Nhwehwɛmuɛ Ma Abrabɔ Ne Asɛnga Adesũa Nwomaa
© 2023 Watch Tower Bible and Tract Society of Pennsylvania
MARCH 4-10
NYAMEƐ DWIRƐ NANU ASUADEƐ | EDWEIN 16-17
‘Nnné Nikye Pá Biala, Sana Wɔ Ngome’
w18.12 26 ¶11
Mmrandeɛ Ne Ndaluwa, Ɛmɔnye Kɔhora Kɔgye
FA NNAMVOA PÁ
Kenga Edwein 16:3. Dawide fale bɛbɔ bɛdɔ Yehowa ne adamvoa, na ɔhãne po kyɛ, benu yeɛ “manigye amukoraa wɔ ɔ.” Ɔhãne ye nnamvo nemɔ nwo dwirɛ kyɛ, bɛte “krongronfoɛ,” na bɔ ɛhẽne kyire yeɛ ole kyɛ, né b’abrabɔ te sannwuu. Dweintolɛniɛ bie koso hãne kyɛ, nna ebiala yeɛ ɔfa ye adamvoa ɔ. Ɔhworɔle kyɛ: “Bɛ bɔ besuro wɔ ne, yeɛ bɛ bɔ bedi w’ahyɛdeɛ so ne, nde bɛ mukoraa bɛ biɛngo.” (Edw. 119:63) Bɛbɔ besuro Yehowa, ná betie ye dwirɛ ne, bɛnyɛ nna wɔ Yehowa asafo nanu. Benu biemɔ te ngwalaa, yeɛ ebiemɔ te mbanyi, yeti ɛkɔhora kɔfa bɛ adamvoa.
w14 2/15 29 ¶4
“Manea AWURADE Animnyam”
Dawide tole dwein kyɛ: “AWURADE te m’agyapadeɛ bɔ mafa ɔ, wɔ sa nu yeɛ me nwo amukoraa wura ɔ. Nningyein paa yeɛ afa ama me ɔ.” (Edw. 16:5, 6) Ɔwɔ nu kyɛ odwu mmerɛ bie a, né Dawide fa ɔhaw nu de, nakoso né yenye sɔ “agyapadeɛ” bɔ Yehowa afa ama ye ne paa. Sɔ agyapadeɛ ne yeɛ ole adamvoa bɔ né ɔne Yehowa le ye ne, ɔne yenwo atẽe bɔ né wanya ye kyɛ ɔkora sõ ye ne. Yɛ koso, odwu mmerɛ bie a yɛfa ɔhaw nu wɔ y’asetena nu, nakoso Yehowa maa yenya nhyiraa pẽe wɔ ye sõen nu. Yeti, ɛmɔma yɛhɔso yɛsõ Yehowa nahorɛ nu wɔ ye asɔneyɛɛ sua nanu, sɛ yɛyɛ sɔ a, ɔkɔmaa yɛnye kɔgye.
w08 2/15 3 ¶2-3
Twẽ W’adwene Sie Awurade So Daa
Bɛbɔ mmenia se bɛnwo dwirɛ paa wɔ Bible nanu tekyɛ Abraham, Sara, Mose, Rutu, Dawide, Ɛseta, ɔne somafoɛ Pɔɔlo ne, yɛkɔhora yekosuesũa bɛ. Nakoso ebiemɔ wɔ berɛ a, Bible ne nga bɛnwo dwirɛ pẽe, koso sɛ yɛkenga bɛnwo dwirɛ, na yɛdwenedwene yenwo a, ɔkɔhora kɔboka yɛ. Sɛ yɛyɛ sɔ a, yɛkɔhora yɛkɔhã edwirɛ bɔ dweintolɛniɛ ne hãne ne bie, ɔhãne kyɛ: “Metwe m’adwene mesie AWURADE so daa; na ɔnate kyɛ ogyi me sa famaa so ne ati, mengofi ase.” (Edw. 16:8) Sɔ dwirɛ bɔ ɔhãne ne, okyire sɛɛ?
Sogyaniɛ sa famaa yeɛ ɔtaa fa tira ye dadeɛ ɔ, ná watira ye akokyɛm wɔ ye bɛen nu. Ɛhe ati sɛ pɔfoɛ bie fi ye sa bɛen so ɔba a, ɔkɔhora kɔfa ye dadeɛ ne kɔpɛ ye. Nakoso sɛ ofi ye famaa so yeɛ ɔba de a, ɔkɔyɛ se kɔma ye kyɛ ɔkɔfa ye dadeɛ ne kɔpɛ ye ɔ. Sɛ ɔba sɔ a, sana ye mango sogyaniɛ bɔ ogyi ye sa famaa so ne bɔ yenwo waen. Sɔ ala yeɛ yɛ koso, sɛ yɛyɛ bɔ Yehowa kuro a, ɔkɔyɛ tekyɛ ebie bɔ ogyi yɛ sa famaa so ɔ, na ɔkɔbɔ yɛnwo waen.
Bible Nu Dwirɛ Titire
it-2 714
Sona Nye Kyiremvua
Sɛ nwĩaa kãamba bie, anaa mvuture kãa bie gua wɔnye so a, ɛberɛ ala ná wɔnye ne ahyɛ yebo kyɛ ɔyɛ wɔ yea. Sɛ ɔba sɔ a, ɛye fi so ndɛ. Odikyɛ daabiala yɛnea yɛnye kyiremvua ne yé paa. Bɔ ɔmaa yɛkã sɔ yeɛ ole kyɛ, sɛ yannea yé, na sɛ nikyee bie bɔ so a, ɔkɔhora kɔsɛkye yɛnye, anaa yɛnye kɔhora kosĩ po. Ɛhe ati yeɛ Bible ne fa “yɛnye kyiremvua” toto nikyee bɔ yenwo hia paa nwo ne. Enu bie yeɛ ole kyɛ, Bible ne kã kyɛ yɛma Yehowa mmraa nwo hia yɛ kyɛ yɛnye kyiremvua. (Any 7:2) Afei koso, mmerɛ bɔ Bible ne kã kyɛbɔ né Yehowa kuro Yisraelfoɛ nemɔ dwirɛ ne, Deuteronomi 32:10 kã kyɛ, ɔbɔle bɛnwo waen kyɛ “ye nye kyiremvua.” Dawide koso bɔle Yehowa mbaeɛ kyɛ, ɔbɔ yenwo waen kyɛ “sona nye kyiremvua.” (Edw 17:8) Nzu yeɛ né Dawide pena kyire ɔ? Kyɛbɔ yalimoa yahã ne, sɛ nikyee bie tɔ yɛnye so a, yɛye yefi so ndɛ kyɛbɔ ɔkɔyɛ a, yɛnye ngosi ɔ. Yeti bɔ né Dawide pena kyire yeɛ ole kyɛ, Yehowa boka ye ndɛ kyɛbɔ ɔkɔyɛ a, ye pɔfoɛ nemɔ ngonya ye ngohũ ye ɔ. (Fa toto Sak 2:8; nanwo.) Sɛ ɛpena ɛhe anwo dwirɛ pẽe a, nea edwirɛti bɔ yeɛ ole, EYE bɔ ɔwɔ Insight nwomaa nanu ne.
MARCH 11-17
NYAMEƐ DWIRƐ NANU ASUADEƐ | EDWEIN 18
“AWURADE Te Me Défoɛ”
w09 5/1 14 ¶4-5
Awurade Nu Anigye Yeɛ Ɔte Yɛ Anwoserɛ Ɔ
Ɔtɔ mmerɛ bie a, Bible ne fa Yehowa toto nningyein biemɔ nwo. Enu bie yeɛ ole kyɛ, Bible ne kã kyɛ Yehowa te “Yisrael nyɔbotaen.” Nekaa foforɛ koso kã kyɛ, ɔte nyɔbotaen, ɔne “anwoserɛ afealeɛ.” (2 Samuel 23:3; Edwein 18:2; Deuteronomi 32:4) Nzuati yeɛ Bible ne fa Yehowa toto nyɔbotaen nwo ɔ? Ofikyɛ, nyɔbotaen nwo yɛ se, na otimu berɛ daa. Sɔ ala yeɛ Yehowa koso, yenwo yɛ se, na ole tumi bɔ ɔkɔfa kɔbɔ yɛnwo waen daabiala ɔ.
Sɛ yɛnea Edwein nwomaa nanu a, ɔfa Yehowa toto nningyein biemɔ nwo, na ɛhẽne maa yenwu kyɛ Yehowa le tumi paa. Edwien 84:11 kã kyɛ Yehowa te “eyia ne akokyɛm.” Bɔ ɛhẽne kyire yeɛ ole kyɛ, Yehowa yeɛ ɔmaa yenya hann, ngõa, na osa bɔ yɛnwo waen ɔ. Ɔtɔ mmerɛ bie koso a, Yehowa maa yɛnwo dwo yɛ fɔnwoo. Edwein 121:5 kã kyɛ, “AWURADE yeɛ ɔte wɔ fɔnwoo ɔ, wɔ wɔ sa famaa so.” Sɛ eyia bɔ serɛserɛ, na sɛ enya bakaa bie bɔ ole nyaa pẽe bo gyina a, ɔmaa wɔnwo dwo wɔ fɔnwoo. Sɔ ala yeɛ yɛ koso, sɛ yeyia ɔhaw bie bɔ enu yɛ se a, Yehowa pepɛ dé yɛ, na ɛhẽne maa yɛnwo dwo yɛ fɔnwoo. Sɛ ɔba sɔ a, né wayɛ tekyɛ bɔ Yehowa afa yɛ awura ye “sa bo,” anaa ye “ndaa ne abo” ne.—Yesaya 51:16; Edwein 17:8; 36:7.
it-2 1161 ¶7
Komvi
Yehowa tie bɛbɔ bɛsõ ye ne. Bɛbɔ befi b’ahõne nu bɛsõ Yehowa, na bedi nahorɛ bɛma ye ne, sɛ besũ bɛfrɛ ye a, otie. Nyameɛ de, ɔte dwudwolɛ biala. Yeti ɔmva yenwo ne dwudwolɛ biala bɔ bɛkɔfa bɛkɔbɔ mbaeɛ ne, okotie. Afei koso, sɛ yɛbɔ mbaeɛ wɔ yɛ tianu, na yammukyé yɛnoa po a, Yehowa te bɔ yɛkã namu. Ye mia, ɔse bɔ ɔwɔ yahõne nu dada, yeti wayɛ krado kyɛ ‘okotie.’ (Edw 66:19; 86:6; 116:1; 1Sa 1:13; Neh 2:4) Bɛbɔ benwu amaneɛ ne, sɛ besũ bɛfrɛ Nyameɛ a, ɔpepɛ dé bɛ. Afei koso, bɛbɔ bedwɔso betia Nyameɛ ne, yenye tá bɔ bɛyɛ ne, yeɛ sɛ bɛbɔ porɛ kyɛ, bɛkɔyɛ bɛbɔ bɛsõ ye ne bɔne a, ɔte bɔ bɛkã namu.—Gye 21:17; Edw 55:18, 19; 69:33; 94:9-11; Yer 23:25.
w22.04 3 ¶1
Sɛ Adwenedwene Hyɛ Yɛ So A, Bɔ Ɔkɔboka Yɛ Maa Yekogyina Yenoa Ɔ
Ɛyɛ a dwenedwene bɔ Yehowa ayɛ ama wɔ nanwo. Aso ayia ɔhaw bie bɔ sɛ nna Yehowa ahɔ a, ahãa ɛngɔhora ngogyina yenoa llé hɔ? Odikyɛ yɛdwenedwene kyɛbɔ Yehowa boka yɛ, ɔne kyɛbɔ ɔbokale bɛbɔ né bɛsõ ye tete nanwo. Sɛ yɛyɛ sɔ a, ɔkɔboka yɛ maa yɛkɔfa yɛnwo yɛkɔto Yehowa so, na yekonya akokoduro yɛkɔfa yekogyina bɔ yɛfa nu ɛnnɛ ne noa. (Edw. 18:17-19) Asafo nu panyi bie bɔ bɛfrɛ ye Joshua hãne kyɛ, “mmerɛ biala bɔ ngonwu kyɛ Yehowa atie me mbaeɛ ne, ná mahworɔ mato berɛ. Sɔ bɔ meyɛ nati, sɛ mebɔ nikye bie nwo mbaeɛ, na sɛ Yehowa yɛ ma me a, ɔmaa menwu ye.” Nahorɛ dwirɛ yeɛ ole kyɛ, sɛ yɛdwendwene bɔ Yehowa ayɛ ama yɛ nanwo a, ɔmaa yenya anwoserɛ yɛfa yegyina bɔ yɛfa nu ne noa.
Bible Nu Dwirɛ Titire
it-1 432 ¶2
Kɛrubo
Kɛrubo bɔ yɛkã yenwo dwirɛ wɔ wa ne, ɔtte bosõen suroensuroen bɔ né mmenia sõ ye ne. Yeɛ ɔtte bosõen bɔ ole ndaa kyɛbɔ ebiemɔ kã ne. Yudafoɛ bɔ né bɛwɔ berɛ tete ne, né bɛkã kyɛ Kɛrubo ne le nipadua tekyɛ yɛ deɛ ne ala, nakoso ɛhẽne de Bible ne nga yenwo dwirɛ. Sɔ Kɛrubo bɔ yɛkã bɛnwo dwirɛ ne, bɛte abɔfo, na Yehowa yeɛ ɔtole ye boase bɔle bɛ ɔ. Afei bele animnyam, na bɛnwo yɛ nyemene koso. Yehowa hãhyirele Mose kyɛ, ‘ɔsɛ kyɛ ɛmɔyɔ Kɛrubo ne sɛso pɛpɛɛpɛ,’ na ɛmɔfa besie apam alaka naso. (Ɛks 25:9) Pɔɔlo koso hãne kyɛ bɛte “animnyam kɛrubim mɔ batrɛtrɛ bɛ ndaa nu wɔ mbata bia ne aso wɔ alaka ne aso.” (Heb 9:5) Kɛrubo bɔ né ogyi ɛtena sua nanu ne, né ɔte adanzeɛ bɔ okyire kyɛ Yehowa honhom wɔ berɛ. Yehowa hãhyirele Mose kyɛ: “Berɛ yeɛ me ne wɔ yɛkoyia ɔ, wɔ mbata bia ne aso anwuro, wɔ kɛrubim nyɔ bɔ bɛwɔ Adanzeɛ alaka ne aso ne b’afia.” (Ɛks 25:22; Num 7:89) Afei koso, Bible ne kã kyɛ Yehowa “te kɛrubim nemɔ b’afia.” (1Sa 4:4; 2Sa 6:2; 2Ah 19:15; 1Abe 13:6; Edw 80:1; 99:1; Yes 37:16) Ebiekũ koso, wɔ Bible nu ne, odwu mmerɛ bie a, bɛfa Kɛrubo ne begyina berɛ bɛma teaseɛnam bɔ Yehowa te so ne. (1Abe 28:18) Bible ne sa kã kyɛ, Kɛrubo ne le ndaa. Na bɔ ɛhẽne kyire yeɛ ole kyɛ, Yehowa nate bɛ so bɔ yɛnwo waen, na bɛnwo yɛ nyera koso. Mmerɛ bie, né Dawide hia mmokalɛ, na ɔfale kyɛbɔ Yehowa yɛle ndɛen ɔɔbokale ye ne totole kyɛbɔ Kɛrubo nwo yɛ nyera nanwo. Ɔhãne kyɛ: “Ɔtenane kɛrubo so tuli, na benwuni ye wɔ mvrama ye ndaa so.”—2Sa 22:11; Edw 18:10.
MARCH 18-24
NYAMEƐ DWIRƐ NANU ASUADEƐ | EDWEIN 19-21
“Nyameɛso Ye Nyameɛ Animnyam Kyire”
w04 1/1 8 ¶1-2
Ɛmɔma Yɛhyɛ Yehowa Animnyam
Né Yese awa yeɛ ole Dawide, na mmerɛ bɔ né ɔte akwalaa ne, né ɔfa mmoaen kɔ adidie. Sɛ Dawide fa ngaka nemɔ kɔ adidie, na sɛ odwu kɔngɔen bɔ ewienu ayɛ dinn ne a, ɔpena nekaa bie tena, ná wanea nzramaa bɔ ɔwɔ ewienu nu ne. Ɛhe ati, mmerɛ bɔ ɔtwerɛ Edwein 19 ne, bɔ onwuni ye sɔ mmerɛ ne, yeɛ ɔhãne yenwo dwirɛ ɔ. Edwirɛ bɔ ɔhworɔle ye wɔ sɔ dwein nanu ne, ɔyɛ fɛ paa. Wɔde, tie enu dwirɛ ne bie: “Nyameɛso ye Nyameɛ animnyam kyire, yeɛ ewienu bɔ ye sa noa adwuma nwo dawure. Bɛ komvi dwu aseɛ ye aso nekaa biala, na bɛ dwirɛ fi aseɛ ti kɔka ye ti.”—Edwein 19:1, 4.
Nningyein bɔ Yehowa abɔ ne, ɔnyɛ nna, eyia oo, kɔngɔen oo, yenwu bie. Yeti ebiala nne berɛ bɔ ɔkɔhora kɔhã kyɛ onnwu nningyein bɔ Yehowa bɔ ne bie ɔ. Nningyein bɔ Yehowa abɔ ne maa yenwu ye animnyam wɔ “aseɛ amukoraa so,” na osa maa yenwu kyɛ ole tumi, yeti sɛ yɛfa yɛnwo yɛtoto ye a, ɔnyɛ yé. Ɔwɔ nu, yenwo hia kyɛ yɛnea nningyein bɔ Yehowa abɔ ɔ, nakoso odikyɛ yɛyɛ nikyee foforɛ bie yɛboka so. Yeɛ ole kyɛ, bɔ yasũa yafi nningyein bɔ Yehowa abɔ nanu ne, odikyɛ yɛkã yenwo dwirɛ yekyire mmenia yɛfa yɛhyɛ Yehowa animnyam. Sɔ yeɛ dweintolɛniɛ bie hyɛle yɛ ngunaen kyɛ yɛyɛ ɔ. Sɔ dweintolɛniɛ ne, Bible ne ammɔ ye dumaa. Yehowa fale ye honhom hãne ye maa ɔhworɔle kyɛ: “Ɛmɔhã kyɛ animnyam ne tumi te AWURADE deɛ. Ɛ́mɔfa animnyam bɔ ɔfata AWURADE dumaa ɔ bɛma ye.” (Edwein 96:7, 8) Bɛbɔ bɛne Yehowa afĩa te kama ne, bɛ bɔ mmɔden kyɛ bɛkɔhyɛ ye animnyam.
w04 6/1 11 ¶8-10
Nningyein Bɔ Yehowa Abɔ Ne, Ɔmaa Yenwu Ye Animnyam!
Dawide hãne kyɛbɔ nningyein bɔ Yehowa abɔ ne yɛ nwanwa nanwo dwirɛ. Ɔhãne kyɛ: “Wasi ɛtena sua wama eyia wɔ nyameɛso, eyia pukye kyɛ atɔmvorɛ biaa bɔ ofi ye sua nu ofite ɔ, kyɛ bienzua anwoserɛniɛ bɔ ole anigye otu amirika ɔ. Eyia pukye fi nyameɛso ye ti dɔ, ɔpɛ ye atee kɔka ye ti dɔ, na hwee ngora mva ye nwo mvea mvi ye hyerɛ ne abo.”—Edwein 19:4-6.
Sɛ ɛfa eyia ne toto nzramaa bɔ baha nemɔ nwo a, ɛkɔhã kyɛ eyia te kãa bie, nakoso ɔte piri pá. Ɔnate kyɛ eyia ne te piri nati, nningyein biemɔ bɔ wapɛ yenwo wayia ne, enwu bɛ mmaammaa bie. Nhwehwɛmuɛ bɔ ebiemɔ ayɛ kyire kyɛ, eyia nanu yɛ nõ tra aseɛ kɔyɛ 333,000. Afei koso, atẽe bɔ ɔla eyia ne aseɛ afĩa ne, ɔte tendenn paa, ɔte kɔyɛ kwanzĩi miliɔn 93. Kyɛbɔ bɛbɔle eyia nati, daabiala nekaa bɔ otimu alaa yeɛ otimu ɔ, ɔmma ye nyunu, yeɛ ɔngɔ ye sĩ koso. Eyia ne noa yɛ hye paa, nakoso sɛ ɔbɔ a, ye hyerɛ ne kãa bie yeɛ odwu aseɛ naso wa ɔ. Nakoso ɛhẽne yeɛ ɔboka yɛ maa yɛkora yɛtena ngõa nu ɔ.
Dweintolɛniɛ ne fale eyia totole “bienzua anwoserɛniɛ” bie nwo. Na osá hãne kyɛ ofité ngyerɛmɔ tutuutu, na odwu nɔsoa a, né waala ye ‘tena sua’ nu. Bɔ ɔmaa ɔhãne sɔ yeɛ ole kyɛ, sɛ odwu nɔsoa a, eyia ne nua, na yennwu ye kõ. Yeti, ɔte kyɛbɔ waala ye ‘tena sua’ nu bɔ odé ye nwomeɛ ɔ. Sɛ odwu ngyerɛmɔ koso a, ofité tekyɛ “atɔmvorɛ biaa bɔ ofi ye sua nu ofite ɔ.” Sɛ odwu kɔngɔen na sɛ eyia ne nua a, ɔmaa ayire ba. Ɔnate kyɛ né Dawide fa mmoaen kɔ adidie kɔngɔen nati, né ɔse sɔ dwirɛ ne paa. (Gyenesise 31:40) Nakoso sɛ odwu ngyerɛmɔ na eyia ne hyɛ yebo kyɛ ɔbɔ a, né ɔmaa ewienu yɛ hye, na ɛhẽne maa Dawide nwo tɔ ye. Sɛ eyia ne fité sɔ a, ‘ɔpɛ atee’ tekyɛ “bienzua anwoserɛniɛ,” ná waatɔ, na daabiala sɔ ala yeɛ ɔyɛ ɔ.
g95 11/8 7 ¶3
Nningyein bɔ Yehowa abɔ ne, ɔnyɛ nna wɔ aseɛ he aso, yeti sɛ yɛto yɛ boase yɛnea a, ɔboka yɛ maa yenwu Yehowa yé. Mmerɛ bie, Yesu hãhyirele ye asũafoɛ nemɔ kyɛ bɛnea flawɛs bɔ ogyigyi Galalia nzue nanwo, ná besũa nikyee befi nu. Ɔhãne kyɛ: “Ɛ́mɔnea eburo sukooko, ɔne kyɛbɔ besi benyi ɔ. Bɛnyɔ adwuma, yeɛ bɛndo gyese. Nakoso mekã mekyire ɛmɔ kyɛ, Solomon animnyam amukoraa nu ne po, ye anwosiesie ne ando ɛhemɔ anu ko po.” (Mateo 6:28, 29) Flawɛs de ɔtte nikyee titire biala. Nakoso kyɛbɔ Yehowa maa ɔyɛ nyemene ne, ɔmaa yenwu kyɛ, ɔkɔhora kɔmaa yɛsa kɔhã nningyein bɔ yehia ɔ.
Bible Nu Dwirɛ Titire
it-1 1073
Hebri, II
Tete ne, bɛbɔ né bɛtwerɛ anwensɛm ne, né bele atẽe pẽe bɔ bɛfa so bɛhyehyɛ bɛ dwirɛ ne ɔ. Ebie yeɛ ole kyɛ, edwirɛ bɔ ɔtɔ so nyɔ ne, ɛyɛ a ɔne edwirɛ bɔ olimoa ne yia, ɔtɔ mmerɛ bie koso a, ɔne ye nyia. Nna ɛhẽne angome, na mmom odwu mmerɛ bie a, edwirɛ bɔ ɔtɔ so nyɔ ne, ɔmaa edwirɛ bɔ olimoa nanu da berɛ. Wɔde, bɔ ɔkɔyɛ na ate bɔ yɛkã nabo ne, má yɛnea edwirɛ bɔ ɔwɔ Edwein 19:7-9 ne:
AWURADE mmeraa ne te pɛpɛɛpɛ,
ɔkanyane sona kra;
AWURADE dwirɛ te nahorɛ,
na ɔma sona tetekwaa onwu nworɛ.
AWURADE ahyɛdeɛ te turoloo,
ɔma sona ahone tɔ ye kunu;
AWURADE mmeraa dwirɛ nwo te,
na obukye sona nye.
AWURADE surolɛ te krongron,
na esurolɛ ne tena berɛ afebɔɔ.
AWURADE nhyehyɛleɛ te nahorɛ,
na ye mukoraa tengyɛ.
Sɛ ɛnea edwirɛ bɔ ɔwɔ tworɔnzɛm nanu ne a, ekonwu kyɛ edwirɛ bɔ ɔtɔ so nyɔ ne, ɛhẽne yeɛ ɔmaa edwirɛ bɔ olimoa nanu da berɛ, anaa ɛte yebo yé ɔ. Afei koso, edwirɛ bɔ ɔtɔ so nyɔ ne, ɔboka sona ne maa onwu mvasoɛ bɔ ɔwɔ so kyɛ ɔkɔfa edwirɛ bɔ olimoa ne kɔyɛ adwuma ɔ. Nekaa bɔ ɔhãne kyɛ ‘AWURADE mmeraa ne te pɛpɛɛpɛ’ ne, edwirɛ bɔ ɔtoa so ne, yeɛ ɔmaa yenwu mvasoɛ bɔ ɔwɔ so kyɛ yɛkɔfa Yehowa mmraa yɛkɔyɛ adwuma ɔ. Ɛhẽne yeɛ ole kyɛ, “ɔkanyane sona kra,” anaakyɛ ɔmaa sona ne nya anwoserɛ. Afei koso, nekaa bɔ ɔhãne kyɛ ‘AWURADE dwirɛ te nahorɛ’ ne, edwirɛ bɔ ɔtoa so ne, yeɛ ɔmaa yenwu mvasoɛ bɔ ɔwɔ so kyɛ yɛkɔfa Yehowa mmraa yɛkɔyɛ adwuma ɔ. Ɛhẽne yeɛ ole kyɛ, “ɔma sona tetekwaa onwu nworɛ.” Yeti mmerɛ bɔ né ɛkenga ne, sɛ ɛhyɛle ye nzorɛ a, enwuni kyɛ, sɛ ɛkenga edwirɛ bɔ olimoa, ɔne bɔ ɔtɔ so nyɔ ne yie a, egyina kãa dwene yenwo kora, na atoa so akenga bɔ oliberɛ ne. Sɛ ɛnea kyɛbɔ bahyehyɛ edwirɛ ne a, ɛkora nwu kyɛ oliliso kama, na enu laberɛ.
MARCH 25-31
NYAMEƐ DWIRƐ NANU ASUADEƐ | EDWEIN 22
Bɔ Né Ɔkɔhɔ So Mmerɛ Bɔ Bekũ Yesu Ne
w11 8/15 15 ¶16
Benwuni Mɛsaya Ne!
Né Yehowa ngɔbɔ Yesu nwo waen, yeti né ɔkɔyɛ tekyɛ bɔ wapo ye ne. (Kenga Edwein 22:1.) Kyɛbɔ né bahã bato berɛ ne, mmerɛ bɔ “ɔbɔle eyia nnɔnmmiɛnza ne, Yesu teane nu serɛserɛ hane kyɛ, “Eloi, Eloi, lama sabaktani?” Bɔ ye bo kyire kyɛ, “Me Nyameɛ, me Nyameɛ, nzu ati yeɛ apo me ye?” (Mak. 15:34) Edwirɛ bɔ Yesu hãne ne, né ongyire kyɛ ollé ye baba bɔ ɔwɔ anwuro nanu gyidie. Né Yesu se kyɛ Yehowa ngɔbɔ yenwo waen sɔ mmerɛ ne, na mmom né ɔkɔma atẽe maa bekohũ ye. Na kyɛbɔ Yesu hora gyinane nu ne maa yenwu kyɛ, ɔkɔhora koli nahorɛ kɔma Yehowa mmerɛ biala. Yesu dwirɛ bɔ ɔhãne ne, ɔmaa ngɔm bɔ bɛhyɛle ye wɔ Edwein 22:1 ne wale nu.
w11 8/15 15 ¶13
Benwuni Mɛsaya Ne!
Dawide hyɛle ngɔm kyɛ bɛkɔgoro Mɛsaya nanwo. (Kenga Edwein 22:7, 8.) Mmerɛ bɔ né Yesu tá bakaa nanwo bɔ owu ne, mmenia gorole yenwo. Mateo hworɔle kyɛ: ‘Na bɛbɔ bɛɛpɛle nu berɛ ne, bɛwosole bɛ ti bɛkekane dwirɛ betiale ye kyɛ, ‘Wɔ bɔ edwiri asɔneyɛɛ sua ne gua, ná ɛfa ɛlɛsa si ne, dé wɔ nwo e! Sɛ Nyameɛ Awa ne ole wɔ a, fi asɛndua ne aso dwu ase!’ Sɔ ala koso yeɛ asɔfo mbanyi, ahyerɛlɛfoɛ, ɔne maen mbanyi bɛgorole ye nwo ɔ. Bɛhãne kyɛ: ‘Olele ebiemɔ, nakoso ɔngora nne ye nwo! Sɛ ye yeɛ ɔte Yisraelfoɛ Hene ne a, maa odwu ase fi asɛndua ne aso kekesaala ye, na yɛkole ye yɛkoli. Ɔfale ye nwo tole Nyameɛ so; sɛ okuro ye dwirɛ a, maa ɔpepɛ ole ye e; ofikyɛ ɔhane kyɛ, ‘Me ole Nyameɛ Awa ne!’ (Mat. 27:39-43) Ɔmva yenwo ne bɔ bɛfa bɛyɛle Yesu ne, ɔyɛ dinn, na wandwudwo wandia bɛ. Yɛkɔhora yekosuesũa bɔ ɔyɛle ne.
w11 8/15 15 ¶14
Benwuni Mɛsaya Ne
Né bekogua serewa bɛkɔfa bɛkɔhyɛ Mɛsaya ne ndaadeɛ nanu. Dweintolɛfoɛ ne hworɔle kyɛ, “Bɛkyɛ me ndena bɛfa, “na begua serewa bɛkyɛ me ndaadeɛ.” (Edw. 22:18) Sɔ pɛpɛɛpɛ yeɛ osili ɔ. Mmerɛ bɔ Roman asogyafoɛ nemɔ ‘bɔle ye asɛndua nu nen, beguale serewa bɛhyɛle ye ndaadeɛ ne.’—Mat. 27:35; kenga Yohane 19:23, 24.
Bible Nu Dwirɛ Titire
w06 11/1 29 ¶7
Kyɛbɔ Yekohyire Kyɛ Yele Obuo Yɛma Yɛ Nhyiamu Ahoroɛ Ne
Yɛkɔyɛ sɛɛ na yahyire kyɛ yele obuo yɛma yɛ nhyiamu ahoroɛ ne? Má yɛnea enu bie. Enu kõ yeɛ ole kyɛ, yekodwu berɛ kora, na bato dwein bɔ yɛfa yɛhyɛ yebo ne. Dwein nemɔ bie wɔ berɛ a, enu dwirɛ ne tekyɛ mbaeɛ, yeti sɛ yɛto a, odikyɛ yɛto ye wɔ atẽe bie so bɔ okyire kyɛ yele obuo yɛma Yehowa. Sɛ yɛnea edwirɛ bɔ ɔwɔ Edwein 22 ne a, enu dwirɛ ne bie fa Yesu nwo, na Somafoɛ Pɔɔlo hwẽne adwene siele so. Ɔhãne kyɛ: “Ngɔbɔ wɔ dumaa ngohyire nniɛma mɔ, na ngɔto dwein ngɔye wɔ ayɛ wɔ agyidifoɛ badwa nu.” (Hebrifoɛ 2:12) Ɔnate kyɛ dwein nwo hia nati, kora bɔ yeɛ bɛkɔhã kyɛ yɛto dwein ne, odikyɛ yɛpena nekaa yɛtena. Afei sɛ ɛto dwein ne a, bɔ mmɔden kyɛ ɛkɔte enu dwirɛ nabo. Yede, ɛmɔma yefi y’ahõne nu yɛto dwein tekyɛ dweintolɛniɛ ne. Ɔhworɔle kyɛ: “Ɛ́mɔye AWURADE ayɛ! Ngofi m’ahone nu amukoraa ngɔfa asennaa ngɔma AWURADE wɔ teneneefoɛ badwa nu, ɔne nyianu ne anu.” (Edwein 111:1) Ɛmɔma yɛbɔ mmɔden kyɛ yekodwu asafo nhyiamu abo ndɛen, kyɛbɔ ɔkɔyɛ a yɛkɔto dwein bɔ bɛfa bɛhyɛ yebo ne bie ɔ. Afei sɛ bɛto dwein a, nnɛmaa yedwɔso yɛkɔ nekafee, na mmom yɛto bie.
w03 9/1 20 ¶1
Kamvo Yehowa Wɔ “Badwa Nu”
Tete ne, né bele atẽe pẽe bɔ bɛfa so bɛye Yehowa ayɛ ɔ. Sɔ ala yeɛ ɛnnɛ koso, yele atẽe ahoroɛ bɔ yɛfa so yɛye Yehowa ayɛ wɔ “badwa nu” ɔ. Enu kõ yeɛ ole kyɛ yɛkɔ asafo nhyiamu a, yɛkɔma mmuayɛɛ ɔ. Kae kyɛ, mvasoɛ wɔ so paa kyɛ yɛkɔma mmuayɛɛ ɔ. Enu bie yeɛ ole kyɛ, sɛ yɛma mmuayɛɛ a, ɔboka aliemaamɔ maa begyina ɔhaw bɔ bɛfa nu ne noa, na bɛfa Bible akwangyerɛ koso bɛyɛ adwuma. Afei koso, tworɔnzɛm biemɔ wɔ berɛ a, bɛmva enu dwirɛ ne bɛmma adesũa nanu, nakoso sɛ ɛto wɔ boase yɛ nhwehwɛmuɛ, na ekyirekyire nu wɔ wɔ mmuayɛɛ nanu a, ɔhyɛ aliemaamɔ ngunaen maa bɛkoso bɛyere bɛnwo besũa nikye
APRIL 1-7
NYAMEƐ DWIRƐ NANU ASUADEƐ | EDWEIN 23-25
“AWURADE Yeɛ Ɔte Me Neafoɛ Ɔ”
w11 5/1 31 ¶3
“AWURADE Yeɛ Ɔte Me Neafoɛ Ɔ”
Yehowa kyire bɛbɔ bɛsõ ye ne atẽe. Sɛ ebie le mmoaen, na sɛ wannea bɛso yé a, ɛyɛ a né bɛnate basabasa, na benu biemɔ kora mini po. Sɔ ala yeɛ yɛ koso, odikyɛ yɛmaa Yehowa kyire yɛ bɔ odikyɛ yɛyɛ ɔ, wannyɛ sɔ a, y’abrabɔ kɔyɛ basaa. (Yeremia 10:23) Dawide hãne kyɛ, Yehowa kyire yɛ atẽe kɔ nekaa bɔ yekonya “nyaa monɛ,” na ‘odi yɛ nyunu fa yɛ kɔ nzue bɔ ɔla berɛ dinn nwo.’ Afei koso, ‘odi yɛ nyunu fa yɛ fa tenenee atẽe so.’ (Edwein 23:2, 3) Edwirɛ bɔ Dawide hãne ne maa yenwu kyɛ, yɛkɔhora yɛkɔfa yɛnwo yɛkɔto Nyameɛ so. Sɛ yɛkenga Bible, na sɛ yɛfa enu dwirɛ ne yɛyɛ adwuma a, okyire kyɛ yɛmaa Yehowa honhom ne kyire yɛ atẽe wɔ y’abrabɔ nu. Sɛ yɛyɛ sɔ a, ɔkɔmaa yɛnye kɔgye, na yɛso anu kodwo yɛ.
w11 5/1 31 ¶4
“AWURADE Yeɛ Ɔte Me Neafoɛ Ɔ”
Yehowa bɔ yɛnwo waen. Sɛ ebie le mmoaen, na sɛ wannea bɛso a, ɛyɛ a né bɛnye so atã, yeti ekonwu ye ne, ná kar abɔ benu bie po maa wawu. Nakoso yɛ de, Yehowa kã kyire yɛ kyɛ nnɛmaa yesuro. Ofikyɛ, sɛ yɛnate “ewue bɔnza awosii kabii nu,” anaa nningyein ngɔyé wɔ yɛ abrabɔ nu po a, Yehowa nwa ɔkɔboka yɛ. (Edwein 23:4) Yehowa de, wayɛ krado kyɛ mmerɛ biala bɔ yehia mmokalɛ ne, ɔkɔboka yɛ. Atẽe bɔ Yehowa faso boka yɛ ne bie yeɛ ole kyɛ, ɔmaa yenya nworɛ ne anwoserɛ yɛfa yegyina ɔhaw bɔ yɛfa nu ne noa.—Filipifoɛ 4:13; Yakobo 1:2-5.
w11 5/1 31 ¶5
“AWURADE Yeɛ Ɔte Me Neafoɛ Ɔ”
Yehowa maa yɛsa kã nningyein bɔ yehia ɔ. Sɛ ɛhɔen kũ boaen bie a, ɛyɛ a né ɔnea atẽe kyɛ bɔ ɔnea ye ne kɔma ye aleɛ maa okoli. Sɔ ala yeɛ yɛ koso, sɛ yɛkɔhora yɛkɔte Bible nu dwirɛ bie bo a, sana Yehowa boka yɛ. (Mateo 5:3) Ɔnate kyɛ Yehowa dɔ yɛ nati, ɔmaa yɛsa kã nningyein bɔ yehia, kyɛbɔ ɔkɔyɛ a yɛkɔte ye dwirɛ Bible nabo ɔ. Sɔ nningyein ne bie yeɛ ole nwomaa ahoroɛ bɔ yɛfa yesũa Bible ne. Bɔ ɛkenga ye kesaalae ne po boka so bie. Sɔ nningyein ne bɔ Nyameɛ afama yɛ nati, wamaa yanya anyelasoɛ kyɛ kyẽabie nningyein kɔyɛ yé.
Bible Nu Dwirɛ Titire
w11 2/15 24 ¶1-3
Fa W’ahõne Mukoraati Dɔ Tenenee
Bɛbɔ bɛsõ Yehowa ne, odi bɛ nyunu fa bɛ fa “tenenee atee so,” na ɔnate ye honhom, ɔne ye Dwirɛ Bible naso yeɛ ɔyɛ sɔ ɔ. (Edw. 23:3) Nakoso ɔnate kyɛ bɔne wɔ yɛnwo nati, ekonwu ye ne, ná yɛyɛ nningyein biemɔ bɔ Yehowa nguro ɔ. Sɛ ebie yɛ sɔ a, bɔ okyire yeɛ ole kyɛ wafi tenenee atẽe naso. Sɛ sona ne fi sɔ atẽe naso a, sana ɔyere yenwo kora né wasa waafa so. Yede, nzu yeɛ ɔkɔboka yɛ maa yɛkɔfa sɔ atẽe naso daabiala ɔ? Yeɛ ole kyɛ, yekosuesũa Yesu bɔ né okuro kyɛ ɔyɛ nikyee bɔ ɔte pá ne.—Kenga Edwein 45:7.
Yede, nzu yeɛ ole “tenenee atee” ne? Yeɛ ole kyɛ yɛkɔbɔ yɛ bra kyɛbɔ Yehowa kuro ɔ. Wɔ Hebri ne Greek dwudwolɛ nu ne, edwirɛ “tenenee” kyire nikyee bɔ ɔtengyɛ anaa yenwo te ɔ. Bɔ ɛhe kyire yeɛ ole kyɛ, sɛ yɛkɔhora yɛkɔfa tenenee atẽe naso a, odikyɛ yɛmaa y’abrabɔ nwo te. Bɔ ɔkɔboka yɛ maa yɛkɔyɛ sɔ yeɛ ole kyɛ, mmraa bɔ Yehowa ahyehyɛ ama yɛ wɔ Bible nanu ne, yekoli so ɔ. Bible ne kã kyɛ Yehowa te “tenenee atenaleɛ,” na bɔ ɛhẽne kyire yeɛ ole kyɛ, sɛ yɛpena kyɛ yɛ abrabɔ nwo te a, sana yɛmaa Yehowa kyire yɛ bɔ odikyɛ yɛyɛ ɔ.—Yer. 50:7.
Sɛ yefi yahõne mukoraati nu yedi Nyameɛ mmraa naso a, ɔkɔmaa yenye kɔgye. (Deut. 32:4) Bɔ ɔkɔboka yɛ maa yɛkɔyɛ sɔ yeɛ ole kyɛ, yekosũa Yehowa nwo nikyee ɔ. Sɛ yɛyere yɛnwo yesũa Yehowa nwo nikyee, na yɛfa ye adamvoa a, ɔkɔmaa y’abrabɔ nwo kɔte. (Yak. 4:8) Nikyee foforɛ bɔ ɔkɔboka yɛ yeɛ ole kyɛ, nikyee biala bɔ yɛpena kyɛ yɛyɛ ye wɔ y’abrabɔ nu ne, odikyɛ yɛmaa Nyameɛ Dwirɛ ne kyire yɛ atẽe.
APRIL 8-14
NYAMEƐ DWIRƐ NANU ASUADEƐ | EDWEIN 26-28
Ɔyɛle Sɛɛ Yeɛ Dawide Hora Lili Nahorɛ Mane Yehowa Ɔ?
w04 12/1 14 ¶8-9
Kɔso Di Nahorɛ Ma Yehowa
Dawide bɔle mbaeɛ kyɛ: “Neanea me nu ná so me nea, pɛnzɛpɛnzɛ m’ahone nu ne me ti anu.” (Edwein 26:2) Sɛ Bibe ne kã ahõne a, ɔtɔ mmerɛ bie a, ogyi berɛ ma nningyein bɔ ebie dwenedwene yenwo, ɔne kyɛbɔ ɔte nga wɔ nikyee bie nwo ɔ. Sɔ nningyein hemɔ bɔ yɛkã yenwo dwirɛ ne, ɔkɔso wɔ sona ne tianu, yeti ebiala nnwu ye. Ɛhẽne ati, mmerɛ bɔ Dawide hãne kyɛ Yehowa pɛnzɛpɛnzɛ y’ahone, ɔne ye tianu nu ne, né ɔpena kyɛ Yehowa boka ye, kyɛbɔ ɔkɔyɛ a, ɔkɔdwenedwene nningyein bɔ ɔte pá nwo ɔ.
Dawide srɛle Yehowa kyɛ ɔneanea y’ahõne nu. Yede, sɛɛ yeɛ né Yehowa kɔyɛ ɛhe ɔ? Dawide tole dwein kyɛ: “AWURADE bɔ otu me foɛ ne, meye ye ayɛ; meda kɔngɔen po a, me tiboa kyire me bɔ nyɔ ɔ.” (Edwein 16:7) Sɔ dwirɛ bɔ Dawide hãne ne, okyire sɛɛ? Okyire kyɛ, sɛ Yehowa tu Dawide foɛ a, ondie ye mbaen, na mmom né ɔfa yɛ adwuma. Yeti, sɛ né subaen bie bɔ ɔttemayé wɔ Dawide nwo, ná ebiala nnwu ye po a, né ɔbɔ mmɔden kyɛ ɔkɔsesã. Yɛ koso, Yehowa nate Bible, ɔne asafo naso tu yɛ foɛ. Ɔnzɛkyɛ yetie sɔ afutue ne mbaen, na mmom daabiala odikyɛ yɛbɔ Yehowa mbaeɛ kyɛ ɔboka yɛ má yɛfa yɛyɛ adwuma. Sɛ yɛyɛ sɔ a, ɔkɔmaa yekoli nahorɛ yɛkɔma Yehowa.
w04 12/1 15 ¶12-13
Kɔso Di Nahorɛ Ma Yehowa
Dawide maa yenwu nikyee foforɛ bɔ ɔbokale ye maa ɔhora lili nahorɛ mane Yehowa ɔ, ɔhãne kyɛ: “Me ne asanzafoɛ yɛndu nu, yeɛ me ne nyaatwomfoɛ yɛmva abiɛngoɛ. Mekyi kyɛ me ne bɔnefoɛ yɛkɔbɔ dwaa ɔ, na me ne nzɛmmɔnefoɛ yɛngɔtena yɛngɔbɔ nu.” (Edwein 26:4, 5) Sɛ né abɔnefoɛ bɔ dwaa a, Dawide ngɔ yebo. Nna ɛhẽne angome, na mmom, ɔne bɛ ammɔ koraa.
Na yɛ koso ɛ? Mmenia bɔ bɛyɛ nningyein bɔ Yehowa nguro ne, ɔnzɛkyɛ yɛfa bɛ adamvoa. Yede, sɛ bɛfa bɛnwo dwirɛ bekogua intanɛt so, anaa bɛyɛ nikyee bie wɔ TV so a, ɛnea a, ɔte pá kyɛ yɛkɔkenga, anaa yɛkɔnea hɔ? Mmenia bɔ sona nye so de bɛyɛ bɛnwo kyɛ abɔfo, nakoso bɛyɛ nningyein bɔ ɔttemayé bɛfea ne, odikyɛ yɛtwẽ yɛnwo yefi bɛnwo. Benu biemɔ yeɛ ole mmenia bɔ yɛne bɛ kɔ sukuu, ɔne bɛbɔ yɛne bɛ yɛ adwuma ne. Ɛyɛ a bɛyɛ bɛnwo kyɛ bekuro yɛ dwirɛ yeti bɛpena kyɛ bɛfa yɛ adamvoa. Nakoso, bɔ bekuro alaa yeɛ ole kyɛ, nningyein tɛ́ɛ bɔ bɛyɛ ne, bɛkɔmaa yɛkɔyɛ bie ɔ. Afei koso, mmenia biemɔ wɔ berɛ a, né yɛne bɛ alaa yeɛ yɛsõ Yehowa ɔ, nakoso kesaalae de bafi asafo nanu. Bɛ koso, bɛyɛ bɛnwo kyɛ bekuro yɛ dwirɛ, nakoso sɛ annea yé a, bɛkɔlakalaka wɔ maa ɛkɔyakyi Yehowa sõen. Bɛbɔ bɛwɔ asafo nanu, nakoso bɛyɛ nningyein bɔ ɔttemayé bɛfea ne koso ɛ? Bɛ koso, aliemaamɔ nye so de, bɛyɛ bɛnwo kyɛ abɔfo, yeti odikyɛ yɛnea yé wɔ bɛnwo. Jayson te asafo nu somvoɛ, na ɔhãne kyɛ mmerɛ bɔ né ɔte abrandeɛ ne, né ole nnamvoa biemɔ bɔ bɛ subaen te sɔ ɔ. Jayson hãne ye nnamvo nemɔ nwo dwirɛ kyɛ: “Mmerɛ bie benu kõ hãhyirele me kyɛ: ‘Má yɛgye yɛnye, ye mia sɛ Yehowa sɛkye wiase ne a, ewue mbaen yeɛ yekowu ɔ. Sona koso de, sɛ ewu a, ɛnze hwee, yeti nnɛmaa yɛha yɛnwo.’ Mekoso de, menguro kyɛ Yehowa sɛkye me, na mmom mepena kyɛ mekɔ ewiase foforɛ nanu bie. Yeti, mmerɛ bɔ ɔhãne sɔ dwirɛ ne, ɔmaa menye sa wale menwo so.” Ɛhe maa Jayson hwẽne yenwo fili sɔ mmenia nemɔ nwo. Somafoɛ Pɔɔlo tu yɛ foɛ kyɛ: “Nnɛmɔma bɛlakalaka ɛmɔ, na “abiɛngoɛ tɛɛ sɛkye bra paa.” (1 Korintofoɛ 15:33) Afei anwu bɔ yeti yeɛ ɔnzɛkyɛ yɛfa abiɛngoɛ tɛ́ɛ ne!
w04 12/1 16 ¶17-18
Kɔso Di Nahorɛ Ma Yehowa
Nekaa bɔ né ɛtena sua ne gyi ne, ɛberɛ yeɛ né Yisrealfoɛ nemɔ yianu bɛsõ Yehowa ɔ, na né bɛ bɔ afɔleɛ wɔ afɔleɛ bokyea naso. Mmerɛ bɔ yeɛ Dawide kã ɛtena sua nanwo dwirɛ ne, ɔhãne kyɛ: “Ao AWURADE, awuro bɔ ɛte nu ne, ɔla m’ahone nwo, nekaa bɔ w’animnyam te ne.”—Edwein 26:8.
Nekaa bɔ yeɛ yeyia nu yesũa Yehowa nwo nikyee ne, ɛyɛ a wɔnye gye yenwo kyɛ ɛkɔhɔ berɛ anaa? Nekaa bɔ yeyianu yɛsõ Yehowa ne, enu kõ yeɛ ole Ahennie Asa so, na ɛyɛ a, yesũa Yehowa nwo nikyee wɔ berɛ. Afei koso, afoɛ biala yɛkɔ manzin nhyiamu, mandam nhyiamu, ɔne nhyiamu titire. Odikyɛ yɛmaa ‘yɛnye gye yenwo paa kyɛ’ yɛkɔhɔ sɔ nhyiamu ahoroɛ ne bie. Sɛ yɛkɔ koso a, odikyɛ yɛyɛ asoɛ yetie ye yé, ofikyɛ ɛberɛ yeɛ yetie Yehowa “noa dwirɛ” ɔ. Bɔ ɛhe kyire yeɛ ole kyɛ, edwirɛ biala bɔ bɛkã ye wɔ berɛ ne, ofi Bible nanu. (Edwein 119:167) Sɛ yɛne yeliemamɔ yianu a, ɔmaa y’ahõne tɔ yɛ kunu. Bɔ yeti yeɛ ɔte sɔ yeɛ ole kyɛ, bɛ dwene yɛnwo, na bɛ boka yɛ maa yɛkɔso yedi nahorɛ yɛma Yehowa.—Hebrifoɛ 10:24, 25.
Bible Nu Dwirɛ Titire
w06 7/15 28 ¶15
Yehowa Boka Bɛbɔ Nningyein Ngoyé Ma Bɛ Ne
Dawide tole dwein kyɛ: “Sɛ me baba ne me maame bɛpo me po a, AWURADE de, okole me.” (Edwein 27:10) Yehowa dɔ yɛ tra y’awofoɛ koraa. Sɛ yɛte ye bo sɔ a, ɛhẽne maa y’ahõne tɔ yɛ kunu. Sɛ w’awofoɛ kã kyɛ bɛngɔnea wɔ, bedi wɔnye, anaa bɛkã kyɛ kesaalae ɛbokka abusũa naso kõ a, ɔyɛ yea paa. Nakoso kae kyɛ, sɛ w’abusũafoɛ kã kyɛ bapo wɔ a, ɛhẽne ngyire kyɛ Yehowa koso apo wɔ. Yeti, nnɛmaa nikyee biala tete ɛne Yehowa afĩa. (Romanfoɛ 8:38, 39) Má ɔtena wɔ tianu kyɛ, Yehowa kuro wɔ dwirɛ, na ɛhẽne ati yeɛ wamaa awa ye asafo nanu ne. (Yohane 3:16; 6:44) Yeti, ɔmva yenwo ne bɔ mmenia kɔfa kɔyɛ wɔ biala ne, wɔ Baba bɔ ɔwɔ anwuro ne de, ɔdɔ wɔ paa.
APRIL 15-21
NYAMEƐ DWIRƐ NANU ASUADEƐ | EDWEIN 29-31
Bɔ Yehowa Dɔ Ye Ne, Yeɛ Ɔtwe Ye So Ɔ
it-1 802 ¶3
Sɛ bɛkã kyɛ ebie ‘aye yenye wafea’ ebie a, okyire nningyein pẽe. Bɔ ɔkɔso sɔ mmerɛ ne, yeɛ ɔmaa yɛte bɔ sona ne pena kyire nabo ɔ. Sɛ bɛkã kyɛ Yehowa aye yenye wafea ebie a, bɔ ɔtaa kyire yeɛ ole kyɛ, Yehowa nguro sona ne dwirɛ kõ. Bɔ ɔmaa ɔba sɔ yeɛ ole kyɛ, ebia na sona ne ayɛ nikyee bie bɔ ɔttemayé watia Yehowa, kyɛbɔ Yisraelfoɛ nemɔ yɛle ne. (Yob 34:29; Edw 30:5-8; Yes 54:8; 59:2) Odwu mmerɛ bie koso a, sɔ dwirɛ ne kyire kyɛ sona ne sũ frɛ Yehowa kyɛ ɔboka ye, nakoso ebia Yehowa ngɔma ye mmuayɛɛ sɔ mmerɛ ne. Ebia Yehowa nwu ye kyɛ, nna sɔ mmerɛ ne yeɛ odikyɛ ɔboka sona ne ɔ, yeti odikyɛ sona ne nwondɛ kãa. (Edw 13:1-3) Mmerɛ bie, Dawide srɛle Yehowa kyɛ, “Nnɛnea me bɔne bɔ mayɔ ɔ.” Bɔ né Dawide pena kyire yeɛ ole kyɛ, Yehowa fa ye bɔne hyɛ ye, anaa okyikyi bɔne bɔ wayɛ ne.—Edw 51:9; Fa toto Edw 10:11 nanwo.
w07 3/1 19 ¶1
Fa Anigye Nwondɛ Yehowa
Kyɛbɔ aduaba nyi ngakãngakã kora né waboro ne, sɔ ala yeɛ sɛ Yehowa twe yɛ so a, ɔte ɔ. Ebia ahyɛaseɛ ne de, yengonwu mvasoɛ bɔ ɔwɔ so ɔ, nakoso mmerɛ bie sĩ ne, yekonwu ye. Bible ne maa yenwu kyɛ, sɛ Yehowa twe yɛ so, na sɛ yɛfa yɛyɛ adwuma a, ‘yɛ sa kã akatuaa bɔ ɔte tenenee ne asomdwee ɔ.’ (Hebrifoɛ 12:11) Sɛ bakaa bie su a, nna ɛberɛ ala yeɛ ɔboro ɔ, na mmom ɔkyɛ kãa. Sɔ ala yeɛ yɛ koso sɛ yele subaen bie bɔ ɔttemayé a, odé mmerɛ kora né yahora yasesã ɔ. Sɛ yɛkɔhora yɛkɔyɛ sɔ a, sana yɛfa Nyameɛ afutue yɛyɛ adwuma. Wɔde yɛfa ye kyɛ, ayɛ nikyee bie bɔ ɔttemayé, maa yeti, asɛdeɛ bie bɔ né ele ye wɔ asafo nanu ne, wafi wɔ sa. Sɛ ɔba sɔ a, nnɛmaa w’abanu bu, na mmom nya aboterɛ nwondɛ Yehowa. Dawide dwirɛ bɔ Nyameɛ maa ɔhworɔle ne kɔhora kɔkyekye wɔ wora, ɔhworɔle kyɛ: “Ofikyɛ ye ɛyaafɛlɛ ndena berɛ ngyɛ, na ye anwumvoinnwunɛ wɔ berɛ ma sona mmerɛ bɔ sona ne te ase amukoraa. Sona poro moen kɔngɔen amukoraa, nakoso aleɛ kye a, onya anika.” (Edwein 30:5) Sɛ yɛto yɛ boase yɛnwodɛ Yehowa, na yɛfa afutue bɔ ɔnate ye Dwirɛ Bible ne, ɔne ye asafo naso fama yɛ ne yɛyɛ adwuma a, ɔkɔmaa yɛnye kɔgye.
w21.10 6 ¶18
Nzu Yeɛ Ebie Yɛ A Okyire Kyɛ Wanu Yenwo Ɔ?
Sɛ betu ebie befi asafo nanu a, nzu yeɛ okohyire kyɛ wanu yenwo ɔ? Ebie yeɛ ole kyɛ ɔkɔwa adesũa daa. Afei koso, afutue bɔ mbanyi nemɔ famane ye kyɛ, osũa Bible ne daa, na ɔbɔ mbaeɛ ne, odikyɛ ɔfa yɛ adwuma. Ebiekũ koso, nikyee bɔ ɔmaa ɔyɛle bɔne ne, odikyɛ ɔnea yé, na wanngɔ yenwo kõ. Sɛ ɔbɔ mmɔden siesie ɔne Yehowa afĩa a, ɔkɔhora konya gyidie kyɛ Yehowa kɔfa kɔhyɛ ye koraa. Sɛ ɔba sɔ a, mbanyi nemɔ koso kɔboka ye maa ɔkɔwa asafo nanu biekũ.
Bible Nu Dwirɛ Titire
w06 5/15 19 ¶13
Edwein Nwomaa Nanu Dwirɛ Titire
31:23—Sɛ ebie ma yenwo so a, atẽe beni aso yeɛ Yehowa tua ye so kerɛ piri paa ɔ? Akatuaa bɔ yɛkã yenwo dwirɛ wɔ wa ne, yeɛ ole asotwe bɔ Yehowa fama bɛbɔ bɛyɛ bɔne ne. Sɛ ebie yɛ bɔne a, Yehowa tu ye foɛ, na sɛ sona ne nu yenwo a, Yehowa fakyɛ ye koraa. Nakoso ebie bɔ ɔma yenwo so de, sɛ Yehowa tu ye foɛ po a, ɔmva nyɛ huu. Sɛ ɔba sɔ a, Yehowa twe ye so maa ɔboso.—Anyandera 11:31; 1 Petro 4:18.
APRIL 22-28
NYAMEƐ DWIRƐ NANU ASUADEƐ | EDWEIN 32-33
Sɛ Ɛyɛ Bɔne Pirikua Bie A, Nzuati Yeɛ Odikyɛ Ɛkã Yenwo Dwirɛ Kyire Yehowa Ɔ?
w93 3/15 9 ¶7
Ɔnate Kyɛ Yehowa Nwu Yɛ Anwumvoin Nati, Ɔmma Y’abanu Mmu
Sɛ yɛyɛ bɔne pirikua bie a, ɛyɛ a ɔyɛ se paa kyɛ yɛkɔbɔ so yekohyire ebie ɔ. Yehowa po, ɔtɔ mmerɛ bie a, né wayɛ se wama yɛ kyɛ yɛkɔhã yenwo dwirɛ yekohyire ye. Sɛ ebie yɛ sɔ a, nzu yeɛ ɔkɔhora kofi nu kɔwa ɔ? Dawide hãne kyɛ: “Mmerɛ bɔ ngane me noa ndole nu ne, m’aporɛ so yɛle me hodwoo, ɔnate ɛpenenɛ bɔ né mepene daa biala ne ati. Ofikyɛ wɔ sa gyi me nwo eyia ne kɔngɔen; m’anwoserɛ amukoraa yiele kyɛbɔ asue wewe wɔ wawa mmerɛ ɔ.” (Edwein 32:3, 4) Mmerɛ bɔ Dawide katale ye bɔne so ne, né bɔne bɔ wayɛ nanwo dwirɛ ha ye alaa maa sɛ ɔda po a, né ɔngora da. Ɛhe maa Dawide anwoserɛ amukoraa yiele, tekyɛ bakaa bɔ wawa apẽ maa enu nzue ahwẽ ne. Ɛhe fale adwenedwene ɔɔtole Dawide so, na ebia ɔbɔle ye anwonyerɛ po. Yeti anigye paa de, né Dawide llé bie. Yede yebisa kyɛ, nzu yeɛ yasũa yafi bɔ ɔtole Dawide nanu ɔ?
cl 262 ¶8
Nyameɛ Fa “Bɔne Kyɛ”
Mmerɛ bɔ Dawide yɛle bɔne, na onune yenwo ne, ɔhãne kyɛ: “Afei ngane me bɔne ngyirele wɔ, na mangata m’amumuyɛɛ so. . . . Na ɛfale me bɔne nwo foɛlilɛ hyɛle me.” (Edwein 32:5) Hebri dwirɛ bɔ bɛhyirele yebo ɛfa “hyɛle me” ne, bɔ okyire yeɛ ole kyɛ “ɛpagya nikyee bie,” anaa “ebie sõ nikyee bie bɔ esikye ye ɔ.” Mmerɛ bɔ Dawide yɛle bɔne ne, ne waayɛ kyɛbɔ adesoa bie bɔ enu yɛnõ so ye ɔ. Yeti ɔsrɛle Yehowa kyɛ osikye ye, kyɛbɔ ɔkɔyɛ a ye kɔme anu kodwo ye ɔ. Na ɔte amba koso, mmerɛ bɔ Yehowa fale Dawide bɔne hyɛle ye ne, ɔmaa yenwo dwole ye fɔnwoo. (Edwein 32:3) Sɔ ala yeɛ yɛ koso, sɛ yɛyɛ bɔne na sɛ yenu yɛnwo a, yɛkɔhora yekonya gyidie kyɛ Yehowa nate Yesu wue naso kɔfa yɛ bɔne kɔhyɛ yɛ. Sɛ ɔba sɔ a, né waayɛ tekyɛ bɔ adesoa bie so yɛ bɔ Yehowa asikye yɛ ne.—Mateo 20:28.
w01 6/1 30 ¶1
Sɛ Ɛkã Wɔ Bɔne Kyire Yehowa A, Ɔmaa Wɔnwo Tɔ Wɔ
Mmerɛ bɔ Dawide hãne ye bɔne ne yiele ne, wannya adwene llé kyɛ yeso llé mvasoɛ, anaa Yehowa nguro ye dwirɛ kõ. Edwirɛ bɔ ɔhãne ye wɔ Edwein 32 ngyekyɛmuɛ 1 ne, ɔmaa yenwu kyɛ mmerɛ bɔ ɔhãne ye bɔne ne, ɔmaa yenwo dwole ye fɔnwoo. Afei koso, né wayɛ krado kyɛ ɔkɔsõ Yehowa wɔ atẽe bɔ okuro so. Wɔde, nea edwirɛ bɔ ɔhãne ye ɔ: ‘Sona bɔ Nyameɛ afa ye mmeraatolɛ wahyɛ ye, ná wakyikyi ye bɔne ne, onya anigye.’ Dawide dwirɛ ne maa yenwu kyɛ, sɛ ebie yɛ bɔne pirikua bie po, na sɛ onu yenwo a, yenye kɔhora kɔgye. Bɔ okyire kyɛ ebie anu yenwo yeɛ ole kyɛ, okole kɔto nu kyɛ wayɛ bɔne. (2 Samuel 12:13) Sɔ ala yeɛ Dawide yɛle ɔ, ole ye bɔne tole nu, yeɛ wanga kyɛ ebie yeɛ ɔmaa ɔyɛle bɔne ɔ. Wɔde, nea edwirɛ bɔ ɔhãne ye wɔ Edwein 32:5 ne: “Afei ngane me bɔne ngyirele wɔ, na mangata m’amumuyɛɛ so. Ngane kyɛ, “Ngɔhã me mmeraatolɛ ngohyire AWURADE,” na ɛfale me bɔne nwo foɛlilɛ hyɛle me.” Sɛ ebie fi yahõne nu kã bɔne bɔ wayɛ nanwo dwirɛ kyire Yehowa a, ɔmaa yenwo dwo ye. Ɔba sɔ a, ɔmaa bɔne bɔ ɔyɛle ne, ɔmva yenwo adwenedwene nha yenwo kõ.
Bible Nu Dwirɛ Titire
w06 5/15 20 ¶1
Edwein Nwomaa Nanu Dwirɛ Titire
33:6—Nzu yeɛ ole Yehowa noa “dwirɛ,” anaa “ye noa nu nwomeɛ” ne? Sɛ bɛkã Nyameɛ nwomeɛ a, okyire tumi bɔ ɔfa yɛ nikyee ɔ, na ɛhẽne ala yeɛ bɛfrɛ ye honhom krongron ne. Sɔ honhom ne yeɛ ɔfa bɔle anwuro ne. (Gyenesise 1:1, 2) Sɔ honhom kõmaapɛ nala yeɛ besa bɛfrɛ ye Nyameɛ noa dwirɛ ne. Bɔ yeti yeɛ bɛfrɛ ye sɔ yeɛ ole kyɛ, sɛ Yehowa pena kyɛ ɔsoma abɔfo nemɔ maa bɛkɔyɛ nikyee bie a, ɔnate ye honhom naso yeɛ odwudwo kyire bɛ ɔ.
APRIL 29–MAY 5
NYAMEƐ DWIRƐ NANU ASUADEƐ | EDWEIN 34-35
“Ngɔye Awurade Ayɛ Mmerɛ Biala”
w07 3/1 22 ¶11
Ɛmɔma Yemukoraati Yɛye Yehowa Ayɛ
“Ngɔye AWURADE ayɛ mmerɛ biala; ye ayɛyelɛ kɔla me noa daa.” (Edwein 34:1) Mmerɛ bɔ né bɛpena Dawide bekũ ye ne, né ollé nekaa bɔ ɔkɔtena ɔ. Ɔkɔhora kɔwa kyɛ né aleɛ bɔ okoli, ɔne ataadeɛ bɔ okowura po, yenwo ayɛ se ama ye. Nakoso, ɔmva yenwo kyɛ né ohia sɔ nningyein nemɔ ne, wanga yenoa wando nu, na mmom daa né ɔye Yehowa ayɛ. Yɛ koso, sɛ ɔkɔba kyɛ yɛnwo kyere yɛ a, yɛkɔhora yekosuesũa bɔ Dawide yɛle ne. Sɛ yɛwɔ sukuu nu oo, adwuma nu oo, asɛnga nu oo, odikyɛ yɛye Yehowa ayɛ. Nna ɛhẽne angome, sɛ yɛne yeliemamɔ gye yɛnye po a, odikyɛ yɛye Yehowa ayɛ. Ye mia ɛhẽne yeɛ ɔte nikyee bɔ yenwo hia paa ɔ. Yede, nzuati yeɛ odikyɛ yɛye Yehowa ayɛ ɔ? Má yɛnea enu nyɔ. Sɛ yɛnea nningyein bɔ Yehowa abɔ ne a, ɔyɛ nwanwa paa, na sɛ yɛkã kyɛ yesũa yenwo nikyee a, yengoyie. Bɔ ɔtɔ so nyɔ, nningyein bɔ Yehowa nate ye asafo naso yɛ wɔ aseɛ he aso ne, ɔyɛ nwanwa paa. Bɛbɔ bɛnea Yehowa asafo naso ne, bɔne bɛnwo, nakoso ɔnate kyɛ bedi nahorɛ nati, adwuma bɔ Yehowa nate bɛ so ayɛ ne, sɛ yɛnwa yɛkã a, yengoyie. Mmenia bɔ bedi tumi wɔ ewiase nanu ne, bɔ bahora bayɛ ne, sɛ ɛfatoto Yehowa deɛ nanwo a, ondwu ye nekafee. Nakoso, kãa bɔ bahora bayɛ ne, kyɛbɔ mmenia hoahoa bɛ ne, ɔtte angorɛ. Yedé yedi paa kyɛ ɛne Dawide bɔ ɔhworɔle sɔ dwirɛ he ne kɔyɛ adwene, ɔhãne kyɛ: “Ao AWURADE, ebiala ne wɔ bɛnzɛ wɔ nyameɛ mɔ nu, na ebiala ngɔhora ngɔfa ye sa noa nnwumaa ngɔtoto wɔ deɛ nwo”?—Edwein 86:8.
w07 3/1 22 ¶13
Ɛmɔma Yemukoraati Yɛye Yehowa Ayɛ
“AWURADE nu yeɛ me kra hoahoa ye nwo ɔ, odi kyɛ anwobrɛaseɛfoɛ betie, ná bɛ nye gye.” (Edwein 34:2) Sɛ yɛnea edwirɛ bɔ Dawide hãne ne a, nna nningyein bɔ né wahora wayɛ ne, yeɛ né ɔfa hoahoa yenwo ɔ. Bɔ ɔmaa yenwu sɔ yeɛ ole kyɛ, mmerɛ bɔ ɔyɛle yenwo kyɛ ebie bɔ wabɔ lae fa lakalakale Gat hene ne, wamva wandu yenwo. Dawide nwuni kyɛ sɛ nna Yehowa yeɛ ɔbɔle yenwo waen fili Gat hene sanu a, ahãa ye de, yeɛ ole nwa. (Anyandera 21:1) Ɛhẽne ati yeɛ Dawide hãne kyɛ ɔkɔhoahoa yenwo wɔ Yehowa nu ne. Ɛhe maa bɛbɔ né bɛbrɛ bɛnwo ase bɔ bɛtele edwirɛ bɔ Dawide hãne ne, bɛfale Yehowa adamvoa. Yesu koso, mmerɛ bɔ ɔwale aseɛ he aso ne, ɔhyɛle Yehowa animnyam. Bɔ ɔyɛle nati, ɔmaa mmenia bɔ ne bɛbrɛ bɛnwo ase ne, bɛfale Yehowa adamvoa. Sɛ ɛkɔ ewiase amukoraati a, mmenia bɔ bɛbrɛ bɛnwo ase pẽe yeɛ bawa Yehowa asafo nanu ɔ, na benu biemɔ po anya yenwo atẽe kyɛ bɛkɔhɔ anwuro. Sɔ mmenia bɔ yɛkã bɛnwo dwirɛ ne, Yesu yeɛ ɔla bɛnoa ɔ. (Kolosefoɛ 1:18) Bɛbɔ bɛkɔhɔ anwuro ne, sɛ bɛte kyɛ yɛhyɛ Yehowa animnyam a, ɔmaa bɛnye gye. Afei koso, sɛ benwu kyɛ Yehowa nate ye honhom so boka ebie maa ɔte Bible nabo a, ɔmaa bɛnye gye. Ye mia honhom komaapɛ nala yeɛ ɔfa bokale bɛ maa bɛwale asafo nanu ɔ.—Yohane 6:44; Asomafoɛ 16:14.
w07 3/1 23 ¶15
Ɛmɔma Yemukoraati Yɛye Yehowa Ayɛ
“Mbenane AWURADE si atee, na obuale me, na ɔpepɛ lele me fili nikyee bɔ mesuro biala ɔ nu.” (Edwein 34:4) Kyɛbɔ Yehowa bokale Dawide ne, ɔmaa yenye gyele paa, yeti ɔtoale ye dwirɛ naso kyɛ: “Sɔ anwumvoinniɛ he, osuni, na AWURADE tiele ye sufrɛ, ná ɔpepɛ lele ye fili ye amaneɛ amukoraa nu.” (Edwein 34:6) Dawide dwirɛ bɔ ɔhãne ne, ɔhyɛle bɛbɔ né beli ye sĩ ne ngunaen. Sɔ ala yeɛ yɛ koso, sɛ yɛne aliemaamɔ yia nu a, ɔmaa yɛnye gye paa. Ofikyɛ sɛ yeyia nu sɔ a, kyɛbɔ Yehowa asi aboka yɛ maa yagyina yɛ haw noa ne, ɛyɛ a yɛbɔ yenwo ngɔmmɔ. Sɛ ɔba sɔ a, ɔmaa yenu biala kora hyɛ ye mango ngunaen. Dawide hãne ye nnamvo bɔ né beli ye sĩ nanwo dwirɛ kyɛ, ‘bɛfale bɛ nwo bɛtole Nyameɛ so ne, bɛ nye gyele; na bɛ nyunu angua ase.’ (Edwein 34:5) Ɔwɔ nu kyɛ né Dawide nnamvo nemɔ nwati Ɔhene Sɔɔlo de, nakoso Yehowa amma benyunu angua ase. Né bele gyidie kyɛ Yehowa kɔboka bɛ, ɛhẽne ati daa ne bɛnye agye. Sɔ ala yeɛ ɛnnɛ koso, bɛbɔ bɛwale asafo nanu ahyɛ, ɔne bɛbɔ ɛlɛsaen ala yeɛ bɛba ne, bemu bɛfa bɛnwo bɛto Yehowa so ɔ. Ɔnate kyɛ daa Yehowa boka bɛ nati, ekonwu bɛ biala ne, né bɛnye agye. Ɛhe ati, ɔmaa bɛkɔso bedi nahorɛ bɛma Yehowa.
Bible Nu Dwirɛ Titire
w06 5/15 20 ¶2
Edwein Nwomaa Nanu Dwirɛ Titire
35:19—Mmerɛ bɔ yeɛ Dawide srɛle Yehowa kyɛ, nnɛmaa ye pɔfoɛ nemɔ bu ye akangyerɛ, anaa bɛkã ye anyinga ne, nzu yeɛ né ɔpena kyire ɔ? Bɛbɔ né babɔ Dawide nwo porɛ ne, sɛ né porɛ bɔ babɔ ne kɔyé ma bɛ a, né bebu ye akangyerɛ, anaa bɛkã ye anyinga. Ɛhẽne ati yeɛ Dawide srɛle Yehowa kyɛ ɔboka ye, ná nikyee bie bɔ ɔte sɔ anzi ne.