Kyɛbɔ Bɛkɔboka Bɛbɔ Baye Bɛ Bafi Asafo Nanu Ɔ

1-2. (a) Bɛbɔ bayɛ bɔne bɔ bɛnzakyera ne, Yehowa nwu bɛ sɛ? (b) Bɛbɔ bayɛ bɔne pirikua ne, nzu yeɛ Yehowa pena kyɛ bɛyɛ ɔ?

YEHOWA kyi bɔne, yesɔ nati nna subaen biala yeɛ odé tonu ɔ. (Edw. 5:​4-6) Abrabɔ nwo mmraa bɔ wafa wama yɛ wɔ Bible nanu ne, ɔpena kyɛ yɛfa yɛbɔ yɛ bra. Bɔ ɔte yeɛ ole kyɛ, ɔse kyɛ bɔne wɔ yɛnwo, yeti ɔnnea atee kyɛ yekoli ye mmraa so pɛpɛɛpɛ. (Edw. 130:​3, 4) Nakoso, ɛhene ngyire kyɛ “amumuyɛɛfoɛ bɔ bafa ye adom ne bakakyi ahowibra” ne, ɔsosɔ bɛso. (Yuda 4) Bible ne kã kyɛ Nyameɛ kɔsɛkye “amumuyɛɛfoɛ” wɔ Amagedon kõɛ nanu.—2 Pet. 3:7; Nye. 16:16.

² Ɛhe mukoraati sĩ ne, Yehowa mbena kyɛ ebiala kɔsɛkye. Kyɛbɔ yalimoa yanwu ye wɔ adesua ahoroɛ nanu ne, Bible ne kã ye pefee kyɛ “ɔpena kyɛ ebiala ba adwenesakyera nu.” (2 Pet. 3:9) Asafo nu mbanyi nemɔ suesua Yehowa. Yeti bɛto bɛ boase bɛboka bɛbɔ bayɛ bɔne pirikua bie ne maa bɛsakyera b’adwene, na wamaa bɛne Yehowa afia asa ayɛ kama. Nakoso, nna bemu yeɛ bɛmaa mbanyi nemɔ boka bɛ ɔ. (Yes. 6:9) Ebiemɔ wɔ berɛ a, ɔmva yenwo kyɛ mbanyi nemɔ bɔ mmɔden kyɛ bɛkɔboka bɛ ne, bayɛ b’adwene kyɛ bɔne ne alaa yeɛ bɛkɔyɛ ɔ. Sɛ ɔba sɔ a, nzu yeɛ odikyɛ mbanyi nemɔ yɛ ɔ?

‘ƐMƆYE AMUMUYƐƐNIƐ NE BÉFI ƐMƆ NU’

3. (a) Sɛ ebie yɛ bɔne pirikua bie na wanzakyera ye adwene a, nzu yeɛ Bible ne nwa bɛfa bɛyɛ ye ɔ? (b) Nzuati yeɛ yɛkɔhora yɛkɔhã kyɛ sona ne bɔbɔ yeɛ wamaa wawa ye sɔ ɔ?

³ Sɛ ebie yɛ bɔne pirikua bie na wanzakyera ye adwene a, bɔ mbanyi nemɔ kɔyɛ alaa yeɛ ole kyɛ bɛkɔfa edwirɛ bɔ ɔwɔ 1 Korintofoɛ 5:13 ne bɛkɔyɛ adwuma ɔ. Ɛberɛ nwa: ‘Ɛmɔye amumuyɛɛniɛ ne béfi ɛmɔ nu.’ Atee bie aso ne, sona ne bɔbɔ deinn yeɛ wamaa wawa ye sɔ ɔ, ofikyɛ bɔ oluale ne, yeɛ ɔpɛ ne. (Gal. 6:7) Nzuati yeɛ yɛkã sɔ ɔ? Ofikyɛ mbanyi nemɔ yɛle alaa kyɛ bɛkɔboka ye maa ɔkɔsakyera ye adwene, nakoso wanyɛ sɔ. (2 Ahe. 17:​12-15) Bɔ wayɛ ne kyire kyɛ, ɔmbena kyɛ ɔfa Yehowa mmraa yɛ adwuma.—Deut. 30:​19, 20.

4. Sɛ ebie anzakyera ye adwene, na bɛye ye befi asafo nanu a, nzuati yeɛ bɛyɛ yenwo ngaebɔ wɔ asafo nanu ɔ?

⁴ Sɛ ebie yɛ bɔne na wanzakyera ye adwene, na bɛye ye befi asafo nanu a, ɛyɛ a bɛyɛ yenwo ngaebɔ wɔ asafo nanu kyɛ, ɔtte Yehowa Danzeniɛ kõ.a Nná kyɛ ebiaa bɛpena kyɛ sona ne fɛre nati yeɛ ɔmaa bɛyɛ sɔ ngaebɔ ne ɔ. Na mmom bɛyɛ sɔ kyɛbɔ ɔkɔyɛ a, aliemaamɔ ne ‘ye ngosã,’ na ‘bɛne ye ngɔto asaa bengodidi po ɔ.’ (1 Kor. 5:​9-11) Ɔte pá kyɛ aliemaamɔ kɔyɛ sɔ, ofikyɛ somafoɛ Pɔɔlo hane kyɛ: “Mɔle harewaa kãa bie yeɛ ɔfra mɔle torɛ ne amukoraa nu maa ɔkeka ɔ.” (1 Kor. 5:6) Bɛbɔ bayɛ bɔne bɔ banzakyera b’adwene ne, bɛkɔhora bɛkɔfa bɛ subaen mmɔne ne bɛkɔsɛkye bɛbɔ bɛyere bɛnwo kyɛ bɛkɔfa Yehowa mmraa bɛkɔbɔ bɛbra ne.—Any. 13:20; 1 Kor. 15:33.

5. Sɛ bɛye ebie befi asafo nanu a, adwene beni yeɛ odikyɛ yenya ye wɔ sona nanwo ɔ, na nzuati ɔ?

⁵ Yede sɛ bɛye aliemaa bie befi asafo nanu a, adwene beni yeɛ odikyɛ yenya ye wɔ sɔ sona nanwo ɔ? Ɔwɔ nu, yɛne ye mmɔ kõ, nakoso ɔnzɛkyɛ yenya adwene kyɛ kesaalae de wayie yebo kyikyi, na mmom odikyɛ yenwu ye kyɛ ɔte boaen bɔ wamini ɔ. Sɛ boaen bie mini a, ɔkora nwu ye sĩ atee sa ba mmoaen kue nanu. Kae kyɛ sɔ sona bɔ wamini ne, ye koso oyirale yenwo so mane Yehowa. Nakoso bɔ ɔyɛ aworabɔ yeɛ ole kyɛ kesaalae de, sɔ ndaen bɔ ɔtale ne wanni so, na ɛhene yɛ suro paa. (Hes. 18:31) Yemukoraati sĩ ne, yedé yedi kyɛ sona ne kosa kɔwa ɔnate kyɛ Yehowa anwumvoinnwunɛ té wɔ berɛ. Yede, sɛ ebie yɛ bɔne maa bɛye ye befi asafo nanu a, mbanyi nemɔ kɔyɛ sɛɛ né baboka ye?

KYƐBƆ MBANYI NEMƆ BOKA BƐBƆ BAYE BƐ BAFI ASAFO NANU Ɔ

6. Sɛ bɛye ebie befi asafo nanu a, nzu yeɛ mbanyi nemɔ kɔyɛ kɔfa kɔboka ye ɔ?

⁶ Sɛ bɛye ebie befi asafo nanu a, aso okyire kyɛ baye yenu koraa, bɔ sana ye bɔbɔ osa pena Yehowa sĩ atee anaa? Nna sɔ koraa yeɛ ɔte ɔ. Sɛ ebie anzakyera ye adwene, na mbanyi kɔmatii ne kã kyire ye kyɛ bɛkɔye ye bekofi asafo nanu a, bɛmaa onwu bɔ odikyɛ ɔyɛ na wahora wasa wawa ɔ. Nakoso nna ɛhene angome, na mmom ɛyɛ a bɛkã bekyire sona ne kyɛ bɛne ye kosa koyia bosome kãa bie sĩ, na banea kyɛ wasakyera ye adwene anaa. Sɛ sona ne pene so maa bɛne ye sa yia nu a, yede sɔ mmerɛ ne, bɛkɔhyɛ ye ngunaen kyɛ ɔsakyera ye adwene, na osa bra asafo nanu. Sɛ ye po benwu ye kyɛ ɔyɛlle nikyefee bɔ okyire kyɛ wasakyera ye adwene a, ɔwɔ nu alaa a, bekosa bekoyia ye.

7. Sɛ mbanyi nemɔ boka ebie bɔ baye ye bafi asafo nanu a, sɛɛ yeɛ besuesua kyɛbɔ Yehowa nwu anwumvoin ne ɔ? (Yeremia 3:12)

⁷ Sɛ mbanyi nemɔ boka ebie bɔ baye ye bafi asafo nanu a, bɛyere bɛnwo besuesua kyɛbɔ Yehowa nwu mmenia anwumvoin ne. Yisraelfoɛ nemɔ sɔa, Yehowa anwondɛ kyɛ bɛsakyera b’adwene kora né waboka bɛ. Na mmom olimoa tuli sɔ agyirɛ ne, mmerɛ po bɔ né bɛyɛlle nikyefee bɔ okyire kyɛ basakyera ne. Kyɛbɔ yenwuni ye wɔ adesua bɔ ɔtɔ so nyɔ nanu ne, Yehowa fale diyifoɛ Hosea ne ɔye dwirɛ ne yɛle kyɛbɔ onwu anwumvoin nanwo nhwɛsoɛ. Yeti mmerɛ bɔ ɔhane kyɛ ɔne ɔye ne besa bɛɛtena ne, né braa ne té bɔ adwaman. (Hos. 3:1; Mal. 3:7) Mbanyi nemɔ koso, bɛnye gye yenwo paa kyɛ bɔ wayɛ bɔne ne, ɔkɔyɛ nzakrayɛɛ na wasa wawa. Yeti bɛnyɛ nikyefee bɔ ɔkɔmaa ɔkɔyɛ se kɔma ye kyɛ ɔkɔyɛ sɔ ɔ.—Kenga Yeremia 3:12.

8. Yesu mvandoho bɔ ɔfa baa bɔ ominini nanwo ne, sɛɛ yeɛ ɔmaa yenwu kyɛbɔ Yehowa se anwumvoin ɔ? (Luka 15:7)

⁸ Aso ɛkae Yesu mvandoho bɔ ɔfa baa bɔ ominini nanwo, bɔ yesusuli yenwo wɔ adesua bɔ ɔtɔ so nyɔ nanu ne? Mmerɛ bɔ Baba ne nwuni kyɛ ɔwa ne sa ba awuro ne, ‘otuli amirika ɔɔfale ye sa tole ye kɔme anu, na ɔyɛle ye awaawaatuu.’ (Luka 15:20) Hyɛ ye nzorɛ kyɛ baba ne anwondɛ kyɛ ɔwa ne ɔɔpa ye kyerɛ. Na mmom ye bɔbɔ yeɛ ooyiale ye ɔ, kyɛbɔ baba biala bɔ okuro ɔwa dwirɛ kɔyɛ ne. Sɔ ala yeɛ sɛ mbanyi nemɔ boka bɛbɔ bamini ne a, bɛyɛ ɔ. Bɛpena kyɛ sɔ mmenia nemɔ sa ba awuro, kyire kyɛ bɛba Yehowa berɛ. (Luka 15:​22-24, 32) Sɛ bɔnefoɛ bie sakyera ye adwene a, anigye ba anwuro dɔ, ɔne aseɛ he aso.—Kenga Luka 15:7.

9. Bɛbɔ bayɛ bɔne ne, nzu yeɛ Yehowa pena kyɛ bɛyɛ ɔ?

⁹ Ɔbaadwu wa ne, yanwu ye kyɛ bɛbɔ bɛyɛ bɔne bɔ bɛnzakyera b’adwene ne, Yehowa nzosɔ bɛso. Nakoso, ɛhene ngyire kyɛ waye yenye wafi bɛso, na mmom ɔpena kyɛ besa bɛbasõ ye. Adwene bɔ Yehowa le ye wɔ sɔ mmenia nemɔ anwo ne, Hosea 14:4 ne kã yenwo dwirɛ kyɛ: “Ngɔsa bɛ nahorɛ bɔ benni ne anwonyerɛ, ngofia me kunu ngohuro bɛ dwirɛ, ofikyɛ me yaafɛlɛ ne, maye mafi bɛ so.” Ɛhe boka mbanyi nemɔ maa benwu kyɛ, sɛ ebie yɛ nningyein biemɔ bɔ okyire kyɛ wasakyera a, odikyɛ bɛboka ye ndɛ. Osa boka bɛbɔ bafi asafo nanu ne maa benwu kyɛ, odikyɛ bɛyɛ ye ndɛ besa bɛba Yehowa berɛ.

10-11. Bɛbɔ bɛyele bɛ befili asafo nanu afoɛ pee ɛhe ne, sɛɛ yeɛ mbanyi nemɔ kɔhora kɔboka bɛ ɔ?

¹⁰ Ebiemɔ wɔ berɛ a, bɛyele bɛ befili asafo nanu ne, ebiaa afoɛ pee ɛhe. Sɔ mmenia nemɔ koso ɛɛ? Nikyee bɔ ɔnate so maa bɛyɛle bɛ befili asafo nanu ne, ebiaa né bayakyi ye yɛlɛ dadaada. Anaa ɛkɔnea po ne, né benu biemɔ ngae nikyehorɛ bɔ bɛyɛle ne kõ. Kyɛbɔ ɔte biala ne, mbanyi nemɔ kɔyere bɛnwo kɔpena bɛ sĩ atee. Sɛ bɛkɔto bɛ a, bɛne bɛ kɔbɔ nu kɔbɔ mbaeɛ, na bahyɛ bɛ ngunaen kyɛ besa bɛbra asafo nanu. Sɛ ebie fi asafo nanu maa ɔkyɛ sɔ a, ɛyɛ a né ye gyidie ayɛ mmerɛ paa. Yesɔ nati, sɛ ɔpene so kyɛ okosa kɔwa a, ebiaa mbanyi nemɔ kɔmaa ebie ne ye kosua nikye mmerɛ po bɔ bennya belɛle ye ne. Nakoso yemukoraati nu ne, bɛ yeɛ odikyɛ bɛyɛ yenwo nhyehyɛɛ ɔ.

¹¹ Mbanyi nemɔ suesua kyɛbɔ Yehowa se anwumvoin ne, yeti bɛbɔ bafi asafo nanu ne, bɛbɔ mmɔden kyɛ bɛkɔmaa benu pee nala konwu ye kyɛ bɛkɔhora bekosa bɛkɔwa. Sɛ mbanyi nemɔ nwu ye kyɛ ebie yɛ nningyein bɔ okyire kyɛ wasakyera ye adwene a, yede ndɛ nala bɛkɔhora bekole ye.—2 Kor. 2:​6-8.

12. (a) Edwirɛ benimɔ anu yeɛ odikyɛ mbanyi nemɔ nea yé paa ɔ? (b) Nzuati yeɛ ɔnzɛkyɛ yenya adwene kyɛ ebiemɔ wɔ berɛ a, Yehowa ngɔhora ngonwu bɛ anwumvoin llé ɔ? (Nea yebo berɛ dwirɛ ne koso.)

¹² Sɛ odwu mmerɛ bie a, odikyɛ mbanyi nemɔ nea yé paa kora né basa bale ebie. Ebie yeɛ ole kyɛ, sɛ sona ne tole akwalaa bie mmɔnaa, ɔɔyɛle ɔwaefoɛ, anaa ɔboapa fale atee bie aso guli ye agyaa a, yede odikyɛ mbanyi nemɔ nea nwu ye kyɛ wasakyera ye adwene amba. (Mal. 2:14; 2 Tim. 3:6) Yenwo hia kyɛ mbanyi nemɔ kɔbɔ aliemaamɔ nwo waen. Nakoso odikyɛ yenwu ye kyɛ, ebiala bɔ okonu yenwo wɔ ye bɔne nwo, ná ɔkɔsakyera ye adwene ne, Yehowa kosa kole ye. Yeti mmenia bɔ bɛne ebiemɔ lili ye yeayea ne, sɛ mbanyi nemɔ pena kyɛ besa bedé bɛ a, odikyɛ bɛmaa bɛnye da berɛ paa. Nakoso ɔnzɛkyɛ benya adwene kyɛ sɔ mmenia nemɔ, Yehowa ngɔhora ngonwu bɛ anwumvoin llé.b—1 Pet. 2:10.

BƆ ASAFO NE KƆHORA KƆYƐ Ɔ

13. Sɛ bɛkã ebie nyunu, anaa bɛye ebie befi asafo nanu a, kyɛbɔ yɛne benu biala koli ne, nzonzoleɛ beni yeɛ ɔwɔ nu ɔ?

¹³ Kyɛbɔ yenwuni ye wɔ adesua bɔ oli ɛhe nyunu nanu ne, sɛ bɛma ngaebɔ kyɛ bahã aliemaa bie nyunu a, yɛkɔhora yɛne ye kɔbɔ ofikyɛ wasakyera ye adwene, na wasesã ye subaen. (1 Tim. 5:20) Ɔnate kyɛ oté wɔ asafo nanu nati, aliemaamɔ kɔhora ne ye kɔbɔ, na bɛhyɛ ye ngunaen. (Heb. 10:​24, 25) Nakoso, sɛ bɛye ebie befi asafo nanu a, ɛhene de ɔte sorongo kãa. Sɔ sona ne, yɛne ye ‘yenzã,’ na ‘yɛne ye ndo asaa nnidi po.’—1 Kor. 5:11.

14. Bɛbɔ baye bɛ bafi asafo nanu ne, Kristofoɛ kɔyɛ sɛɛ né bagyina bɛ tiboa bɔ bafa Bible batete ye naso basi gyinayɛɛ bafa bɛnwo ɔ? (Nea foto ne koso.)

¹⁴ Sɔ dwirɛ bɔ yasusu yenwo ne, aso okyire kyɛ sɛ bɛye ebie befi asafo nanu a, yɛkɔhwe yɛnwo yekofi yenwo koraa anaa? Daabi. Bɔ ɔwɔ nu yeɛ ole kyɛ yɛne sona ne ngɔbɔ. Nakoso sɛ sona ne te y’abusuaniɛ anaa né ɔte yɛ damvo a, yede Kristofoɛ kɔhora kogyina bɛ tiboa bɔ bafa Bible ne batete ye naso kosi gyinayɛɛ kyɛ bɛkɔto bɛsa bɛkɔfrɛ ye kyɛ ɔbra adesua. Na sɛ ɔba koso ɛɛ? Dáa ne de, né yɛngyea sɔ sona ne. Nakoso, kesaalae de odikyɛ Kristoniɛ biala gyina ye tiboa bɔ wafa Bible ne watete naso si yenwo gyinayɛɛ. Ɛhene ati ebiaa ebiemɔ kosi gyinayɛɛ kyɛ sɛ sona ne ba adesua a, bɛde ɔngɔha bɛ kyɛ bɛkɔhyea ye ná bayɛ ye akwaaba ɔ. Koso ɛhene ngyire kyɛ yɛne ye yɛɛte yegyina yɛbɔ ngɔmmɔ.

15. Nwamɔ yeɛ 2 Yohane 9-11 ne kã bɛnwo dwirɛ ɔ? (Kenga edwirɛ bɔ ɔwɔ alaka nanu bɔ yenwa: “Aso Bɔne Kõ Nala Yeɛ Né Yohane Ne Pɔɔlo Bɛkã Yenwo Dwirɛ Ne Anaa?”)

¹⁵ Ebiaa ebiemɔ kobisa kyɛ: ‘Bible ne nwa sɛ ebie kyea sɔ sona ne a, okyire kyɛ ɔyɔ ye yɔleɛ tɛɛ ne bie, ɛhene koso ɛɛ? (Kenga 2 Yohane 9-11.) Sɛ yɛnea bɔ né sɔ tworɔnzɛm ne kã yenwo dwirɛ ne a, yenwu ye kyɛ awaefoɛ ne bɛbɔ bɛhyɛ subaen mmɔne nwo ngunaen wɔ asafo nanu ne, yeɛ ɔfa bɛnwo ɔ. (Nye. 2:20) Yeti sɛ sona ne te ɔwaefoɛ, anaa ebie bɔ ɔhyɛ subaen mmɔne nwo ngunaen a, ɛhene de mbanyi nemɔ ngɔhɔ ye berɛ. Nahorɛ nu, sɔ sona ne kɔhora kɔsesã. Nakoso kodwu kyɛ ɔkɔyɛ sɔ ne, yɛngɔhyea ye, na yɛngɔto yɛsa yɛngɔfrɛ ye kyɛ ɔbra adesua.

SUESUA KYƐBƆ YEHOWA SI NWU ANWUMVOIN NE

16-17. (a) Nzu yeɛ Yehowa pena kyɛ abɔnefoɛ yɛ ɔ? (Hesekiel 18:32) (b) Sɛɛ yeɛ mbanyi nemɔ ne Yehowa bɔ nu yɛ adwuma, mmerɛ bɔ bɛboka ebie bɔ wayɛ bɔne ne?

¹⁶ Adesua nnu bɔ ɔwɔ Ɛwɛnelɛ Waen he anu ne, nzu yeɛ wamaa yanwu ye ɔ? Yanwu kyɛ Yehowa mbena kyɛ ebiala kɔsɛkye! (Kenga Hesekiel 18:32.) Ɔpena kyɛ ɔne abɔnefoɛ siesie b’afia, na ɔkã bɛ bata yenwo. (2 Kor. 5:20) Ɛhene ati yeɛ ofi tete ɔbaadwu ɛnnɛ mukoraati ne, ɔkɔso srɛ abɔnefoɛ kyɛ bɛsakyera b’adwene, na besa bɛbra ye berɛ ne. Ɔte yenwo atee paa kyɛ mbanyi nemɔ ne Yehowa bɔ nu yɛ adwuma, mmerɛ bɔ bɛyere bɛnwo bɛboka mmenia bɔ bayɛ bɔne ne maa bɛsakyera b’adwene ne.—Rom. 2:4; 1 Kor. 3:9.

¹⁷ Sɛ abɔnefoɛ sakyera b’adwene a, anigye bɔ ɔba anwuro dɔ ne de, bɛnga! Yehowa, yɛ Baba bɔ ɔwɔ anwuro ne, sɛ ye mmoaen bɔ bamini nanu kõ sa ba asafo nanu a, ye bɔbɔ koso yenye gye paa. Sɛ yɛdwenedwene anwumvoin bɔ Yehowa le ye, ɔne kyɛbɔ wasi walo yɛ nanwo a, ɔmaa ɔdɔ bɔ yele yɛma ye ne, ɔyɛ piri paa.—Luka 1:78.