Dé Tonu Kyɛ Yehowa Afa Wɔ Bɔne Ahyɛ Wɔ

1-2. Sɛ ebie yɛ bɔne na onu yenwo a, nzu yeɛ ɔkɔhora kɔnea ye atee ɔ? (Nea foto ne koso.)

ƆHENE Dawide yɛle bɔne mbirimbiri biemɔ wɔ ye asetena nu, na né yenwo dwirɛ ha ye paa. Yeti ne ɔse kyɛbɔ sɛ bɔne nwo adwenedwene hyɛ ebie so a, osi te ɔ. (Edw. 40:12; 51:3; yeti afia dwirɛ) Nakoso siɛ ye onuni yenwo, yeti Yehowa koso fale ye bɔne hyɛle ye. (2 Sam. 12:13) Ɛhene ati, anigye bɔ ebie nya ye mmerɛ bɔ Yehowa afa ye bɔne ahyɛ ne, ne Dawide te yebo paa.—Edw. 32:1.

² Tekyɛ Dawide ne, yɛ koso sɛ Yehowa nwu yɛ anwumvoin fa yɛ bɔne kyɛ yɛ a, ɔmaa yɛnye gye paa. Yeti sɛ yɛyɛ bɔne pirikua bie po na yenu yɛnwo, yɛsrɛ Yehowa kyɛ ɔfa hyɛ yɛ, yɛbɔ mbanyi nemɔ amaneɛ, na yɛyere yɛnwo kyɛ yɛngɔyɛ sɔ bɔne ne kõ a, yede yɛse kyɛ Yehowa kɔfa kɔhyɛ yɛ. Ɔba sɔ a, wɔde nea kyɛbɔ y’ahone kɔtɔ yɛ kunu ɔ. (Any. 28:13; Aso. 26:20; 1 Yoh. 1:9) Bɔ ɔyɛ yɛ fɛ po yeɛ ole kyɛ, Yehowa de, sɛ ɔfa wɔ bɔne kyɛ wɔ a, ɔngae ye kõ!—Hes. 33:16.

3-4. Aliemaa brasua bie bɔle asu yiele po ne, adwene beni yeɛ ne oté le ye ɔ, na nzu yeɛ yekosusu yenwo wɔ adesua he anu ɔ?

³ Sɛ odwu mmerɛ bie a, ebiaa ɔkɔyɛ se kɔma yɛ nu biemɔ kyɛ yekole yɛkɔto nu kyɛ Yehowa afa yɛ bɔne ahyɛ yɛ. Ɛhe bie tole aliemaa brasua bie bɔ bɛfrɛ ye Jennifer. Bɛtetele ye wɔ nahorɛ nanu, nakoso osili so kãa ne, ɔbɔle bra biemɔ bɔ ne ɔttemaye, na né ɔfa fea ye awofoɛ. Siɛ ye, ɔsesane ye subaen sa wale asafo nanu, na ɔbɔle asu. Ɔhane kyɛ: “Ne mebɔ adwaman, meno nzaa paa, nné ahone, na afei koso bɔ ne menye li ye si alaa yeɛ ole esikaa. Ne mese kyɛ ɔnate Yesu afɔleɛ nati Yehowa afa me bɔne ahyɛ me. Nakoso, m’ahone nu paa de, ne menné menni kyɛ wafa wahyɛ me.”

⁴ Wɔ koso, ɛyɛ a ɔyɛ se ma wɔ kyɛ ekole kɔto nu kyɛ Yehowa afa wɔ bɔne ahyɛ wɔ anaa? Yehowa pena kyɛ enwu ye kyɛ, kyɛbɔ onwuni Dawide anwumvoin fale ye bɔne hyɛle ye ne, wɔ koso okonwu wɔ anwumvoin sɔ ala. Adesua he anu ne, yekonwu bɔ yeti yeɛ odikyɛ yedé yɛtonu kyɛ Yehowa afa yɛ bɔne ahyɛ yɛ, ɔne bɔ ɔkɔboka yɛ maa yɛkɔyɛ sɔ ɔ.

BƆ YETI YEƐ ODIKYƐ YEDÉ YƐTONU KYƐ YEHOWA AFA YƐ BƆNE AHYƐ YƐ Ɔ

5. Adwene beni yeɛ Satan pena kyɛ yenya ye ɔ? Ma yenwo nneasoɛ.

⁵ Sɛ yedé yɛtonu kyɛ Yehowa afa yɛ bɔne ahyɛ yɛ a, ɔkɔmaa yɛngɔtɔ Satan ngaen nu. Kae kyɛ Satan de, bɔ ogyi yenye so yeɛ ole kyɛ ɔkɔmaa yɛkɔyakyi Yehowa soen. Bɔ ɔkɔyɛ ne wahora wayɛ sɔ ne, ɔmaa yenya adwene kyɛ Yehowa ngɔfa yɛ bɔne ngɔhyɛ yɛ lle. Brienzua bie bɔ ɔbɔle adwaman maa bɛyele ye befili Korintofoɛ asafo nanu ne, ɛmɔma yesusu ye dwirɛ nanwo kãa. (1 Kor. 5:​1, 5, 13) Mmerɛ bie si ne, ɔsakyerale ye adwene. Nakoso, ne Satan nguro kyɛ aliemaamɔ bɔ bɛwɔ asafo nanu ne kɔfa ye bɔne kɔhyɛ ye. Yeti mmerɛ bɔ besa belɛle ye ne po, ne benguro kyɛ bekole ye bɛkɔto nu kyɛ beliema. Afei koso, ne Satan pena kyɛ biaa ne nya adwene kyɛ bɛfa ye bɔne bɛkyɛ ye a, ɔnyɛ yé. Yeti ne ɔpena kyɛ ‘aworabolɛ bu ye kɔme anu’ maa ɔyakyi Yehowa soen. Ɛnnɛ koso, Satan sesanne, nakoso, yɛde “yɛse ye atee bɔ ɔnate so ɔ.”—2 Kor. 2:​5-11.

6. Sɛ yɛyɛ bɔne bie a, nzu yeɛ ɔkɔboka yɛ na yenwo adwenedwene anhyɛ yɛ so ɔ?

⁶ Sɛ yedé yɛtonu kyɛ Yehowa afa yɛ bɔne ahyɛ yɛ a, ɔmaa adwenedwene nhyɛ yɛ so. Sɛ yɛyɛ bɔne bie a, yɛdi aworabolɛ paa. (Edw. 51:17) Yɛyɛ sɔ a, ɔte ye atee so, ofikyɛ ɔmaa yesusu bɔ yayɛ nanwo, na yɛyere yɛnwo yɛyɛ nzakrayɛɛ. (2 Kor. 7:​10, 11) Nakoso sɛ yɛkɔso yɛdwenedwene bɔne nanwo mmerɛ bɔ yasakyera y’adwene a, ɔkɔhora kɔmaa y’abanu kobu maa yɛkɔyakyi Yehowa soen. Yeti sɛ yedé yɛtonu kyɛ Yehowa afa yɛ bɔne ahyɛ yɛ a, ɔkɔmaa yɛkɔyakyi sɔ adwenedwene ne. Ɔba sɔ a, ɔkɔmaa yɛkɔfa anigye yɛkɔsõ Yehowa bɔ nikyefee ngɔhyɛ yɛso ɔ, na sɔ yeɛ okuro ɔ. (Kol. 1:​10, 11; 2 Tim. 1:3) Yede bɔne bɔ yayɛ ne, nzu paa yeɛ ɔkɔmaa yekole yekoli kyɛ Yehowa afa ahyɛ yɛ ɔ?

NZU YEƐ ƆKƆMAA YEKOLE YƐKƆTO NU KYƐ YEHOWA AFA YƐ BƆNE AHYƐ YƐ Ɔ?

7-8. Nzu yeɛ Yehowa hafale yenwo hyirele Mose ɔ, na nzu yeɛ ɛhene maa yenwu ye ɔ? (Ɛksadɔso 34:​6, 7)

⁷ Edwirɛ bɔ Yehowa bɔbɔ ahã afa yenwo ne, susu yenwo. Ɛmɔma yɛnea edwirɛ bie bɔ Yehowa hahyirele Mose wɔ Sinai Bokaa so ɔ.a (Kenga Ɛksadɔso 34:​6, 7.) Né ahaa Yehowa kɔhora kɔhã ye subaen foforɛ biemɔ nwo dwirɛ kohyire Mose, nakoso ɔhane kyɛ ɔte “Nyameɛ bɔ ɔse anwumvoin ná ɔdo mmenia ɔ.” Nyameɛ bɔ ɔte sɔ ne, sɛ ye somvoɛ bie yɛ bɔne, na ofi ye ahone nu nu yenwo a, aso ɔngɔfa ngɔhyɛ ye anaa? Ɔkɔfa kɔhyɛ ye soma, ofikyɛ sɛ wanyɛ sɔ a, okohyire kyɛ yetianu yɛse na ɔnze anwumvoin. Yehowa koso de, ɔngɔhora ngɔyɛ sɔ lle.

⁸ Ɔnate kyɛ Yehowa te nahorɛ Nyameɛ nati, subaen biala bɔ yenwa ole ye ne, ole ye amba. (Edw. 31:5) Yeti yɛkɔhora yekole ye yekoli. Bɔne bie bɔ ayɛ apɛ nu ne, sɛ ɔyɛ se kyɛ ekole kɔto nu kyɛ Yehowa afa ahyɛ wɔ a, yede bisa wɔnwo kyɛ: ‘Aso mede medi kyɛ Yehowa bɔ ole ahunundeterɛ na ɔse anwumvoin ne, sɛ ebie yɛ bɔne na onu yenwo a, ɔngɔfa ngɔhyɛ ye anaa? Sɛ sɔ a, ɔnzɛkyɛ medé metonu kyɛ wafa me bɔne wahyɛ me hɔ?’

9. Sɛ bɛkã kyɛ Yehowa afa ebie bɔne ahyɛ ye a, okyire sɛɛ? (Edwein 32:5)

⁹ Mmenia bɔ Yehowa maa bɛhworɔle Bible ne, susu bɔ ɔmaa bɛhã bɛfale kyɛbɔ ɔfa bɔne kyɛ nanwo. Benu kõ yeɛ ole Dawide. Ɛmɔma yɛnea bɔ ɔhafale Yehowa bɔnefakyɛ nwo ɔ. (Kenga Edwein 32:5.) Dawide hane kyɛ, ‘Ɛfale me bɔne hyɛle me.’ Hebri dwirɛ bɔ yeɛ ole “hyɛle me” ne, ɔkora koso kyire kyɛ “ɛma nikyeebie so anaa ɛsoa.” Yeti mmerɛ bɔ Yehowa fale Dawide bɔne hyɛle ye ne, ne ɔtekyɛ bɔ Yehowa ama ye bɔne naso wasoa wahɔ ne. Ɛhene maa Dawide nwo yɛle ye fɔnwoo, ɔnate kyɛ ne sɔ adwenedwene ne afi ye so. (Edw. 32:​2-4) Yɛ koso yɛkɔme anu kɔhora kodwo yɛ sɔ ala. Yeti sɛ yefi y’ahone nu yenu yɛnwo wɔ yɛ bɔne nwo a, onnikyɛ yɛkɔso yɛdwenedwene yenwo kõ, ɔnate kyɛ Yehowa ama sɔ bɔne naso, na wasoa wahɔ.

10-11. Edwirɛ bɔ yeɛ ole kyɛ, Yehowa ‘kuro kyɛ ɔkɔfa bɔne kɔhyɛ’ ne, nzu yeɛ ɔmaa yenwu ye yɛfa yenwo ɔ? (Edwein 86:5)

¹⁰ Kenga Edwein 86:5. Dawide hane Yehowa nwo dwirɛ kyɛ ‘ekuro kyɛ ɛkɔfa bɔne kɔhyɛ.’ Nwomaa bie bɔ okyirekyire Bible nu hane ɛhe anwo dwirɛ kyɛ: “Yehowa de, bɔne fakyɛ te ye subaen.” Nzuati yeɛ Yehowa le sɔ subaen ne ɔ? Tworɔnzɛm ne bue bɔ waha ne kã kyɛ: “Wɔ ɔdɔ bɔ onni ngasi” anaa yebo mbɛ le ne, “ɔsone ma bɛ bɔ besu bɛfrɛ wɔ ɔ.” Kyɛbɔ yenwuni ye wɔ adesua bɔ oli ɛhe nyunu nanu ne, sɔ ɔdɔ bɔ Yehowa le ma bɛbɔ bedi nahorɛ bɛma ye nati, ɔmaa ɔndwe yenwo mvi bɛnwo. Ɛhene ati, bɛbɔ bayɛ bɔne bɔ banu bɛnwo ne, ɔkɔfa ‘kɔhyɛ bɛ koraa.’ (Yes. 55:7.) Yede, sɛ ɔyɛ se ma wɔ kyɛ ekole koli kyɛ Yehowa afa wɔ bɔne ahyɛ wɔ a, bisa wɔnwo kyɛ: ‘Aso medé medi paa kyɛ Yehowa fa bɔne kyɛ, na bɛbɔ banu bɛnwo ne mukoraati, bɔ bɛsrɛ ye kyɛ onwu bɛ anwumvoin ne, okuro kyɛ ɔfa bɛ bɔne kyɛ bɛ anaa? Sɛ sɔ ahɔ a, yede mmerɛ bɔ nzrɛle ye kyɛ onwu me anwumvoin na ɔfa me bɔne hyɛ me ne, onnikyɛ medé metonu kyɛ wafa wahyɛ me anaa?’

¹¹ Yehowa se ye paa kyɛ yɛte abɔnefoɛ. Sɔ dwirɛ ne bɔ yɛse ne, ɔkyekye yɛwora paa. (Edw. 139:​1, 2) Ɛmɔma yɛnea Dawide dwein foforɛ bie, na ɛhene koso kɔboka yɛ maa yekole yɛkɔto nu kyɛ Yehowa afa yɛ bɔne ahyɛ yɛ amba.

NNƐMAA WƆ WORA FI BƆ YEHOWA KAE NE

12-13. Kyɛbɔ Edwein 103:14 kã ne, nzu yeɛ Yehowa kae ɔ, na ɛhene maa ɔyɛ nzu?

¹² Kenga Edwein 103:14. Dawide hane Yehowa nwo dwirɛ kyɛ “ɔkaye kyɛ yɛte mvuture” anaa nnɛterɛ. Sɔ dwirɛ bɔ Dawide hane ne, ɔmaa yenwu nikyee kõ bɔ yeti yeɛ Yehowa kuro paa kyɛ abɔnefoɛ bɔ banu bɛnwo ne, ɔfa bɛ bɔne kyɛ bɛ ɔ. Yeɛ ole kyɛ, daa ɔkae kyɛ yɛte abɔnefoɛ. Bɔ ɔkɔyɛ ne yate ɛhe abo yé ne, ɛmɔma yesusu edwirɛ bɔ Dawide hane nanwo yɛhɔ siɛ kãa.

¹³ Dawide hane kyɛ Yehowa ‘se kyɛbɔ osi bɔle yɛ ɔ.’ Ɔfale “aseɛnwo nnɛterɛ” yeɛ ɔnwone Adam ɔ. Yeti mmerɛ bɔ ɔbɔle sona bɔ né bɔne biala nne yenwo ne po, ne ɔse kyɛbɔ osi te, ɔne bɔ ohia ɔ. Ebie yeɛ ole kyɛ odikyɛ odé nwomeɛ, odidi, ná ɔda. (Gye. 2:7) Nakoso ofi mmerɛ bɔ Adam ne Hawa yɛle bɔne ne, sɛ bɛkã kyɛ sona te nnɛterɛ a, osa kyire kyɛ bafa bɔne bawo yɛ, yeti ɔyɛ se ma yɛ kyɛ yɛkɔyɛ bɔ ɔte pá ɔ. Yehowa nze ye mbaen kyɛ bɔne wɔ yɛnwo, na mmom kyɛbɔ Dawide hane ne, “ɔkaye” kyɛ yɛte abɔnefoɛ yeti yeɛ ɔmaa yɛyɛ nningyein bɔ ɔttemaye ne. Sɔ Hebri dwirɛ ‘kaye’ ne, ɔkɔhora kohyire kyɛ etu edwirɛ bie bɔ wasi nanwo agyirɛ. Yeti bɔ Dawide hane ne, ye tikaape yeɛ ole kyɛ: Yehowa se kyɛ odwu mmerɛ bie a, yɛkɔyɛ bɔne. Ɛhene ati, sɛ ɔba kyɛ yɛyɛ bɔne, na yefi y’ahone nu yenu yɛnwo a, ye koso onwu yɛ anwumvoin na ɔfa kyɛ yɛ.—Edw. 78:​38, 39.

14. (a) Dawide fale Yehowa bɔne fakyɛ totole nzu anwo? (Edwein 103:12) (b) Kyɛbɔ Yehowa fale Dawide bɔne hyɛle ye koraa ne, nzu yeɛ yesua yefi nu ɔ? (Nea alaka nanu dwirɛ ne koso. “Nzu Yeɛ Okyire Kyɛ Sɛ Yehowa Fa Bɔne Kyɛ A, Ɔngae Ye Kõ Ɔ?”)

¹⁴ Nzu bieku yeɛ ɔboka yɛ maa yenwu kyɛ Yehowa fa yɛ bɔne kyɛ yɛ koraa ɔ? (Kenga Edwein 103:12.) Dawide hane kyɛ sɛ Yehowa fa yɛ bɔne kyɛ yɛ a, ɔye fi yɛnwo kɔ dedeede kyɛbɔ “eyia afiteleɛ ne eyia atɔleɛ b’afia si wale” ne. Kyɛbɔ yɛse ne, atee bɔ ɔla afiteleɛ ne atɔleɛ afia ne de, ɔngɔhora ngoyia lle. Nzu yeɛ ɛhene maa yenwu ye yɛfa Yehowa bɔne fakyɛ nwo ɔ? Nwomaa bie hyirele nu kyɛ: “Ɔfa bɔne ne kɔ dedeede bɔ ɔngae yenwo dwirɛ biala kõ ɔ.” Yeti sɛ Yehowa fa yɛ bɔne kyɛ yɛ a, nikyefee biala nne berɛ bɔ ɔkɔmaa ɔkɔkae kyɛ yɛyɛle sɔ bɔne ne, yeti odikyɛ ɔtwe yɛ so ɔ.—Hes. 18:​21, 22; Aso. 3:19.

15. Bɔne bie bɔ yayɛ yapɛ nu ne, sɛ yenwo adwenedwene té hyɛ yɛ so a, nzu yeɛ odikyɛ yɛyɛ ɔ?

¹⁵ Edwirɛ bɔ Dawide hane ye wɔ Edwein 103 ne, sɛɛ yeɛ ɔkɔhora kɔboka yɛ maa yekole yɛkɔto nu kyɛ Yehowa afa yɛ bɔne ahyɛ yɛ ɔ? Sɛ bɔne bie bɔ yayɛ yapɛ nu nanwo adwenedwene té hyɛ yɛ so a, yɛkɔhora yekobisa yɛnwo kyɛ: ‘Aso me wora afi kyɛ Yehowa kae kyɛ nde sona bɔ bɔne wɔ menwo, yeti sɛ menu menwo a ɔkɔfa me bɔne kɔhyɛ me anaa? Anaa bɔne bɔ Yehowa afa ahyɛ me dadaada bɔ ɔngɔhwe me so wɔ yenwo kõ ne, ɛhene yeɛ me de meté dwenedwene yenwo ɔ?’ Bɔne bɔ yayɛ yapɛ nu ne, Yehowa mva ye adwene ngɔ so kõ, na sɔ yeɛ odikyɛ yɛwora yɛyɛ ɔ. (Edw. 130:3) Sɛ yedé yɛtonu kyɛ Yehowa afa yɛ bɔne ahyɛ yɛ a, yɛngɔ dwenedwene yenwo yɛngɔha yɛnwo, na mmom yɛkɔhɔso yɔkɔfa anigye yɛkɔsõ ye.

16. Bɔne bɔ yayɛ yapɛ nu ne, bɔ yeti yeɛ ɔyɛ suro kyɛ yɛkɔmaa yenwo adwenedwene kɔhyɛ yɛ so ne, fa mvandoho kyirekyire nu. (Nea foto ne koso.)

¹⁶ Wɔde yɛnea sɔ mvandoho he. Bɔne bɔ yayɛ yapɛ nu ne, sɛ yɛmaa yenwo adwenedwene hyɛ yɛso a, ɔte kyɛ ebie bɔ ɔkã kar nakoso ɔnnea atee nu, na mmom ye dravin mirɔ nala yeɛ ɔnea nu ne. Ɔwɔ nu alaa na sɛ dravaniɛ nea ye dravin mirɔ nanu a ɔte pá, ofikyɛ sɛ nikyeebie fi siɛ dɔ ɔbaapemo kar ne a, ɔboka ye maa onwu ye. Nakoso sɛ ɔmbena kyɛ onya asedɛnt a, yede sana ɔnea ye nyunu. Yɛ koso sɛ ɔwɔ nu alaa na yɛkae bɔne bie bɔ yɛyɛle ne a, ɔboka yɛ maa yesi y’adwene pi kyɛ yɛngɔyɛ ye kõ, yeti yɛkora yesua nikyee yefi nu. Nakoso sɛ daabiala sɔ bɔne nala yeɛ yɛdwene yenwo a, yede yɛngɔhora yɛngɔsõ Yehowa yé. Yeti daa ngoa atee bɔ ɔkɔ ewiase foforɛ bɔ Nyameɛ afa ahyɛ yɛ bɔ nanu ne, ɛmɔma yɛnea yɛ nyunu yɛfa so. Ofikyɛ ɛberɛ de nningyein bɔ ɔmaa adwenedwene hyɛ yɛ so ne, ‘yɛngɔkaye ye ko.’—Yes. 65:17; Any. 4:25.

KƆSO NYA GYIDIE KYƐ YEHOWA AFA WƆ BƆNE AHYƐ WƆ

17. Nzuati yeɛ odikyɛ daabiala yɛkae yɛnwo kyɛ Yehowa kuro yɛ dwirɛ, na okuro kyɛ ɔkɔfa yɛ bɔne kɔhyɛ yɛ ɔ?

¹⁷ Odikyɛ daabiala yɛkae yɛnwo kyɛ Yehowa kuro yɛ dwirɛ, na okuro kyɛ ɔkɔfa yɛ bɔne kɔhyɛ yɛ. (1 Yoh. 3:19) Nzuati ɔ? Ofikyɛ Satan yɛ bɔ ɔkɔhora biala kyɛ ɔkɔmaa yekonya adwene kyɛ Yehowa nguro yɛ dwirɛ yɛ, na ɔngɔfa yɛ bɔne ngɔhyɛ yɛ lle. Bɔ ɔmaa ɔyɛ sɔ ne mukoraati yeɛ ole kyɛ, ɔpena kyɛ yɛyakyi Yehowa soen. Nikyeemia ɔse kyɛ waha ye mmerɛ tikaape bie, yeti odikyɛ yenwu ye kyɛ ɔkɔyere yenwo paa kyɛ ɔkɔmaa yekonya sɔ adwene ne ɔ. (Nye. 12:12) Nakoso ɔnzɛkyɛ yɛmaa odi yɛ so ngunim lle!

18. Ɛkɔyɛ sɛɛ ne ale ali paa kyɛ Yehowa kuro wɔ dwirɛ, na okuro kyɛ ɔkɔfa wɔ bɔne kɔhyɛ wɔ?

¹⁸ Bɔ ɔkɔmaa ekole koli paa kyɛ Yehowa kuro wɔ dwirɛ yeɛ ole kyɛ, nningyein bɔ adesua bɔ oli ɛhe nyunu ne hane yenwo dwirɛ kyɛ yɛyɛ ne, ɛyɛ a yɛ. Afei bɔ Yehowa bɔbɔ ahã afa yenwo ne, ɛyɛ a dwenedwene yenwo, na ɛhene kɔboka wɔ maa ekole koli kyɛ wafa wɔ bɔne wahyɛ wɔ amba. Bɔ Yehowa maa bɛbɔ bɛhworɔle Bible ne hafale ye bɔne fakyɛ nwo ne koso, dwenedwene yenwo. Nnɛmaa wɔ wora fi kyɛ Yehowa se ye paa kyɛ bɔne wɔ wɔnwo, yeti okonwu wɔ anwumvoin. Afei kae kyɛ sɛ ɔfa bɔne kyɛ a okyikyi ye koraa, na ɔngae ye kõ. Sɛ ɛyɛ sɔ a, gyidie bɔ ne Dawide le ye kyɛ Yehowa konwu ye anwumvoin ne, wɔ koso ekonya bie, yeti ɛkɔhora kɔhã kyɛ: “Yehowa meda wɔ ase kyɛ ‘afa me bɔne ahyɛ me’ ɔ.”—Edw. 32:5.