Ɛkɔhora Kɔtena Ase Daa—Atee Beni Aso?

1. Mmeni pee le adwene kyɛ bɛngɔhora bɛngɔtena ase daa. Nzuati ɔ?

MMENI pee nea b’adidie yé, na bɛtengyɛtengyɛ b’aporɛ nu, ofikyɛ bɛpena kyɛ benya anwoserɛ. Nakoso bɛse kyɛ sɛ bɛyɛ sɔ po a, bɛngɔhye nyɔboɛ. Sɛ bɛnea amaneɛ bɔ mmenia nwu ye mmerɛ bɔ babɔ nworowaa ne a, ɔmaa benné benni kyɛ sona kɔhora kɔtena ase daa. Nakoso Yesu hane ye wɔ Yohane 3:​16, ɔne 5:24 kyɛ mmenia kɔhora konya “daa ngoa.”

2. Nzu yeɛ Yohane yeti 6 ne kã fa daa ngoa nwo ɔ? (Yohane 6:​39, 40)

² Ɛlɛhõ bie, Yesu yɛle nzɛngyerɛnneɛ maa mmeni lɔen bie nyane paanoo ne egyein belili.a Né ɛhe yɛ nwanwa paa, nakoso edwirɛ bɔ aleɛ hyene ne, ɔhahyirele bɛ ne, né ɔbo adwene ne ndeaseɛ so. Né bali ye si bahɔ Kapanɔm, nekaa bɔ opingye Galiliea po ne noa ne, na ɛberɛ yeɛ ɔhane kyɛ, okotingye bɛbɔ bawu ne maa bɛkɔtena ase daa ne. (Kenga Yohane 6:​39, 40.) Enwu ye kyɛ ɛhe fa wɔ damvomɔ ne w’abusuafoɛ bɔ bawu nanwo anaa? Yesu dwirɛ ne kyire kyɛ bekotingye mmeni pee bɔ bawu ne, na ɛne mmenia bɔ ekuro bɛ dwirɛ ne kɔhora konya daa ngoa. Nakoso, edwirɛ bɔ Yesu hã toale so wɔ Yohane yeti 6 nanu ne, ɔyɛ se ma mmeni pee kyɛ bɛkɔte yebo ɔ. Yede, nzu yeɛ ɔhane ɔ?

3. Kyɛbɔ Yohane 6:51 kã ne, nzu yeɛ Yesu bɔbɔ deinn hã fale yenwo ɔ?

³ Paanoo bɔ Yesu famane mmeni lɔen ne wɔ Kapanɔm ne, ɔmaa bɛkaele mana bɔ Yehowa fa mane bɛ nanamɔ ne. Ne bɛse kyɛ Bible ne frɛle sɔ aleɛ ne “paanoo bɔ ofili nyameɛso wale ase ne.” (Edw. 105:40; Yoh. 6:31) Bɔ né bɛse bɛfa mana nanwo ne, Yesu gyinane so hyirehyirele bɛ. Ɔwɔ nu, né mana ne te anwanwadeɛ bɔ ofi Nyameɛ berɛ ɔ, nakoso bɛbɔ belili bie ne, siɛ ye bewuli. (Yoh. 6:49) Yesu hane ye bɔbɔ yenwo dwirɛ kyɛ ɔte “nahorɛ paanoo bɔ ofi nyameɛso,” “Nyameɛ paanoo,” ɔne “ngoa paanoo” ne. (Yoh. 6:​32, 33, 35) Ɔmaa benwuni nzozoleɛ deinn bɔ ɔla ɔne sɔ mana ne afia ɔ. Ɔhane kyɛ: “Me ole ngoa paanoo bɔ ofi nyameɛso wale ase ne; na sɛ ebie di paanoo he bie a, ɔkɔtena ase daa.” (Kenga Yohane 6:51.) Edwirɛ ne yɛle sɔ Yudafoɛ nemɔ nwanwa paa. Né bɛnde yebo kyɛ Yesu nwa yeɛ ole “paanoo” bɔ ofili anwuro wale ne, na odimu tra mana bɔ Nyameɛ famane bɛ nanamɔ ne. Yesu hane edwirɛ bie bɔ ne ɔkɔmaa bɛkɔte bɔ ɔkã nabo ɔ. Ɔhane kyɛ: “Paanoo bɔ ngɔfa ngɔma ne, ye ole me nwonaen.” Nzu yeɛ né Yesu pena kyire ɔ? Odikyɛ yɛte bɔ né ɔkã nabo, ofikyɛ ɔkɔmaa yekonwu kyɛ yɛne y’adɔfo mɔ kɔhora konya daa ngoa. Ɛmɔma yɛnea bɔ né Yesu pena kyire ɔ. 

NGOA PAANOO NE YE NWONAEN

4. Yesu dwirɛ bɔ ɔhane ne, nzuati yeɛ ɔmaa ebiemɔ nwo dwirili bɛ ɔ?

⁴ Mmerɛ bɔ Yesu hane kyɛ “paanoo bɔ ngɔfa ngɔma wiase ngoa ne, ye ole me nwonaen” ne, ɔmaa bɛbɔ ne betie ye nanu biemɔ nwo dwirili bɛ paa. Aso ne b’adwene yɛ bɛ kyɛ, ɔpena kyɛ bedi ye nwonaen deinn anaa? (Yoh. 6:52) Bɔ Yesu hã toale so ne po de, ɔsɛkyele edwirɛ ne koraa. Ɔhane kyɛ: “Mekã mekyire ɛmɔ kyɛ, sɛ ɛmɔanni Sona Awa ne nwonaen, ná ɛmɔanno ye mogya a, ye de ɛmɔlle ngoa wɔ ɛmɔ nu.”—Yoh. 6:53.

5. Nzu yeɛ ɔmaa yenwu ye kyɛ, nna Yesu mogya deinn yeɛ né ɔkã kyire mmenia nemɔ kyɛ bɛno ɔ?

⁵ Nowa aberɛ so ne, Nyameɛ hane kyɛ ɔnzɛkyɛ sona biala di mogya. (Gye. 9:​3, 4) Yehowa sa hane ɛhe anwo dwirɛ wɔ ye Mmraa bɔ ɔfa mane Yisraelfoɛ nemɔ anu. Ebiala bɔ okoli mogya ne, né ‘odi kyɛ bekũ ye.’ (Lew. 7:27) Yesu andu sɔ mmraa ne angua. (Mat. 5:​17-19) Yeti né ɔngɔhã ngohyire bɛ lle kyɛ beli ye nwonaen, na bɛno ye mogya. Edwirɛ bɔ Yesu hane ne, nahorɛ bɔ ɔwɔ nu yeɛ ole kyɛ, né ɔpena kyɛ okyire mmenia nemɔ kyɛbɔ bɛkɔhora bekonya “daa ngoa” ɔ. —Yoh. 6:54.

6. Nzuati yeɛ yɛkɔhora yɛkɔhã kyɛ, edwirɛ bɔ Yesu hã fale ye nwonaen ne ye mogya nwo ne, ɔte mvandoho bie yeɛ né ɔyɛ ɔ?

⁶ Nzu yeɛ né Yesu pena kyire ɔ? Yɛkora yenwu ye kyɛ, mvandoho bie yeɛ né ɔyɛ ɔ, tekyɛ mmerɛ bɔ né ɔne Samarianiɛ braa ne bɔ ngɔmmɔ nala. Ɔhane kyɛ: “Ebiala bɔ ɔkɔno nzue bɔ ngɔma ye bie ne de, nzuhɔen ngohũ ye le. Na nzue bɔ ngɔfa ngɔma ye ne, ɔkɔyɛ nzue abura wɔ ye nu bɔ opu kɔ daa ngoa nu ɔ.” (Yoh. 4:​7, 14)b Nna bɔ né Yesu pena kyire yeɛ ole kyɛ, sɛ Samarianiɛ braa ne no nzue pɔtee bie a, okonya daa ngoa. Sɔ ala yeɛ mmeni lɔen bɔ ne odwudwo kyire bɛ wɔ Kapanɔm ne koso, né ɔtte kyɛ ɔkã kyire bɛ kyɛ sɛ bedi ye nwonaen, na bɛno ye mogya a, bɛkɔtena ase daa.

NZONZOLEƐ BƆ ƆWƆ EDWIRƐ NYƆ BƆ YESU HANE NANU Ɔ

7. Nzu yeɛ ebiemɔ kã fa edwirɛ bɔ Yesu hane ye wɔ Yohane 6:53 nanwo ɔ?

⁷ Ebiemɔ kã kyɛ edwirɛ bɔ Yesu hane ye wɔ Yohane 6:53 kyɛ beli ye nwonaen, na bɛno ye mogya ne, ɔmaa yenwu bɔ odikyɛ yɛyɛ ye wɔ Awurade Nɔsoa Aleɛ nabo. Ofikyɛ besusu kyɛ sɔ dwirɛ bɔ ɔhane ne, ɔpena ne bɔ ɔhane ye wɔ sɔ nɔsoa aluolue nabo ne yɛ kõ. (Mat. 26:​26-28) Yeti bɛnwa ebiala bɔ ɔkɔwa Awurade Nɔsoa Aleɛ nabo ne, odikyɛ odi paanoo ne, ná ɔno nzaa ne koso bie. Aso ɛhe te nahorɛ? Yenwo hia paa kyɛ yekonya sɔ dwirɛ nanwo mmuayɛɛ, ofikyɛ afoɛ biala mmeni pee yeɛ bɛbaboka yɛ so wɔ ewiase mukoraati maa yɛyɛ sɔ dwumadie ne. Yɛbaanea nzonzoleɛ bɔ ɔla edwirɛ bɔ Yesu hane wɔ Yohane 6:​53, ɔne bɔ ɔhane ye wɔ Awurade Nɔsoa Aleɛ nabo ne afia ɔ.

8. Nzonzoleɛ beni yeɛ ɔwɔ edwirɛ nyɔ bɔ Yesu hane nanu ɔ? (Nea foto ne koso.)

⁸ Ɛmɔma yɛnea nzonzoleɛ bɔ ɔwɔ sɔ dwirɛ nyɔ nanu ɔ. Bɔ olimoa ne, nisua yeɛ Yesu hane edwirɛ bɔ ɔwɔ Yohane 6:​53-56 ne, na mmerɛ beni yeɛ ɔhane ɔ? Ɔhane ye wɔ Galilea afoɛ 32 Y.A (Y’aberɛ So), na Yudafoɛ mmeni lɔen bie yeɛ ɔhahyirele bɛ ɔ. Ɔhane sɔ dwirɛ ne, kɔyɛ afoɛ kora yeɛ ɔfa Awurade Nɔsoa Aleɛ ne sie berɛ wɔ Yerusalem ɔ. Bɔ ɔtɔ so nyɔ, nwamɔ yeɛ né ye dwirɛ ne kɔ ma bɛ ɔ? Mmenia bɔ né betie ye wɔ Galilea ne, bɔ né yenwo hia benu pee yeɛ ole paanoo bɔ bekoli maa bɛko koyi ne, na mmom ɔtte Nyameɛ Ahennie nanwo dwirɛ bɔ ne ɔkã kyire bɛ ne. (Yoh. 6:26) Mmerɛ bɔ Yesu hane edwirɛ bie bɔ né bɛnde yebo ne, banné ye banni kõ, na ye asuafoɛ ne biemɔ po anni ye si kõ. (Yoh. 6:​14, 36, 42, 60, 64, 66) Ma yɛfa ɛhe yɛtoto bɔ ɔhɔle so kɔyɛ afoɛ si, mmerɛ bɔ né Yesu fa Awurade Nɔsoa Aleɛ ne sie berɛ wɔ afoɛ 33 Y.A. nanwo. Wɔ sɔ dwumadie nabo ne, né ye asomafoɛ 11 bɔ bedi nahorɛ ne boka ye so. Ɔwɔ nu, nna nikyeebiala bɔ ohyirehyirele bɛ ne, yeɛ né bɛte yebo ɔ. Nakoso né bɛtte kyɛ Galileafoɛ nemɔ. Bɛ de, ne bedé bedi paa kyɛ Yesu yeɛ ɔte Nyameɛ Awa bɔ ofi anwuro wale ne. (Mat. 16:16) Ɔhahyirele bɛ kyɛ: “Ɛmɔ yeɛ ɛmɔ ne me banate alaa wɔ me nzɔhwɛ nu ɔ.” (Luka 22:28) Sɔ nningyein nyɔ bɔ yasusu yenwo ne, ɛhene angome po maa yenwu ye kyɛ, Yesu dwirɛ bɔ ɔwɔ Yohane 6:53 ne, ɔmva Awurade Nɔsoa Aleɛ nanwo, kyɛbɔ ebiemɔ adwene yɛ bɛ ne. Nakoso, adanzeɛ foforɛ pee wɔ berɛ.

KYƐBƆ YESU DWIRƐ NE FA WƆNWO Ɔ

9. Edwirɛ bɔ Yesu hane ye wɔ Awurade Nɔsoa Aleɛ nabo ne, né ɔfa nwamɔ nwo?

⁹ Awurade Nɔsoa Aleɛ nabo ne, Yesu fale paanoo kabrɛdi mane ye asomafoɛ nemɔ, na ɔhane kyɛ ogyi berɛ ma ye nwonaen. Afei ɔfale nzaa ne mane bɛ, na ɔhane kyɛ ogyi berɛ ma ‘apam foforɛ nanwo mogya’ ne. (Mak. 14:​22-25; Luka 22:20; 1 Kor. 11:24) Sɔ dwirɛ nanwo hia paa, ofikyɛ apam foforɛ ne, nna mmenia mukoraati yeɛ Yehowa ne bɛ yɛle ɔ, na mmom ɔne “[honhom nu] Yisrael awuro ama” bɔ bɛne Yesu koli bia wɔ anwuro ne yeɛ bayɛ ɔ. (Heb. 8:​6, 10; 9:15) Sɔ mmerɛ ne, asomafoɛ nemɔ ande sɔ dwirɛ ne mukoraati bo. Nakoso, né ɔngɔhyɛ bɛkɔfa honhom krongron bɛkɔpopa bɛ maa bɛkɔɔboka apam foforɛ naso, kyɛbɔ ɔkɔyɛ a bɛne Yesu koli hene wɔ anwuro ɔ.—Yoh. 14:​2, 3.

10. Edwirɛ bɔ Yesu hane ye wɔ Awurade Nɔsoa Aleɛ nabo ne, sɛɛ yeɛ ɔte sorongo wɔ bɔ ɔhane ye wɔ Galilea nanwo ɔ? (Nea foto ne koso.)

¹⁰ Hyɛ ye nzorɛ kyɛ Awurade Nɔsoa Aleɛ nabo ne, ne Yesu dwudwo kyire ‘kue kaaba’ ne. Ye asomafoɛ bɔ bedi nahorɛ bɔ ne bɛboka ye so wɔ sɔ sua nanu ne, bɛ yeɛ belimoa wɔ sɔ kue nanu ɔ. (Luka 12:32) Yeti bɛ yeɛ belili paanoo ne, na bɛnone nzaa ne bie ɔ. Bɛbɔ siɛ ye ne bɛkɔɔboka sɔ kue naso ne, mmerɛ biala bɔ bɛyɛ sɔ dwumadie ne, odikyɛ bɛ koso bedi paanoo ne, na bɛno nzaa ne bie ofikyɛ bɛne Yesu koli bia wɔ anwuro. Yeti edwirɛ bɔ ɔhayirele ye asomafoɛ nemɔ wɔ sɔ aluolue nabo ne, ɔte sorongo koraa wɔ bɔ ɔhahyirele mmeni lɔen bɔ ne bayia nu wɔ Galilea ne. Galilea deɛ ne de, né odwudwo kyire mmeni pee.

11. Edwirɛ bɔ Yesu hane ye wɔ Galilea ne, nzu yeɛ ɔmaa yenwu ye kyɛ né ɔnga ma mmenia kãa bie ɔ?

¹¹ Mmenia bɔ né Yesu dwudwo kyire bɛ wɔ Galilea wɔ afoɛ 32 Y.A ne, bɔ né ohia bɛ nu pee nala yeɛ ole paanoo bɔ bekonya ye bekoli ne. Nakoso, Yesu hwene b’adwene siele nikyeebie bɔ ne yenwo hia tra aleɛ naso, na né ɛhene kɔhora kɔmaa bekonya daa ngoa. Yesu sa hane kyɛ bɛbɔ bawu ne, okotingye bɛ ayieleɛ kyẽa ne, na bɛkɔtena ase daa. Sɔ dwirɛ bɔ ɔhane ye wɔ Galilea ne, ɔtte kyɛ bɔ ɔhane ye wɔ Awurade Nɔsoa Aleɛ nabo, bɔ né ɔfa mmeni kãa bie nwo ne. Na mmom, ne ɔkã nhyiraa bɔ mmenia mukoraati konya ye nanwo dwirɛ. Ɛhene ati yeɛ ɔhane kyɛ: “Paanoo bɔ ngɔfa ngɔma wiase ngoa ne, ye ole me nwonaen” ne.—Yoh. 6:51.

12. Nzu yeɛ odikyɛ ebie yɛ, na wamaa wanya daa ngoa?

¹² Aso sɔ dwirɛ bɔ Yesu hahyirele Yudafoɛ nemɔ wɔ Galilea ne, okyire kyɛ ebiala yeɛ okonya ngoa anaa? Daabi, na mmom bɛbɔ ‘bedi sɔ paanoo’ ne, kyire kyɛ benya gyidie wɔ Yesu nu ne, yeɛ bekonya sɔ nhyiraa ne. Bɛbɔ bɛkɔ asɔre ne, benu pee nala nwa sɛ ebie kã ye mbaen kyɛ ‘odé Yesu di,’ na ɔfa ye kyɛ ye kra ne ye agyenkwa a, okonya ngoa. (Yoh. 6:29) Nakoso sɛ ebie yɛ sɔ a, né oyielle. Sɛ yɛnea Galileafoɛ nemɔ sɔa a, ahyɛaseɛ ne, né benu biemɔ dé Yesu di, koso siɛ ye, banni ye si kõ. Nzuati yeɛ bɛyɛle sɔ ɔ?

13. Sɛ ebie kɔhora kɔɔyɛ Yesu suaniɛ a, nzu yeɛ odikyɛ ɔyɛ ɔ?

¹³ Bɛbɔ né beli Yesu si ne, benu pee nala wɔ berɛ a, bɔ né benya befi ye berɛ nati yeɛ né beli ye si ɔ. Bɔ né bɛnye gye yenwo yeɛ ole kyɛ ɔkɔsa b’anwonyerɛ, ɔkɔma b’aleɛ, ná wahã edwirɛ bɔ ɔkɔyɛ́ bɛsoanu fɛ ɔ. Nakoso, Yesu maa benwuni ye kyɛ nna ɛhene ati yeɛ ɔwale aseɛ he aso ɔ. Na mmom ɔwale kyɛ ɔbaahyirehyire bɛ nningyein bɔ ɔkɔmaa bɛkɔhɔso bɛkɔyɛ ye asuafoɛ ɔ. Yeti sɛ ne bɛkɔhora ‘bɛkɔwa ye berɛ’ a, né odikyɛ betie ye, na bedi ye dwirɛ so.—Yoh. 5:40; 6:44.

14. Yesu nipadua ne ye mogya bɔ ɔfa bɔle afɔleɛ ne, nzu yeɛ odikyɛ yɛyɛ na yanya so mvasoɛ ɔ?

¹⁴ Yesu mane bɛbɔ ne betie ye ne nwuni kyɛ, odikyɛ benya gyidie. Wɔ nzu anu? Yeɛ ole kyɛ bɛkole bɛkɔto nu kyɛ ye nipadua ne ye mogya bɔ né ɔkɔfa kɔbɔ afɔleɛ ne, ɔkɔhora kole bɛ. Ne yenwo hia paa kyɛ sɔ Yudafoɛ nemɔ nya sɔ gyidie ne, na yɛ koso odikyɛ yɛyɛ sɔ ala. (Yoh. 6:40) Yesu nipadua ne ye mogya bɔ ɔfa bɔle afɔleɛ ne, sɛ yɛkɔhora yekonya so mvasoɛ a, sana yenya ye wue nanu gyidie, kyɛbɔ Yohane 6:53 kã ne. Mmeni pee yeɛ bɛkɔhora bekonya ɛhe aso mvasoɛ ɔ.—Ɛfe. 1:7.

15-16. Edwirɛ bɔ yenwo hia benimɔ yeɛ Yohane yeti 6 ne maa yenwu ye ɔ?

¹⁵ Edwirɛ bɔ ɔwɔ Yohane yeti 6 ne, ɔmaa yenwu kyɛbɔ Yesu si kuro mmenia dwirɛ ɔ, na ɛhene maa y’ahone tɔ yɛ kunu paa. Mmerɛ bɔ né Yesu wɔ Galilea ne, ɔsale mmenia anwonyerɛ, ɔhane Ahennie nanwo dwirɛ hyirele bɛ, na osa mane bɛ aleɛ maa belili. (Luka 9:11; Yoh. 6:​2, 11, 12) Bɔ yenwo hia paa ne, ɔmaa benwuni kyɛ ye yeɛ ole “ngoa paanoo” ne.—Yoh. 6:​35, 48.

¹⁶ Awurade Nɔsoa Aleɛ dwumadie bɔ bɛyɛ ye afoɛnoa biala ne, sɛ bɛbɔ Yesu hane kyɛ bɛte “mmoaen foforɛ” ne kɔ bie a, benni paanoo ne, na bɛnno nzaa ne bie; ɔnzɛkyɛ bɛyɛ sɔ po. (Yoh. 10:16) Nakoso, Yesu Kristo nipadua ne ye mogya bɔ ɔfa bɔle afɔleɛ ne, benya so mvasoɛ. Sɛ benya gyidie kyɛ sɔ afɔleɛ bɔ ɔbɔle ne kɔhora kole bɛ ngoa a, yeɛ ɔkɔmaa bekonya sɔ mvasoɛ ne ɔ. (Yoh. 6:53) Bɛbɔ odikyɛ bedi paanoo ne, na bɛno nzaa ne bie ne de, bɛboka apam foforɛ naso, na bɛne Yesu koli hene wɔ ye Ahennie nanu. Yeti sɛ yɛboka bɛbɔ bapopa bɛ naso oo, sɛ yɛboka mmoaen foforɛ naso oo, yenwo hia kyɛ yesusu Yohane yeti 6 nanwo, ofikyɛ ɔfa yemukoraati nwo. Ɔmaa yenwu kyɛ sɛ yekonya daa ngoa a, odikyɛ yenya Yesu wue nanu gyidie.