‘Frɛ Asafo Nu Mbanyi Nemɔ’

1. Nzu yeɛ ɔmaa yenwu kyɛ Yehowa mmoaen nanwo hia ye ɔ?

YEHOWA mmoaen nemɔ nwo hia ye paa. Ɔfale Ɔwa Yesu mogya yeɛ ɔtɔle bɛ ɔ, na wafa bɛ wawura asafo nu mbanyi nemɔ sa kyɛ bɛnea bɛ so. (Aso. 20:28) Ɔpena kyɛ mbanyi nemɔ nye kɔ ye mmoaen nanwo. Ɔnate kyɛ betie Kristo bɔ ɔte asafo ne ti ne akwangyerɛ nati, bɛmaa mmoaen nemɔ nwo dwo bɛ, na besa bɛbɔ bɛnwo waen befi nningyein bɔ ɔkɔsɛkye bɛne Yehowa afia nanwo.—Yes. 32:​1, 2.

2. Nwamɔ paa yeɛ Yehowa pena kyɛ ɔboka bɛ ɔ? (Hesekiel 34:​15, 16)

² Yehowa dwene ye mmoaen ne mukoraati nwo, nakoso bɛbɔ benwu amaneɛ ne, bɛ paa yeɛ ɔpena kyɛ ɔboka bɛ ɔ. Bɛbɔ bayɛ bɔne bie maa bɛne ye afia asɛkye ne koso, ɔnate mbanyi naso boka bɛ. (Kenga Hesekiel 34:​15, 16.) Nakoso sɛ yenwu ye kyɛ yehia ye mmokalɛ a, ɔmbena kyɛ yɛtenatena yenwo. Na mmom ɔpena kyɛ yɛbɔ ye mbaeɛ, na yesa yɛkɔ ‘neafoɛ ne akyerɛkyerɛfoɛ’ bɔ bɛwɔ asafo nanu ne berɛ maa bɛboka yɛ.—Ɛfe. 4:​11, 12.

3. Adwuma bɔ mbanyi nemɔ yɛ ne, sɛ yesusu yenwo a, ɔkɔboka yɛ sɛ?

³ Adesua he anu ne, yɛkɔnea kyɛbɔ Yehowa nate mbanyi nemɔ aso boka bɛbɔ bɛne ye afia asɛkye ne. Sɔ dwirɛ hemɔ koso, yekonya yenwo mmuayɛɛ: Mmerɛ beni yeɛ odikyɛ yɛmaa mbanyi nemɔ boka yɛ ɔ? Nzuati yeɛ odikyɛ yɛyɛ sɔ ɔ, na atee beni yeɛ bɛfa so bɛboka yɛ ɔ? Ebiaa yenwu ye kyɛ kesaalae de yɛne Yehowa afia te kama. Sɛ sɔ po a, adesua ne kɔmaa yekonya anisɔ yɛkɔma sɔ nhyehyɛɛ bɔ Nyameɛ ayɛ ne, na sɛ ɛhema bie koso yehia mbanyi nemɔ mmokalɛ a, yanwu bɔ odikyɛ yɛyɛ ɔ.

MMERƐ BENI YEƐ ODIKYƐ ‘YƐFRƐ MBANYI NEMƆ’ Ɔ?

4. Nzu yeɛ ɔmaa yenwu kyɛ edwirɛ bɔ ɔwɔ Yakobo 5:​14-16, 19, 20 ne, ɔfa ebie bɔ ɔne Yehowa afia asɛkye nanwo ɔ? (Nea foto ne koso.)

⁴ Suaniɛ Yakobo hane kyɛbɔ Yehowa nate mbanyi nemɔ aso boka yɛ nanwo dwirɛ. Ɔhworɔle kyɛ: ‘Ɛmɔ nu bie nde apɔ anaa? Maa ɔfrɛ asafo nu mbanyi.’ (Kenga Yakobo 5:​14-16, 19, 20.) Bɔ ne Yakobo kã yenwo dwirɛ ne, né ɔfa ebie bɔ ɔne Yehowa afia asɛkye nanwo. Ɛhene ati yeɛ ɔhane kyɛ sɔ sona bɔ ɔnde apɔ ne, ɔfrɛ asafo nu mbanyi nemɔ, na mmom wanga kyɛ dɔktaniɛ ne. Yakobo sa hane kyɛ bɔ ɔnde apɔ ne, sɛ bɛfa ye bɔne bɛkyɛ ye a, ɔkɔmaa yenwo kɔtɔ ye. Kyɛbɔ sɛ yɛfokyɛ a, odikyɛ yɛyɛ nningyein biemɔ kora ne yɛnwo atɔ yɛ ne, sɔ ala yeɛ sɛ yɛne Yehowa afia sɛkye a ɔte ɔ. Sɛ yɛnde apɔ a, yɛkɔ dɔktaniɛ berɛ yɛkɔkã bɔ ɔha yɛ ne yekyire ye, na yetie bɔ ɔkɔhã kyɛ yɛyɛ ne. Sɔ ala yeɛ sɛ yɛne Yehowa afia sɛkye a, odikyɛ yɛkɔ asafo nu panyi bie berɛ yɛkɔkã yenwo dwirɛ yekyire ye, na yɛfa Bible nu afutue bɔ ɔkɔfa kɔma yɛ ne yɛyɛ adwuma.

5. Yɛkɔyɛ sɛɛ ne yanwu ye kyɛ yɛne Yehowa afia pena sɛkye?

⁵ Edwirɛ bɔ ɔwɔ Yakobo yeti 5 ne, ɔhyɛ yɛ ngunaen kyɛ sɛ yenwu ye kyɛ yɛne Yehowa afia pena sɛkye a, odikyɛ yɛkɔ mbanyi nemɔ berɛ. Ɔte pá kyɛ yɛkɔyɛ sɔ kora ne yɛne Nyameɛ afia asɛkye koraa. Bible ne bɔ yɛ kɔkɔ kyɛ y’adwene kɔhora kɔyɛ yɛ kyɛ yɛne Yehowa afia te kama, nakoso ɛkɔnea ne, ne ɔtte sɔ. Yeti odikyɛ yɛnea yé na yanlakalaka yɛnwo. (Yak. 1:22) Tete Kristofoɛ bɔ ne bɛwɔ Sadise ne, benu biemɔ lili sɔ mvomsoɛ ne bie. Nakoso, Yesu hahyirele bɛ kyɛ bɛte teaseawuo. (Nye. 3:​1, 2) Sɛ yɛpena kyɛ yenwu kyɛbɔ yɛne Yehowa afia si te a, nikyee kõ bɔ ɔkɔboka yɛ yeɛ ole kyɛ, yɛkɔfa anwokeka bɔ yɛfa yɛsõ ye kesaalae ne yɛkɔtoto mmerɛ bɔ yɛbɔle asu foforɛ nanwo. (Nye. 2:​4, 5) Yɛkɔhora yekobisa yɛnwo kyɛ: ‘Anigye bɔ mefa mekenga Bible na medwenedwene yenwo ne, wate wahɔ ase hɔ? Nningyein bɔ yekosua ye wɔ adesua bo ne, aso ɛyɛ a mesua ye biala-biala anaa? Aso metoto adesua nu hɔ? Anwokeka bɔ mefa mekɔ asɛnga ne, so ate anaa? Aso mamaa nningyein bɔ mefa megye menye, anaa esikaa nwo aahia me atra nikyeebiala hɔ?’ Sɛ enwu ye kyɛ ɛtɔ sii wɔ sɔ dwirɛ he anu bie nwo a, okyire kyɛ wɔ gyidie ahɔ ase. Yeti sɛ annea yé a, nningyein kɔhora kole asaa nu koraa. Sɛ ɔyɛ se ma wɔ kyɛ wɔ bɔbɔ deinn ekoli sɔ haw nanwo dwumaa, anaa wamaa atõ Yehowa mmraa a, yede bɔ mbanyi nemɔ amaneɛ ma bɛboka wɔ.

6. Bɛbɔ bayɛ bɔne pirikua bie ne, nzu yeɛ odikyɛ bɛyɛ ɔ?

⁶ Bɛbɔ bayɛ bɔne pirikua bie bɔ ɔkɔmaa bɛkɔhora bɛkɔye bɛ bekofi asafo nanu ne, odikyɛ bɛbɔ asafo nu panyi bie amaneɛ. (1 Kor. 5:​11-13) Sɛ ebie yɛ bɔne bɔ ɔte sɔ a, sana bɛboka ye kora ne wahora wasiesie ɔne Yehowa afia. Ɔnate Yesu wue nati, Yehowa kɔhora kɔfa yɛ bɔne kɔhyɛ yɛ. Nakoso, sana ‘yɛbɔ bra bɔ okyire kyɛ yasakyera y’adwene’ ɔ. (Aso. 26:20) Nikyee kõ bɔ yɛyɛ yɛfa yekyire sɔ yeɛ ole kyɛ, sɛ yɛyɛ bɔne pirikua bie a, yɛkɔbɔ mbanyi nemɔ amaneɛ.

7. Nwamɔ koso yeɛ odikyɛ bɛmaa mbanyi nemɔ boka bɛ ɔ?

⁷ Nna bɛbɔ bayɛ bɔne pirikua ne ngome yeɛ mbanyi nemɔ boka bɛ ɔ, na mmom besa bɛboka bɛbɔ bɛ gyidie ayɛ mmerɛ ne. (Aso. 20:35) Ebie yeɛ ole kyɛ ebiaa ne ɔyɛ se ma wɔ kyɛ ɛkɔho kotia akɔnnɔ bɔne bie. Kora bɔ yeɛ ɛba asafo nanu ne, sɛ ne ɛno nnubɔne, ɛnea ponografi, anaa ɛbɔ brabɔne bie a, yede ne edwirɛ ne asɛkye koraa. Sɛ sɔ a, kã w’ahone to wɔ kunu, ofikyɛ ɛkɔhora kɔhã yenwo dwirɛ kohyire asafo nu panyi bie bɔ edé di kyɛ okonya wɔnwo alagye kotie wɔ ɔ. Ɔkɔma wɔ afutue, na wasa wamaa anwu ye kyɛ sɛ ɛyere wɔnwo di akɔnnɔ bɔne naso a, ɔkɔmaa Yehowa nye kɔgye. (Nwo. 4:12) Sɛ akɔnnɔ bɔne bɔ ɔha wɔ nati w’abanu abu po a, mbanyi nemɔ kɔmaa ekonwu ye kyɛ sɔ adwene bɔ anya ye ne, ɛhene ngome po kyire kyɛ ɛmbena kyɛ ɛkɔfa wɔnwo kɔto wɔ bɔbɔ w’anwoserɛ so. Afei osa kyire kyɛ ɛne Yehowa adamvoa nanwo hia wɔ.—1 Kor. 10:12.

8. Aso odikyɛ edwirɛ biala a ne yakuku yahɔ mbanyi nemɔ berɛ anaa? Kyirekyire nu.

⁸ Nakoso bɔ yahã ye ngyire kyɛ edwirɛ biala a, ne yakuku yahɔ mbanyi nemɔ berɛ. Wɔde fa ye kyɛ ahã edwirɛ yeayea bie ahyire aliemaa bie, anaa afɛ ye so yaa paa. Kyɛ ahaa ɛkɔɔbɔ panyi bie amaneɛ ne, odikyɛ ɛfa Yesu afutue ne yɛ adwuma, na ɛne eliema ne kosiesie ɛmɔ afia. (Mat. 5:​23, 24) Ɛkɔhora kɔyɛ nhwehwɛmuɛ kɔfa edwolɛ, aboterɛ, ɔne anwohyɛsoɛ nwo, kyɛbɔ ɔkɔyɛ a ɔkɔboka wɔ maa ɛkɔla sɔ subaen ne ali paa mmerɛ foforɛ ɔ. Sɛ ɛhe mukoraati si ne, ɛne sona ne angora anziesie ɛmɔ afia a, ɛkɔhora kɔbɔ panyi bie amaneɛ maa ɔkɔboka wɔ. Pɔɔlo krataa bɔ ɔhworɔ ɔɔmane Filipifoɛ nanu ne, ɔhahyirele aliemaa bie kyɛ ɔboka Yiwodia ne Sintike ma besiesie b’afia. Sɔ ala yeɛ w’asafo nu panyi bie kɔhora kɔboka wɔ ɔ.—Flp. 4:​2, 3.

NZUATI YEƐ ODIKYƐ YƐFRƐ MBANYI NEMƆ Ɔ?

9. Sɛ yɛyɛ bɔne bie a, nzuati yeɛ ɔnzɛkyɛ yɛfɛle kyɛ yɛkɔhã yekohyire mbanyi nemɔ ɔ? (Anyandera 28:13)

⁹ Sɛ yɛyɛ bɔne pirikua bie, anaa ɔyɛ se kyɛ yekoli akɔnnɔ bɔne bie so a, yehia gyidie ne akokoduro paa kora ne yahora yamaa mbanyi nemɔ aboka yɛ. Ɔnzɛkyɛ yɛfɛle kyɛ yɛkɔhã yekohyire mbanyi nemɔ ɔ. Nzuati ɔ? Ofikyɛ Yehowa yeɛ waye bɛ wasie berɛ kyɛ bɛboka yɛ ɔ. Yeti sɛ yɛkɔ bɛ berɛ a, okyire kyɛ yele ye nu gyidie, na yɛpena kyɛ yɛne ye afia yɛ kama. Sɛ yenwu ye kyɛ yɛpena yesoti a, odikyɛ yede yɛtonu kyɛ Yehowa yeɛ ɔkɔhora kɔboka yɛ ɔ. (Edw. 94:18) Afei sɛ yɛyɛ bɔne bie a, bɔ ɔkɔmaa Yehowa konwu yɛ anwumvoin yeɛ ole kyɛ yɛkɔbɔ mbanyi nemɔ amaneɛ, na yayakyi ye sɔ bɔne ne ɔ.—Kenga Anyandera 28:13.

10. Sɛ yɛyɛ bɔne pirikua bie na yɛfa yɛfea a, nzu yeɛ ɔkɔhora kosi ɔ?

¹⁰ Sɛ yɛyɛ bɔne na yɛbɔ mbanyi nemɔ amaneɛ a, Yehowa kɔfa kɔhyɛ yɛ. Nakoso sɛ yammɔ so a, ɔfa ɔhaw pee brɛ yɛ. Mmerɛ bɔ Ɔhene Dawide katale ye bɔne so ne, ɔne Yehowa afia sɛkyele, adwenedwene hyɛle ye so, na ebiaa ɔbɔle ye anwonyerɛ po. (Edw. 32:​3-5) Sɛ ebie fokyɛ anaa opira na wanyɛ yenwo hwee ndɛ a, ɔkora maa ɔhaw ne yɛ piri. Sɔ ala yeɛ sɛ yɛyɛ bɔne pirikua bie na yanga yenwo dwirɛ yangyire mbanyi nemɔ maa bammoka yɛ ndɛ a, ɔte ɔ. Yɛne Yehowa afia kɔsɛkye koraa. Yehowa se ye sɔ, yeti yeɛ waye mbanyi nemɔ kyɛ bɛboka yɛ maa ‘yesiesie yɛne ye afia’ mmerɛ bɔ yayɛ bɔne bie ne.—Yes. 1:​5, 6, 18.

11. Sɛ ebie yɛ bɔne pirikua bie na yɛkata so a, ɔhaw beni yeɛ ɔkɔhora kɔfa kɔwa ɔ?

¹¹ Sɛ yɛyɛ bɔne pirikua bie na yanga yenwo dwirɛ yangyire mbanyi nemɔ a, ɔkɔhora kɔfa ɔhaw kɔbrɛ mmeni foforɛ. Ebie yeɛ ole kyɛ ɔkɔhora kɔmaa Nyameɛ kɔye ye sunzum krongron kofi asafo naso, na ɔkɔsɛkye asomdwee bɔ aliemaamɔ le ye wɔ asafo nanu ne. (Ɛfe. 4:30) Sɔ ala yeɛ sɛ yɛse kyɛ aliemaa bie ayɛ bɔne pirikua bie a, odikyɛ yɛhyɛ ye ngunaen maa ɔkɔbɔ mbanyi nemɔ amaneɛ ɔ.a Sɛ yɛkata bɔne bɔ sona ne ayɛ naso a, ɔkɔmaa yekoli fɔ wɔ Yehowa nyunu. (Lew. 5:1) Yeti sɛ sona ne angɔ anga a, ɔnate ɔdɔ bɔ yele yɛma Yehowa nati, odikyɛ yɛbɔ mbanyi nemɔ amaneɛ. Sɛ yɛyɛ sɔ a, ne yɛboka maa asafo nanwo te, na osa boka bɔ wayɛ bɔne ne koso maa osiesie ɔne Yehowa afia.

ATEE BENI YEƐ MBANYI NEMƆ FA SO BOKA YƐ Ɔ?

12. Bɛbɔ bɛ gyidie ayɛ mmerɛ ne, atee beni yeɛ mbanyi nemɔ fa so boka bɛ ɔ?

¹² Bible ne amaa mbanyi nemɔ anwu ye kyɛ bɛboka bɛbɔ bɛ gyidie ayɛ mmerɛ ne. (1 Tɛs. 5:14) Sɛ ayɛ bɔne bie na ɛkã yenwo dwirɛ kyire mbanyi nemɔ a, bɛkɔto bɛ boase bekobisa wɔ dwirɛ biemɔ. Ɛhene kɔmaa bɛkɔte bɔ ɛfa nu nabo, na bahora baboka wɔ. (Any. 20:5) Ebiaa w’amammerɛ, anaa kyɛbɔ asi afɛle nati ɔyɛ se kyɛ ɛne mbanyi nemɔ kodwudwo. Nakoso fi w’ahone nu ɛne bɛ dwudwo, na ɛhene kɔmaa bekonwu kyɛbɔ bɛkɔboka wɔ ɔ. Nnɛmaa enya adwene kyɛ ebiaa ne adwudwo “fumfum,” yeti sɛ bebisa wɔ dwirɛ a, engodwudwo. (Yob 6:3) Hyɛ ye nzorɛ kyɛ, nna kyɛ ɛne mbanyi nemɔ yiale nala ne babua wɔ dwirɛ ne, na mmom bɛkɔto bɛ boase bekotie edwirɛ namu bɛkɔte yebo kora ne bafa yenwo afutue bama wɔ. (Any. 18:13) Mbanyi nemɔ se kyɛ sɛ bɛkɔhora bɛkɔnea Yehowa mmoaen bɔ bewura bɛsa naso a, sana benya bɛnwo aboterɛ. Yeti sɛ benwu ye kyɛ odikyɛ besa beyia wɔ bieku a, bɛkɔyɛ ye sɔ.

13. Sɛ mbanyi nemɔ ne yɛ bɔ mbaeɛ, na bɛfa Bible nu afutue bɛma yɛ a, ɔkɔboka yɛ sɛ? (Nea foto ne koso.)

¹³ Sɛ ɛfrɛ mbanyi nemɔ a, bɛngɔyɛ nikyeebiala bɔ ɔkɔmaa ɛyealɛ bɔ edi ne kɔyɛ piri ɔ. Na mmom bɛne wɔ kɔbɔ mbaeɛ. Sɔ mbaeɛ ne, ‘tumi wɔ nu paa,’ na kyɛbɔ okosi kɔboka wɔ ne, ebiaa ɔkɔyɛ wɔ nwanwa. Bekosa ‘bɛkɔfa ngoo bɛkɔpopa wɔ wɔ Yehowa dumaa nu.’ (Yak. 5:​14-16) Sɔ “ngoo” ne yeɛ ole nahorɛ bɔ ɔwɔ Nyameɛ Dwirɛ nanu ne. Tworɔnzɛm ahoroɛ bɔ mbanyi nemɔ ne wɔ kosusu yenwo ne, ɔkɔkyekye wɔ wora, na ɔkɔboka wɔ maa ɛne Yehowa afia kosa kɔyɛ kama bieku. (Yes. 57:18) Bible nu afutue bɔ bɛkɔfa bɛkɔma wɔ ne, ɔkɔboka wɔ maa ɛkɔyere wɔnwo kɔyɛ bɔ Yehowa kuro ɔ. Ɔkɔyɛ kyɛbɔ Yehowa nate bɛso ɔkã kyire wɔ kyɛ: ‘Atee ne ɛhe, fa so!’—Yes. 30:21.

14. Kyɛbɔ Galatiafoɛ 6:1 kã ne, sɛ ebie yɛ “bɔne” a, sɛɛ yeɛ mbanyi nemɔ boka ye ɔ? (Nea foto ne koso.)

¹⁴ Kenga Galatiafoɛ 6:1. Sɛ Kristoniɛ bie yɛ “bɔne” a, bɔ okyire yeɛ ole kyɛ ɔmva Nyameɛ akwangyerɛ mmɔ ye bra. Ebie yeɛ ole mmerɛ bɔ wasi gyinayɛɛ bie bɔ ɔttemaye, anaa watõ Nyameɛ mmraa ne. Ɔnate kyɛ asafo nu mbanyi nemɔ le ɔdɔ nati, sɛ ɔba ye sɔ a, ‘bɛfa aboterɛ bɛtengyɛtengyɛ sona ne.’ Greek dwirɛ bɔ behyirele yebo kyɛ “bɛtengyɛtengyɛ” ne, ɔkora koso kyire kyɛ bɛkã bowue bie besie yenye maa ɔtoa ɔ. Dɔktaniɛ bɔ ɔse adwuma paa ne, sɛ ebie bowue nu bu na osa kã sie yenye a, ɔto yeboase kyɛbɔ ɔkɔyɛ a, sona ne ngɔte ɛyealɛ pee ɔ. Sɔ ala yeɛ sɛ ebie yɛ bɔne a, mbanyi nemɔ to bɛboase bɛboka ye, na bɛnyɛ nikyeefee bɔ ɔkɔyɛ kyɛ bɛfa ngyee begua ye kena nu ɔ. Bible ne sa kã kyɛ, odikyɛ mbanyi nemɔ ‘nea bɛnwo yé.’ Yeti sɛ bɛboka ebie a, ɔnzɛkyɛ benwu bɛnwo kyɛ bɛde bɛte soro abɔfo, na mmom odikyɛ bɛkae kyɛ bɛ koso bɛkɔhora bekoli mvomsoɛ. Yesɔ nati, odikyɛ benya tema bɛma sona ne, na benwu ye anwumvoin.—1 Pet. 3:8.

15. Sɛ yele ɔhaw bie a, nzu yeɛ odikyɛ yɛyɛ ɔ?

¹⁵ Yɛkɔhora yekole asafo nu mbanyi nemɔ yekoli. Bama bɛ ndeteyɛɛ, yeti sɛ yɛkã yɛ dwirɛ bie yekyire bɛ a, bɛmva benni ngɔmmɔ. Afei nna bɔ b’adwene yɛ bɛ kyɛ ɔte pá ne, yeɛ begyina so betu yɛ foɛ ɔ, na mmom bɛfa begyina Bible naso. Ɛhene si ne, bɛkɔso bɛboka yɛ tonn kodwu kyɛ yekosa yekogyina yɛ gya so ɔ. (Any. 11:13; Gal. 6:2) Ɔwɔ nu, ɔsono mbanyi nanu biala subaen ne suahu bɔ ole ye ɔ, koso yɛkɔhora yɛkɔhã yɛ haw yekohyire benu biala. Nakoso sɛ yɛpena afutue bie a, yenguro kyɛ yekohyini mbanyi nemɔ so kodwu kyɛ yekonya bɔ ɔkɔhã bɔ ɔkɔyɛ yɛ fɛ ɔ. Sɛ yɛyɛ sɔ a, ne yayɛ tekyɛ mmenia biemɔ bɔ benguro kyɛ ‘bekotie ngyerɛkyerɛ bɔ ɔte paa ne,’ na mmom bɔ ‘ɔkɔyɛ bɛ so anu fɛ’ yeɛ bekuro kyɛ betie ne. (2 Tim. 4:3) Yeti sɛ yɛkã yɛ haw yekyire panyi bie a, ebiaa okobisa yɛ kyɛ aso yalimoa yɛne asafo nu mbanyi foforɛ biemɔ ali yenwo ngɔmmɔ anaa, na nzu yeɛ bɛhane ɔ. Sɔ panyi ne koso, ɔnate kyɛ ɔbrɛ yenwo ase nati, ebiaa okobisa ye mmango panyi bie maa ɔkɔboka ye.—Any. 13:10.

BƆ ODIKYƐ YƐ BƆBƆ DEINN YƐYƐ Ɔ

16. Nzu yeɛ odikyɛ yɛ bɔbɔ deinn yɛyɛ ɔ?

¹⁶ Ɔwɔ nu kyɛ mbanyi nemɔ nea yɛ so, nakoso benzisi gyinayɛɛ bɛmma yɛ. Yɛnu biala kobu ye bɔbɔ ye ngondaa kohyire Nyameɛ. Yesɔ nati, yɛ bɔbɔ deinn yeɛ odikyɛ yɛyere yɛnwo yɛbɔ bra bɔ ɔsɔ yenye ɔ. Yehowa kɔhora kɔboka yɛnu biala maa ɔkɔhɔso koli nahorɛ kɔma ye. (Rom. 14:12) Yeti kyɛ ahaa mbanyi nemɔ kohyire yɛ bɔ odikyɛ yɛyɛ ne, bɛmaa yenwu Yehowa adwene wɔ edwirɛ nanwo, na yɛ bɔbɔ yasi yɛ gyinayɛɛ. Bible nu afutue bɔ bɛfa bɛma yɛ ne, sɛ yetie a, ɔkɔmaa yekonwu “nzonzoleɛ bɔ ɔwɔ paa ne tɛɛ nu” ɔ, na wamaa yasi gyinayɛɛ pá.—Heb. 5:14.

17. Nzu yeɛ odikyɛ yɛbɔ yɛ tianu kyɛ yɛkɔyɛ ɔ?

¹⁷ Ɔyɛ yɛ fɛ paa kyɛ yɛte Yehowa mmoaen ɔ! Ɔsomane Yesu bɔ ɔte “mmoaenneafoɛ paa ne” maa oowu mane yɛ kyɛbɔ ɔkɔyɛ a, yɛkɔhora yekonya daa ngoa ɔ. (Yoh. 10:11) Wasa wama yɛ asafo nu mbanyi mɔ, na ɛhene amaa ye bɔhyɛ he awa nu kyɛ: “Ngɔye neafoɛ mɔ bɔ bɛla m’ahone nwo ɔ ngɔma ɛmɔ, bɔ bɛkɔfa nimdeɛ ne nworɛ bɛkɔtete ɛmɔ ɔ.” (Yer. 3:15) Yeti sɛ yɛ gyidie ayɛ mmerɛ, anaa yɛne Yehowa afia sɛkye a, nnɛmɔmaa ɔha yɛ kyɛ yɛkɔfrɛ mbanyi nemɔ maa bɛkɔboka yɛ ɔ. Sɛ yɛyɛ sɔ a, nhyehyɛɛ bɔ Yehowa nate bɛ aso ayɛ ama yɛ ne, yekonya so mvasoɛ paa.