Mmeni Pee Nne Amanyɔfoɛ Nni—Nzu Yeɛ Bible Ne Ka Ɔ?

2024 afoɛ he anu ne, bɛkɔto aba wɔ wiase ne nekaa ahoroɛ pee. Nakoso ɛnnɛ de, mmeni pee nala yeɛ benne amanyɔfoɛ benni ɔ. Nzuati yeɛ yɛka sɔ ɔ?

• Bɛyɛle nhwehwɛmuɛ bie wɔ America, na mmeni pee hane kyɛ, “amanyɔfoɛ pee nala te pɛsɛmengominya,” yeti kyɛ ahaa bɛkɔ dwene maen nanwo ne, bɛ ngome bɛnwo yeɛ bɛdwene ɔ.a—Pew Research Center, September 19, 2023.

Mmabunu pee nala koso nne amanyɔfoɛ nni.

• “Mmrandeɛ ne ndaluwa pee nala pena kyɛ bedi ɔhaw bɔ ɔkɔso nanwo dwumaa, nakoso bɛtaa bɛka kyɛ, bɛ dwirɛ mva amanyɔfoɛ nemɔ nwo.”—The New York Times, January 29, 2024.

• “Nhwehwɛmuɛ bie kyire kyɛ, mmrandeɛ ne ndaluwa pee dé mmenia bɔ bɛpɛ vidio begua YouTube ne di tra amanyɔfoɛ.”—The Korea Times, January 22, 2024.

Aso yɛkɔhora yɛkɔha kyɛ, amanyɔfoɛ kɔboka maa nningyein kɔyɛ yé kyeabie? Ná nwa po yeɛ yɛfa yɛnwo yɛto ye so ɔ?

Nea bɔ edé ye di ne yé

Ɛnnɛ mmeni pee taa ka kyɛ, ‘sɛ ebie ka kyire wɔ kyɛ ɛnea anwuro a, odikyɛ ɛnea ase.’ Bible ne po tu yɛ fo kyɛ “sona bɔ ye adwene te kãa ne, ode edwirɛ biala di, nakoso badwemma de, ɔdwene ye agyirɛtulɛ nwo yé.”—Anyandera 14:15.

• Bɔ ɔkɔboka wɔ na anné edwirɛ biala bɔ ɛkɔte ne anni ne, kenga edwirɛ he: “Hwɛ Yiye Na Woannye Nsɛm Nyinaa Anni.”

Afei koso, amanyɔfoɛ bɔ bedi nahorɛ, na bele adwene pá ne po, nna nikye biala yeɛ bɛkora ye yɛ ɔ. Ɛhene ati yeɛ Bible ne bɔ yɛ kɔkɔ kyɛ:

• ‘Nnɛma ɛmɔfa ɛmɔ wora bewura ahemvo mɔ nu; yeɛ nnɛma ɛmɔfa ɛmɔ wora bewura adasa mmaa bɔ mmokalɛ biala mvi bɛ berɛ mma ne nu.’—Edwein 146:3.

Ebie bɔ ɛkɔhora kɔfa wɔnwo kɔto ye so

Bible ne maa yenwu kyɛ, Nyameɛ aye ebie bɔ yede, yɛkɔhora yekole ye yekoli paa ɔ, na ye yeɛ ole Yesu Kristo. (Luka 1:32, 33) Yesu yeɛ ɔte Nyameɛ Ahennie naso Hene ɔ, na okofi anwuro yeɛ okoli tumi ɔ.—Mateo 6:10.

• Nea bɔ yeti yeɛ ɛkɔhora kɔfa wɔnwo kɔto Yesu so kyɛ, ɔkɔye ɔhaw bɔ yɛfa nu namukoraati kofi berɛ, mmerɛ bɔ ɛkenga edwirɛ hemɔ ne: “Hena Ne Onyankopɔn Ahenni No So Hene?” ɔne “Dɛn na Onyankopɔn Ahenni Bɛyɛ?”