Y’ABRABƆ KYƐ KRISTOFOƐ
Kyɛbɔ Yehowa Nwu Wɔ Ne, Sɔ Yeɛ Wɔ Koso Enwu Wɔnwo Anaa?
“Yehowa nye gye ye mmenia nwo paa.” (Edw 149:4) Ɔwonu kyɛ yɛdi mvomsoɛ de, nakoso Yehowa fa y’adwene sie subaen pá bɔ yele ye ne, ɔne bɔ yɛkora yɛyɛ naso. Ɔtɔ mmerɛ bie a, subaen pá bɔ yɛ bɔbɔ yele ye ne, ɔyɛ se kyɛ yɛkɔfa y’adwene yekosie so. Sɛ mmenia ne yɛ anni ye yé a, ɔmaa yɛte ngã kyɛ mvasoɛ biala nné yɛ so. Afei koso, sɛ yɛdwenedwene bɔne bɔ yayɛ yapɛ nu nanwo a, ɔkora maa yɛte ngã kyɛ Yehowa ndwene yɛnwo. Sɛ sɔ adwene nemɔ bie ba yɛ tianu a, nzu yeɛ ɔkɔhora kɔboka yɛ ɔ?
Kae kyɛ, kyɛbɔ sona si nwu nikyee ne, nná sɔ koraa yeɛ Yehowa nwu ye ɔ. (1Sa 16:7) Ɛhe kyire kyɛ, Yehowa se yɛ tra kyɛbɔ yɛ bɔbɔ yɛse yɛnwo ne. Nakoso, ɔyɛ yɛ fɛ paa kyɛ Bible ne aboka yɛ maa yate kyɛbɔ Yehowa si nwu yɛ nabo ɔ. Sɛ yɛdwenedwene Bible nu dwirɛ bɔ ɔfa kyɛbɔ Yehowa dɔ y’asomvoɛ nanwo a, ɔkɔboka yɛ maa yɛkɔte kyɛbɔ Yehowa si nwu yɛ nabo.
NEA VIDIO BƆ YEƐ OLE, NYA GYIDIE KYƐ YEHOWA DƆ WƆ, NA YE NZƐMMISA BƆ OLILI SO HEMƆ NOA:
Mvandoho bɔ ɔfa akwalaa bɔ né otu amirika nanwo ne, sɛɛ yeɛ ɔmaa yɛte kyɛbɔ Yehowa si nwu yɛ nabo ɔ?
Sɛ ebie yɛ bɔne bɔ enu yɛ nõ, na ɔbɔ mmɔden siesie ɔne Yehowa afĩa a, ɔkɔyɛ sɛɛ né wanya gyidie kyɛ Yehowa afa ahyɛ ye?—1Yo 3:19, 20
Dawide ne Yehosafate nwo dwirɛ bɔ aliemaa ne susuli yenwo ne, sɛɛ yeɛ ɔbokale ye ɔ?