Kyɛbɔ Asafo Ne Suesua Adwene Bɔ Yehowa Le Ye Wɔ Abɔnefoɛ Nwo Ne Ɔ

1. Nzu yeɛ Yehowa pena kyɛ mmenia mukoraati benya ɔ?

YEHOWA bɔle sona kyɛ ye bɔbɔ ɔyɛ bɔ okuro ɔ. Ɛhene ati yeɛ ɛkora sisi gyinayɛɛ daabiala ne. Sɔ gyinayɛɛ nanu bɔ yenwo hia paa yeɛ ole kyɛ, ebie koyira yenwo so kɔma Yehowa na waaboka ye abusua naso ɔ. Yehowa pena kyɛ ebiala yɛ sɔ. Nzuati ɔ? Ofikyɛ okuro mmenia dwirɛ, na ɔpena kyɛ osi bɛ yé. Afei koso, ɔpena kyɛ ɔne bɛ fa adamvoa, na benya daa ngoa.—Deut. 30:​19, 20; Gal. 6:​7, 8.

2. Bɛbɔ bayɛ bɔne pirikua bɔ bɛsakyeralle b’adwene ne, nzu yeɛ Yehowa pena kyɛ bɛyɛ ɔ? (1 Yohane 2:1)

² Bɔ ɔte yeɛ ole kyɛ Yehowa nhyɛ ebiala kyɛ ɔsõ ye. Na mmom, wama ebiala atee kyɛ ye bɔbɔ osi sɔ gyinayɛɛ ne. Yede, sɛ Kristoniɛ bie bɔ wabɔ asu ne yɛ bɔne pirikua bie tia Yehowa koso ɛɛ? Sɛ wansakyera a, odikyɛ bɛye ye befi asafo nanu. (1 Kor. 5:13) Nakoso ɛhene po ne, ɛyɛ a né Yehowa nea atee kyɛ sona ne kosa kɔwa ye berɛ bieku. Ɛhene titire paa ti yeɛ ɔmaa Yesu oowuli ɔ, kyɛbɔ ɔkɔyɛ a abɔnefoɛ bɔ basakyera b’adwene ne, ɔkɔfa bɛ bɔne kɔhyɛ bɛ ɔ. (Kenga 1 Yohane 2:1.) Yeti bɛbɔ bayɛ bɔne pirikua ne, yɛ Nyameɛ bɔ okuro yɛ dwirɛ ne pena kyɛ bɛsakyera b’adwene.—Sak. 1:3; Rom. 2:4; Yak. 4:8.

3. Nzu yeɛ yekosusu yenwo wɔ adesua he anu ɔ?

³ Yehowa pena kyɛ adwene bɔ ole ye wɔ bɔne, ɔne mmenia bɔ bayɛ bɔne pirikua nwo ne, yɛ koso yenya bie. Yekosusu edwirɛ nza biemɔ nwo wɔ adesua he anu, na ɛhene kɔmaa yekonwu kyɛbɔ yɛkɔyɛ sɔ ɔ. (1) Mmerɛ bɔ ebie yɛle bɔne pirikua bie wɔ tete Korinto asafo nanu ne, sɛɛ yeɛ belili yenwo dwumaa ɔ? (2) Mmerɛ bɔ sɔ sona ne sakyerale ye adwene ne, akwangyerɛ beni yeɛ Pɔɔlo fa mane bɛ ɔ? (3) Nzu yeɛ sɔ dwirɛ ne maa yenwu ye yɛfa adwene bɔ Yehowa le ye wɔ mmenia bɔ bayɛ bɔne pirikua nanwo ɔ?

KYƐBƆ BELILI BƆNE PIRIKUA BIE NWO DWUMAA WƆ ASOMAFOƐ NEMƆ ABERƐ SO Ɔ

4. Edwirɛ beni yeɛ osili wɔ tete Korinto asafo nanu ɔ? (1 Korintofoɛ 5:​1, 2)

⁴ Kenga 1 Korintofoɛ 5:​1, 2. Pɔɔlo nzɛmbatrɛlɛ akwanduo bɔ ɔtɔ so nza nanu ne, ɔtele edwirɛ bie bɔ né ɔttemaye koraa. Né ɔfa asafo bɔ bate ye foforɛ wɔ Korinto nanwo. Yeɛ ole kyɛ aliemaa bie bɔ né ɔwɔ sɔ asafo nanu ne, né wale ye baba aye. Né ɛhe te subaen mmɔne paa bɔ né “ye sɛso nne ewiasefoɛ po nu ɔ.” Né bɛsosɔ ye so wɔ asafo nanu, na ɔkɔyɛ kyɛ né bɛfa bɛhoahoa bɛnwo po. Ebia benu biemɔ nyane adwene kyɛ sɔ nikyee bɔ bɛyɛ ne, okyire kyɛ besuesua kyɛbɔ Yehowa nwu mmenia anwumvoin, ɔmva yenwo kyɛ bɔne wɔ bɛnwo ne. Nakoso sɛ bɛbɔ bɛsõ Yehowa ne yɛ bɔne pirikua bie a, ɔnzosɔ so. Sɔ abrabɔ fiɛ bɔ né sɔ sona ne wɔ nu ne, né ɔfa gua asafo ne nyunu ase paa. Afei koso aliemaamɔ biemɔ bɔ né bɛne ye bɔ ne, né bɛkɔhora bekosuesua ye subaen ne bie. Ɔwale sɔ ne, nzu yeɛ Pɔɔlo hahyirele asafo ne kyɛ bɛyɛ ɔ?

5. Nzu yeɛ Pɔɔlo hahyirele asafo ne kyɛ bɛyɛ ɔ, na nzu yeɛ né ɔpena kyire ɔ? (1 Korintofoɛ 5:13) (Nea foto ne koso.)

⁵ Kenga 1 Korintofoɛ 5:13. Yehowa maa Pɔɔlo hworɔle krataa ɔɔmane Korintofoɛ nemɔ kyɛ, sɔ aliemaa bɔ wayɛ ye adwene kyɛ ɔngɔsesã ne, bɛye ye befi asafo nanu. Né aliemaamɔ kɔyɛ bɛ nikyee sɛ wɔ ɛhe anwo? Pɔɔlo hahyirele bɛ kyɛ: ‘Nnɛmaa ɛmɔ ne ye besã.’ Né sɔ dwirɛ ne kyire sɛɛ? Ohyirehyirele nu kyɛ, ‘nnɛmaa bɛ ne ye to asaa bedidi po.’ (1 Kor. 5:11) Sɛ ɛne ebie to asaa didi a, ɔyɛ sɛ alaa a ɛne ye kɔbɔ ngɔmmɔ, na ɛmɔkora bɛfa bɛnwo adamvoa po. Yeti bɔ ne Pɔɔlo kã yeɛ ole kyɛ, ɔnzɛkyɛ aliemaamɔ ne sɔ sona ne bɛbɔ bɛkɔ siɛ. Sɛ bɛyɛ sɔ a, né ɔkɔbɔ asafo nanwo waen, na aliemaamɔ anzuesua ye subaen mmɔne ne. (1 Kor. 5:​5-7) Afei koso, ebia né ɛhene kɔmaa okonwu kyɛ wayɛ Yehowa bɔne piri paa, na wamaa yenye awa yenwo so maa wasakyera.

6. Asafo ne sa hane Pɔɔlo krataa ne, nzu yeɛ bɛyɛle ɔ, na nzu yeɛ bɔnefoɛ ne koso yɛle ɔ?

⁶ Mmerɛ bɔ Pɔɔlo hworɔle krataa ɔɔmane Korintofoɛ nemɔ ne, ebia né ɔdwene yenwo kyɛ aso bɛkɔfa sɔ akwangyerɛ ne bɛkɔyɛ adwuma ɛɛn. Nakoso ye sĩ ne, Tito fale ngraa bie brɛle ye, na ɛhene maa yenye gyele paa. Yeɛ ole kyɛ aliemaamɔ tiele sɔ afutue ne, na bɛyele sɔ brienzua ne befili asafo nanu. (2 Kor. 7:​6, 7) Bɔ ɔboka so yeɛ ole kyɛ, Pɔɔlo hworɔle sɔ krataa ne ɔɔmane bɛ ne, bosome bie sĩ ne, sɔ brienzua ne sakyerale ye adwene, na ɔhyɛle yebo kyɛ ɔfa Yehowa mmraa bɔ ye bra. (2 Kor. 7:​8-11) Kesaalae bɔ wasesã ye, nzu yeɛ né Pɔɔlo kɔmaa asafo ne kɔyɛ ɔ?

BƆ NÉ ASAFO KƆYƐ, MMERƐ BƆ SƆ BRIENZUA NE SAKYERALE YE ADWENE Ɔ

7. Bɛyele bɔnefoɛ ne befili asafo nanu ne, nzu yeɛ ofili nu wale ɔ? (2 Korintofoɛ 2:​5-8)

⁷ Kenga 2 Korintofoɛ 2:​5-8. Pɔɔlo hane kyɛ “ɔte paa bɔkɔɔ ma sɔ sona ne kyɛ mmeni soma ahwi ye nyunu ɔ.” Sɔ dwirɛ ne kyire kyɛ mvasoɛ wɔ so kyɛ bɛyele bɔnefoɛ ne befili asafo nanu ɔ. Nzuati ɔ? Ofikyɛ ɔbokale ye maa ɔsakyerale ye adwene.—Heb. 12:11.

8. Nzu yeɛ Pɔɔlo hahyirele aliemaa nemɔ kyɛ bɛyɛ ɔ?

⁸ Afei Pɔɔlo hahyirele aliemaa nemɔ kyɛ: ‘Ɛmɔfa ye nwo bɛhyɛ ye, ɛmɔkyekye ye wora, na ɛmɔhɔ so behuro ye dwirɛ.’ Nna kyɛ ebia né Pɔɔlo kã kyɛ besa bele brienzua bɔ wasakyera ye adwene ne bɛbra asafo nanu mbaen. Na mmom né ɔpena kyɛ bɛfa bɛnoa dwudwolɛ, ɔne bɛ nneyɛɛ so behyire kyɛ bafa bahyɛ ye amba, na bekuro ye dwirɛ. Né ɛhene koso kɔmaa brienzua ne konwu kyɛ, ɔyɛ bɛ fɛ kyɛ wasa wawa asafo nanu ɔ.

9. Nzuati yeɛ ebia né ɔyɛ se ma ebiemɔ kyɛ bɛkɔfa aliemaa bɔ wasakyera ye adwene ne bɔne bɛkɔhyɛ ye ɔ?

⁹ Aso mmerɛ bɔ belɛle sɔ brienzua ne bɛwale asafo nanu bieku ne, né ɔyɛ se ma aliemaa biemɔ kyɛ bekole ye bɛkɔto nu anaa? Ɛhene de Bible ne nga, nakoso ɔkɔhora kɔwa sɔ. Ofikyɛ bɔ ɔyɛle ne guale asafo ne mukoraati nyunu ase, na ebia ɔmaa ebiemɔ koso lili yealɛ paa. Afei koso, né aliemaa nemɔ ayere bɛnwo bali nahorɛ bama Yehowa, yeti ebia né ɔha benu biemɔ paa kyɛ ebie bɔ wabɔ sɔ bra ne, bekosa bekole ye bɛkɔto nu kyɛ beliema ɔ. (Fatoto Luka 15:​28-30 nanwo.) Yede, sɔ brienzua bɔ né wasakyera ye adwene ne, nzuati yeɛ ne yenwo hia kyɛ asafo ne maa onwu ye kyɛ bekuro ye dwirɛ ɔ?

10-11. Sɛ asafo nu mbanyi nemɔ amva brienzua bɔ né wasakyera ye adwene ne bɔne bangyɛ ye a, ahaa nzu yeɛ okosi ɔ?

¹⁰ Brienzua bɔ né wasakyera ye adwene ne, sɛ mbanyi nemɔ anne ye bamma asafo nanu, anaakyɛ mmerɛ bɔ belɛle ye ne, aliemaamɔ yele bɛnye mane ye a, ahaa nzu yeɛ okosi ɔ? Ebiaa ahaa ‘aworabɔlɛ kobu ye kɔme anu,’ anaa okonya adwene kyɛ Yehowa ngɔfa ye bɔne ngɔhyɛ ye lle. Ɛhene ati, ahaa ye aba nu kobu alaa maa kyɛbɔ ɔ́yere yenwo kyɛ okosa kɔwa asafo nanu ne, ɔkɔyakyi.

¹¹ Aliemaa nemɔ koso, sɛ bamva brienzua ne bɔne bangyɛ ye a, ahaa ɔkɔsɛkye bɛne Yehowa afia, na né ɛhene yɛ suro paa. Nzuati ɔ? Ofikyɛ ahaa okohyire kyɛ nna Yehowa bɔ onwu abɔnefoɛ bɔ benu bɛnwo ne anwumvoin ne, yeɛ besuesua ye ɔ. Na mmom besuesua Satan bɔ yetianu yɛse bɔ onnwu ebiala anwumvoin ne. Sɛ ɔba sɔ a, né Satan kɔhora kɔfa bɛ so kɔmaa sɔ brienzua ne kɔyakyi Yehowa soen.—2 Kor. 2:​10, 11; Ɛfe. 4:27.

12. Korinto asafo ne, sɛɛ yeɛ né bekosuesua Yehowa ɔ?

¹² Korinto asafo ne, né bɛkɔyɛ sɛɛ né basuesua Yehowa na banzuesua Satan? Yeɛ ole kyɛ bɛkɔfa abɔnefoɛ bɔ benu bɛnwo ne bɔne bɛkɔhyɛ bɛ, kyɛbɔ Yehowa yɛ nala. Bɛbɔ bɛhworɔle Bible ne, wɔde nea bɔ benu biemɔ hã fale Yehowa nwo ɔ. Dawide sɔa, ɔhane kyɛ: “Ɛte paa, na ɛfa bɔne kyɛ.” (Edw. 86:5) Mika koso hane kyɛ: ‘Nwa yeɛ ɔte Nyameɛ kyɛ wɔ, bɔ ɔfa amumuyɛɛ kyɛ, bɔ obu ye nye gua mmeraatolɛ so ɔ?’ (Mik. 7:18) Yesaya wora hane kyɛ: “Ohia kyɛ bɔnefoɛ yakyi ye yɔleɛ, yeɛ sona bɔ ɔndengyɛ ne koso, maa ɔsesã ye adwene, maa osa bra AWURADE berɛ, na okonwu ye anwumvoin, maa ɔbra yɛ Nyameɛ berɛ, ofikyɛ ɔkɔfa bɔne ne kɔhyɛ kandinga paa.”—Yes. 55:7.

13. Brienzua bɔ ne wasakyera ye adwene ne, nzuati yeɛ né ɔfata kyɛ besa bedé ye ɔ? (Kenga edwirɛ bɔ ɔwɔ alaka nanu bɔ yenwa: “Brienzua Bɔ Né Ɔwɔ Korinto Asafo Nanu Ne, Mmerɛ Beni Yeɛ Besa Belɛle Ye Ɔ?”)

¹³ Korinto asafo ne, né odikyɛ bedé brienzua bɔ wasakyera ye adwene ne bɛto nu, na bɛmaa onwu kyɛ bekuro ye dwirɛ kyɛbɔ Pɔɔlo hane ne. Sɛ bɛyɛ sɔ a, okyire kyɛ né besuesua Yehowa, na né ‘bɛyɛ sotie wɔ nningyein mukoraa nu.’ (2 Kor. 2:9) Ɔwɔ nu bɛyele sɔ brienzua ne befili asafo nanu ne, ne bosome kãa apɛ nu. Nakoso, né sɔ asotwe ne aboka ye maa wasakyera ye adwene. Yeti né ndeaseɛ biala nne nu kyɛ mbanyi nemɔ kɔmaa ɔkɔhyɛ pee kora né basa bale ye ɔ. 

SUESUA KYƐBƆ YEHOWA BUA NDƐEN TUROLOO, NÁ ONWU ANWUMVOIN NE

14-15. Edwirɛ bɔ osili wɔ tete Korinto asafo nanu ne, nzu yeɛ yesua yefi kyɛbɔ belili yenwo dwumaa nanu ɔ? (2 Petro 3:9) (Nea foto ne koso.)

¹⁴ Edwirɛ bɔ osili wɔ tete Korinto asafo nanu ne, Yehowa maa bɛhworɔle kyɛbɔ belili yenwo dwumaa ne bɛtole berɛ “maa ɔyɛle ngyerɛkyerɛ mane yɛ.” (Rom. 15:4) Sɔ dwirɛ ne maa yenwu kyɛ bɛbɔ bɛyɛ bɔne pirikua bɔ bɛnzakyera ne, Yehowa mma bɛngɔso bɛndena asafo nanu. Yeti adwene bɔ ebiemɔ le ye kyɛ, odikyɛ benwu sɔ mmenia nemɔ anwumvoin maa bɛkɔso bɛtena asafo nanu ne, Yehowa nne ndo nu. Ɔwɔ nu kyɛ Yehowa nwu anwumvoin de, nakoso nná subaen biala yeɛ odé to nu ɔ, na ye mmraa bɔ ɔfa abrabɔ nwo ne koso ɔnzesã ye. (Yuda 4) Sɛ né Yehowa yɛ sɔ a, ahaa ongyire anwumvoinnwunɛ, ofikyɛ ɔkɔmaa bɛbɔ bɛwɔ asafo nanu ne abrabɔ kɔsɛkye.—Any. 13:20; 1 Kor. 15:33.

¹⁵ Ɛhe mukoraati sĩ ne, yɛse kyɛ Yehowa mbena kyɛ ebiala sɛkye, na mmom ɔpena kyɛ ɔyɛ bɔ ɔkɔhora biala fa dé mmenia ngoa. Yeti bɛbɔ basakyera b’adwene, ná bɛpena kyɛ bɛne ye fa adamvoa bieku ne, onwu bɛ anwumvoin. (Hes. 33:11; kenga 2 Petro 3:9.) Ɛhene ati yeɛ mmerɛ bɔ brienzua bɔ né ɔwɔ Korinto asafo nanu ne sakyerale ye adwene ne, Yehowa nate Pɔɔlo so maa benwuni kyɛ bɛ́fa ye bɔne bɛhyɛ ye, ná bele ye bɛtonu bieku ne.

16. Nzu yeɛ edwirɛ bɔ osili wɔ Korinto asafo nanu ne maa enwu ye fa Yehowa nwo ɔ?

¹⁶ Edwirɛ bɔ osili wɔ Korinto asafo nanu bɔ yasusu yenwo ne, ɔboka yɛ maa yenwu kyɛ Yehowa te ɔdɔ, ɔyɛ bɔ ɔtengyɛ, na obua ndɛen turoloo. (Edw. 33:5) Yɛnye gye Yehowa subaen bɔ ɔte sɔ nanwo paa, na ɔmaa yɛye yɛ ayɛ. Ofikyɛ yemu yɛte abɔnefoɛ, na yehia ye bɔnefakyɛ daabiala. Yeti ɔyɛ yɛ fɛ paa kyɛ ɔmaa Yesu wuli ɔ, na ɔnate ɛhene aso wafa yɛ bɔne wahyɛ yɛ. Amba Yehowa kuro ye mmenia dwirɛ paa, na ɔpena kyɛ osi bɛ yé, na ɛhe maa y’ahone tɔ yekunu.

17. Adesua bɔ oli berɛ nemɔ anu ne, nzu yeɛ yekosusu yenwo ɔ?

¹⁷ Ɛnnɛ koso ɛɛ, sɛ ebie yɛ bɔne pirikua bie wɔ asafo nanu a, sɛɛ yeɛ bedi yenwo dwumaa ɔ? Kyɛbɔ Yehowa kuro kyɛ ɔboka ebie bɔ wayɛ bɔne maa ɔsakyera ye adwene ne, mbanyi nemɔ kɔyɛ sɛɛ né basuesua? Sɛ mbanyi nemɔ si gyinayɛɛ kyɛ bɛkɔye ebie bekofi asafo nanu, anaa bekosa bekole ebie a, nzu yeɛ odikyɛ asafo ne yɛ ɔ? Yekonya edwirɛ hemɔ nwo mmuayɛɛ wɔ adesua bɔ oli berɛ nemɔ anu.