ADESŨA 4
DWEIN 18 Agyede no Som Bo Ma Yɛn
Yesu Ngoa Bɔ Ɔfa Bɔle Afɔleɛ Ne, Nzu Yeɛ Ɔmaa Yenwu Ye Ɔ?
“Kyɛbɔ Nyameɛ yele ye dɔ ne ali wɔ yɛ nu ɛhe.”—1 YOH. 4:9.
BƆ ADESŨA NE KƆHÃ YENWO DWIRƐ Ɔ
Yesu ngoa bɔ ɔfa bɔle afɔleɛ ne, yɛkɔnea subaen ahoroɛ bɔ ɔyɛ nyemene, bɔ ɔmaa yenwu ye yɛfa ɔne Yehowa nwo ɔ.
1. Nzuati yeɛ odikyɛ yɛkɔ Yesu wue aluolue nabo afoɛ biala ɔ?
YESU ngoa bɔ ɔfa bɔle afɔleɛ ne, ɔte akyɛdeɛ pirikua paa! (2 Kor. 9:15) Ɔnate ye wue nati, ɛne Yehowa kɔhora kɔfa adamvoa. Afei koso, ɔmaa enya anyelasoɛ kyɛ ɛkɔhora konya daa ngoa. Yehowa kuro yɛ dwirɛ paa, na ɛhene ati yeɛ ɔmaa Yesu oowuli ɔ. Odikyɛ ɛhe kã yɛ maa yɛda ye ase paa! (Rom. 5:8) Bɔ ɔkɔyɛ né yɛ wora amvi bɔ Yehowa ne Yesu ayɛ ama yɛ ne, Yesu hane kyɛ yɛkae ye wue ne afoɛ biala. Sɛ yɛkɔ sɔ aluolue nabo a, okyire kyɛ yɛnye sɔ bɔ bayɛ bama yɛ ne paa.—Luka 22:19, 20.
2. Nzu yeɛ yekonwu ye wɔ adesua he anu ɔ?
2 Yɛkɔkae Yesu wue ne Fue, April 12, 2025, na yɛse ye paa kyɛ yɛ mukoraati yɛboa yɛnwo kyɛ yɛkɔhɔ bie. Sɛ odwu mmerɛ bɔ yɛfa yɛkae Yesu wue ne, ná yɛdwenedwenea bɔ Yehowa ne Ɔwa ne ayɛ ama yɛ nanwo a, yekonya so mvasoɛ paa. Adesua he anu ne, yɛkɔnea bɔ Yesu wue ne maa yenwu ye yɛfa Yehowa ne Ɔwa nanwo ɔ. Adesua bɔ oli berɛ ne koso, yekonwu bɔ yɛyɛ a ɔkɔmaa yekonya Yesu wue naso mvasoɛ, ɔne bɔ yɛkɔyɛ yɛkɔfa yekohyire kyɛ yɛnye sɔ ɔ.
BƆ YESU WUE NE MAA YENWU YE YƐFA YEHOWA NWO Ɔ
3. Ɔkɔyɛ sɛɛ né sonahorɛ ahora afa ye ngoa abɔ afɔleɛ ale mmeni pee? (Nea foto ne koso.)
3 Yesu ngoa bɔ ɔfa bɔle afɔleɛ ne maa yenwu kyɛ, Yehowa yɛ bɔ ɔtengyɛ ɔ. (Deut. 32:4) Nzuati yeɛ yɛkã sɔ ɔ? Bɔ ɔte yeɛ ole kyɛ, asoserɛ bɔ Adam yɛle ne, ɔfale yɛ hɔle bɔne ne ewue nu. (Rom. 5:12) Yehowa yɛle nhyehyɛɛ maa Yesu oowu mane yɛ, kyɛbɔ ɔkɔyɛ a, okole yɛ kofi bɔne ne ewue nu ɔ. Né bɔne biala nne Yesu nwo, yeti né ɔkɔhora kɔfa ye ngoa kɔbɔ afɔleɛ. Nakoso, ɔkɔyɛ sɛɛ né sonahorɛ ahora afa ye ngoa abɔ afɔleɛ ale mmeni pee? Somafoɛ Pɔɔlo hyirele nu kyɛ: “Kyɛbɔ ɔnate sona ko asoserɛ so ti mmeni pee yɛle bɔnefoɛ nen, sɔ ala yeɛ ɔnate sona ko sotie so mmeni pee kɔyɛ teneneefoɛ ɔ.” (Rom. 5:19; 1 Tim. 2:6) Bɔ ɛhe kyire yeɛ ole kyɛ, asoserɛ bɔ sonahorɛ yɛle ne, yeɛ ɔfale yɛ mukoraati hɔle bɔne ne ewue nu ɔ. Yeti né sonahorɛ sotie bɔ ɔkɔyɛ ne koso kɔhora kole yɛ mukoraati.
Kyɛbɔ sonahorɛ fale yɛ hɔle bɔne ne ewue nu ne, sɔ ala yeɛ sonahorɛ koso maa yenyane fanwodie ɔ (Nea ngyekyɛmuɛ 3)
4. Adam bosofoɛ bɔ bɛyɛ sotie bɛma Yehowa ne, nzuati yeɛ né odikyɛ ɔmaa Yesu wu kora né bahora batena ase daa ɔ?
4 Né odikyɛ Yesu wu kora né Yehowa ahora ale yɛ ngoa anaa? Aso né ahaa ɔngɔhora ngɔma Adam bosofoɛ bɔ bɛyɛ sotie bɛma ye ne ngɔtena ase daa, bɔ yenwo ngohia kyɛ Yesu kowu ɔ? Sona nye so de, ebiaa sɔ yeɛ y’adwene kɔyɛ yɛ ɔ. Nakoso, Yehowa de sɛ ɔyɛ sɔ a, ahaa okohyire kyɛ wanyɛ bɔ ɔtengyɛ ɔ. Ɛhene ati, né ɔngɔhora ngobu yenye ngogua asoserɛ bɔ Adam hyɛleda yɛle naso lle.
5. Nzuati yeɛ yɛkɔhora yekonya Yehowa nu gyidie kyɛ ɔkɔyɛ bɔ ɔtengyɛ mmerɛ biala ɔ?
5 Sɛ Yehowa buli yenye guale nningyein so maa Adam bosofoɛ bɔ bɔne wɔ bɛnwo ne tenane ase daa, yeɛ wamma Yesu amma anwu a, ahaa nzu yeɛ okosi ɔ? Ahaa mmenia ngole Nyameɛ ngoli, ofikyɛ bekonya adwene kyɛ nna mmerɛ mukoraati yeɛ ɔkɔyɛ bɔ ɔtengyɛ, anaa okoli ye bɔhyɛ so ɔ. Nakoso, ɔnzɛkyɛ yɛfa sɔ dwirɛ hemɔ yɛha yɛnwo. Nzuati ɔ? Ofikyɛ Yehowa yɛ bɔ ɔtengyɛ ɔ, yeti yeɛ ɔhora fale Ɔwa bɔ okuro ye dwirɛ ne po bɔle afɔleɛ mane yɛ ne. Ɛhe maa yenya yenu gyidie kyɛ ɔkɔyɛ bɔ ɔtengyɛ mmerɛ biala.
6. Nikyee foforɛ beni ati yeɛ Yehowa maa Ɔwa ne oowuli ɔ? (1 Yohane 4:9, 10)
6 Yesu wue ne te adanzeɛ bɔ okyire kyɛ Yehowa yɛ bɔ ɔtengyɛ ɔ. Nakoso, osa maa yenwu ye kyɛ Yehowa kuro yɛ dwirɛ paa. (Yoh. 3:16; kenga 1 Yohane 4:9, 10.) Ebieku koso, ɔmaa yenwu kyɛ, nna daa ngoa ngome yeɛ Yehowa pena kyɛ yenya ye ɔ, na mmom ɔpena kyɛ yɛboka ye abusua naso. Wɔde susu ɛhe anwo nea oo, mmerɛ bɔ Adam yɛle bɔne ne, Yehowa foane ye fili ye abusua nanu. Ɛhene ati mmerɛ bɔ bɛwole yɛ ne, né yɛbokka Nyameɛ abusua naso. Nakoso, ɔnate Yesu wue nati, Yehowa afa yɛ bɔne ahyɛ yɛ, yeti sɛ yenya yenu gyidie na yɛyɛ sotie yɛma ye a, ɔkɔmaa yɛkɔɔboka ye abusua naso kyẽabie. Ɛnnɛ po, yɛne Yehowa ne yeliemamɔ Kristofoɛ afia kɔhora kɔyɛ kama. Ɛhe mukoraati maa yenwu ye kyɛ, Yehowa kuro yɛ dwirɛ amba!—Rom. 5:10, 11.
7. Amaneɛ bɔ Yesu nwuni ye ne, sɛɛ yeɛ ɔmaa yenwu kyɛ Yehowa kuro yɛ dwirɛ ɔ?
7 Sɛ yesusu ɛyealɛ bɔ Yehowa fale nu kora yeɛ ɔmaa Yesu wu nanwo a, ɔkɔmaa yekonwu ye kyɛ okuro yɛ dwirɛ paa. Satan nwa bɛbɔ bɛsõ Nyameɛ ne, sɛ bɛ́fa ɛyealɛ nu a, benu biala nne berɛ bɔ ɔkɔhɔso koli nahorɛ ɔ. Yesɔ nati, Yehowa mane atee maa Yesu nwuni amaneɛ kora yeɛ owu ɔ, kyɛbɔ ɔkɔyɛ a, ebiala konwu kyɛ Satan te ngondomboniɛ. (Yob 2:1-5; 1 Pet. 2:21) Mmerɛ bɔ né mmenia goro Yesu nwo, sogyafoɛ nemɔ bo ye, ná bɛbɔ ye asɛnnua nu mukoraati ne, né Yehowa nye tua. Afei mmerɛ bɔ né Ɔwa bɔ okuro ye dwirɛ ne wu ewue yeayea ne, onwuni ye mukoraati. (Mat. 27:28-31, 39) Yehowa le tumi bɔ ahaa ɔkɔhora kɔfa kosi ɛhemɔ noa ɔ. Ebie yeɛ ole kyɛ, mmerɛ bɔ Yesu pɔfoɛmɔ hahyirele ye kyɛ: ‘Sɛ Nyameɛ kuro ye dwirɛ a, maa ɔpepɛ ole ye ne,’ ahaa Yehowa kɔhora kohyire ye tumi ɛberɛ nala. (Mat. 27:42, 43) Nakoso sɛ ɔyɛle sɔ a, ahaa Yesu ngɔhora ngɔfa ye ngoa ngɔbɔ afɔleɛ ngole yɛ. Yeti ahaa yelle anyelasoɛ biala. Ɛhene ati yeɛ Yehowa mane atee maa Ɔwa ne nwuni amaneɛ koraka yeɛ owu ne.
8. Mmerɛ bɔ Yehowa nwuni kyɛ Ɔwa ne nwu amaneɛ ne, aso olili yealɛ anaa? Kyirekyire nu. (Nea foto ne koso.)
8 Ɔnzɛkyɛ yenya adwene kyɛ ɔnate kyɛ Nyameɛ le nningyein mukoraati so tumi nati, edwirɛ nyɛ ye yea. Yehowa bɔle yɛ wɔ ye subaen so, yeti kyɛbɔ yɛ wora kora bɔ, anaa yɛnye gye ne, sɔ ala yeɛ ye koso ɔte ɔ. Bible ne kã Yehowa nwo dwirɛ kyɛ “ye wora bɔle,” na ‘bewurale ye apue.’ (Edw. 78:40, 41) Wɔ de ɛmɔma yesusu Abraham ne Yisake dwirɛ nanwo kãa. Yehowa hahyirele Abraham kyɛ ɔfa ɔwa komapɛ ne ɔɔbɔ afɔleɛ ma ye. (Gye. 22:9-12; Heb. 11:17-19) Mmerɛ bɔ ɔfale dadeɛ kyɛ okũ ɔwa Yisake ne, wɔ de nea kyɛbɔ ɔyɛle ye yea, ná ye wora bɔle ɔ. Ɛhe maa yenwu kyɛ, mmerɛ bɔ Yehowa nwuni kyɛ mmenia bɔ bɛ tianu yɛse, bɛyɛ ɔwa ne ayayadeɛ na bekũ ye ne, ɛyealɛ bɔ ɔhɔle nu ne de, bɛnga!—Nea vidio bɔ yeɛ ole, Suasua Wɔn Gyidi—Abraham, Ɔfã 2 ne wɔ jw.org so.
Mmerɛ bɔ Yehowa nwuni kyɛ Ɔwa ne nwu amaneɛ ne, ɔyɛle ye yea paa (Nea ngyekyɛmuɛ 8)
9. Sɛɛ yeɛ Romanfoɛ 8:32, 38, 39 ne maa enwu ye kyɛ, Yehowa kuro ɛne eliemamɔ Kristofoɛ dwirɛ paa ɔ?
9 Yesu ngoa bɔ ɔfa bɔle afɔleɛ mane yɛ ne, ɔmaa yenwu ye kyɛ, kyɛbɔ Yehowa si kuro yɛ dwirɛ ne, y’abusuaniɛ anaa yɛ damvo bɔ opingye yɛ paa po, ongohuro yɛ dwirɛ sɔ. (Kenga Romanfoɛ 8:32, 38, 39.) Kyɛbɔ Yehowa si kuro yɛ dwirɛ ne, yɛngɔhora yengohyire nu po. Enyane a, ahaa ɛkɔtena ase daa hɔ ɔ? Sɔ pɛpɛɛpɛ yeɛ Yehowa pena kyɛ ɔba nu ma wɔ ɔ. Ɛpena kyɛ bɛfa wɔ bɔne bɛkyɛ wɔ anaa? Sɔ pɛpɛɛpɛ yeɛ Yehowa kuro kyɛ ɔyɛ ma wɔ ɔ. Bɔ ɔpena kyɛ yɛyɛ alaa yeɛ ole kyɛ, yekohyire kyɛ yɛnye sɔ Yesu afɔleɛ ne, yekonya yenu gyidie, na yayɛ sotie yama ye. Amba, Yesu wue ne maa yenwu ye kyɛ Yehowa kuro yɛ dwirɛ paa. Ɔdɔ bɔ Yehowa le ma yɛ ne, sɛ yedwu ewiase foforɛ nanu a, yekosua yenwo nikyee yɛkɔhɔ siɛ paa.
BƆ YESU WUE NE MAA YENWU YE YƐFA YENWO Ɔ
10. (a) Mmerɛ bɔ né bɛbaahũ Yesu ne, nzu yeɛ ɔmaa ye wora bɔle paa ɔ? (b) Atee beni aso yeɛ Yesu tele Yehowa dumaa nanwo ɔ? (Kenga edwirɛ bɔ yeɛ ole, “Yesu Nate Nahorɛ Bɔ Olili Naso Tele Yehowa Dumaa Nanwo” bɔ ɔwɔ alaka nanu ne.)
10 Né Yesu nguro kyɛ ye Baba dumaa nanwo kɔwa dwirɛ. (Yoh. 14:31) Bɛbɔ né bédi Yesu dwirɛ ne, bɛbɔle ye somoɛ kyɛ wahã musue dwirɛ. Ɛhe yɛle Yesu yea paa, ofikyɛ né ɛhene kɔhora kogua ye Baba dumaa nanwo fiɛ. Yeti yeɛ ɔbɔle mbaeɛ kyɛ: “Me Baba, sɛ ɔkɔyɛ yé a, ma sɔ kulie he ofi me so hɔ” ne. (Mat. 26:39) Nahorɛ bɔ Yesu li mane Yehowa oodwuli ewue nu ne, ɔnate so tele ye Baba dumaa nanwo.
11. Sɛɛ yeɛ Yesu hyirele kyɛ ɔdwene sona nwo ɔ? (Yohane 13:1)
11 Yesu ngoa bɔ ɔfa bɔle afɔleɛ ne, osa maa yenwu kyɛ ɔdwene sona nwo paa, ye titire bɛbɔ beli yesi ne. (Any. 8:31; kenga Yohane 13:1.) Ebie yeɛ ole kyɛ, né Yesu se kyɛ ɔkɔfa ɔhaw pee nu wɔ ye soen adwuma nanu, na né okowu ewue yeayea. Nakoso, nna kyɛ Yehowa nwa ɔyɛ sɔ nati yeɛ ɔmaa ɔyɛle ɔ, na mmom né okuro sona dwirɛ. Bɔ yeti yeɛ yɛkã sɔ yeɛ ole kyɛ, ofili ye ahone nu yɛle asɛnga adwuma ne, ohyirehyirele mmenia, na ɔbokale bɛ. Ɛlɛho bɔ né ɔbaawu ne po, onwunzini ye asomafoɛ nemɔ gyabo, ɔhyɛle bɛ ngunaen, na otuli bɛ foɛ. (Yoh. 13:12-15) Mmerɛ bɔ né osinze bakaa naso bɔ onwu amaneɛ po ne, ɔmane bɔnefoɛ bie bɔ ye koso babɔ ye asɛnnua nu ne nyane anyelasoɛ. Osa koso yɛle nhyehyɛɛ kyɛbɔ ɔkɔyɛ a, bɛkɔnea ye maame ɔ. (Luka 23:42, 43; Yoh. 19:26, 27) Yeti nna Yesu wue ne ngome yeɛ ɔnate so hyirele kyɛ okuro sona dwirɛ ɔ, na mmom ɔyɛle nningyein pee koso fa hyirele sɔ.
12. Nningyein benimɔ yeɛ Yesu té yɛ faboka yɛ ɔ?
12 Ɔwɔ nu, Yesu wu mane yɛ “pɛen ko,” nakoso oté yɛ nningyein pee ma yɛ. (Rom. 6:10) Ebie yeɛ ole beni? Mvasoɛ bɔ ɔwɔ ye wue naso ne, ɔyere yenwo paa kyɛ ɔkɔboka yɛ maa yɛsa kɔha ye. Kesaalae, ɔte yɛ Hene, yɛ Sɔfo Panyi, na osa te asafo ne ti. (1 Kor. 15:25; Ɛfe. 5:23; Heb. 2:17) Kristofoɛ bɔ bapopa bɛ, ɔne mmeni lɔen kandinga bɔ bɛboaboa bɛ noa ne, ye yeɛ owura ye sa ɔ, na ɔkɔyɛ sɔ koodwu kyɛ amaneɛnwunɛ piri ne kɔhɔ ayieleɛ ɔ.b (Mat. 25:32; Mak. 13:27) Osa nate akoaa nahorɛniɛ naso maa yɛsa kã bɔ yehia, na yahora yali nahorɛ yama Yehowa wɔ ayieleɛ mmerɛ he anu. (Mat. 24:45) Ye Afoɛ Apee Ahennie nanu koso, ɔkɔhɔso kɔboka yɛ. Nahorɛ nu, Yehowa fale Ɔwa ne mane yɛ kyɛ akyɛdeɛ amba!
KƆSO SUA YEHOWA NE YESU NWO NIKYE
13. Ɔdɔ bɔ Nyameɛ ne Kristo ala ye ali ahyire yɛ ne, ɛkɔyɛ sɛɛ né ahɔso asua yenwo nikye?
13 Ɔdɔ bɔ Yehowa ne Yesu Kristo ala ye ali ahyire wɔ ne, kɔso sua yenwo nikye na dwenedwene yenwo. Mmerɛ bɔ ɔka kãa maa yɛkae Yesu wue ne afoɛ he, anaa ɛhene si ne, ɛkɔhora kɔkenga edwirɛ bɔ ɔwɔ Nzɛmba nanu ne bie. Ɛyɛ a nnɛpere wɔnwo kenga edwirɛ pee, na mmom kenga ye ngakã. Afei to wɔ boase yɛ nhwehwɛmuɛ pena nikyee foforɛ bɔ yeti yeɛ odikyɛ yenya ɔdɔ yɛma Yehowa ne Yesu ɔ. Bɔ ekonwu ye ne, ɛyɛ a ɛne mmenia bɛbɔ yenwo ngɔmmɔ.
14. Kyɛbɔ Edwein 119:97 kã ne, sɛ yɛyɛ nhwehwɛmuɛ a, sɛɛ yeɛ ɔkɔboka yɛ maa yɛkɔhɔso yekosua Yesu wue ne, ɔne Bible nu dwirɛ foforɛ nwo nikye ɔ? (Nea foto ne koso.)
14 Ebiaa ɛwale asafo nanu ahyɛ paa. Yeti ɛkɔhora konya adwene kyɛ, kyɛbɔ Yehowa yɛ bɔ ɔtengyɛ, ɔdɔ bɔ ole ye, ɔne Yesu wue ne de, ɛse yenwo dwirɛ pee. Ɛhe ati yenwo nhia kyɛ ekosua yenwo dwirɛ foforɛ biala kõ. Nakoso bɔ ɔwɔ nu yeɛ ole kyɛ, yɛngɔhora yengosua sɔ nningyein hemɔ nwo nikyee yengoyie lle. Yede nzu yeɛ ɛkɔhora kɔyɛ ɔ? Yɛ nwomaa ahoroɛ ne kã sɔ nningyein hemɔ nwo dwirɛ pee, yeti ɛyɛ a to wɔ boase sua. Sɛ ɛkenga edwirɛ bie koso ná ɛnde yebo a, yɛ nu nhwehwɛmuɛ. Afei bɔ asua ne, dwenedwene yenwo sɔ kyẽa ne, na nea bɔ ɔmaa enwu ye fa Yehowa, Ɔwa ne, ɔne ɔdɔ bɔ bele bɛma wɔ nanwo ɔ.—Kenga Edwein 119:97.
Ebiaa yɛwale asafo nanu ahyɛ paa, nakoso sɛ yɛkɔso yesua Yesu wue nanwo nikyee a, ɔkɔmaa anisɔ bɔ yele yɛma Yehowa ne Yesu ne kɔyɛ piri (Nea ngyekyɛmuɛ 14)
15. Nzuati yeɛ odikyɛ yɛkɔso yɛkenga Bible ne, na yɛyɛ nhwehwɛmuɛ ɔ?
15 Sɛ ɛ́kenga Bible ne, anaa ɛ́yɛ nhwehwɛmuɛ na enwu ye kyɛ, ennya edwirɛ foforɛ biala mmokka bɔ ɛse ye dada naso a, nnɛmaa w’aba nu bu. Atee bie aso ne, bɔ ɛyɛ ne tekyɛ bɛbɔ bɛpena esikaa kɔkorɛ ɔ. Sɔ mmenia nemɔ kora fa dɔnhwere anaa ngyẽa pee bɛpena esikaa kɔkorɛ, nakoso ɛkɔnea ne, kamba bie yeɛ benya ye ɔ. Sɛ ɔba sɔ a, bɛmma b’abanu mmu, ofikyɛ kaamba bie po bɔ bekonya ye ne, ɛso le mvasoɛ ma bɛ. Nakoso Bible nu dwirɛ de, yenwo hia tra esikaa kɔkorɛ koraa! (Edw. 119:127; Any. 8:10) Yeti kɔso kenga Bible ne, na yɛ nhwehwɛmuɛ.—Edw. 1:2.
16. Sɛɛ yeɛ yɛkɔhora yekosuesua Yehowa ne Yesu ɔ?
16 Sɛ ésua nikyee a, pena atee ahoroɛ bɔ ɛkɔfa so kɔfa bɔ esua ne kɔyɛ adwuma ɔ. Ebie yeɛ ole kyɛ, suesua kyɛbɔ Yehowa bua ndɛen turoloo ne, na nnɛyɛ mmenia nu nyeyemuɛ. Sɛ énwu amaneɛ po a, mia wɔnye kyɛ ɛkɔyɛ bɔ Yehowa kuro ɔ, na bɔ mmɔden boka mmenia. Ɛhene kohyire kyɛ ésuesua bɔ Yesu yɛle ne. Afei koso, yere wɔnwo kã nzɛmba ne kyire mmenia fa suesua Yesu, na wamaa bɛ koso banya akyɛdeɛ bɔ ɔsombo bɔ Yehowa afa ama yɛ naso mvasoɛ.
17. Nzu yeɛ yekosusu yenwo wɔ adesua bɔ oli berɛ nanu ɔ?
17 Sɛ yɛkɔso yesua Yesu wue nanwo nikye, na yɛdwenedwene yenwo a, ɔkɔmaa yekonya ɔdɔ pirikua yɛkɔma Yehowa ne Ɔwa ne. Ɛhene kɔmaa bɛ koso bekohuro yɛ dwirɛ paa. (Yoh. 14:21; Yak. 4:8) Yeti nningyein bɔ Yehowa afa ama yɛ, bɔ ɔboka yɛ maa yesua Yesu wue nanwo dwirɛ yɛkɔ siɛ ne, ɛmɔma yɛhɔso yɛfa yɛyɛ adwuma. Adesua bɔ oli berɛ nanu ne, yɛkɔnea nhyiraa bɔ ɔnate Yesu wue nati, yanya ye ɔ. Afei ɔdɔ bɔ Yehowa ala ye ali ahyire yɛ ne, yɛkɔnea bɔ yɛkɔyɛ yɛkɔfa yekohyire kyɛ yɛnye sɔ ɔ.
DWEIN 107 Ɔdɔ Ho Nhwɛso
a EDWIRƐ BIE BƆ BAHYIREHYIRE NU Ɔ: Sɛ bɛkã kyɛ “ɛ́dwenedwene nikyeebie nwo” a, okyire kyɛ ɛkɔfa w’adwene kosie edwirɛ bie aso, na asusu yenwo ahɔ siɛ.
b Edwirɛ bɔ Pɔɔlo hane ye wɔ Ɛfesofoɛ 1:10 bɔ yenwa, ɔkɔboaboa “abɔdeɛ amukoraa bɔ bɛwɔ nyameɛso ne noa” ne, ɔte sorongo wɔ bɔ Yesu hane ye wɔ Mateo 24:31 ɔne Marko 13:27 kyɛ, bɛkɔboaboa “bɛ bɔ waneanea nu waye bɛ” nemɔ noa nanwo. Pɔɔlo de, mmerɛ bɔ Yehowa kɔfa honhom krongron kɔpopa bɛbɔ waye bɛ kyɛ bɛne Ɔwa ne kooli bia wɔ anwuro ne, yeɛ né ɔkã yenwo dwirɛ ɔ. Yeɛ Yesu koso bɛbɔ bapopa bɛ bɔ beté wɔ aseɛ so ne, mmerɛ bɔ bɛkɔboaboa bɛnoa maa bɛkɔhɔ anwuro wɔ amaneɛnwunɛ piri nanu ne, yeɛ ne ɔkã yenwo dwirɛ ɔ.