Kyire Kyɛ Wɔnye Sɔ Mmrienzua Bɔ Bɛte “Akyɛdeɛ” Bɛma Yɛ Ne

1. Nningyein bɔ Yesu ayɛ ama yɛ ne, ebie yeɛ ole beni?

SONA biala nne berɛ bɔ wayɛ nningyein pee waboka mmenia tekyɛ Yesu ɔ. Ɔyɛle anwanwadeɛ ahoroɛ bokale mmenia maa bɛnye gyele. (Luka 9:​12-17) Bɔ ɔtra sɔ akyɛdeɛ namu, yeɛ ole ye ngoa bɔ ɔfa tole berɛ mane yɛ ne. (Yoh. 15:13) Ofi mmerɛ bɔ betingyele ye ɔbaadwu ɛnnɛ mukoraati, oté boka yɛ. Ebie yeɛ ole kyɛ, wasrɛ Yehowa kyɛ ɔfa ye honhom krongon naso ɔboka yɛ, na ɔkyekye yɛ wora. (Yoh. 14:​16, 17; 16:13) Afei koso, Yesu nate asafo naso maa yɛsa kã bɔ yehia, na wamaa yahora yahã nzɛmba ne wɔ ewiase mukoraati.—Mat. 28:​18-20.

2. Mmenia bɔ bɛte “akyɛdeɛ,” bɔ Ɛfesofoɛ 4:​7, 8 kã bɛnwo dwirɛ ne, bɛ yeɛ bele nwamɔ?

² Akyɛdeɛ foforɛ bie koso wɔ berɛ bɔ Yesu afa ama yɛ ɔ. Somafoɛ Pɔɔlo hane kyɛ mmerɛ bɔ Yesu hɔle anwuro ne, “ɔmane mmenia akyɛdeɛ.” (Kenga Ɛfesofoɛ 4:​7, 8.) Pɔɔlo hyirele nu kyɛ, Yesu fale sɔ mmenia nemɔ mane, na wamaa baboka asafo ahoroɛ ne. (Ɛfe. 1:​22, 23; 4:​11-13) Ɛnnɛ, sɔ mmenia nemɔ bɔ bɛte “akyɛdeɛ” ne, bɛ yeɛ bele asafo nu asomvoɛ, asafo nu mbanyi, ɔne manzini soneafoɛ.a Sɔ mmrienzua hemɔ, ɔnate kyɛ bɔne wɔ bɛnwo nati, bedi mvomsoɛ. (Yak. 3:2) Nakoso, y’Awurade Yesu Kristo nate bɛ so ɔ́boka yɛ. Yeti bɛte akyɛdeɛ bɔ wafa bɛ wama yɛ ɔ.

3. Adwuma bɔ mmenia bɛ bɛte “akyɛdeɛ” ne yɛ ne, kyirekyire kyɛbɔ yɛkɔhora yɛkɔboka bɛ nanu.

³ Yesu afa awura sɔ mmrienzua bɔ bɛte “akyɛdeɛ” ne sa kyɛ, bɛhyɛ bɛbɔ bɛwɔ asafo nanu ne ngunaen. (Ɛfe. 4:12) Nakoso, yemukoraati yɛkɔhora yɛkɔboka bɛ maa bɛkɔyɛ sɔ adwuma bɔ yenwo hia ne. Waayɛ kyɛ mmerɛ bɔ besi Ahennie asa bie ne. Yele bɛbɔ bési sua ne, bɛbɔ bɛtõ aleɛ bɛma adwumayɛfoɛ ne, ɔne afei bɛbɔ bɛboka adwuma ne wɔ atee foforɛ so ɔ. Yɛ koso yɛkɔhora yɛkɔfa yɛnoa dwudwolɛ ne yɛ nneyɛɛ so yɛkɔboka adwuma bɔ asafo nu asomvoɛ, asafo nu mbanyi, ɔne manzini soneafoɛ nemɔ yɛ ne. Adwuma serɛ bɔ bɛyɛ ne, ɛmɔma yɛnea mvasoɛ bɔ yenya yefi so ɔ. Afei yɛkɔnea kyɛbɔ yekohyire kyɛ yɛnye sɔ mmenia bɔ bɛte “akyɛdeɛ” bɔ Yesu afa bɛ ama yɛ ne ɔ.

ASAFO NU ASOMVOƐ, BƐTE “BOKAFOƐ”

4. Asomafoɛ nemɔ aberɛ so ne, nzu yeɛ né asafo nu asomvoɛ nemɔ yɛ bɛfa bekyire kyɛ bɛte “bokafoɛ” ɔ?

⁴ Asomafoɛ nemɔ aberɛ so ne, bɛyele ebiemɔ maa bɛsone kyɛ asafo nu asomvoɛ. (1 Tim. 3:8) Ɔkɔyɛ kyɛ bɛ yeɛ Pɔɔlo hane bɛnwo dwirɛ kyɛ bɛte ‘bokafoɛ’ wɔ 1 Korintofoɛ 12:28 ne. Né asafo nu asomvoɛ nemɔ di nningyein biemɔ bɔ yenwo hia nwo dwumaa, kyɛbɔ ɔkɔyɛ a mbanyi nemɔ kɔfa b’adwene bekosie ngyerɛkyerɛ ne moaen nemɔ bɔ bɛkɔnea bɛ naso ɔ. Ebie yeɛ ole kyɛ, ɔkɔyɛ kyɛ né asafo nu asomvoɛ nemɔ nea tworɔnzɛm naso bɛtworɔ bie bɛto berɛ, anaa ebia bɛ yeɛ né bɛkɔtotɔ sɔ adwuma nanwo nningyein ɔ.

5. Adwuma ahoroɛ bɔ asafo nu asomvoɛ yɛ ye ɛnnɛ ne, ebie yeɛ ole beni?

⁵ Adwuma bɔ asafo nu asomvoɛ nemɔ yɛ ye wɔ asafo nanu ne, ɛmɔma yɛnea bie. (1 Pet. 4:10) Ebiemɔ wɔ berɛ a, bɛmaa bɛnea asafo ne sikaa ne nekaa bɔ yɛyɛ asɛnga adwuma naso. Ebiemɔ koso nea maa bɛkra nwomaa ahoroɛ bɛma aliemaamɔ. Ngaen bɔ ɔwɔ Ahennie Asa so ne, benu biemɔ yeɛ bɛnea so ɔ. Afei benu biemɔ te atɛndant, na ebiemɔ koso boka maa yesiesie Ahennie Asa so. Sɔ adwuma bɔ yenwo hia hemɔ boka maa nningyein kɔ so kama wɔ asafo nanu. (1 Kor. 14:40) Asafo nu asomvoɛ nemɔ bie yɛ Abrabɔ Ne Asɛnga Adesua dwumadie ne bie, na ebiemɔ koso ma badwa nu dwudwolɛ. Asafo nu asomvoɛ bie wɔ berɛ a, mbanyi nemɔ ma ɔkora boka kue soneafoɛ bie. Odwu mmerɛ bie po a, benu biemɔ bɔ bɛfata ne, mbanyi nemɔ maa bɛboka bɛso mmerɛ bɔ bɛkwaanea aliemaamɔ boso ne.

6. Adwuma serɛ bɔ asafo nu asomvoɛ nemɔ yɛ ne, nzuati yeɛ yɛnye sɔ ɔ?

⁶ Adwuma bɔ asafo nu asomvoɛ nemɔ yɛ ne, sɛɛ yeɛ ɔboka aliemaamɔ ɔ? Beberlyb te aliemaa brasua bɔ ɔwɔ Bolivia. Ɔhane kyɛ: “Meda asafo nu asomvoɛ nemɔ ase paa, ofikyɛ bɛmaa menya adesua bɔ mekɔ naso mvasoɛ. Bɛmaa mekora meto dwein, metie dwudwolɛ ahoroɛ, na menya vidio ne foto ahoroɛ ne bie koso menea. Aliemaamɔ ba adesua a, bɛbɔ bɛnwo waen, na bɛkɔnɛte ebiemɔ koso wɔ vidio kɔnfrɛns so. Sɛ yɛpɔno adesua a, bedi anyunu maa yesiesie Asa naso, bɛnea esikaa so, na bɛnea maa yɛsa ka nwomaa ahoroɛ koso. Menye sɔ bɔ bɛyɛ ne paa.” Leslie koso wɔ Colombia, na ohu te asafo nu panyi. Ɔhane kyɛ: “Dwumadie bɔ owura me hũ sa ne, asafo nu asomvoɛ nemɔ boka ye maa ɔkora yɛ. Sɛ bɛnne nu a, ahaa ongonya yenwo alagye koraa. Meda b’ase paa kyɛ batu bɛnwo bama bɛyɛ sɔ adwuma ne ɔ.” Edwirɛ bɔ sɔ aliemaa hemɔ kã ne, yɛne bɛ yɛ adwene.—1 Tim. 3:13.

7. Yɛkɔyɛ sɛɛ né yahyire kyɛ yɛnye sɔ adwuma bɔ asafo nu asomvoɛ nemɔ yɛ ne? (Nea foto ne koso.)

⁷ Ebia yɛkɔhã ye wɔ yɛ tianu kyɛ yɛnye sɔ adwuma bɔ asomvoɛ nemɔ yɛ ne. Nakoso odikyɛ yɛyɛ nikyebie yɛfa yekyire sɔ; ɛhene kohyire kyɛ yɛtte “boniayɛ.” (Kol. 3:15) Krzysztof wɔ Finland, na ɔte asafo nu panyi. Ɔhane kyɛ: “Sɛ asafo nu somvoɛ bie yɛ nikyeebie ma me a, metworɔ krataa anaa tɛs mɛsege mefa meda ye ase. Ɛyɛ a metaa mekã tworɔnzɛm bie nwo dwirɛ mekyire ye mmerɛ bɔ meyɛ sɔ ne.” Pascal ne Jael koso wɔ New Caledonia. Bɔ bɛyɛ yeɛ ole kyɛ, bɛtaa bɛbɔ mbaeɛ bɛma asafo nu asomvoɛ nemɔ. Pascal hane kyɛ: “Yɛnye sɔ adwuma bɔ bɛyɛ ne paa. Yeti ɛlɛsae, yɛtaa yɛbɔ mbaeɛ kyɛ Yehowa boka bɛ ma benya anwoserɛ bɛyɛ adwuma bɔ owura bɛ sa ne.” Yehowa tie mbaeɛ bɔ ɔte sɔ ne, ofikyɛ bɛbɔ bɛwɔ asafo nanu ne, bemu benya so mvasoɛ.—2 Kor. 1:11.

ASAFO NU MBANYI NEMƆ YƐ ‘ADWUMA SERƐ’

8. Mbanyi bɔ né bɛwɔ asomafoɛ nemɔ aberɛ so ne, nzuati yeɛ Pɔɔlo hane kyɛ né bɛyɛ adwuma serɛ ɔ? (1 Tɛsanikafoɛ 5:​12, 13)

⁸ Mbanyi bɔ né bɛwɔ asomafoɛ nemɔ aberɛ so ne, bɛyɛle adwuma serɛ bɛbokale asafo ne paa. (Kenga 1 Tɛsalonikafoɛ 5:​12, 13; 1 Tim. 5:17) Né sɔ mbanyi nemɔ “nea” asafo naso, bekyirekyire wɔ asafo nanu, na bebɔle nu besisili gyinayɛɛ ahoroɛ. Afei koso, befili ɔdɔ nu ‘betuli aliemaamɔ foɛ’ kyɛbɔ ɔkɔyɛ a, begyidie kɔyɛ se ɔ. (1 Tɛs. 2:​11, 12; 2 Tim. 4:2) Asa koso, bɛyɛle adwuma serɛ bɛneane b’abusua, na bɛbɔbɔ koso, bɛbɔle mmɔden kyɛ gyidie bɔ bele ye wɔ Yehowa nu ne, bɛkɔmaa nu kɔyɛ se.—1 Tim. 3:​2, 4; Tito 1:​6-9.

9. Adwuma beni yeɛ asafo nu mbanyi bɔ bɛwɔ berɛ ɛnnɛ ne yɛ ɔ?

⁹ Asafo nu mbanyi bɔ bɛwɔ berɛ ɛnnɛ ne, belle alagye koraa. Bɛte nzɛmbahanɛfoɛ. (2 Tim. 4:5) Bɛne yɛ bɔ nu yɛ asɛnga adwuma ne, bɛmaa yenwu nekaa bɔ odikyɛ yɛkɔ asɛnga ɔ, na bɛtete yɛ maa yɛkora yekyirekyire yé wɔ asɛnga nu. Besa koso bɛte ndɛenbualɛfoɛ bɔ bɛnyɛ nyeyemuɛ, na bɛse anwumvoin ɔ. Sɛ aliemaa bie yɛ bɔne pirikua bie a, sɔ mbanyi hemɔ ala yeɛ bɛboka ye maa ɔne Yehowa afia sa yɛ kama ɔ. Nakoso sɛ bɛ́yɛ sɔ a, bɛbɔ mmɔden kyɛ bɛkɔmaa asafo nanwo kɔte. (1 Kor. 5:​12, 13; Gal. 6:1) Bɔ ɔtra yemu ne, bɛte mmoaeneafoɛ. (1 Pet. 5:​1-3) Bɛma Bible nu dwudwolɛ ahoroɛ bɔ ɔhyɛ ngunaen ɔ, bɛbɔ mmɔden kyɛ bekonwu asafo nanuniɛ biala yé, ná bahyɛ ye ngunaen. Mbanyi ne biemɔ boka bɛbɔ besisi Ahennie Asa ahoroɛ na besiesie naso. Ebiemɔ koso yɛ nhyiamu nwo ndotoyɛɛ. Ebiemɔ wora boka Dɔktafoɛ Ne Ayarefoɛ Afĩa Ngitanwodie Kɔmatii (HLC), ɔne Bɛbɔ Bɛkɔnea Aliemaamɔ Wɔ Hɔspitel naso. Bɛyɛ adwuma foforɛ pee koso. Amba, asafo nu mbanyi nemɔ yɛ adwuma serɛ paa!

10. Adwuma bɔ asafo nu mbanyi nemɔ yɛ ne, nzuati yeɛ yɛnye sɔ ɔ?

¹⁰ Yehowa alimoa ahã kyɛ ɔkɔye mmoanneafoɛ bɔ bɛkɔnea yɛ so ɔ, yeti ‘yɛngosuro, na yɛ kunu ngɔtete yɛ.’ (Yer. 23:4) Aliemaa brasua Johanna wɔ Finland. Asafo nu panyi bie bokale ye paa mmerɛ bɔ anwonyerɛ bie bɔle ye maame ne. Ɔhane kyɛ: “Nde ebie bɔ menga me dwirɛ mengyire sona, nakoso mmerɛ bɔ nyɛle kyɛ mekã me haw mekyire asafo nu panyi bie bɔ menze ye pá ne, onyane aboterɛ tiele me. Ɔne me bɔle mbaeɛ, na ɔmaa nwuni kyɛ Yehowa kuro me dwirɛ paa. Mengae edwirɛ bɔ ɔhã hyirele me ne, nakoso bɔ ɔyɛle ne maa m’ahone tɔle me kunu. Medé medi kyɛ Yehowa yeɛ ɔsomane ye kyɛ ɔɔboka me ɔ.” Wɔ koso, nzu yeɛ mbanyi bɔ bɛwɔ w’asafo nu ne ayɛ afa aboka wɔ ɔ?

11. Yɛkɔyɛ sɛɛ né yahyire kyɛ yɛnye sɔ bɔ asafo nu mbanyi nemɔ yɛ ne? (Nea foto ne koso.)

¹¹ Yehowa pena kyɛ yɛmaa asafo nu mbanyi nemɔ nwu ye kyɛ yɛnye sɔ “b’adwuma” ne paa. (1 Tɛs. 5:​12, 13) Henrietta wɔ Finland, na ɔhane kyɛ: “Mbanyi nemɔ fi b’ahone nu boka mmenia. Nakoso, ɛhene ngyire kyɛ bele mmerɛ ne anwoserɛ maa ɔbo so, anaakyɛ belle haw biala. Ɛyɛ a, mekora mekã mekyire benu biemɔ kyɛ, ‘Mepena kyɛ enwu ye kyɛ ɛte asafo nu panyi bɔ ɛdwene sona nwo paa.’” Aliemaa brasua Sera koso wɔ Türkiye,c ɔhane kyɛ: “Mbanyi nemɔ koso hia ngunaenhyɛ na wamaa bahɔso bayɛ b’adwuma ne. Yeti yɛkɔhora yɛkɔhworɔ edwirɛ bie yɛkɔfa yɛkɔkamvo bɛ, yɛkɔmaa bɛkɔwa y’awuro na yɛne bɛ adidi, anaa yɛne bɛ kɔhɔ asɛnga.” Aso ɛse asafo nu panyi bie bɔ ɔbɔ yenwo mmɔden bɔ ekuro kyɛ ɛkɔkamvo ye anaa? Yede pena atee bɔ ɛkɔfa so kɔyɛ sɔ ɔ.—1 Kor. 16:18.

MANZINI SONEAFOƐ MƆ HYƐ YƐ NGUNAEN

12. Nhyehyɛɛ foforɛ beni yeɛ Yesu nate so hyɛle aliemaamɔ ngunaen wɔ asomafoɛ nemɔ aberɛ so ɔ? (1 Tɛsalonikafoɛ 2:​7, 8)

¹² Yesu Kristo sa le mmenia bɔ bɛte “akyɛdeɛ” bɔ bɛboka asafo ne wɔ atee foforɛ so ɔ. Ɔnate mbanyi bɔ né bɛwɔ Yerusalem naso somane Pɔɔlo, Banaba, ɔne mmeni foforɛ maa bɛɛneane asafo ahoroɛ nemɔ boso. (Aso. 11:22) Nzuati ɔ? Ofikyɛ né ɔpena kyɛ bɛkɔhyɛ aliemaamɔ ngunaen, kyɛbɔ asafo nu mbanyi ne asomvoɛ nemɔ koso yɛ ne. (Aso. 15:​40, 41) Sɔ mmrienzua nemɔ fale nningyein bɔ ɔkɔmaa bɛnwo kɔto bɛ, ɔne bɛ ngoa po bɛbɔle afɔleɛ kyɛbɔ ɔkɔyɛ a, bɛkɔhyɛ aliemaamɔ ngunaen ɔ.—Kenga 1 Tɛsalonikafoɛ 2:​7, 8.

13. Adwuma bɔ manzini soneafoɛ nemɔ yɛ ne, ebie yeɛ ole beni?

¹³ Manzini sonaefoɛ mɔ tutu atee paa. Benu biemɔ pɛ kwanzii pee kora né bahora baasõ asafo ahoroɛ. Sɛ ebie te manzini soneafoɛ a, dapɛen biala ɔma dwudwolɛ ahoroɛ, ɔne mbanyi nemɔ kɔhyɛ aliemaamɔ ngunaen, na ɔne ateepakyelɛfoɛ yɛ nhyiamu. Afei koso, ɔne mbanyi nemɔ yɛ nhyiamu, na ɔnea asɛnga nhyiamu so. Ɔyɛ manzini ne mandam nhyiamu nwo nhyehyɛɛ, na osua dwudwolɛ ahoroɛ bɔ ɔkɔma ne. Asa koso, okyire nikyee wɔ ateepakyelɛfoɛ sukuu ahoroɛ bo, na sɛ bɛbaayɛ manzini nhyiamu a, ɔne ateepakyelɛfoɛ nemɔ yɛ nhyiamu. Sɛ odwu mmerɛ bie koso a, Bɛtɛl kora fa adwuma bie wura ye sa maa odi yenwo dwumaa ndɛ.

14. Adwuma serɛ bɔ yɛ manzini soneafoɛ nemɔ yɛ ne, nzuati yeɛ yɛnye sɔ ɔ?

¹⁴ Adwuma bɔ manzini soneafoɛ nemɔ yɛ ne, mvasoɛ beni yeɛ aliemaamɔ nya fi so ɔ? Aliemaa bie wɔ Türkiye na ɔhane mvasoɛ bɔ onya ye, mmerɛ bɔ manzini soneafoɛ bie aasõ bɛ nanwo dwirɛ. Ɔhane kyɛ: “Sɛ manzini soneafoɛ basõ yɛ a, ɛhene hyɛ me ngunaen maa menwu kyɛ odikyɛ me koso menya mmerɛ pee meboka aliemaamɔ. Manzini soneafoɛ bɔ baasõ yɛ ne mukoraati ne, benu biala nne berɛ bɔ ɔyɛle yenwo kyɛ olle alagye, anaa ebie bɔ bɛngora bembingye ye ɔ.” Johanna bɔ yalimoa yahã yenwo dwirɛ ne, ye koso ɔne manzini soneafoɛ bie hɔle asɛnga, nakoso bando ebiala wɔ awuro. Ɔhane kyɛ: “Me wora ngofi bɔ ɔhɔle so sɔ kyẽa ne lle. Bɔ ɔwɔ nu yeɛ ole kyɛ, né nniema mmrasua nyɔ nemɔ atu ahɔ nekaa foforɛ, yeti ne me wora adɔ bɛ paa. Manzini soneafoɛ ne hyɛle me ngunaen, na ɔbokale me maa nwuni kyɛ, ewiase he anu de, ebia nna dáa yeɛ yɛne y’abusufoɛ kɔtena kɔbɔ nu ɔ, nakoso ewiase foforɛ nanu de ɔngɔwa sɔ, ofikyɛ yekonya mmerɛ pee yɛne y’abusuafoɛ yɛkɔbɔ.” Yɛ koso ebia manzini soneafoɛ bie ahyɛ yɛ ngunaen le.—Aso. 20:37–21:1.

15 (a) Kyɛbɔ 3 Yohane 5-8 kã ne, yɛkɔyɛ sɛɛ né yamaa manzini soneafoɛ nemɔ anwu kyɛ yɛnye sɔ b’adwuma ne? (Nea foto ne koso.) (b) Aliemaamɔ bɔ bɛyɛ adwuma serɛ wɔ asafo nanu ne, nzuati yeɛ odikyɛ yɛmaa bɛyemɔ nwu ye kyɛ yɛnye sɔ bɔ bɛyɛ ne ɔ, na yɛkɔyɛ ye sɛ? (Kenga alaka bɔ yeɛ ole “Ɛmɔkae Bɛyemɔ” ne.)

¹⁵ Somafoɛ Yohane hyɛle Gayɔso ngunaen kyɛ, aliemaamɔ bɔ bɛbasõ asafo ne, ɛyɛ a ɔsõ bɛ wɔfoɛ na ‘ogua bɛ ate kama bɔ ɔfata Nyameɛ solɛ ɔ.’ (Kenga 3 Yohane 5-8.) Yɛ koso yɛkɔhora yɛkɔto yɛsa yɛkɔfrɛ manzini soneafoɛ maa ɔne yɛ kɔbɔ nu kodidi. Afei koso, ɔbasõ y’asafo ne a, yɛkɔhora yɛkɔfa yɛnwo yekowura asɛnga adwuma nanu. Leslie bɔ yalimoa yahã yenwo dwirɛ ne fa atee foforɛ so maa manzini soneafoɛ nemɔ nwu kyɛ yenye sɔ b’adwuma ne paa. Ɔhane kyɛ: “Mebɔ mbaeɛ kyɛ Yehowa ma bɛsa hã bɔ behia ɔ. Afei koso, ɛyɛ a mene mehu tworɔ ngrataa yɛma bɛ, na yɛmaa benwu kyɛ sɛ bɛbasõ yɛ a, ɔboka yɛ paa.” Kae kyɛ manzini soneafoɛ nemɔ koso te sona. Yeti odwu mmerɛ bie a, bɛkora bɛfokyɛ, adwenedwene tɔ bɛ so, na b’abanu kora bu. Yeti Yehowa kɔhora kɔfa wɔ dwirɛ bie bɔ ɛkɔhã, anaa nikyee kãa bie bɔ ɛkɔfa kɔhyɛ ye naso maa okonya ye mbaeɛ nwo mmuayɛɛ.—Any. 12:25.

YEHIA MMRIENZUA BƆ BƐTE “AKYƐDEƐ” Ɔ

16. Kyɛbɔ Anyandera 3:27 kã ne, edwirɛ benimɔ yeɛ aliemaa mmrienzua nemɔ kɔhora kobisa bɛnwo ɔ?

¹⁶ Yehia aliemaa mmrienzuamɔ pee bɔ bɛte “akyɛdeɛ” bɔ bɛkɔsõ beliemamɔ wɔ ewiase mukoraati ɔ. Sɛ ɛte brienzua bɔ abɔ asu a, aso “ɛkɔhora kɔboka” wɔ sɔ atee naso? (Kenga Anyandera 3:27.) Ɛbɔ wɔnwo mmɔden kyɛ ɛkɔɔyɛ asafo nu somvoɛ anaa? Sɛ ɛte asafo nu somvoɛ koso a, ekuro kyɛ ɛbayɛ asafo nu panyi na aboka aliemaamɔ anaa?d Ɛnea a, ɛkɔhora kɔyɛ nzakrayɛɛ biemɔ wɔ w’astena nu kyɛbɔ ɔkɔyɛ a, ɛkɔhora kɔhɔ Ahennie Nanwo Nzɛmbahãnɛfoɛ Sukuu ne bie anaa? Sɔ sukuu ne kɔhora kɔtete wɔ, kyɛbɔ ɔkɔyɛ a Yesu kɔfa wɔ kɔyɛ adwuma yé ɔ. Sɛ enwu ye kyɛ ɛngɔhora sɔ nningyein ne biemɔ yɛ a, bɔ Yehowa mbaeɛ. Srɛ ye kyɛ ɔfa ye honhom krongron ne boka wɔ, kyɛbɔ ɔkɔyɛ a dwumadie biala bɔ bɛkɔfa bekowura wɔ sa ne, ɛkɔhora kɔyɛ ɔ. —Luka 11:13; Aso. 20:28.

17. Mmrienzua bɔ yɛ Hene Yesu Kristo afa bɛ ama yɛ kyɛ “akyɛdeɛ” ne, nzu yeɛ ɔmaa yenwu ye yɛfa Yesu nwo ɔ?

¹⁷ Aliemaamɔ bɔ Yesu afa bɛ ama yɛ kyɛ “akyɛdeɛ” ne, ɔte adanzeɛ bɔ okyire kyɛ ye yeɛ okyire yɛ atee wɔ ayieleɛ mmerɛ he anu ɔ. (Mat. 28:20) Aso ɔnyɛ wɔ fɛ kyɛ yele Ɔhene bɔ okuro yɛ dwirɛ, ofĩa ye kunu boka yɛ, ná ɔnate aliemaamɔ bɔ bɛte sɔ naso maa yɛsa kã bɔ yehia anaa? Yede adwuma serɛ bɔ mmrienzua bɔ bɛte sɔ nemɔ yɛ ne, pena atee bɔ ɛkɔfa so kohyire kyɛ wɔnye sɔ ɔ. Na nnɛmaa wɔ wora fi ye lle kyɛ ɛkɔla Yehowa ase, ofikyɛ ye berɛ yeɛ ‘akyɛdeɛ paa amukoraa ne akyɛdeɛ bɔ odi mu amukoraa fi ɔ.’—Yak. 1:17.