Mmenia Bɔ Bɛte Pɛsɛmangomenya Wɔ Ewiase He Anu Ne, Nnesuesua Bɛ
ƐNNƐ mmeni pee nala le adwene kyɛ bɛnwo hia tra ebiala, yeti bɛfata yenwo atee anaa anidie sorongo bie. Wɔ koso ahyɛ ye nzorɛ sɔ anaa? Ɔnate ɛhe ati, bɔ bekonya ye biala ne, bɛnye nzɔ. Ɔnzɛkyɛ yɛmaa ɛhe yɛ yɛ nwanwa, ofikyɛ Bible ne hane kyɛ sɔ yeɛ mmenia subaen kɔyɛ wɔ ayieleɛ mmerɛ he anu ɔ.—2 Tim. 3:2.
Mmenia hyɛle yebo kyɛ bɛyɛ pɛsɛmangomenya ne, nna ɛnnɛ ɔ. Benu bie yeɛ ole Adam ne Hawa. Né bɛbɔbɔ bɛpena kyɛ bekyire bɔ ɔte pá ne bɔ ɔttemaye ɔ. Bɔ bɛyɛle nati yeɛ wamaa ɛnnɛ yɛfɛ sɔ ne. Sona foforɛ koso yeɛ ole Yuda hene Yusia. Né ye adwene yɛ ye kyɛ ye koso ɔfata kyɛ ɔyera ɛyɛɛ wɔ asɔre awuro berɛ, nakoso né olle yenwo atee sɔ. (2 Abe. 26:18, 19) Farasiifoɛ ne Sadusiifoɛ nemɔ koso, sɔ yeɛ né bɛ subaen te ɔ. Ne b’adwene yɛ bɛ kyɛ ɔnate kyɛ bɛ nana yeɛ ole Abraham nati, bɛ ngome yeɛ bɛfata kyɛ Nyameɛ yira bɛ ɔ.—Mat. 3:9.
Mmenia bɔ bɛwɔ ewaise nanu ne, benu pee nala te pɛsɛmangomenya na bɛmoma bɛnwo so. Yeti sɛ yannea yé a, yekosuesua bɛ. (Gal. 5:26) Ɛhene kɔmaa ebiaa yekonya adwene kyɛ, yenwo atee biemɔ wɔ berɛ a, yɛ yeɛ ɔfata yɛ ɔ, anaa odikyɛ mmenia fa anidie sorongo bie ma yɛ. Yede nzu yeɛ ɔkɔboka yɛ na yanyɛ sɔ ɔ? Ɛmɔma yelimoa yɛnea Bible nu dwirɛ nyɔ bie, na ɔkɔmaa yekonwu Yehowa adwene wɔ sɔ subaen nanwo.
Yehowa yeɛ odikyɛ okyire bɔ ɔfata yɛ ɔ. Ɛmɔma yɛnea ɛhe anwo nneasoɛ ahoroɛ.
Wɔ abusua nu ne, odikyɛ brasua kyire obuo ma ohũ, na brienzua ne koso, odikyɛ ɔyɛ nningyein biemɔ fakyire kyɛ okuro ɔye ne dwirɛ. (Ɛfe. 5:33) Brienzua ne brasua bɔ bagya ne ngome yeɛ Yehowa pena kyɛ bedi aweweɛ ɔ. (1 Kor. 7:3) Odikyɛ ngwalaa tie b’awofoɛ dwirɛ. Sɔ ala yeɛ awofoɛ nemɔ koso, odikyɛ bɛnea bɛ mmaamɔ, na bɛmaa ngwalaa nemɔ nwu ye kyɛ bekuro bɛ dwirɛ ɔ.—2 Kor. 12:14; Ɛfe. 6:2.
Asafo nanu koso, mbanyi bɔ befia bɛ kunu bɛyɛ adwuma serɛ ne, odikyɛ yɛfa anidie yɛma bɛ. (1 Tɛs. 5:12) Nakoso, mbanyi nemɔ lle yenwo atee biala kyɛ bɛkɔhyɛ aliemaamɔ so.—1 Pet. 5:2, 3.
Awaen bɔ bɛwɔ berɛ nemɔ koso, Nyameɛ ama bɛ tumi kyɛ bele ɛtoɔ befi bɛbɔ bedi bɛso ne berɛ, na odikyɛ yɛfa anidie koso yɛma bɛ.—Rom. 13:1, 6, 7.
Yehowa kuro yɛ dwirɛ nati, walo yɛ maa wabo so. Bɔne bɔ bɛfa bɛwole yɛ nati, ewue alaa yeɛ ahaa ɔfata yɛ ɔ. (Rom. 6:23) Nakoso Yehowa dɔ bɔ onni ngasi nati, wama yɛ nhyiraa pee. (Edw. 103:10, 11) Ɔnate kyɛ Nyameɛ kuro yɛ dwirɛ nati yeɛ wamaa walo yɛ sɔ ne, na mmom nna kyɛ yɛfata sɔ nhyiraa nemɔ ti ɔ.—Rom. 12:6-8; Ɛfe. 2:8.
BƆ ƆKƆBOKA YƐ NÁ YANYƐ PƐSƐMANGOMENYA, ANAA YAMMOMA YƐNWO SO
Nea yé na annya ewiase ne adwene ne bie. Sɛ yannea yé a, ebiaa yekonya adwene kyɛ yenwo atee biemɔ wɔ berɛ a, yɛ ngome yeɛ ɔfata yɛ ɔ. Yesu yɛle mvandoho bie, na ɔmaa yenwu kyɛbɔ ɔnyɛ se kyɛ yekonya sɔ adwene ne bie ɔ. Né ɔfa adwumayɛfoɛ bɔ bɛmane bɛ denare ko kyɛ bɛyɛ adwuma nanwo. Benu biemɔ hyɛle yebo ngyerɛmɔ tutuutu, na begyinane eyia gyeingyein nu bɛyɛle adwuma tonn oodwuli nɔsoa. Nakoso ebiemɔ de, bɛyɛle adwuma dɔnhwere komapɛ. Bɛbɔ belimoa bɛwale ne, benyane adwene kyɛ ɔnate kyɛ bayɛ adwuma serɛ nati, bɛfata akatuaa piri. (Mat. 20:1-16) Yesu nate sɔ mvandoho he aso maa ye asuafoɛ nemɔ nwuni kyɛ, bɔ Nyameɛ kɔfa kɔma bɛ biala, odikyɛ bɛmaa bɛnye sɔ.
Mmrienzua bɔ bɛyɛle adwuma kyẽa ne mukoraati ne, né besusu kyɛ bɛfata kyɛ benya akatuaa piri
Má wɔnye sɔ bɔ ele ye ɔ, na nnɛpere kyɛ bɛma wɔ pee. (1 Tɛs. 5:18) Suesua bɔ somafoɛ Pɔɔlo yɛle ne. Né ole yenwo atee kyɛ nikyee biala bɔ ohia ne, okobisa aliemaamɔ bɔ bɛwɔ Korinto ne maa bɛkɔfa bɛkɔma ye, nakoso wanyɛ sɔ. (1 Kor. 9:11-14) Yeti nikyee biala bɔ yɛsa kɔhã ye ne, odikyɛ yɛmaa yɛnye sɔ, na ɔnzɛkyɛ yenya adwene kyɛ bɛma yɛ pee bɛboka so.
Né somafoɛ Pɔɔlo mbena kyɛ ɔfa ye haw to aliemaamɔ so
Brɛ wɔnwo ase. Sɛ ebie bu yenwo tra so a, ɔtaa nya adwene kyɛ odikyɛ onya yenwo atee pee boka bɔ ole ye naso. Ɛhe te nikyee bɔ ɔyɛ suro paa, nakoso anwobrɛaseɛ yeɛ ɔkɔboka yɛ na yannya sɔ adwene ne bie ɔ.
Diyifoɛ Daniel anwobrɛaseɛ ti, né Yehowa kuro ye dwirɛ paa
Né diyifoɛ Daniel brɛ yenwo ase paa, na yɛkɔhora yekosuesua ye. Né yenwo yɛ nyemene, na abusua bɔ ofi nu ne koso, né bɛte nnehyeɛ. Afei né ɔse nworɛ, na né ole adom akyɛdeɛ. Yeti né ahaa ɔkɔhora konya adwene kyɛ ɛhene yeɛ ɔmaa onyane yenwo atee sorongo ne. (Dan. 1:3, 4, 19, 20) Nakoso wannya sɔ adwene ne, na mmom ɔbrɛle yenwo ase. Ɛhe maa Yehowa hurole ye dwirɛ paa.—Dan. 2:30; 10:11, 12.
Yeti nnɛmɔmaa yɛyɛ pɛsɛmangomenya, na yɛmoma yɛnwo so kyɛbɔ mmeni pee yɛ ye ɛnnɛ ne. Na mmom nhyiraa biala bɔ Yehowa afa alo yɛ ne, ɛmɔma yehyire kyɛ yɛnye sɔ.