Yere Wɔnwo Boka Mmenia Má Bɛɛyɛ Asũafoɛ

Bɔ Yesu Yɛle Ɔ

VIDIO: Kyɛbɔ Yesu Hyirehyirele Nikodemo Ɔ

1. Nea VIDIO ne, anaa kenga Yohane 3:​1, 2. Eyie a susu nzɛmmisa hemɔ nwo:

1. Ɛnea a, nzuati yeɛ ebia Nikodemo hɔle Yesu berɛ kɔngɔen ɔ? —Nea Yohane 12:​42, 43.

2. Nzu yeɛ ɔmaa yenwu kyɛ, né Yesu kuro paa kyɛ ɔboka mmenia maa bɛ bayɛ asũafoɛ ɔ?

Bɔ Yesu Yɛle Ne, Nzu Yeɛ Yesũa Yefi Nu Ɔ?

2. Sɛ yɛdɔ mmenia a, yɛkɔyere yɛnwo kyɛ yɛkɔboka bɛ maa bɛ kɔɔyɛ asũafoɛ.

Suesũa Bɔ Yesu Yɛle Ne

3. Ɛne wɔ Bible sũaniɛ ne sũa nikyee wɔ mmerɛ, ɔne nekaa bɔ ɔte pá ma ye ɔ. Sɛ ɛnea a, nisɔa paa yeɛ okuro kyɛ ɛmɔ sũa nikye ɔ? Aso ɔte ye adwuma nu, ye awuro, anaa nekaa foforɛ bie? Ebia sona ne le mmerɛ, anaa kyẽa pɔtee bie wɔ dapɛen nanu bɔ okuro kyɛ ɛne ye sũa nikye ɔ. Sɛ enwu ye sɔ a, bɔ mmɔden kyɛ ɛkɔhɔ berɛ sɔ mmerɛ ne, kyɛbɔ ɔkɔyɛ a ɛkɔhora ne ye kosũa nikye ɔ.

4. Nea kyɛ ekoli nhyehyɛɛ bɔ ɛmɔfa besũa nikyee naso. Sɛ ebia ekotu atẽe, anaa nikyee bie ti engonya atẽe ngɔhɔ ye berɛ a, aso:

1. Ɛmɔ kɔhora kosũa ye kyẽa foforɛ wɔ dapɛen nanu anaa?

2. Ɛmɔ kɔhora kosũa ye wɔ fon so anaa?

3. Ɛkɔhora kɔmaa sona foforɛ ne ye koosũa nikyee anaa?

5. Bɔ Yehowa mbaeɛ kyɛ ɔboka wɔ má enya sona nanwo aboterɛ. Ebia wɔ Bible sũaniɛ ne taa tu adesũa ne hyɛ kyẽa, anaa ɔyɛ se ma ye kyɛ ɔkɔfa bɔ osũa ne kɔyɛ adwuma. Sɛ ɔba sɔ a, bɔ Yehowa mbaeɛ kyɛ ɔboka wɔ maa enya yenwo aboterɛ. (Flp. 2:13) Kae kyɛ, wɔ Bible sũaniɛ ne le subaen biemɔ bɔ ɔyɛ nyemene ɔ, yeti bɔ Yehowa mbaeɛ kyɛ ɔboka wɔ maa ɛfa w’adwene sie sɔ subaen nemɔ aso.