“Sãa Né Ɔhalle Me Ngome”

NNEASOƐ BƆ M’AWOFOƐ YƐLE Ɔ

Né me baba ne me maame te Romanfoɛ, na né bɛmva bɛ asɔre benni angorɛ. Nakoso siɛ ye, beenwuni ye wɔ Bible nanu kyɛ Nyameɛ dumaa li Yehowa. Yeti bɛɛyɛle Yehowa Adanzefoɛ bɔ né bɛbɔ bɛnwo mmɔden paa ɔ. Né me baba te kapentaniɛ, na mmerɛ bɔ né ɔkɔ asɔre ne, ne ɔfa bakaa se Yesu honi, nakoso ɔyakyili. Ne y’awuro ne te aborɔsaen, yeti osiesiele aseɛ nwo deɛ ne maa ɔɔyɛle Ahennie Asa bɔ olimoa wɔ San Juan del Monte bɔ ɔwɔ Manila bɔ ɔte Philippines maen ne ahenguro ne.

Bɛwole me 1952 nu, né nne aliemaamɔ mbanyi mmrienzua nna, ɔne mmrasua nza. M’awofoɛ fale Bible nu nimdeɛ bɔ né bele ye ne hyirehyirele me ne nniema nemɔ. Mmerɛ bɔ nyini kãa ne, me baba hyɛle me ngunaen kyɛ ngenga Bible ne ti kõ kyẽa biala. Osa ne me suane asafo nwomaa ahoroɛ koso. Ɛyɛ a né m’awofoɛ taa to bɛsa bɛfrɛ manzini soneafoɛ ne aliemaamɔ bɔ bɛwɔ Bɛtɛl ne maa bɛbasikye y’awuro berɛ. Sɔ aliemaa nemɔ suahu ne bɛ ngunaenhyɛ ne, ɔbokale y’abusua ne paa, na ɔmaa yɛnye gyele. Osa maa yenwuni kyɛ odikyɛ yɛfa Yehowa soen yedimoa wɔ y’asetena nu.

Né m’awofoɛ di nahorɛ ma Yehowa paa, yeti nzuesuane bɛ. Nakoso anwonyerɛ bie bɔle me maame maa owuli. Ɛhene si ne, mene me baba hyɛle ateepakyelɛ adwuma nabo wɔ 1971 nu. Afoɛ nyɔ si ne, me baba koso wuli wɔ 1973 nu. Sɔ mmerɛ ne, né mali afoɛ 20. Bɛ wue ne maa me wora bɔle paa, na né menwu ye kyɛ waha me ngome. Nakoso anyelasoɛ bɔ yele ye ne, ɔtekyɛ sɛkyɛ bɔ ‘otira yɛ kra nu, bɔ nu nde ɔ.’ Ɛhene yeɛ ɔbokale me maa ngyinane bɔ wato me ne noa ɔ. (Heb. 6:19) Me baba wuli ne, wangyɛ biala yeɛ bɛmaa ngɔnyɛle ateepakyelɛniɛ titire wɔ kuro bie bɔ bɛfrɛ ye Coron. Ɔte supɔ bɔ wate yenwo, na ɔwɔ Palawan manzini nanu.

MVALE ƆHAW NU WƆ DWUMADIE BIE BƆ BƐFA BEWURALE ME SA NANU

Ngɔle Coron ne, né mali afoɛ 21. Né ndennane namue nu llé. Yeti ɔyɛle me nwanwa paa kyɛ, sɔ supɔ naso ne, awuro biemɔ wɔ berɛ a belle nzue ne kanea ɔ. Afei kar ne motor koso né ɛndaa nwu bie. Né aliemaamɔ kãa wɔ berɛ de, nakoso né mendaa mennya ebie bɔ mene ye kɔhɔ asɛnga. Yeti odwu mmerɛ bie a, me ngome yeɛ né mekɔ ɔ. Bosome bɔ olimoa ne de, né me wora adɔ m’abusuafoɛ ne me damvomɔ paa. Sɛ odwu kɔngɔen a, né mekɔtena aluo menea nzramaa, na aworabɔlɛ ti, ɛyɛ a né mesũ. Ne nikyeebie yɛ me kyɛ, nyakyi asɛnga adwuma bɔ meyɛ ye wɔ berɛ ne, na ngɔ me kuro.

Sɛ ɔba sɔ a, né mekã bɔ ɔha me ne mukoraati mekyire Yehowa wɔ mbaeɛ nu. Ɛyɛ a mekaakae edwirɛ biemɔ bɔ ngengale ye wɔ Bible ne, ɔne yɛ nwomaa ahoroɛ nu ne. Edwein 19:14 nanu dwirɛ de, me wora amvi ye llé. Nwuni kyɛ sɛ medwenedwene nningyein bɔ Yehowa abɔ, ɔne ye subaen ahoroɛ nwo a, ɔkɔmaa ɔkɔyɛ “me nyɔbotaen ne me defoɛ.” Edwirɛ bie bɔ ɔwɔ Ɛwɛnelɛ Waen bie nu bokale me paa. Né ye dwirɛti nwa, “You Are Never Alone.”a Né mekenga ye tekyɛ meno nzue ne. Sɔ mmerɛ ne, né menwu ye kyɛ waha mene Yehowa ngome, yeti né mekora mebɔ mbaeɛ, mesua nikye, na medwenedwene bɔ masua nanwo.

Mmerɛ bɔ ndwuli Coron ne, wangyɛ mmanyɛle asafo nu panyi. Ɔnate kyɛ me ngome yeɛ né nde asafo nu panyi nati, me ala yeɛ né meyɛ Teokrase Ɔsom Sukuu, Ɔsom Nhyiam, Asafo Nwoma Mu Adesua, ɔne Ɛwɛnelɛ Waen Adesua ne ɔ. Afei koso, né mema badwanu dwudwolɛ dapɛen biala. Ɔnate sɔ dwumadie hemɔ bɔ né meyɛ nati, wamma mannya adwene kõ kyɛ waha me ngome.

Asɛnga adwuma bɔ né meyɛ ye wɔ Coron ne, mvasoɛ wale so paa, ofikyɛ me Bible asuafoɛ ne biemɔ bɔle asu po. Nakoso mvale ɔhaw pee nu. Nekaa bɔ né mekɔyɛ asɛnga adwuma ne, né atee wale paa. Né mepɛ kwanzii pee kora na madwu dɔ. Yeti sɛ mekɔ asɛnga a, ɛyɛ a né menze nekaa po bɔ sɛ aleɛ sa me a ngɔla ɔ. Asafo bɔ né nwɔ nu ne, nekaa bɔ né odikyɛ bɛyɛ asɛnga ne, né supɔ mmaammaa biemɔ bɔ ɔwɔ dede boka so. Ɔmva yenwo kyɛ né menze nzue nu bia ne, sɛ mvrama tu serɛserɛ po a, né metaa mefa ɛlɛen mefa ɛpo naso mekɔ dɔ. Sɔ haw ne mukoraati nu ne, Yehowa bokale me, na ɔbɔle menwo waen. Siɛ ye, nwuni kyɛ sãa né Yehowa nate ɛhene aso ɔtete me ma dwumadie pirikua bie bɔ né ɔla me nyunu ɔ.

PAPUA NEW GUINEA

Wɔ 1978 nu ne, bɛmaa ngɔle Papua New Guinea bɔ ɔwɔ Australia sorɔ dɔ ne. Papua New Guinea maen ne, ogua mmokaa so, na ɔpena ne Spain maen ne yɛ pɛ. Mmenia kɔyɛ miliɔn nza yeɛ bɛwɔ maen nanu ɔ, na mmerɛ bɔ nwuni kyɛ bɛkã dwudwolɛ kɔbo 800 ne, ɔyɛle me nwanwa paa. Bɔ ɔmaa m’ahone tole me kunu kãa yeɛ ole kyɛ, mmenia bɔ bɛwɔ maen nanu ne, né benu pee kã Melanesian Pidgin bɔ bɛfrɛ ye Tok Pisin ne.

Bɛmaa ngɔle asafo bɔ bɛfa Brɔfo bɛyɛ adesua nanu wɔ Port Moresby bɔ ɔte ahenguro nanu mmerɛ kãa. Nakoso ndu ngɔle asafo bɔ bɛfa Tok Pisin bɛyɛ b’adesua nu, na né mesa mesua dwudwolɛ ne koso. Kãa bɔ né masua ne, sɛ mekɔ asɛnga a, ɛhene yeɛ né mefa medi adanzeɛ ɔ. Sɔ bɔ nyɛle ne, ɔmaa ndele dwudwolɛ ne ndɛ. Yesɔ nati wangyɛ, ngora mva mane badwanu dwudwolɛ. Bɔ ɔyɛle me nwanwa yeɛ ole kyɛ, mmerɛ bɔ ngɔle Papua New Guinea bosome kãa bie si ne, bɛhane kyɛ ngɔyɛ manzini soneafoɛ, na nzõ asafo ahoroɛ bɔ bɛkã Tok Pisin dwudwolɛ ne. Maen ne nekaa bɔ né mesõ ne, né ɔte piri paa.

Sɛ efi asafo kõ anu ɛkɔ foforɛ nu a, né nu wale paa. Yeti né odikyɛ meyɛ manzini nhyiamu pee nwo nhyehyɛɛ, na ɛhene maa ndutuli atee pee. Né mahɔ ebie maen so, na né ɔsono ɛberɛ dwudwolɛ ne b’amammerɛ koraa. Ɛhene ati ahyɛaseɛ ne de né menye ngã. Sɛ mekwaasõ asafo bie a, ɔnate mmokaa ɔne atee ne bɔ ɔttemaye nati, né mengora memvo kar. Yeti dapɛen biala, alupre yeɛ né odikyɛ mefo mekɔ ɔ. Alupre bɔ ngɔfo ne koso, odwu mmerɛ bie a, né mene bɔ ɔkã ne ngome yeɛ yɛte nu ɔ, na ɛyɛ a né alupre ne hyɛdda lle anwoserɛ sɔ. Sɛ ɔba sɔ a, ɛyɛ a né esuronyi ahã me tekyɛ mmerɛ bɔ né mefo ɛlɛen metu atee nala.

Sɔ mmerɛ ne, mmeni kãa bie yeɛ né bele fon ɔ. Yeti sɛ mekwaasõ asafo nemɔ a, sana metworɔ bɛ krataa. Odwu mmerɛ bie po a, mekodwu kuro naso kora ne aliemaamɔ sa ahã me krataa ne. Ɔba sɔ a, sana mebisa maa bekyire me kora né manwu nekaa bɔ aliemaamɔ wɔ ɔ. Ɔmva yenwo kyɛ né aliemaamɔ nze kyɛ meba ne, sɛ benwu me a né bɛnye agye. Ɛhene maa menwu ye kyɛ me fɛɛ anyɛ mbaen. Yehowa bokale me wɔ atee pee so, na ɛhene maa mene ye afia yɛle kama.

Né mekwaasõ asafo bie wɔ supɔ bie bɔ bɛfrɛ ye Bougainville naso. Mmerɛ bɔ olimoa bɔ ngɔle adesua ne, aliemaa bie ne ɔye wale menwo berɛ bɔ né bɛsere ɔ. Bebisale me kyɛ: “Yeti ɛkae yɛ?” Ɔwale so ne, ngaele kyɛ mmerɛ bɔ ngɔle Port Moresby ne, bɛ yeɛ mene bɛ lilimoa suane nikyee ɔ. Mmerɛ bɔ né mefi berɛ ne, ngakyili bɛ mane aliemaa kõ kyɛ ɔne bɛ toa so. Sɔ mmerɛ bɔ né bɛne me dwudwo ne, né babɔ asu. Nhyiraa bɔ nyane ye mmerɛ bɔ né nwɔ Papua New Guinea ne, ɛhe te nu kõ.

ABUSUA KOROKORO BƆ BƐBƆ BƐNWO MMƆDEN Ɔ

Mmerɛ bɔ né mebaafi Coron wɔ 1978 nu ne, nyiale aliemaa brasua bie bɔ oli Adel. Né yenwo yɛ nyemene, ná ne osa bɔ yenwo mmɔden paa. Né ɔtete ye mmaamɔ nyɔ bɔ beli Samuel ne Shirley ne, na né osa te ateepakyelɛniɛ. Né ye maame koso ayɛ panyi, na ye komapɛ nala yeɛ né ɔnea ye ɔ. Wɔ May 1981 nu ne, nza ngɔle Philippines ngongyale Adel. Mmerɛ bɔ yegyale ne si ne, yɛɛyɛle ateepakyelɛfoɛ, na yɛbɔle nu yɛneane abusua ne.

Ɔmva yenwo kyɛ me yeɛ né menea abusua ne, besa bɛyele me kyɛ ateepakyelɛniɛ titire wɔ 1983 nu. Bɛmaa ngɔle Linapacan supɔ bɔ ɔwɔ Palawan manzini nu naso. Mene abusua namu yetu yɛhɔle berɛ, na sɔ mmerɛ ne, né Yehowa Danzeniɛ biala nne berɛ. Yeedwuli berɛ kɔyɛ afoɛ kõ si ne, Adel maame wuli. Nakoso yɛhɔle so yɛyɛle asɛnga adwuma ne, na ɛhene bokale yɛ maa yegyinane aworabolɛ bɔ né yedi ne noa. Yenyane mmeni pee yɛne bɛ suane Bible ne wɔ berɛ, yeti wangyɛ yenwuni kyɛ odikyɛ yenya Ahennie Asa korokoro bie bɔ yɛkɔhɔ nu ɔ. Yeti yɛ bɔbɔ yesili bie. Yedwuli Linapacan afoɛ nza si ne, yɛnye gyele paa kyɛ mmenia 110 wale Yesu Wue Aluolue ne bie ɔ. Sɔ mmenia nanu pee bɔle asu mmerɛ bɔ yefili berɛ ne si.

Wɔ 1986 nu ne, bɛmaa ngɔle Culion supɔ naso. Né mmenia bɔ kwata ayɛ bɛ pee wɔ sɔ kuro naso. Siɛ ye, bɛmaa Adel koso ɔɔyɛle ateepakyelɛniɛ titire. Ahyɛaseɛ ne de, mmenia bɔ kwata ayɛ bɛ ne, né ɔyɛ se ma yɛ kyɛ yekoli bɛ adanzeɛ. Nakoso aliemaamɔ bɔ bɛwɔ berɛ ne maa yenwuni kyɛ, bɛbɔ banya sɔ anwonyerɛ ne, babɔ bɛ paneɛ yeti ɔnzɛkyɛ yesuro kyɛ bɛkɔfa bekosa yɛ. Sɔ mmenia ne, né benu biemɔ kotie adesua ne bie wɔ aliemaa brasua bie awuro. Yeti wangyɛ biala, yɛnye gyele paa kyɛ yɛkɔhã anyelasoɛ bɔ ɔwɔ Bible nanu nanwo dwirɛ yekohyire bɛ. Ofikyɛ né bele adwene kyɛ bɛ de, Nyameɛ ne kuro sona biala mva bɛ nyɛ hwee. Mmerɛ bɔ benwuni kyɛ sãa anwonyerɛ kofi berɛ kyẽabie maa bɛnwo kɔtɔ bɛ ne, bɛnye gyele paa.—Luka 5:​12, 13.

Ebiaa ekobisa kyɛ, na yɛ mmaa nemɔ koso ɛɛ, nningyein hɔle sɛɛ mane bɛ wɔ Culion? Bɔ ɔwɔ nu yeɛ ole kyɛ, mene Adel tole yɛsa frɛle aliemaa ndaluwa nyɔ biemɔ bɔ né bɛwɔ Coron maa bɛɛbokale yɛso wɔ berɛ. Né ɛhene kɔboka yɛ mmaa nemɔ maa bekosuesua bɛ subaen pá ne. Samuel ne Shirley ne sɔ aliemaa mmrasua hemɔ bɔle nu fale anigye yɛle asɛnga adwuma ne, na bɛne ngwalaa pee suane nikye. Yɛ koso yɛne sɔ ngwalaa nemɔ awofoɛ suane nikye. Odwuli nekaa bie ne, né yɛne abusua 11 yeɛ yesua nikye ɔ. Bɛbɔ né yɛne bɛ sua nikyee ne, benu pee nala bɔle mmɔden kyɛ bɛkɔfa bɔ besua ne bɛkɔbɔ bɛ bra, yeti wangyɛ yeɛ yɛtele asafo foforɛ ɔ.

Ahyɛaseɛ ne de, me ngome yeɛ né nde asafo nu panyi wɔ berɛ ɔ. Yeti Bɛtɛl hane kyɛ nyɛ adesua nwo nhyehyɛɛ mma adawurubɔfoɛ mmɔtwɛ bɔ né bɛwɔ Culion, ɔne adawurubɔfoɛ ngona bɔ né bɛwɔ namue bie bɔ bɛfrɛ ye Marily nu ne. Sɛ efi Culion ɛkɔ berɛ a, ɛkɔtena ɛlɛen nu kɔpɛ dɔnhwere nza kora né adwu dɔ. Sɛ yɛpɔno adesua ne wɔ berɛ a, né mene abusua ne pɛ atee dɔnhwere pee yɛfa mmokaa so yɛkɔ namue bie bɔ bɛfrɛ ye Halsey nu yɛkɔyɛ Bible adesua.

Mmeni pee tiele nzɛmba bɔ né yɛkã ye wɔ Marily ne Halsey ne, na benu pee wale asafo nanu. Ɛhene maa yesili Ahennie Asa wɔ sɔ nekaa nyɔ ne. Kyɛbɔ ɔhɔle so wɔ Linapacan ne, aliemaamɔ ne bɛbɔ né bahyɛ yebo bɛba asafo nanu ne, bɛfale b’anwonyadeɛ ne b’anwoserɛ yeɛ besili Ahennie Asa ne ɔ. Marily Ahennie Asa ne sɔa, né ɔkora fa mmenia kɔbo 200. Ɛhene ati né yɛkora yɛfa yɛyɛ manzini nhyiamu po.

ME WORA BƆLE, NYƐLE ANGONAM, NAKOSO NYANE ANIGYE

Odwuli 1993 ne, né yɛ mmaa nemɔ anyinyi, yeti bɛmaa mene Adel yɛɛyɛle manzini adwuma wɔ Philippines. Wɔ afoɛ 2000 nu ne, bɛmaa ngɔle Asomvoɛ Ndeteyɛɛ Sukuu ngonlɛle ndeteyɛɛ bɔ ɔkɔmaa ngɔhora ngohyire nikyee wɔ sɔ sukuu nabo ɔ. Né mebu menwo kyɛ mengɔhora sɔ adwuma ne yɛ, nakoso Adel hɔle so hyɛle me ngunaen. Ɔmaa nwuni kyɛ, Yehowa kɔma me anwoserɛ maa ngɔyɛ sɔ dwumadie foforɛ bɔ bafa bawura mesa ne. (Flp. 4:13) Né ɔse bɔ ɔkã ɔ, ɔnate kyɛ ye bɔbɔ koso né anwonyerɛ ha ye paa, nakoso né ogu so ɔyɛ ye soen adwuma ne.

Wɔ 2006 nu ne, bɛhane kyɛ Adel anya adwene nu anwonyerɛ bie bɔ bɛfrɛ Parkinson, na yɛnwo dwirili yɛ paa. Ɔwale sɔ ne, nga ngyirele Adel kyɛ mepena kyɛ yɛfa yɛ dwumadie ne yɛto berɛ na mahora manea ye. Nakoso ɔhane kyɛ, “Mesrɛ wɔ, pena dɔktaniɛ bie ma ɔnea me, na mese kyɛ Yehowa kɔboka yɛ maa yɛkɔtoa ye adwuma naso.” Afoɛ nzia bɔ oli berɛ ne, Adel hɔle so miane yenye yɛle ye soen adwuma ne. Odwuli nekaa bie po ne, né ɔngora nate, nakoso né ɔtena wheelchair nu kɔ asɛnga. Sɛ ɔyɛ se kyɛ okodwudwo po a, né omia yenye ma mmuayɛɛ wɔ adesua bo. Animia bɔ né Adel fa gyina ye haw ne noa ne, né ɔyɛ aliemaamɔ nyemene paa. Yeti né bɛsɛnde ye mɛsegye bɛfa bɛhyɛ ye ngunaen, oodwuli kyɛ owuli wɔ 2013 nu ɔ. Né mene meye Adel bɔ mekuro ye, ná odi nahorɛ ne atena kɔbo afoɛ 30. Yeti mmerɛ bɔ owuli ne, aworabɔlɛ bɔ né medi ne, ɔmaa nza ndele nga kyɛ waha me ngome.

Adel hane kyɛ nnɛmaa mefa dwumadie bɔ owura mesa ne meto berɛ, yeti mekoso manyakyi. Nyerele menwo nyɛle soen adwuma ne, ɛhene ati mannya adwene kyɛ waha me ngome. Ofi 2014 kodwu 2017 ne, bɛmaa ngɔnzone asafo biemɔ bɔ bɛfa Tagalog dwudwolɛ bɛyɛ adesua wɔ maen biemɔ bɔ né babra Yehowa Adanzefoɛ adwuma ne wɔ berɛ naso. Ɛhene si ne, ngɔnzone asafo ahoroɛ bɔ bɛfa sɔ dwudwolɛ ne ala bɛyɛ adesua wɔ Taiwan, United States, ɔne Canada. Wɔ 2019 nu ne, ngyirele nikyee wɔ Ahennie Nanwo Nzɛmbahãnɛfoɛ Sukuu nabo wɔ India ne Thailand wɔ Brɔfo nu. Sɔ dwumadie ahoroɛ hemɔ maa menye gyele paa. Mmerɛ biala bɔ ngɔfa m’adwene mukoraati ngosie Yehowa soen so ne, menye gye paa.

YEHOWA AHƆSO ABOKA ME

Nekaa foforɛ biala bɔ bɛkɔfa me bɛkɔhɔ ne, mene aliemaamɔ fa adamvoa. Yeti ɛyɛ a né ɔlla ase kyɛ mene bɛ kɔtete nu. Nakoso ɔba sɔ a, mefa menwo meto Yehowa so, ofikyɛ ye yeɛ wasoma me ɔ. Yehowa ahɔso aboka me paa. Yeti nzakrayɛɛ biala bɔ ɔkɔwa m’asetena nu ne, mefi m’ahone mukoraati nu medé metonu. Kesaalae, nde ateepakyelɛniɛ titire wɔ Philippines. Asafo foforɛ bɔ mahɔ nu ne, aliemaamɔ boka me paa, na benni menwo angorɛ koraa. Menye agye paa kyɛ Samuel ne Shirley koso afa bɛ maame subaen, na bɛ́bɔ bɛnwo mmɔden paa wɔ asafo nanu ɔ.—3 Yoh. 4.

Nahorɛ nu, ɔhaw pee yeɛ mafa nu wɔ m’asetena nu ɔ. Ebie yeɛ ole anwonyerɛ suronyisuronyi bɔ ɔbɔle meye maa owuli yeayea ne. Afei koso, né odikyɛ meyere menwo megyina nzakrayɛɛ pee bɔ ɔwale m’asetena nu ne noa. Nakoso yemukoraati nu ne, manwu kyɛ Yehowa de, “ɔne yɛ nu biala afia atee anwa.” (Aso. 17:27) Bɛbɔ bɛsõ Yehowa ne, sɛ bewura makyebu po a, yesa “ɔtte tika” kyɛ ɔkɔboka bɛ, na wama b’anwoserɛ ɔ. (Yes. 59:1) Yehowa bɔ ɔte me Nyɔbotaen ne, wahɔso waboka me paa wɔ m’asetena nu waadwu ɛnnɛ. Amba, sãa né ɔhalle me ngome.