Nzɛngyerɛnneɛ Bɔ Ɔmaa Mmeni Pee Nyane Paanoo Lili Ɔ

1. Bɛbɔ bɛtenane ase tete ne, sɛɛ yeɛ né paanoo nwo hia bɛ ɔ?

BƐBƆ bɛtenane ase tete ne, né paanoo te aleɛ bɔ bɛtaa bedi ɔ. (Gye. 14:18; Luka 4:4) Ɔnate kyɛ né ɔnyɛ nna nati, ɔtɔ mmerɛ bie a, né Bible ne kora fa “paanoo” gyina berɛ ma aleɛ biala. (Mat. 6:11) Yesu nzɛngyerɛnneɛ nyɔ bie bɔ mmenia se yenwo dwirɛ paa ne, paanoo yeɛ ɔfa yɛle ɔ. (Mat. 16:​9, 10) Yenwu sɔ nzɛngyerɛnneɛ nanu kõ wɔ Yohane yeti 6 nanu. Mmerɛ bɔ yesusu sɔ dwirɛ nanwo ne, yɛkɔnea bɔ yɛkɔhora yekosua yekofi nu ɛnnɛ ɔ. 

2. Nzuati yeɛ né aleɛ nwo aahia ɔ?

² Mmerɛ bɔ Yesu asomafoɛ nemɔ bɛɛhane nzɛmba ne beyiele ne, ɔne bɛ fole ɛlɛen pɛle Galilea Po ne, kyɛbɔ ɔkɔyɛ a, bekoole bɛ nwomeɛ ɔ. (Mak. 6:​7, 30-32; Luka 9:10) Beewurale Betesaeda kuro ne nekaa bie bɔ né ɛberɛ te dinn. Bedwuli berɛ ne, wangyɛ biala yeɛ mmeni pee pole bɛso ɔ. Yesu amvoa bɛ, na mmom onyane bɛnwo aboterɛ hane Ahennie nanwo dwirɛ hyirele bɛ, na ɔsale bɛbɔ bɛnde apɔ ne anwonyerɛ. Né aleɛ sã, yeti aleɛ bɔ né sɔ mmenia pembepembe ne konya ye koli ne, né asuafoɛ nemɔ dwene yenwo paa. Benu biemɔ wɔ berɛ a, né bele aleɛ kãa wɔ bɛnwo. Nakoso benu pee nala de, né odikyɛ bɛkɔ namue nemɔ nu bɛkɔpena bie bɛtɔ. (Mat. 14:15; Yoh. 6:​4, 5) Yede, nzu yeɛ né Yesu kɔyɛ ɔ?

YESU NATE NZƐNGYERƐNNEƐ SO MANE MMENI LƆEN PAANOO

3. Nzu yeɛ Yesu hahyirele ye asomafoɛ nemɔ kyɛ bɛyɛ bɛma mmenia nemɔ ɔ? (Nea foto bɔ ɔwɔ.)

³ Yesu hahyirele ye asomafoɛ nemɔ kyɛ: “Onhia kyɛ bɛkɔ, ɛ́mɔma bɛ nikyee ma beli.” (Mat. 14:16) Né ɛhe kɔyɛ se kɔma bɛ paa, ofikyɛ mmrienzua kɔyɛ 5,000 yeɛ né bɛwɔ berɛ ɔ. Sɛ bɛfa mmrasua ne ngwalaa bɛbokaso a, mmenia kɔyɛ 15,000 yeɛ né odikyɛ bɛma b’aleɛ ɔ. (Mat. 14:21) Andrea hane kyɛ: ‘Abɛɛmaa bie wɔ wa bɔ ole ayuo paanoo nnu ne egyein nyɔ ɔ; nakoso ɛhe de, aso ɔkɔso mmenia wora he di?’ (Yoh. 6:9) Né ayuo paanoo te aleɛ bɔ mmenia kuro ɔ, na bɛbɔ wahia bɛ paa yeɛ né bedi ɔ. Ɔkɔyɛ kyɛ ne egyein ne koso te worowaa, na né bawura ye ngyee. Ɔnate kyɛ ne mmenia nemɔ sone nati, né sɔ aleɛ kãa bɔ abɛɛmaa ne le ye ne, ɔngɔsõ bɛ.

4. Edwirɛ bɔ ɔwɔ Yohane 6:​11-13 ne, nzu yeɛ yɛkɔhora yekosua yekofi nu ɔ? (Nea foto ne koso.)

⁴ Né Yesu pena kyɛ ɔsõ mmenia nemɔ wɔfoɛ, yeti ɔhane kyɛ bɛkyekyɛ benu kure kure, na bɛtenatena ɛserɛ naso. (Mak. 6:​39, 40; kenga Yohane 6:​11-13.) Ɛhene sĩ ne, Yesu lale ye Baba ase wɔ paanoo ne egyein bɔ wafa wama ye nanwo, ofikyɛ Nyameɛ yeɛ né walo ye maa yesa ahã sɔ nningyein ne ɔ. Bɔ Yesu yɛle ne maa yenwu kyɛ, mmerɛ biala bɔ yɛbaadidi ne, odikyɛ yɛbɔ mbaeɛ, ɔmva yenwo kyɛ yɛwɔ mmenia nu, anaa yɛ ngome yeɛ yɛwɔ berɛ ne. Yesu maa ye asuafoɛ nemɔ kyekyɛle aleɛ ne mane mmenia ne, na ebiala didili maa yeko yili. Aleɛ ne bie po hale, nakoso né Yesu mbena kyɛ ɔsɛkye mbaen. Yeti ɔhane kyɛ bɛboa yenoa, kyɛbɔ ɔkɔyɛ a, bekoli ye mmerɛ foforɛ ɔ. Yesu nate ɛhe aso maa yenwuni kyɛ ɔnzɛkyɛ yɛsɛkye aleɛ, anaa nikyee foforɛ biala. Sɛ ɛte awofoɛ a, ɛkɔhora ne wɔ mmaamɔ kosusu ɛhe anwo maa bekonwu bɔ yeti yeɛ odikyɛ bɛbɔ mbaeɛ, bɛsõ mmenia wɔfoɛ, ná bɛyɛ bɛ pá ɔ. 

5. Mmerɛ bɔ mmeni lɔen ne nwuni bɔ Yesu ayɛ ne, nzu yeɛ bɛyɛle kyɛ bɛyɛ ɔ, na nzu yeɛ Yesu wora yɛle ɔ?

⁵ Mmerɛ bɔ mmeni lɔen ne nwuni kyɛbɔ Yesu se ngyerɛkyerɛ, ɔne anwanwadeɛ bɔ ɔyɛ ne, bɛnwo dwirili bɛ. Né bɛse kyɛ Mose hyɛle ngɔm kyɛ Nyameɛ kɔye diyifoɛ pirikua bie kɔma bɛ. Yeti ebiaa ne bebisa bɛnwo kyɛ: ‘Yesu yeɛ ole sɔ diyifoɛ ne anaa?’ (Deut. 18:​15-18) Ebiaa benyane adwene kyɛ sɛ Yesu badi bɛso a, ɔkɔyɛ ɔhene bɔ ole tumi bɔ ɔkɔmaa ebiala konya aleɛ koli wɔ maen nanu ɔ. Ɛhene ati bɛyɛle kyɛ ‘bɛbaahye ye bɛfa ye bedi hene.’ (Yoh. 6:​14, 15) Sɔ mmerɛ ne, Romanfoɛ yeɛ né bedi Yudafoɛ nemɔ aso ɔ. Yeti sɛ Yesu mane b’atee a, ahaa okohyire kyɛ ɔta Yudafoɛ nemɔ si. Ɛhene ati wanyɛ sɔ. Bible ne kã kyɛ, ‘ɔhwene ye nwo, na ɔhɔle bokaa ne aso.’ Ɔmva yenwo ne bɔ mmenia yɛle ne, Yesu amva yenwo anwurowura amanyɔnzɛm nu lle. Bɔ ɔyɛle ne, yɛkɔhora yekosua nikyee yekofi nu.

6. Sɛɛ yeɛ yɛkɔhora yekosuesua bɔ Yesu yɛle ne? (Nea foto ne koso.)

⁶ Ɔwɔ nu, mmenia ngɔhyɛda ngɔhã kyɛ yɛyɛ nzɛngyerɛnneɛ ma benya aleɛ beli, yɛsa b’anwonyerɛ, anaa bɛma yeli bɛso hene. Nakoso, ebiaa bɛkɔhã alaa kyɛ ebie bɔ besusu kyɛ ɔkɔmaa nningyein kɔyɛ yé ne, yɛto aba yɛma ye, anaa yɛyɛ nikyeebie bɔ okyire kyɛ yɛta ye si ɔ. Nakoso yɛse bɔ Yesu yɛle ne pefee. Wamva yenwo wanwurowura amanyɔnzɛm nu lle. Ɔhane po kyɛ: “M’ahennie ne, offi wiase wa.” (Yoh. 17:14; 18:36) Yɛbɔ yɛte Kristofoɛ ne, yɛbɔ mmɔden kyɛ yekosuesua bɔ Yesu yɛle ne. Yeti yɛ koso yɛta Nyameɛ Ahennie ne si, yedi yenwo adanzeɛ, na yɛbɔ mbaeɛ kyɛ ɔbra. (Mat. 6:10) Yede, ɛmɔma yesa yɛnea Yesu nzɛngyerɛnneɛ bɔ ɔfa paanoo nwo ne, na yɛnea nikyee foforɛ bɔ yɛkɔhora yekosua yekofi nu ɔ. 

‘PAANOO NE NWO NZƐNGYERƐNNEƐ NE’

7. Nzu yeɛ Yesu yɛle ɔ, na ɔhane asomafoɛ nemɔ sɛ? (Yohane 6:​16-20)

⁷ Mmerɛ bɔ Yesu mane mmeni lɔen ne aleɛ yiele ne, ɔmaa ye asomafoɛ nemɔ fole ɛlɛen bɛhɔle Kapanɔm. Ye bɔbɔ de, oowurale bokaa naso dɔ, kyɛbɔ ɔkɔyɛ a bengonya ye bɛngɔfa ye bengosi hene ɔ. (Kenga Yohane 6:​16-20.) Asomafoɛ nemɔ te ɛlɛen nanu bɔ bɛkɔ ne, mvrama pirikua bie tuli na asorɔkye serɛserɛ bie bɔle. Bɛkwaato bɛnye a, Yesu yeɛ ɔnate nzue naso bɔ ɔba ye. Ɔhahyirele Petro po kyɛ, ɔnate nzue naso ɔbra. (Mat. 14:​22-31) Yesu fole ɛlɛen nala pɛ, yeɛ mvrama ne yakyili ɔ. Asuafoɛ nemɔ nwo dwirili bɛ, na bɛhane kyɛ: “Amba, wɔ ole Nyameɛ Awa ne.”a (Mat. 14:33) Ebie bɔ né wama mmeni lɔen bɔ bɛte sɔ aleɛ ne de, ne ɔnzɛkyɛ ahãa ɔyɛ bɛ nwanwa kyɛ wahora wanate ɛpo so ɔ. Marko hane kyɛ: “Bɛ nwo dwirili bɛ paa, ofikyɛ né bennya bɛttele paanoo ne nwo nzɛngyerɛnneɛ bo, ofikyɛ né bapirim b’ahone.” (Mak. 6:​50-52) Nahorɛ nu ne, tumi bɔ né Yehowa afa ama Yesu kyɛ ɔfa yɛ nzɛngyerɛnneɛ ne, ne asomafoɛ nemɔ nnya bɛttele yebo. Ɛhene si ne, Yesu sa hane paanoo nanwo dwirɛ, na ɔmaa yenwuni asuadeɛ foforɛ bɔ ɔwɔ nu ɔ.

8-9. Nzuati yeɛ né mmeni lɔen ne pena Yesu ɔ? (Yohane 6:​26, 27)

⁸ Mmeni lɔen bɔ Yesu mane bɛ aleɛ ne, bɔ né bɛpena alaa yeɛ ole kyɛ bekonya bɔ behia ɔ. Nzuati yeɛ yɛkã sɔ ɔ? Aleɛ hyene ne, benwuni kyɛ Yesu ne ye asomafoɛ nemɔ nne berɛ. Yeti bɛfole ɛlɛen biemɔ bɔ ofi Tiberia wale ne, na bɛhɔle Kapanɔm kyɛ bɛkwaapena Yesu. (Yoh. 6:​22-24) Aso né bɛpena kyɛ betie Ahennie nanwo dwirɛ pee ti yeɛ bɛyɛle sɔ anaa? Daabi, na mmom bɔ né bɛdwene yenwo alaa yeɛ ole paanoo bɔ né bekonya ye bekoli ne. Nzu yeɛ ɔmaa yenwu ye sɔ ɔ?

⁹ Mmerɛ bɔ benwuni Yesu wɔ nekaa bie bɔ opingye Kapanɔm ne, ɛmɔma yɛnea bɔ ɔhɔle so ɔ. Yesu hahyirele bɛ kyɛ, aleɛ bɔ bɛpena bedi nati yeɛ bɛpena ye ɔ. Ɔmaa benwuni kyɛ ‘paanoo bɔ beli maa bɛ ko yili ne,’ ɔte “aleɛ bɔ ɔsɛkye ɔ.” Otuli bɛ foɛ kyɛ, “aleɛ bɔ ɔtena berɛ kɔ daa ngoa nu” ɛhene mmom yeɛ bɛyɛ yenwo adwuma ɔ. (Kenga Yohane 6:​26, 27.) Yesu hane kyɛ ye Baba yeɛ ɔkɔfa sɔ aleɛ ne kɔma bɛ ɔ. Mmerɛ bɔ mmeni lɔen ne tele kyɛ sãa aleɛ bie kora ma daa ngoa ne, ɔkɔyɛ kyɛ ɔyɛle bɛ nwanwa paa! Né ɔte nzu aleɛ, na bɛbɔ né bétie Yesu ne, né ɔkɔyɛ sɛɛ né bɛsa ahã ye?

10. Nzu yeɛ né odikyɛ mmenia nemɔ yɛ, na banya “daa ngoa”?

¹⁰ Ɔkɔyɛ kyɛ né sɔ Yudafoɛ nemɔ adwene yɛ bɛ kyɛ, odikyɛ bɛyɛ nningyein anaa adwuma biemɔ kora né bɛsa ahã sɔ aleɛ ne. Ebiaa “nnwumaa” bɔ Mose Mmraa ne hane yenwo dwirɛ ne yeɛ né ɔwɔ bɛ tianu ɔ. Nakoso Yesu hahyirele bɛ kyɛ: “Bɔ ɔte Nyameɛ adwuma ɛhe, kyɛ ɛmɔkole bɔ wasoma ye ne bekoli ɔ.” (Yoh. 6:​28, 29) Sɛ bekonya “daa ngoa” a, ne odikyɛ benya sona bɔ Nyameɛ asoma ye nanu gyidie. Né Yesu alimoa ahã ɛhe anwo dwirɛ dada. (Yoh. 3:​16-18, 36) Bɔ yɛkɔyɛ né yanya daa ngoa ne, né okosa kɔhã yenwo dwirɛ pee.—Yoh. 17:3.

11. Nzu yeɛ Yudafoɛ nemɔ yɛle bɔ né okyire kyɛ b’adwene té wɔ paanoo bɔ bekoli naso ɔ? (Edwein 78:​24, 25)

¹¹ “Nyameɛ adwuma” bɔ Yesu hane yenwo dwirɛ hyirele sɔ Yudafoɛ nemɔ ne, banné bando nu, ofikyɛ né ɔte bɛnye so foforɛ. Bebisale ye kyɛ: “Nzaade, nzɛngyerɛnneɛ beni yeɛ ɛkɔyɔ, bɔ yɛkonwu ye, bɔ ɔkɔmaa yɛkole wɔ yɛkoli ɔ?” (Yoh. 6:30) Bɛhane kyɛ bɛ nana mɔ lili mana wɔ Mose aberɛ so. Né sɔ aleɛ ne tekyɛ paanoo. (Neh. 9:15; kenga Edwein 78:​24, 25.) Nahorɛ nu ne, ne b’adwene té wɔ paanoo bɔ bekoli maa bɛko koyi naso. Yesɔ nati, mmerɛ bɔ Yesu hane “nahorɛ paanoo bɔ ofi nyameɛso” bɔ né ɔkɔhora kole bɛ ngoa nanwo dwirɛ ne, bammisa ye po maa wangyirekyire benu. (Yoh. 6:32) Né anwoɔnaen nu nningyein nwo hia bɛ alaa maa bebuli bɛnye beguale nahorɛ bɔ né Yesu pena kyɛ ɔmaa benwu ye naso. Nzu yeɛ yɛkɔhora yekosua yekofi sɔ dwirɛ nanu ɔ?

BƆ ODIKYƐ YƐMAA YENWO HIA YƐ PAA Ɔ

12. Sɛɛ yeɛ Yesu maa yenwuni bɔ yenwo hia paa ɔ?

¹² Nikyee titire bɔ yesua yefi Yohane yeti 6 nanu yeɛ ole kyɛ, odikyɛ yɛmaa yɛne Yehowa afia bɔ ɔkɔyɛ kama nanwo hia yɛ tra nikyee biala. Kae kyɛ mmerɛ bɔ Satan sɔle Yesu neane ne, sɔ ala yeɛ ɔyɛle ɔ. (Mat. 4:​3, 4) Afei ye bokaaso asɛnga nanu ne koso, osili sotie bɔ yɛkɔyɛ yɛkɔma Yehowa naso dua paa. (Mat. 5:3) Yeti yɛkɔhora yekobisa yɛnwo kyɛ: ‘Aso kyɛbɔ mebɔ me bra ne, okyire kyɛ mene Yehowa afia bɔ ɔkɔyɛ kama nanwo hia me tra bɔ me bɔbɔ mekuro anaa?’

13. (a) Ɔtte mvomsoɛ kyɛ yekodidi na yɛnye agye ɔ. Nzuati ɔ? (b) Kɔkɔbɔ beni yeɛ odikyɛ yesusu yenwo ɔ? (1 Korintofoɛ 10:​6, 7, 11)

¹³ Mvomsoɛ nne yenwo kyɛ yɛkɔsrɛ Yehowa kyɛ, ɔma yɛsa hã nningyein bɔ yehia bɔ ɔkɔmaa yɛnye kɔgye ɔ. (Luka 11:3) Sɛ ebie yɛ adwuma serɛ bɔ ɔkɔmaa “okodidi, ɔkɔno” ná yenye agye a, ɛhene koso “Nyameɛ yeɛ ɔfa ma ɔ.” (Nwo. 2:24; 8:15; Yak. 1:17) Ɛhe anu po ne, odikyɛ yenya sɔ nningyein nemɔ nwo adwene bɔ ɔfata ɔ. Somafoɛ Pɔɔlo hane ɛhe anwo dwirɛ, mmerɛ bɔ né ɔtworɔ krataa kɔma tete Kristofoɛ nemɔ ne. Bɔ Yisraelfoɛ nemɔ yɛle mmerɛ bɔ né bɛnate ɛserɛ so, ɔne bɔ ɔhɔle so wɔ Sinai Bokaa nanwo ne, ɔhane yenwo dwirɛ. Ɔbɔle sɔ Kristofoɛ nemɔ kɔkɔ kyɛ ‘nnɛmaa bedi bɔne si kyɛbɔ Yisraelfoɛ nemɔ yɛle ne.’ (Kenga 1 Korintofoɛ 10:​6, 7, 11.) Yehowa yɛle anwanwadeɛ pee mane Yisraelfoɛ nemɔ, nakoso ɔnate kyɛ né bɛnye boro nikyee nati, bɛnye anzɔ, na ɔyɛle kyɛbɔ ‘beli bɔne si’ ne. (Num. 11:​4-6, 31-34). Bɔ ne yenwo hia bɛ paa yeɛ ole kyɛ bekodidi, bɛkɔno, na bagye bɛnye tekyɛ mmerɛ bɔ né bɛsõ nandwie awa bosoen ne. (Ɛks. 32:​4-6) Pɔɔlo fale sɔ dwirɛ hemɔ yɛle kɔkɔbɔ mane Kristofoɛ nemɔ, ofikyɛ ne waha kãa maa bɛsɛkye Yerusalem ne ye asɔre awuro ne wɔ afoɛ 70 Y.A (Y’aberɛ So). Yɛ koso yɛte ewiase he ayieleɛ mmerɛ nu, yeti odikyɛ yɛfa Pɔɔlo afutue ne anyeborolɛ dwirɛ.

14. Nzu yeɛ yɛnea atee yɛfa aleɛ nwo wɔ ewiase foforɛ nanu ɔ?

¹⁴ Mmerɛ bɔ Yesu hane kyɛ yɛbɔ mbaeɛ kyɛ Yehowa “ma yɛ daa daa aleɛ ɛnɛ” ne, osa hane kyɛ yɛsrɛ Nyameɛ kyɛ, ‘ɔma bɛyɔ ye apɛdeɛ wɔ aseɛ so, kyɛbɔ bɛyɔ ye wɔ nyameɛso ne.’ (Mat. 6:​9-11) Ɛnea a sɔ mmerɛ ne, asetena kɔyɛ sɛɛ? Bible ne maa yenwu ye kyɛ Nyameɛ apɛdeɛ bɔ ɔkɔyɛ berɛ wɔ aseɛ he aso ne, aleɛ koso nwo dwirɛ boka so. Yesaya 25:​6-8 maa yenwu kyɛ, aleɛ pá kobu so wɔ Yehowa Ahennie nanu. Edwein 72:16 kã kyɛ: ‘Ma aleɛ obu so wɔ aseɛ ne aso, maa aleɛ ɔsone wɔ mmokaa nemɔ aso po.’ Aso ɛnea atee kyɛ aleɛ bie bɔ ekuro ye paa, anaa elilli bie lle ne, ɛkɔyɛ bie koli anaa? Anaa wɔde ɛnea atee kyɛ ɛkɔyɛ wɔ boo na ali nu aleɛ hɔ ɔ? (Yes. 65:​21, 22) Kyɛbɔ ɔte biala ne, ebiala nye kɔgye paa sɔ mmerɛ ne.

15. Bɛbɔ bekotingye bɛ wɔ ewiase foforɛ nanu ne, nzu yeɛ bekosua ɔ? (Yohane 6:35)

¹⁵ Kenga Yohane 6:35. Wɔde sa susu mmenia bɔ Yesu mane bɛ paanoo ne egyein maa belili nanwo bieku. Ɔwɔ nu, benu pee annya Yesu nu gyidie, nakoso ebiaa bekotingye bɛ, na ebiaa ekoyia benu biemɔ po wɔ ewiase foforɛ nanu. (Yoh. 5:​28, 29) Sɔ mmenia nemɔ, yenwo kohia kyɛ bɛkɔte Yesu dwirɛ he abo: “Me ole ngoa paanoo ne; ebiala bɔ ɔba me berɛ nen, ɛhɔen ngohũ ye le.” Odikyɛ benya gyidie kyɛ Yesu nate ye wue naso yeɛ wale bɛ ngoa ɔ. Sɔ mmerɛ ne, bɛbɔ bekontingye bɛ, ɔne ngwalaa bɔ bɛkɔwo bɛ ne, bekonya yenwo atee bekosua Yehowa nwo nikye. Sɛ enya yenwo atee kyɛ ekohyirehyire bɛ bie a, nea kyɛbɔ wɔnye kɔgye ɔ. Nahorɛ nu, ɔkɔyɛ fɛ kɔtra aleɛ biala bɔ ekoli ye sɔ mmerɛ ne!

16. Nzu yeɛ yekosusu yenwo wɔ adesua bɔ oli berɛ nanu ɔ?

¹⁶ Edwirɛ bɔ ɔwɔ Yohane yeti 6 ne, ye bue bie yeɛ yasusu nwo wɔ adesua he anu ne. Nakoso, edwirɛ pee wɔ berɛ bɔ Yesu hã fale “daa ngoa” nwo ɔ. Yudafoɛ bɔ ne betie Yesu ne, né odikyɛ bɛmaa sɔ dwirɛ nanwo hia bɛ paa, na yɛ koso sɔ ala. Yeti yɛkɔtoa so yekosusu Yohane yeti 6 nanwo wɔ adesua bɔ oli berɛ nanu.