo ɔye anaa ɔbɔ ye alapaa ne, odikyɛ ɔyɛ nningyein biemɔ fasiesie ɔne Yehowa ne ɔye afia. Sɔ nningyein nemɔ yeɛ ole beni? Bɔ olimoa, odikyɛ odé to nu kyɛ ole haw paa, ofikyɛ Yehowa nwu bɔ ɔyɛ ne mukoraati. (Edw. 44:21; Nwo. 12:14; Heb. 4:13) Bɔ ɔtɔ so nyɔ, odikyɛ ɔsesã ye subaen, ná ɔyakyi bɔ ɔ́fa yɛ ɔye ne. (Any. 28:13) Bɔ ɔtɔ so nza, ɔkɔpa Yehowa ne ɔye ne kyerɛ, ná wasrɛ bɛ kyɛ bɛfa ye bɔne bɛhyɛ ye. (Aso. 3:19) Odikyɛ ɔsrɛ Yehowa kyɛ ɔboka ye ma ɔsesã ye subaen, kyɛbɔ ɔkɔyɛ a ye nzusuleɛ, ye nneyɛɛ, ɔne yenoa dwudwolɛ kɔsɔ yenye ɔ. (Edw. 51:10-12; 2 Kor. 10:5; Flp. 2:13) Bɔ ɔtɔ so nna, odikyɛ ɔyɛ ye mbaeɛ nanwo adwuma, na ɔyakyi basabasayɛlɛ ne edwirɛ yeayea bɔ ɔkekã ne. (Edw. 97:10) Bɔ ɔtɔ so nnu, odikyɛ ɔpena mmokalɛ fi asafo nu mbanyi nemɔ berɛ ndɛ. (Yak. 5:14-16) Bɔ ɔtɔ so nzia, odikyɛ ɔyɛ nhyehyɛɛ bɔ ɔkɔboka ye kyɛbɔ ɔkɔyɛ a, ɔngɔhɔ sɔ subaen nanwo kõ ɔ. Huɛ bɔ ɔnea ponografi ne koso, odikyɛ ɔyɛ sɔ nningyein hemɔ ala. Sɛ ɔyɛ sɔ a, Yehowa koso kɔboka ye maa ɔkɔsesã ye subaen. (Edw. 37:5) Nakoso sɛ brienzua bie yakyi kyɛ ɔteetee ɔye a, né oyielle, na mmom odikyɛ ɔyɛ nningyein biemɔ koso fakyire kyɛ ɔfa anidie ma ye. Yede ɔkɔyɛ sɛɛ né wahora wayɛ sɔ?
KYƐBƆ ƐKƆFA ANIDIE KƆMA ƐYE Ɔ
15. Brienzua bie kɔyɛ sɛɛ né wamaa ɔye anwu ye kyɛ okuro ye?
15 Ma ɛye nwu ye kyɛ ekuro ye. Aliemaa biemɔ bɔ b’agyaa aso ne, kyẽa biala bɛyɛ nikyeebie bɔ ɔkɔmaa bɛye konwu kyɛ bekuro ye ɔ. (1 Yoh. 3:18) Nningyein mmaammaa biemɔ bɔ brienzua bie yɛ a okyire kyɛ okuro ɔye ne, ebie yeɛ ole kyɛ ɔkɔsɔ yesa, anaa ɔkɔyɛ ye atuu. Ɔkɔhora koso kɔsɛnde ye tɛs mɛsege biemɔ tekyɛ, “Me wora adɔ wɔ,” anaa “Nningyein kɔ sɛɛ?” Ɔwɔ nu alaa a, ɔkɔhora kɔhworɔ edwirɛ bie bɔ ɔyɛ fɛ kogua krataa so kɔma ye, anaa ɔkɔtɔ nikyeebie bɔ okuro kɔma ye. Sɛ brienzua bie yɛ sɔ nningyein hemɔ a, okyire kyɛ ɔfa anidie ma ɔye ne, na ɛhe kɔmaa b’agyaa ne koso.
16. Nzuati yeɛ odikyɛ brienzua bie kamvo ɔye ɔ?
16 Sɛ ɔyɛ nikyee ma wɔ a, da ye ase. Brienzua bɔ ɔfa anidie ma ɔye ne, ɔkamvo ye, na ɔhyɛ ye ngunaen koso. Atee ko bɔ ɔfa so yɛ sɔ yeɛ ole kyɛ, nningyein bɔ ɔyɛ fa boka ye ne, ɔkɔkae kyɛ ɔkɔla ye ase mmerɛ biala. (Kol. 3:15) Sɛ brienzua bie fi ye ahone nu kamvo ɔye a, ɔmaa brasua ne nye gye paa. Asa koso, ɔmaa yetianu yɛ ye fɛ, onwu ye kyɛ ye so le mvasoɛ, na ohu ne bu ye.—Any. 31:28.
17. Nzu yeɛ brienzua bie yɛ a, okyire kyɛ obu ɔye ɔ?
17 Dwene ɛye nwo, na bu ye. Brienzua bɔ okuro ɔye ne, yenwo hia ye na onni yenwo angorɛ. Onwu ɔye kyɛ, ɔte akyɛdeɛ bɔ ɔyɛ nyemene bɔ Yehowa afa ama ye ɔ. (Any. 18:22; 31:10) Yesɔ nati, sɛ ɔne ɔye ne da a, ɔda ye ali kyɛ ɔdwene yenwo, na obu ye. Yeti, ɔngɔhyɛ ye kyɛ ɔyɛ nnaa nu nningyein biemɔ bɔ onguro, bɔ ɔkɔmaa ɔkɔteetee, anaa ɔkɔmaa ye tiboa kobua ye fɔ ɔ.f Sɔ ala yeɛ brienzua ne koso, ɔngɔyɛ nikyeebie bɔ ɔkɔmaa ye tiboa kobua ye fɔ wɔ Yehowa nyunu mmerɛ bɔ ɔne ɔye bɛda ne.—Aso. 24:16.
18. Nzu yeɛ odikyɛ huɛmɔ bɔ mmɔden kyɛ bɛkɔyɛ ɔ? (Kenga edwirɛ bɔ ɔwɔ alaka nanu bɔ yenwa: “Nningyein Nna Bɔ Ɛyɛ A Okyire Kyɛ Ebu Ɛye Ɔ.”)
18 Huɛmɔ, ɛmɔnya gyidie kyɛ mmɔden bɔ ɛmɔbɔ kyɛ ɛmɔkɔfa anidie bɛkɔma ɛmɔ ayemɔ ne, Yehowa nwu ye mukoraati, na yenye sɔ. Yeti yere wɔnwo kyɛ ɛkɔfa anidie kɔma ɛye, na nnɛyɛ nikyeebiala bɔ ɔkɔmaa ɔkɔteetee ɔ. Afei ma onwu ye kyɛ ɛdwene yenwo, ebu ye, na ekuro ye. Ɛyɛ sɔ a, ɛmaa onwu ye kyɛ, yenwo hia wɔ. Yeti sɛ ɛpena kyɛ ɛne Yehowa afia kɔso yɛ kama a, yede bɔ mmɔden kyɛ ɛkɔfa anidie kɔma ɛye.—Edw. 25:14.
DWEIN 131 “Nea Onyankopɔn Aka Abom”
a Sɛ huɛmɔ kenga edwirɛ bɔ yenwa: “Aso Ekyire Obuo Ma Mmrasua Kyɛbɔ Yehowa Yɛ Ne?” bɔ ɔwɔ January 2024 Ɛwɛnelɛ Waen nanu ne a, ɔkɔboka bɛ paa.
b Mmrasua bɔ behũmɔ bo bɛ, bɛhyɛ bɛ bɛne bɛda, anaa bɛyɛ bɛ basabasa ne, edwirɛ bɔ yenwa “Help for Victims of Domestic Abuse” ne kɔboka bɛ. Ɔwɔ edwirɛ bɔ ɔbatoatoa so bɔ yeɛ ole “More Topics” wɔ jw.org ne JW Library® so.
c EDWIRƐ BIE BƆ BAHYIREHYIRE NU Ɔ: Sɛ bɛkã kyɛ “edwudwo tia ebie” a, ebie yeɛ ole kyɛ ɛkɔbɔ sona ne alapaa, ɛkɔgoro yenwo, ɛkɔhã edwirɛ yeayea kohyire ye, anaa ɛkɔhã ye nyunu mmerɛ biala ɔ. Afei edwirɛ biala bɔ ɛkɔhã kɔfa kogua sona ne nyunu ase ne koso boka so.
d Kenga edwirɛ bɔ yeɛ ole “Ponografi Betumi Ama W’aware Atetew Apansam” bɔ ɔwɔ jw.org ne JW Library so ne.
e Brasua bɔ ohũ nea ponografi ne, edwirɛ bɔ yenwa: “Sɛ Ehũ Anaa Ɛye Nea Ponografi A, Nzu Yeɛ Ɛkɔhora Kɔyɛ Ɔ?” ne kɔboka ye. Ɔwɔ August 2023 Ɛwɛnelɛ Waen nanu.
f Atee bɔ brienzua ne brasua bɔ bagya ne kuro kyɛ bɛfa so bɛda ne, Bible ne ngyire bɔ ɔte pá anaa bɔ ɔttemaye ɔ. Ɛhene de, Kristofoɛ bɔ bagya ne bɔbɔ yeɛ odikyɛ besi yenwo gyinayɛɛ ɔ. Nakoso, odikyɛ benwu ye kyɛ ɔkɔsɔ Yehowa nye, ɔngɔha benu biala, na ɔngɔma bɛ tiboa ngobua bɛ fɔ koso. Ɔnate kyɛ ɛhe te bɛmunyɔ bɛ dwirɛ nati, ɔnzɛkyɛ bɛfa bedidi ngɔmmɔ.
g BƆ FOTO NE KÃ YENWO DWIRƐ Ɔ: Aliemaa bie wɔ adwuma nu, na bɛbɔ ɔne bɛyɛ adwuma bɔ bɛtte Yehowa Adanzefoɛ ne, bɛpena kyɛ ɔbanea ponografi nwo foto.