Aliemaa Mmrienzuamɔ, Ɛmɔyere Bɛnwo Bɛbayɛ Asafo Nu Mbanyi Anaa?

1-2. “Adwuma paa” bɔ asafo nu panyi yɛ ne, ebie yeɛ ole beni?

SƐ AYƐ asafo nu somvoɛ afoɛ kãa ɛhe a, ebia ɛnea atee paa kyɛ ɛkɔɔyɛ asafo nu panyi. Yede, ɛkɔyɛ sɛɛ ne ahora aayɛ sɔ “adwuma paa” he bie?—1 Tim. 3:1.

² Sɛ ebie te asafo nu panyi a, ye adwuma yeɛ ole sɛɛ? Odi aliemaamɔ nyunu maa bɛyɛ asɛnga adwuma ne, ɔkɔnea bɛ boso, na osa kyirekyire bɛ. Afei ɔnate yenoa dwudwolɛ, ɔne ye nneyɛɛ so hyɛ aliemaamɔ ngunaen. Ɛhene ati yeɛ Bible ne kã bɛnwo dwirɛ kyɛ ‘bɛte akyɛdeɛ bɛma mmenia’ ne.—Ɛfe. 4:8.

3. Aliemaa bie kɔyɛ sɛɛ né wahora waayɛ asafo nu panyi? (1 Timoteo 3:​1-7; Tito 1:​5-9)

³ Ɛkɔyɛ sɛɛ né ahora aayɛ asafo nu panyi? Sɛ ɛpena kyɛ ɛbayɛ asafo nu panyi a, ɔtte kyɛ ebie bɔ ɔkwaapena adwuma ɔ. Adwuma de sɛ ebie pena a, bɔ ohia ala yeɛ ole kyɛ ole sɔ adwuma nanwo nimdeɛ ɔ; ɔba sɔ a adwumawura ne kora fa ye. Nakoso sɛ ɛpena kyɛ ɛbayɛ asafo nu panyi a, ɛhene de nna kyɛ ɛbɔ wɔnwo mmɔden wɔ asɛnga nu, anaa ɛkora kyirekyire a, né wayie. Bɔ odikyɛ ebie dwu yenwo kora né waayɛ asafo nu panyi bɔ yenwo dwirɛ wɔ 1 Timoteo 3:​1-7, ɔne Tito 1:​5-9 ne, odikyɛ ɛkora dwu yenwo. (Kenga.) Yekosusu sɔ dwirɛ nanu nza nwo wɔ adesua he anu. Yeɛ ole kyɛ: Aliemaamɔ ne bɛbɔ bɛnne asafo nanu ne, odikyɛ bɛbɔ wɔ dumaa pá, na odikyɛ ɛkora di w’abusua so yé. Afei odikyɛ ɛyɛ ebie bɔ ofia ye kunu boka aliemaamɔ ɔ.

ODIKYƐ MMENIA BƆ WƆ DUMAA PÁ

4. Sɛ bɛkã kyɛ ɛte ‘sona bɔ ngekalewa biala nne w’abrabɔ nu’ a, okyire sɛɛ?

⁴ Sɛ ɛkɔhora kɔɔyɛ asafo nu panyi a, ’odikyɛ ɛyɛ ‘sona bɔ ngekalewa biala nne w’abrabɔ nu ɔ.’ Bɔ ɛhe kyire yeɛ ole kyɛ, ɔnzɛkyɛ aliemammɔ nya adanzeɛ bɔ odi mu tia wɔ kyɛ ɛbɔ bra bie bɔ ɔttemaye ɔ. Afei koso, ‘ɔsɛ kyɛ ɛyɛ ebie bɔ mmenia bɔ bɛnne asafo nanu ne bɔ wɔ dumaa paa ɔ.’ Ɔwɔ nu, Yehowa bɔ ɛsõ ye nati mmenia kɔkekã wɔnwo dwirɛ tɛɛ, nakoso ɔnzɛkyɛ benya wɔnwo dwirɛ biala kyɛ ebie bɔ ye abrabɔ ttemaye, anaa ɔnga nahorɛ ɔ. (Dan. 6:​4, 5) Bisa wɔnwo kyɛ: ‘Aliemaamɔ ne bɛbɔ bɛnne asafo nanu ne, aso bɛbɔ me dumaa pá?’

5. Ɛkɔyɛ sɛɛ né ahyire kyɛ ɛte ebie bɔ “okuro bɔ ɔte pá” ɔ?

⁵ Sɛ ɛte ebie bɔ “okuro bɔ ɔte pá” a, ɛkɔfa w’adwene kosie subaen pá bɔ ɔwɔ mmenia nwo naso, na akamvo bɛ. Afei wɔnye gye yenwo kyɛ ɛkɔyɛ mmenia pá. Na ɛnnwondɛ mma bɛnga bɛ haw kora né aboka bɛ. (1 Tɛs. 2:8) Nzuati yeɛ yenwo hia kyɛ asafo nu mbanyi nya sɔ subaen he ɔ? Ofikyɛ bɛfa bɛ mmerɛ pee bɛkɔnea aliemaamɔ boso bɛhyɛ bɛ ngunaen, na bɛfa bie koso besiesie bɛ dwumadie ahoroɛ. (1 Pet. 5:​1-3) Nakoso anigye bɔ benya ye mmerɛ bɔ bayɛ sɔ ne, ɔtra nikyeebiala bɔ bɛfa bɛbɔle afɔleɛ ne.—Aso. 20:35.

6. Nningyein benimɔ yeɛ ebie yɛ fakyire kyɛ “okuro ɛwɔfoɛsolɛ” ɔ? (Hebrifoɛ 13:​2, 16; nea foto ne koso.)

⁶ Sɛ ɛyɛ nningyein pá ma wɔ damvomɔ ne mmeni foforɛ a, okyire kyɛ ɛte ebie bɔ “okuro ɛwɔfoɛsolɛ” ɔ. (1 Pet. 4:9) Nwomaa bie kã kyɛ, “ebie bɔ okuro ɛwɔfoɛsolɛ ne, ɔto ye sa frɛ mmenia po bɔ ɔnze bɛ ne kɔ ye awuro.” Yeti bisa wɔnwo kyɛ: ‘Nde ebie bɔ bɛse me kyɛ mekuro ɛwɔfoɛsolɛ anaa?’ (Kenga Hebrifoɛ 13:​2, 16.) Ebie bɔ okuro ɛwɔfoɛsolɛ ne, obukye ye sa nu ma bɛbɔ belle bie, ɔne mmenia bɔ bɛyɛ adwuma serɛ bɛfa bɛhyɛ aliemaamɔ ngunaen ne. Sɔ mmenia nanu biemɔ yeɛ ole manzini soneafoɛmɔ, ɔne bɛbɔ befi nekaa bie bɛbama dwudwolɛ wɔ asafo bɔ ɔwɔ nu nanu ne.—Gye. 18:​2-8; Any. 3:27; Luka 14:​13, 14; Aso. 16:15; Rom. 12:13.

7. Asafo nu panyi bie kɔyɛ sɛɛ né wahyire kyɛ ‘ye nye mmoro sikaa’?

⁷ “Ɔnzɛ kyɛ ɔma ye nye boro sikaa.” Bɔ ɛhe kyire yeɛ ole kyɛ ɛngɔfa w’adwene ngosie anwonyadeɛ pee bɔ ekonya ye naso. Yeti sɛ ɛte sikaniɛ oo, ɛte hianiɛ oo, ɛmaa Yehowa soen nwo hia wɔ tra nikyeebiala. (Mat. 6:33) Ɛbɔ mmɔden kyɛ ɛkɔfa wɔ mmerɛ, w’anwoserɛ, ɔne nikyee foforɛ biala bɔ ele ye ne kɔboka w’abusuafoɛ ne asafo ne. (Mat. 6:24; 1 Yoh. 2:​15-17) Bisa wɔnwo kyɛ: ‘Adwene beni yeɛ nné ye wɔ esikaa nwo ɔ? Aso nningyein kãa bɔ nné ye ne, memaa menye sɔ anaa? Matu menye masie esikaa ne anwonyadeɛ pee bɔ ngonya naso anaa?’—1 Tim. 6:​6, 17-19.

8. Sɛɛ yeɛ ɛda ye ali kyɛ ɛte ebie bɔ “ye nye la berɛ,” bɔ “ole anwohyɛsoɛ” ɔ?

⁸ Sɛ ɛte sona bɔ “ye nye la berɛ,” bɔ “ole anwohyɛsoɛ” a, ɛngɔyɛ nningyein ngɔtra so wɔ nikyeebiala nu. Ebie yeɛ ole kyɛ, engodidi má ɔngɔbo so, yeɛ ɛngɔno nzãa pee koso. Ɛnea wɔ ndaadeɛ wuralɛ ne w’anwosiesie yé, na ɛnea yé koso wɔ bɔ ɛfa gye wɔnye nanwo. Ɛbɔ mmɔden kyɛ engosuesua kyɛbɔ ewiase ne yɛ bɛ nningyein ne. (Luka 21:34; Yak. 4:4) Sɛ mmenia yɛ nikyee maa ɔyɛ wɔ yea po a, ɛhyɛ wɔnwo so, na ɛmvɛ yaa. Afei ɔnzɛkyɛ ɛyɛ “akɔnomnzaniɛ,” anaa ebie bɔ mmenia se ye kyɛ ɔno nzãa pee ɔ. Bisa wɔnwo kyɛ: ‘Kyɛbɔ mebɔ me bra ne, okyire kyɛ nde ebie bɔ ye nye la berɛ, bɔ ole anwohyɛsoɛ anaa?’

9. Sɛ bɛkã kyɛ odikyɛ ɛyɛ “ebie bɔ ye adwene nu pi” bɔ ɔyɛ ye ‘nikyeebiala pɛpɛɛpɛ’ a, okyire sɛɛ?

⁹ Sɛ ɛte “ebie bɔ ye adwene nu pi” a, koraka ekosi gyinayɛɛ bie ne, ɛkɔto wɔ boase kɔnea Bible nu dwirɛ bɔ ɔfa yenwo ɔ, na agyina so asi wɔ gyinayɛɛ ne. Ɔnate ɛhene ati ɛmbere wɔnwo nzi nikyeebie nwo gyinayɛɛ, mmerɛ bɔ ɛneaneane nu nwunni nahorɛ bɔ ɔwɔ nu ɔ. (Any. 18:13) Yesɔ nati, ɛkora si gyinayɛɛ bɔ ɔsɔ Yehowa nye ɔ. Sɛ ɛyɛ wɔ ‘nikyeebiala pɛpɛɛpɛ’ a, okyire kyɛ endu nningyein nhyɛ kyẽa, na edi wɔ mmerɛ so koso. Afei koso, ɛte ebie bɔ edi akwangyerɛ so, na mmenia dé wɔ di. Sɛ enya sɔ subaen hemɔ a, ɔkɔmaa mmenia kɔbɔ wɔ dumaa pá. Yede sɛ ɛte abusua ti a, ɛmɔma yɛnea subaen foforɛ bɔ Bible ne kã kyɛ odikyɛ enya ye ɔ.

NEA W’ABUSUA SO YÉ

10. Brienzua bie kɔyɛ sɛɛ né wahyire kyɛ “ɔkora bu ye bɔbɔ ye awuro yé”?

¹⁰ Sɛ egya braa, ná ɛpena kyɛ enya yenwo atee kyɛ asafo nu panyi a, yede mmɔden bɔ w’abusua bɔ ne koso kɔboka so bie. Ɛhene ati, ‘ɔsɛ kyɛ ɛyɛ sona bɔ ɔkora bu ye bɔbɔ ye awuro yé’ ɔ. Bɔ ɛhe kyire yeɛ ole kyɛ, odikyɛ edi asɛyɛdeɛ bɔ owura wɔsa kyɛ abusua ti nanwo dwumaa, ná ɛmaa w’abusua ne nwu kyɛ ekuro bɛ dwirɛ. Bɔ ɔboka ɛhe aso yeɛ ole kyɛ, nningyein bɔ yɛyɛ ye wɔ Yehowa soen nu ne, odikyɛ edi w’abusua ne nyunu maa bɛyɛ ye mukoraati bie. Nzuati yeɛ ɛhe anwo hia ɔ? Somafoɛ Pɔɔlo bisale kyɛ: ‘Sɛ ebie nze kyɛbɔ osi bu ye bɔbɔ ye awuro yé a, ɔkɔyɛ sɛɛ né wahora wanea Nyameɛ asafo so?’—1 Tim. 3:5.

11-12. Sɛ ebie pena kyɛ ɔbayɛ asafo nu panyi a, nzuati yeɛ odikyɛ ɔmaa yenye kɔ ye mmaamɔ subaen nwo ɔ? (Nea foto ne koso.)

¹¹ Sɛ ɛte ebie bɔ ele mmaa bɔ ɛne bɛ yeɛ ɛte a, ‘ɔsɛ kyɛ ɛtete bɛ maa bebu wɔ wɔ́ atee biala so.’ Odikyɛ ɛfa Bible nanu dwirɛ kyirekyire wɔ mmaa nemɔ, na ɛtete bɛ wɔ ɔdɔ nu. Ɔwɔ nu, mvomsoɛ nne yenwo kyɛ ɛkɔmaa bekoli angorɛ, na bagye bɛnye tekyɛ ngwalaa bɔ baha ne. Nakoso, ɔnate kyɛ atete bɛ yé nati, bɛkɔyɛ ngwalaa bɔ bɛso yɛ mmerɛ, bebu nikye, ná b’abrabɔ te kama ɔ. Afei koso, odikyɛ ɛyɛ bɔ ɛkɔhora biala boka bɛ maa bɛfa Yehowa adamvoa, bɛfa Bible nanu dwirɛ bɛbɔ bɛbra, ná bɛyere bɛnwo bɛbɔ asu.

¹² Odikyɛ ɛyɛ ebie “bɔ ye mma mɔ bɛte agyidifoɛ bɔ bɛnyɛ basabasa anaa asoserɛ ɔ.” Sɛ akwalaa bɔ ɔte dawurubɔniɛ bɔ ɔne ye awofoɛ te kɔyɛ bɔne pirikua bie a, sɛɛ yeɛ ɔkɔhã yenwo atee bɔ ye baba le ye ne ɔ? Sɛ bɛneanea nu benwu kyɛ obuli yenye guale nningyein so, bɔ wamva ndeteyɛɛ ne afutue wamma ɔwa ne a, yede ebiaa ɔngɔfata kyɛ asafo nu panyi kõ.—Kenga Ɔwɛn-Aban bɔ ɔwale October 15, 1996, kr. 21, ngy. 6-7 ne.

BOKA ASAFO NE

13. Ɛkɔyɛ sɛɛ né ahyire kyɛ ‘edwo,’ na ‘ɛmomma wɔ nwo so’?

¹³ Aliemaamɔ bɔ bɛda Kristofoɛ subaen bɔ ɔyɛ nyemene ali ne, asafo ne nya bɛso mvasoɛ paa. Ebie bɔ “odwo” ne, okuro asomdwee. Yeti sɛ mmenia kyire b’adwene a, ɔyɛ asoɛ tie bɛ, na sɛ ɔkɔyɛ yé a, odé tonu. Sɛ mbanyi nemɔ yia nu kyɛ besusu edwirɛ bie anwo, ná benu pee nala adwene kɔ nekahorɛ bɔ ondia Bible nu dwirɛ biala a, ɛkɔhora kole kɔto nu anaa? ‘Ɔnzɛ kyɛ ɛmoma wɔ nwo so.’ Ɛhene kyire kyɛ ɛngɔhyɛ mmenia kyɛ bɔ w’adwene kyire wɔ ne ngome yeɛ bele bɛto nu ɔ. Na mmom ekonwu ye kyɛ mvasoɛ wɔ so kyɛ ekotie mmeni foforɛ koso adwene ɔ. (Gye. 13:​8, 9; Any. 15:22) ‘Ɔnzɛ kyɛ ekuro ngondii,’ anaa ‘enya ahone.’ Kyɛ ahaa ɛkɔmaa wɔ dwirɛ kɔyɛ twaan ne, odikyɛ ɛda obuo ali na enya aboterɛ. Kyɛ ebie bɔ okuro asomdwee ne, sɛ mmenia yɛ wɔ nikyee maa ɔha wɔ po a, ɛbɔ mmɔden pena asomdwee. (Yak. 3:​17, 18) Sɛ ɛto wɔ boase ne mmenia dwudwo a, ebiaa bɛbɔ bɛnguro yɛ dwirɛ ne po, ɔkɔmaa b’ahone kodwo.—Mae. 8:​1-3; Any. 20:3; 25:15; Mat. 5:​23, 24.

14. Sɛ bɛkã kyɛ “ɔnzɛ kyɛ ɔyɛ sona bɔ ɔte gyidiniɛ foforɛ,” na ‘odi nahorɛ’ a, okyire sɛɛ?

¹⁴ Sɛ aliemaa bie kɔhora kɔɔyɛ asafo nu panyi a, “ɔnzɛ kyɛ ɔyɛ sona bɔ ɔte gyidiniɛ foforɛ ɔ.” Nna afoɛ pee bɔ afa abɔ asu ne yeɛ ole edwirɛ ne, na mmom odikyɛ ɛyɛ ebie bɔ asua Bible ne ate yebo yé, bɔ ɛkora gyina nu dwirɛ naso sisi gyinayɛɛ bɔ ɔte pá ɔ. (Mat. 20:23; Flp. 2:​5-8) Sɛ edi Yehowa mmraa so, na ɛfa akwangyerɛ bɔ ye ahyehyɛdeɛ ne fama yɛ ne yɛ adwuma a, okyire kyɛ ɛte ebie bɔ ‘odi nahorɛ’ ɔ.—1 Tim. 4:15.

15. Aso odikyɛ asafo nu panyi biala yɛ ebie bɔ yenoa ate paa wɔ dwudwolɛ manɛ nu anaa? Kyirekyire nu.

¹⁵ Tworɔnzɛm ne kã kyɛ ɔsɛ kyɛ neafoɛ yɛ ebie bɔ “ɔse ngyerɛkyerɛ” ɔ. Aso ɛhe kyire kyɛ odikyɛ ɛyɛ ebie bɔ yenoa ate paa wɔ dwudwolɛ manɛ nu anaa? Daabi. Asafo nu mbanyi pee nala wɔ berɛ a, bɛtte mmenia bɔ bɛnoa ate paa wɔ dwudwolɛ manɛ nu ɔ. Nakoso, sɛ ɛte asafo nu panyi a, odikyɛ ɛkora kyirekyire yé wɔ asɛnga nu, na sɛ ɛkɔnea aliemaamɔ boso a, odikyɛ ɛkora fa Bible ne hyɛ bɛ ngunaen. (Fatoto 1 Korintofoɛ 12:​28, 29, ɔne Ɛfesofoɛ 4:11 nanwo.) Afei koso, odikyɛ ɛbɔ wɔnwo mmɔden kyɛ ɛkɔɔyɛ ebie bɔ ɔse ngyerɛkyerɛ ɔ. Yede, nzu yeɛ ɔkɔboka wɔ maa ɛkɔhora kɔyɛ sɔ ɔ?

16. Ɛkɔyɛ sɛɛ né ahora aayɛ ebie bɔ ɔse ngyerɛkyerɛ ɔ? (Nea foto ne koso.)

¹⁶ “Ɔsɛ kyɛ otira nahorɛ dwirɛ ne anu bum.” Sɛ ɛkɔhora kɔɔyɛ ebie bɔ ɔse ngyerɛkyerɛ a, mmerɛ bɔ ekyirekyire aliemaamɔ anaa etu bɛ foɛ ne, odikyɛ ɛfa gyina Nyameɛ Dwirɛ naso. Bɔ ɔkɔboka wɔ maa ɛkɔyɛ sɔ yeɛ ole kyɛ ɛkɔkenga Bible ne, ɔne asafo nwomaa ahoroɛ. (Any. 15:28; 16:23) Sɛ ésua nikyee a, pena atee bɔ ɛkɔfa so kɔfa bɔ esua ne kɔyɛ adwuma ɔ. Sɛ ekyirekyire koso a, bɔ mmɔden kyɛ ɛkɔmaa wɔ dwirɛ ne kɔhã bɛbɔ betie wɔ ne ahone. Ɛkɔhora kɔmaa asafo nu mbanyi bɔ bɛse ngyerɛkyerɛ ne kɔboka wɔ. (1 Tim. 5:17) Ɔwɔ nu, odikyɛ asafo nu mbanyi ‘kora hyɛ aliemaamɔ ngunaen,’ nakoso odwu mmerɛ bie a, odikyɛ bɛkora betu bɛ foɛ, anaa bɛmaa benwu ‘bɛ mvomsoɛ.’ Yemukoraati nu ne, odikyɛ bɛyɛ sɔ wɔ ɔdɔ nu. Sɛ ɛmaa ɔda ali kyɛ ɛte ebie bɔ ɛdwene sona nwo, na ɛfa wɔ ngyerɛkyerɛ gyina Nyameɛ Dwirɛ naso a, ɔkɔmaa ɛkɔɔyɛ ebie bɔ ɔse ngyerɛkyerɛ ɔ. Ɛyɛ sɔ a, né esuesua Kyerɛkyerɛniɛ Pirikua Yesu.—Mat. 11:​28-30; 2 Tim. 2:24.

KƆSO YERE WƆNWO

17. (a) Nzu yeɛ ɔkɔboka asafo nu asomvoɛ maa bɛkɔhora bɛkɔɔyɛ asafo nu mbanyi ɔ? (b) Sɛ mbanyi nemɔ susu aliemaa bie nwo bɛnea kyɛ ɔkɔhora kɔɔyɛ asafo nu panyi a, nzu yeɛ odikyɛ bɛkae ye ɔ? (Kenga edwirɛ bɔ ɔwɔ alaka nanu bɔ yenwa: “Sɛ Ɛmɔsusu Aliemaamɔ Nwo A, Ɛmɔla Anwobrɛaseɛ Ali” ne.)

¹⁷ Bɔ odikyɛ ebie dwu yenwo kora né waayɛ asafo ne panyi ne, ebiaa asafo nu asomvoɛ biemɔ konya adwene kyɛ bɛngɔhora bengodwu yenwo llé. Nakoso kae kyɛ, Yehowa anaa ye ahyehyɛdeɛ ne nnea atee kyɛ ekodwu yemukoraati nwo pɛpɛɛpɛ. (1 Pet. 2:21) Afei nwu ye kyɛ, ɔte Yehowa honhom ne yeɛ ɔkɔboka wɔ maa ɛkɔhora kodwu yenwo ɔ. (Flp. 2:13) Subaen bie wɔ berɛ bɔ ɛpena kyɛ enya ye anaa? Yede kã yenwo dwirɛ kyire Yehowa, na sua sɔ subaen nanwo nikyee kɔ siɛ. Afei bisa asafo nu mbanyi nanu kõ maa ohyire wɔ kyɛbɔ ɛkɔla ye ali ɔ.

18. Nzu yeɛ bɛhyɛ asafo nu asomvoɛ mukoraati ngunaen kyɛ bɛyɛ ɔ?

¹⁸ Ɛmɔma yɛ mukoraati bɔ asafo nu mbanyi boka so ne, yɛhɔso yɛla subaen bɔ bahã yenwo dwirɛ wɔ adesua he anu ne ali. (Flp. 3:16) Ɛte asafo nu somvoɛ anaa? Kɔso ala yere wɔnwo. Srɛ Yehowa kyɛ ɔtete wɔ maa ɛɛyɛ ebie bɔ asafo ne konya wɔ so mvasoɛ paa, na ɛhora sõ ye kyɛbɔ okuro ɔ. (Yes. 64:8) Yehowa yira wɔ paa kyɛ ɛbɔ mmɔden bayɛ asafo nu panyi ɔ.