Ngɔyɛ Sɛɛ Né Mayɛ Adamvoa Pá?

ƆHAW bie ato wɔ le, bɔ né ɛto wɔnye a, ɔndɔ ebiala nyunu anaa? Yɛte “mmerɛ bɔ nu yɛ se” nu, yeti y’abanu kɔhora kobu, anaa yekonya adwene kyɛ waha yɛ ngome. (2 Tim. 3:1) Nakoso sɛ ɔhaw bie to yɛ a, yele mmenia bɔ bɛkɔhora bɛkɔboka yɛ ɔ. Bible ne maa yenwu kyɛ adamvoa pá kɔhora kɔboka yɛ wɔ ‘y’amaneɛnwunɛ nu.’—Any. 17:17.

BƆ ƐYƐ A, OKYIRE KYƐ ƐTE ADAMVOA PÁ Ɔ

Pɔɔlo damvomɔ bɔ né ɔne bɛ tu atee kɔkã nzɛmba ne, bɛbokale ye paa. (Kol. 4:​7-11) Mmerɛ bɔ né ɔla prisa wɔ Rome ne sɔa, nningyein biemɔ bɔ né ye bɔbɔ ɔngɔhora ye yɛ ne, ye damvo nemɔ yɛ mane ye. Ebie yeɛ ole kyɛ, akyɛdeɛ bɔ né ofi aliemaamɔ bɔ bɛwɔ Filipi ne berɛ ne, Epafrodito yeɛ ole brɛle ye ɔ. (Flp. 4:18) Ngrataa bɔ ɔhworɔle ne koso, Tikiko fa ɔɔmane asafo nemɔ mane ye. (Kol. 4:7) Mmerɛ bɔ bɛhyɛle Pɔɔlo kyɛ nnɛmaa ofite fi ye awuro, ɔne siɛ ye bɔ bɛfale ye bɛtole prisa po ne, ɔhora hyɛle aliemaamɔ ngunaen, ofikyɛ ye damvo nemɔ bokale ye. Wɔ koso, ɛkɔyɛ sɛɛ né ayɛ adamvoa pá?

Aliemaa biemɔ ayɛ nningyein biemɔ bɔ okyire kyɛ bɛte adamvoa pá ɔ. Elisabet te ateepakyelɛniɛ wɔ Spain. Ɛmɔma yɛnea bɔ aliemaa brasua bie yɛ fabokale ye ɔ. Ye maame nyane kansa, na nekaa bɔ né anwonyerɛ ne adwu ne, né bɛyɛ ye sɛ alaa a okowu. Sɔ aliemaa brasua ne sɛndele ye mɛsegye pee bɔ ɔhyɛ ngunaen ɔ, na né nu dwirɛ ne gyi Bible naso. Elisabet hane kyɛ, “Sɔ mɛsegye ne bokale me maa nwuni kyɛ sãa né ɔhalle me ngome, na ɛhene maa nyane anwoserɛ bɔ ngɔfa ngɔnea me maame ɔ.”—Any. 18:24.

Sɛ yɛboka aliemaamɔ maa bɛkɔ adesua ne asɛnga a, ɔkɔmaa yɛne bɛ adamvoa nanu kɔyɛ se. Aso ɛse aliemaa bie bɔ wayɛ panyi, bɔ ɛkɔhora kɔfa wɔ kar kɔɔfa ye kɔhɔ adesua anaa asɛnga hɔ ɔ? Sɛ ɛyɛ sɔ a, ɛmɔ nu biala kɔhyɛ ye mmango ngunaen. (Rom. 1:12) Aliemaamɔ bɔ baha sua nu ne koso, yɛkɔyɛ sɛɛ né yamaa banwu kyɛ yɛte adamvoa pá?

BOKA ALIEMAAMƆ BƆ BAHA SUA NU NE

Yeliema biemɔ wɔ berɛ a, ɔnate anwonyerɛ anaa nningyein biemɔ ti, bɛngora bɛngɔ adesua wɔ Ahennie Asa so. Sɔ yeɛ ɔtole David mmerɛ bɔ bɛhane kyɛ wanya kansa ne. Bɛfale ye bɛtole ayire so kɔbo bosome nzia. Ɔwale sɔ ne, né ɔne ɔye Lidia ngora ngɔ Ahennie Asa so, yeti vidio kɔɔl so yeɛ ne betie adesua ne bie ɔ.

Yede sɛɛ yeɛ aliemaamɔ bokale bɛ ɔ? Sɛ bɛpɔno adesua biala a, né benu biemɔ fa mmerɛ kãa ne David ne ɔye bɔ ngɔmmɔ wɔ vidio kɔɔl naso. Sɛ bɛkora bɛma mmuayɛɛ koso a, né aliemaamɔ sɛnde bɛ mɛsegye bɛfa bɛyɛ bɛ ayekoo. Sɛɛ yeɛ ɛhene bokale David ne Lidia ɔ? Ɔmaa benwuni kyɛ ɔhalle bɛ ngome.

Aliemaamɔ bɔ baha sua nu ne, ɛkɔhora ne bɛ kɔyɛ asɛnga adwuma ne anaa? Sɛ yɛyɛ yɛ nhyehyɛɛ yé na yɛne bɛ bɔnu yɛ sɔ a, ɔkɔmaa bekonwu ye kyɛ sãa yɛ wora filli bɛ. (Any. 3:27) Aso ɛne bɛ kɔhora koli adanzeɛ wɔ fon so, anaa ɛmɔkɔhworɔ ngrataa hɔ ɔ? Sɛ bɛyɛ asɛnga nhyiamu a, mbanyi nemɔ kɔhora kɔyɛ nhyehyɛɛ maa bɛbɔ baha sua nu ne koso kotie bie wɔ vidio kɔɔl so. Mbanyi nemɔ yɛle sɔ bie mane David ne Lidia, na ɔbokale bɛ paa. David hane kyɛ: “Sɛ né yɛne aliemaamɔ bɔnu tie asɛnga nhyiamu, ɔne mbaeɛ bɔ bɛbɔ ne bie a, ne ɔhyɛ yɛ ngunaen paa.” Sɛ ɔkɔyɛ yé a, ɔwɔ nu alaa a fa wɔ Bible suaniɛ kɔ aliemaa bie bɔ waha sua nu awuro, ná wamaa ye koso watena adesua nanu bie.

Aliemaamɔ bɔ baha sua nu ne, sɛ yɛtaa yɛkɔ bɛ berɛ a, yekonwu bɛ subaen bɔ ɔyɛ nyemene ne, na ɛhene kɔmaa yɛkɔfa bɛ adamvoa paa. Ebie yeɛ ole kyɛ, sɛ ɛne bɛ bɔnu yɛ asɛnga adwuma ne, ná enwu kyɛbɔ bekyirekyire Bible nanu maa ɔkã ebie ahone a, ɔkɔmaa ekohuro bɛ dwirɛ paa. Sɛ ɛboka aliemaamɔ maa bɛkɔ adesua ne asɛnga a, ɔkora bukye yenwo atee maa enya mmeni foforɛ bɔ ɛne bɛ kɔfa adamvoa ɔ.—2 Kor. 6:13.

Pɔɔlo wora kyekyele paa mmerɛ bɔ ye damvo Tito wale ye berɛ ne. (2 Kor. 7:​5-7) Sɔ dwirɛ he maa yenwu kyɛ nna yɛ noanu dwirɛ ngome yeɛ yɛfa yɛkyekye yeliemamɔ wora ɔ. Na mmom sɛ yɛkɔ bɛ berɛ, na yɛyɛ nningyein biemɔ yɛfa yɛboka bɛ a, ɛhene koso kyekye bɛ wora paa.—1 Yoh. 3:18.

BOKA WƆ DAMVOMƆ MMERƐ BƆ BƐTANE BƐNYE NE

Sɛ bɛ́kã kyɛbɔ aliemaamɔ kosi kɔbokaboka bɛnwo a, yeliemamɔ bɔ bɛwɔ Russia ne amaa yanwu bɔ okyire ɔ. Ɛmɔma yɛnea Sergey ne ɔye Tatyana dwirɛ ne. Polisifoɛ wale b’awuro beeturuli bɛ nningyein nu, na ɛhene si ne, bɛfale bɛ bɛhɔle polis stahyɛn beetiele bɛnoa dwirɛ. Belimoa bɛyakyili Tatyana maa ɔhɔle awuro. Sergey hane kyɛ: “Tatyana dwuli awuro nala yeɛ aliemaa brasua bie wale berɛ ɔ. Né sɔ aliemaa brasua ne le akokoduro paa. Aliemaamɔ pee koso wale y’awuro berɛ, na bɛbokale yɛ maa yesiesiele berɛ.”

Sergey fa bokale so kyɛ: “Tworɔnzɛm kõ bɔ menye gye yenwo paa yeɛ ole Anyandera 17:17 ne. Ɔkã kyɛ: ‘Adamvoa kuro wɔ dwirɛ mmerɛ biala, na ɔte aliemaa bɔ bɛwole ye bɛmane amaneɛnwunɛ kyẽa ɔ.’ Mmerɛ bɔ né bɛtane menye ne, mmandele sɔ tworɔnzɛm nabo yé. Ofikyɛ né mehia aliemaamɔ mmokalɛ paa. Yehowa koso anyɛ m’aborɛ, ɔmaa nyane nnamvoa bɔ bele akokoduro maa bɛbokale me.”

Ɛnnɛ sɛ yɛnwo kyere yɛ a, yekohia yɛ damvomɔ mmokalɛ paa. Sɔ ala yeɛ sɛ amaneɛnwunɛ piri ne koso hyɛ yebo a, yekohia bɛ mmokalɛ ɔ. Yeti ɛmɔma yɛyere yɛnwo kyɛ yɛkɔyɛ adamvoa pá ɛnnɛ!—1 Pet. 4:​7, 8.