Yehowa Pena Kyɛ Ebiala Sakyera Ye Adwene

1. Sɛ bɛkã kyɛ ebie asakyera ye adwene a, okyire sɛɛ?

SƐ YƐYƐ nikyeebie bɔ ɔttemaye a, yenwo hia paa kyɛ yɛsakyera y’adwene. Sɛ Bible ne kã kyɛ ebie asakyera ye adwene a, okyire kyɛ sona ne asesã afi ye subaen bie nwo, wayakyi nningyein bɔ ɔttemaye bɔ ɔyɛ ne, na wasi ye hue kyɛ ɔngɔyɛ sɔ kõ.—Mat. 3:8; Aso. 3:19; 2 Pet. 3:9.

2. Nzuati yeɛ odikyɛ yemu yesua adwenesakyera nwo nikyee ɔ? (Nehemia 8:​9-11)

² Yenwo hia kyɛ sona biala sua adwenesakyera nwo nikye. Nzuati ɔ? Ofikyɛ yɛte Adam ne Hawa bosofoɛ, yeti bafa bɔne ne ewue bawo yenu biala. Ɛhene ati, yemu yɛyɛ bɔne daabiala. (Rom. 3:23; 5:12) Sona biala nne berɛ bɔ wafa yenwo wali ɔ. Mmenia bɔ né bele gyidie paa tekyɛ somafoɛ Pɔɔlo po, né ɔlla ase kyɛ bɛkɔyɛ bɔ ɔte pá ɔ. (Rom. 7:​21-24) Yede ɔnate kyɛ bɔne wɔ yɛnwo nati, odikyɛ daa yenwu yɛnwo kyɛ yɛ dwirɛ yɛ aworabɔ anaa? Daabi, ofikyɛ Yehowa de onwu anwumvoin, na ɔpena kyɛ yɛnye gye. Ma yɛnea Yudafoɛ bɔ né bɛwɔ Nehemia aberɛ so ne dwirɛ ne. (Kenga Nehemia 8:​9-11.) Né Yehowa mbena kyɛ bedi bɔne bɔ bayɛ bapɛ nu nanwo aworabɔlɛ soma, na mmom né ɔpena kyɛ bɛsõ ye wɔ anigye nu. Sɛ yɛsakyera y’adwene a, Yehowa se kyɛ ɔmaa yɛnye gye, na ɛhene ati okyirekyire yɛ yenwo dwirɛ. Sɛ yɛyɛ bɔne na yɛsakyera a, yele gyidie kyɛ yɛ Baba bɔ ɔse anwumvoin ne kɔfa kɔhyɛ yɛ.

3. Nzu yeɛ yekosusu yenwo wɔ adesua he anu ɔ?

³ Adesua he anu ne, yekosusu nningyein nza biemɔ bɔ ɔfa adwenesakyera nwo ɔ, na ɛhene kɔmaa yekonwu yenwo dwirɛ pee. Yekolimoa yɛkɔnea bɔ Yehowa maa Yisraelfoɛ nemɔ nwu fale adwenesakyera nwo ɔ. Afei yekonwu kyɛbɔ Yehowa aboka abɔnefoɛ maa basakyera b’adwene ɔ. Bɔ ɔpɛ yebo ne, yɛkɔnea bɔ Yesu maa ye asuafoɛ nemɔ nwu fale adwenesakyera nwo ɔ.

BƆ YEHOWA MAA YISRAELFOƐ NEMƆ NWU FALE ADWENESAKYERA NWO Ɔ

4. Nzu yeɛ Yehowa maa Yisrael maen ne nwuni ye fale adwenesakyera nwo ɔ?

⁴ Mmerɛ bɔ Yehowa fale Yisraelfoɛ nemɔ yɛle ye maen ne, ɔne bɛ yɛle apam. Ɔhyɛle bɛ bɔ kyɛ sɛ bedi ye mmraa so a, ye koso ɔkɔbɔ bɛnwo waen, na wayira bɛ. Ɔhahyirele bɛ kyɛ: “Mmeraa dwirɛ he bɔ méhyɛ méma wɔ ɛnɛ ye, ɔnyɛ se mma wɔ, yeɛ ɔne wɔ b’afia koso wanwa.” (Deut. 30:​11, 16) Nakoso sɛ né bɛyɛ asoserɛ, tekyɛ ebiaa bɛkɔsõ bosoen a, né ɔkɔye ye sa kofi bɛbo maa bekonwu amaneɛ. Ɛhene po ne, né ongyire kyɛ Nyameɛ apo bɛ koraa, na mmom ‘né bɛkɔhora bekosa bɛkɔwa AWURADE bɛ Nyameɛ berɛ, ná bali ye dwirɛ so.’ (Deut. 30:​1-3, 17-20) Sɛ yɛkɔhã a, né bɛkɔhora bɛkɔsakyera b’adwene. Sɛ bɛyɛ sɔ a, né Yehowa koso kɔhwe kopingye bɛ, na wasa wayira bɛ.

5. Sɛɛ yeɛ Yehowa hyirele kyɛ wamma ye aba nu ammu wɔ ye mmenia nemɔ nwo ɔ? (2 Ahemvo 17:​13, 14)

⁵ Mmenia bɔ né Yehowa aye bɛ ne, bedwɔso betiale ye mmerɛ pee. Bɛsone bosoen, na besa bɛyɛle nningyein tɛɛtɛɛ pee mbaen. Ɔnate ɛhene ati, benwuni amaneɛ. Nakoso Yehowa amma ye aba nu ammu, na mmom ɔyɛle alaa kyɛ ɔkɔboka bɛ. Ɔnate ye adiyifoɛ nemɔ aso hahyirele ye mmenia nemɔ mmerɛ pee kyɛ bɛsakyera, na besa bɛɛsõ ye.—Kenga 2 Ahemvo 17:​13, 14.

6. Sɛɛ yeɛ Yehowa nate ye adiyifoɛ nemɔ aso maa ye mmenia nemɔ nwuni bɔ yeti yeɛ odikyɛ bɛsakyera ɔ? (Nea foto ne koso.)

⁶ Né Yehowa taa fa ye adiyifoɛ nemɔ aso bɔ ye mmenia nemɔ kɔkɔ, na né osa tengyɛ b’adwene. Ebie yeɛ ole kyɛ ɔnate Yeremia so hane kyɛ: ‘Sa bra, asoserɛniɛ Yisrael. Mengɔfɛ wɔ so yaa, ofikyɛ mese anwumvoin, yiti mengɔfɛ yaa afebɔɔ. Wɔ de, de w’amumuyɛɛ to nu, kyɛ ayɛ AWURADE wɔ Nyameɛ nwo lɔen.’ (Yer. 3:​12, 13) Yoel koso, Yehowa nate ye so hane kyɛ: ‘Ɛmɔfa ɛmɔ ahone amukoraa besa bɛbra me berɛ.’ (Yoel 2:​12, 13) Osa nate Yesaya so hane kyɛ: “Ɛ́mɔpete ɛmɔ nwo, ɛ́mɔye ɛmɔ bɔne yɔleɛ ne béfi me nye so, ɛ́mɔyakyi bɔne yɔlɛ.” (Yes. 1:​16-19) Hesekiel koso, Yehowa nate ye so bisale kyɛ: ‘Aso me nye gye bɔnefoɛ ye wue nwo anaa? Aso me nye ngye kyɛ ɔkɔhwe ye nwo kofi ye yɔleɛ nwo ná okonya ngoa ɔ? Yiti ɛ́mɔsakyera, ná ɛmɔnya ngoa.’ (Hes. 18:​23, 32) Sɛ mmenia sakyera b’adwene a Yehowa nye gye paa, ofikyɛ ɔpena kyɛ bɛtena ase daa. Yeti Yehowa nnwondɛ mma abɔnefoɛ nzakyera b’adwene kora né waboka bɛ. Ɛmɔma yɛnea ɛhe anwo nneasoɛ foforɛ.

7. Diyifoɛ Hosea ne ɔye Gomɛre dwirɛ ne, nzu yeɛ Yehowa nate so maa ye mmenia nemɔ nwuni ye ɔ?

⁷ Gomɛre bɔ né ɔte diyifoɛ Hosea aye ne, Yehowa nate bɔ ɔyɛle naso maa ye mmenia nemɔ suane nikyeebie. Ɔsɛkyele agyaa yiele ne, ɔyakyili Hosea ɔɔfale mmrienzua foforɛ. Aso bɔ ɔyɛle nati, né bɛfa ye bɛyɛ hwee a, ɔnyɛ yé anaa? Yehowa bɔ ɔkora nwu sona ahone nu ne, ɔhahyirele Hosea kyɛ: ‘Sa kohuro braa adwamanbɔlɛniɛ bɔ ɔte agyaasɛkyelɛniɛ ne, kyɛbɔ AWURADE kuro Yisraelfoɛ dwirɛ, nakoso bɛso nyameɛ foforɛ mɔ ne.’ (Hos. 3:1; Any. 16:2) Né Hosea aye ne gu so ɔyɛ sɔ bɔne pirikua ne. Nakoso, Yehowa hahyirele Hosea kyɛ ɔfa hyɛ ye, na osa ɔne ye bɛɛtena.a Yehowa nate sɔ dwirɛ he aso maa ye mmenia nemɔ nwuni kyɛ bɛnwo té hia ye. Ɔwɔ nu kyɛ né beguso bɛyɛ bɔne mbiri mbiri de, nakoso né oté kuro bɛ dwirɛ. Yeti ɔhɔleso bokale bɛ kyɛbɔ ɔkɔyɛ a, bɛkɔsakyera b’adwene ná basesã bɛ subaen ɔ. Aso sɔ dwirɛ he kyire kyɛ sɛ ebie guso ɔyɛ bɔne mbiri mbiri a, Yehowa bɔ ‘onwu bɔ ɔwɔ ahone nu’ ne, ɔkɔhɔso kɔboka sɔ sona ne maa ɔkɔsakyera ye adwene anaa? (Any. 17:3) Ɛmɔma yɛnea.

KYƐBƆ YEHOWA ABOKA ABƆNEFOƐ MAA BASAKYERA B’ADWENE Ɔ

8. Nzu yeɛ Yehowa yɛle bɔ ahaa ɔkɔboka Kein maa ɔkɔsakyera ɔ? (Gyenesise 4:​3-7) (Nea foto ne koso.)

⁸ Kein yeɛ né ɔte Adam ne Hawa awa brienzua panyi ɔ. Yeti ye koso, bɛfale bɔne bɛwole ye. Bible ne sa kã yenwo dwirɛ kyɛ: “Né ye yɔleɛ ndengyɛ.” (1 Yoh. 3:12) Ebiaa ɛhene ati yeɛ Yehowa “nye anzɔ Kein ne ye afɔleɛ ne.” Kein anzesã ye subaen, na mmom ‘ɔfɛle yaa hahii, na ye wora bɔle.’ Ɔwale sɔ ne, nzu yeɛ Yehowa yɛle ɔ? Ɔne ye bedwudwole. (Kenga Gyenesise 4:​3-7.) Ɔtole ye boase bokale Kein maa onwuni kyɛ sɛ ɔyɛ bɔ ɔte pá a, okoyira ye. Nakoso osa bɔle ye kɔkɔ kyɛ sɛ wannea yé a, ɔkɔyɛ bɔne. Bɔ ɔyɛ aworabɔ ne, Kein andie, na wamma Yehowa ammoka ye maa wansakyera. Aso ɔnate bɔ ɔyɛle nati, ɔmaa Yehowa yakyili kyɛ ɔkɔboka abɔnefoɛ maa bɛkɔsakyera b’adwene anaa? Ɔtte sɔ koraa!

9. Sɛɛ yeɛ Yehowa bokale Dawide maa ɔsakyerale ɔ?

⁹ Né Yehowa kuro Ɔhene Dawide dwirɛ paa. Ɔhane yenwo dwirɛ po kyɛ ‘ɔte sona bɔ ɔsɔ ye nye ɔ.’ (Aso. 13:22) Nakoso, Dawide yɛle bɔne mbiri mbiri; ebie yeɛ ole kyɛ ɔsɛkyele agyaa, na osa huni sona. Kyɛbɔ Mose Mmraa ne kyire ne, né ahaa odikyɛ beku ye. (Lew. 20:10; Num. 35:31) Nakoso Yehowa fale yenwo lɛle edwirɛ nanu.b Ɔsomane ye diyifoɛ Natan maa ɔhɔle Dawide berɛ, koso sɔ mmerɛ ne, né ɔyɛlle nikyefee bɔ okyire kyɛ wasakyera ɔ. Natan yɛle mvandoho bie, na ɔnate so bokale Dawide maa onwuni kyɛ bɔne bɔ wayɛ ne, ɔte piri paa. Ɛhene maa yenye wale yenwo so, yeti ɔsakyerale. (2 Sam. 12:​1-14) Dawide hworɔle edwein bie bɔ ɔmaa yenwu kyɛ né wanu yenwo amba ɔ. (Edw. 51, yeti afia dwirɛ) Mmeni pee bɔ bayɛ bɔne ne, sɔ dwein ne akyekye bɛ wora, na waboka bɛ maa bɛsakyera b’adwene. Ɔyɛ yɛ fɛ paa kyɛ Yehowa bokale Dawide maa ɔsakyerale ɔ.

10. Kyɛbɔ Yehowa le abɔnefoɛ nwo aboterɛ, na ɔfa bɔne kyɛ ne, sɛɛ yeɛ ɔmaa ɛte nga ɔ?

¹⁰ Yehowa kyi bɔne, na ɔnzosɔ so wɔ atee biala so. (Edw. 5:​4, 5) Nakoso, ɔnate kyɛ okuro yɛ dwirɛ, na ɔse kyɛ yemu yɛte abɔnefoɛ nati, sɛ yɛyɛ bɔne a, okuro kyɛ ɔboka yɛ. Bɛbɔ bayɛ bɔne bahɔ siɛ paa ne po, ɛyɛ a ɔbɔ mmɔden biala kyɛ ɔkɔboka bɛ maa bɛkɔsakyera, na bahora bapingye ye. Sɔ dwirɛ he kã ahone paa! Kyɛbɔ Yehowa le aboterɛ na ɔfa bɔne kyɛ ne, sɛ yesusu yenwo a, ɔboka yɛ maa yɛyere yɛnwo kyɛ yekoli nahorɛ yɛkɔma ye. Afei sɛ yɛyɛ bɔne a, ɔmaa yɛsakyera y’adwene ndɛ. Yede, ɛmɔma yɛnea bɔ Yesu maa ye asuafoɛ nemɔ nwu fale adwenesakyera nwo ɔ.

BƆ YESU MAA YE ASUAFOƐ NEMƆ NWU FALE ADWENESAKYERA NWO Ɔ

11-12. Kyɛbɔ Yehowa kuro kyɛ ɔkɔfa bɔne kɔhyɛ ne, sɛɛ yeɛ Yesu hyirehyirele nu ɔ? (Nea foto bɔ ɔwɔ ne.)

¹¹ Afoɛ 29 Y.B. (Yɛ Aberɛ So) yeɛ Mɛsaya ne wale ɔ, na kyɛbɔ yenwuni ye wɔ adesua bɔ olimoa nanu ne, ɔmaa mmenia nwuni kyɛ yenwo hia kyɛ bɛsakyera b’adwene. Sɔ ala yeɛ Asubɔlɛniɛ Yohane koso, Yehowa nate ye so hane adwenesakyera nwo dwirɛ ɔ.—Mat. 3:​1, 2; 4:17.

¹² Mmerɛ bɔ ne Yesu wɔ aseɛ so ne, ohyirehyirele mmenia maa benwuni kyɛ ye Baba nye gye yenwo paa kyɛ ɔkɔfa bɔne kɔhyɛ. Mvandoho bɔ ɔfa baa bɔ ne wamini nanwo ne, Yesu nate so maa sɔ dwirɛ nanu lale berɛ paa. Sɔ abrandeɛ ne fili awuro, na ɔɔbɔle bra bɔne. Ye sĩ ne, “ye nye wale ye nwo so” na osa wale awuro. Yede, nzu yeɛ ye baba ne yɛle ɔ? Yesu hane kyɛ “ɔwɔ dedeede nen, yeɛ ye baba nwuni ye ɔ, na ɔyɛle ye anwumvo, na baba ne tuli amirika ɔɔfale ye sa tole ye kɔme anu, na ɔyɛle ye awaawaatuu.” Abrandeɛ ne hahyirele ye baba kyɛ ɔma ɔɔyɛ ye ngoaa nemɔ anu ko wɔ awuro berɛ. Nakoso, baba ne frɛle ye “mma,” na osa lɛle ye tole nu. Ɔhane kyɛ: “Ominini, na manwu ye.” (Luka 15:​11-32) Koraka Yesu ba aseɛ he aso ne, onwuni kyɛ mmenia bɔ bayɛ bɔne bɔ basakyera ne, ye Baba nwuni bɛ anwumvoin, na ɔfa hyɛle bɛ. Sɔ mvandoho bɔ Yesu yɛle ne maa yenwu kyɛ Yehowa yɛ Baba ne, ɔse anwumvoin na ɛhene maa y’ahone tɔ yekunu!

13-14. Nzu yeɛ somafoɛ Petro sua fale adwenesakyera nwo ɔ, na yenwo dwirɛ beni yeɛ ɔmaa mmenia nwuni ye ɔ? (Nea foto ne koso.)

¹³ Somafoɛ Petro suane bɔne fakyɛ ne adwenesakyera nwo nikyee pee fili Yesu berɛ. Petro lili mvomsoɛ pee, nakoso Yesu fili ye ahone nu fa hyɛle ye. Ebie yeɛ ole kyɛ, ɔhane ye pɛen nza kyɛ ɔnze ye Mene ne, na ɛhene sĩ ne, ye wora bɔle paa. (Mat. 26:​34, 35, 69-75) Nakoso mmerɛ bɔ betingyele Yesu ne, ɔyele yenwo ali hyirele Petro, na ɔkɔyɛ kyɛ ye ngome yeɛ né ɔwɔ berɛ ɔ. (Luka 24:​33, 34; 1 Kor. 15:​3-5) Yɛkɔhora yɛkɔhã kyɛ sɔ mmerɛ ne, Yesu hyɛle ye suaniɛ bɔ né wanu yenwo ne ngunaen, na ɔfale ye bɔne hyɛle ye.—Mak. 16:7.

¹⁴ Ɔnate bɔ ɔtole Petro nati, né ɔkɔhora kɔboka mmenia maa bɛkɔte adwenesakyera ne bɔne fakyɛ bo yé paa. Belili Pɛntekɔso aluolue ne sĩ ne, Petro mane dwudwolɛ bie hyirele Yudafoɛ mmenikue bie, na ɔmaa benwuni kyɛ bɛ yeɛ behuni Mɛsaya ne ɔ. Nakoso otuli bɛ foɛ kyɛ: “Sɔ ati ɛmɔsakyera ɛmɔ adwene na ɛmɔbra Nyameɛ berɛ, na ɔkɔfa ɛmɔ bɔne kɔhyɛ ɛmɔ. Na sɛ ɛmɔyɔ sɔ a, sunzum nu anwoserɛ kofi Awurade berɛ kɔwa.” (Aso. 3:​14, 15, 17, 19, 20a) Bɔ né Petro kã yeɛ ole kyɛ, sɛ ebie kã kyɛ wasakyera ye adwene a, okyire kyɛ wanu yenwo paa wɔ bɔ ɔyɛle nanwo, yeti ɔngɔhɔ yenwo ko, na mmom ɔkɔyɛ bɔ Nyameɛ kuro ɔ. Osa hyirele kyɛ sɛ bɛyɛ sɔ a, Yehowa kɔfa bɛ bɔne kɔhyɛ bɛ koraa anaa okyikyi. Afoɛ pee sĩ ne, Petro hahyirele Kristofoɛ nemɔ kyɛ: ‘Aboterɛ mmom yeɛ Awurade le ye wɔ yɛ nwo ɔ, ɔmbena kyɛ sona biala mini, na mmom ɔpena kyɛ ebiala ba adwenesakyera nu.’ (2 Pet. 3:9) Nea kyɛbɔ ɔyɛ yɛ fɛ paa kyɛ, sɛ yɛyɛ bɔne bɔ ye piri te sɛɛ po, na yɛsakyera a, Yehowa kɔfa kɔhyɛ yɛ ɔ.

15-16. (a) Nzu yeɛ somafoɛ Pɔɔlo sua fale bɔne fakyɛ nwo ɔ? (1 Timoteo 1:​12-15) (b) Nzu yeɛ yekosusu yenwo wɔ adesua bɔ oliberɛ nanu ɔ?

¹⁵ Sɔɔlo bɔ ofi Taaso ne, sɛ bɛ́kã mmenia bɔ né behia adwenesakyera maa bɛfa bɛ bɔne bɛkyɛ bɛ a, né ɔboka so. Bɛbɔ né beli Kristo sĩ ne, otuli yenye siele bɛ so paa. Ɛhene ati, né Kristofoɛ nemɔ pee le adwene kyɛ ɔngɔhora ngɔsesã lle. Nakoso Yesu bɔ né batingye ne de, né onnwu ye sɔ. Na mmom, ɔne ye Baba nwuni subaen pá biemɔ bɔ ɔwɔ Sɔɔlo nwo ɔ. Yesu hane kyɛ: “Maye ye kyɛ ɔso me.” (Aso. 9:15) Ɔyɛle anwanwadeɛ po kyɛbɔ ɔkɔyɛ a, Sɔɔlo kɔhora kɔsakyera ɔ. (Aso. 7:58–8:3; 9:​1-9, 17-20) Siɛen Sɔɔlo sesane ɔɔyɛle Kristoniɛ, na bɛfrɛle ye somafoɛ Pɔɔlo. Né ɔtaa kã kyɛ, yenye sɔ kyɛbɔ Yehowa ne Yesu nwuni ye anwumvoin, ná bɛlole ye ne paa. (Kenga 1 Timoteo 1:​12-15.) Ɛhene ati, ɔhahyirele Kristofoɛ nemɔ kyɛ: “Nyameɛ paayɛlɛ ne ɔboka wɔ maa ɛsakyera w’adwene.”—Rom. 2:4.

¹⁶ Mmerɛ bie Pɔɔlo tele kyɛ ebie bu bra bɔne wɔ Korinto asafo nanu, nakoso né bɛhanne yenwo hwee. Ɔwale sɔ ne, nzu yeɛ ɔyɛle ɔ? Olili edwirɛ nanwo dwumaa wɔ atee bie aso bɔ ɔmaa yenwu kyɛ sɛ Yehowa twe ebie so a, ɔyɛ ye wɔ ɔdɔ nu, na yenwo hia koso kyɛ yenwu mmenia anwumvoin. Sɔ dwirɛ bɔ osili ne, yekosusu yenwo yɛkɔhɔ siɛ wɔ adesua bɔ oliberɛ nanu.