ADESUA 56
Má Koyɛlɛ Tena Asafo Nanu
Sɛ yɛwɔ yeliemamɔ nu a, yɛte ngã kyɛbɔ Ɔhene David tele ngã ne: “Nea kyɛbɔ osi te pá, na ɔyɛ nyemene kyɛ aliemaamɔ kɔtena ase wɔ koyɛlɛ nu ɔ!” (Edwein 133:1) Kõyɛlɛ bɔ ɔkɔtena yɛnu ne mma mbaen. Mmom ne, odikyɛ yenu biala bɔ yenwo mmɔden boka maa kõyɛlɛ tena asafo nanu.
1. Nzu yeɛ ɔkɔ so wɔ Nyameɛpiri mmenia afĩa ɔ?
Sɛ ɛkɔ maen foforɛ so na sɛ ɛkɔ asafo nhyiamu a, ebia ɛngɔte edwudwolɛ bɔ bɛfa bɛyɛ adesua ne de, nakoso wɔnye kɔhora kɔgye. Nzuati ɔ? Ofikyɛ nekaa biala bɔ ɛkɔhɔ ne, nwomaa komaapɛ yeɛ yɛfa yesua Bible ne ɔ. Na yɛbɔ mmɔden kyɛ yɛkɔla ɔdɔ ali yekohyire yɛnwo. Ɔmva yenwo ne nekaa biala bɔ yɛwɔ ne, yemukoraati “bɔ Yehowa dumaa, na yɛsõ ye wɔ kõyɛlɛ nu.”—Zefania 3:9.
2. Ɛkɔyɛ sɛɛ na ɛne afoforɛ afĩa ayɛ kama?
“Ɛmɔfi ɛmɔ ahõne nu bɛdodɔ ɛmɔ nwo.” (1 Petro 1:22) Ɛkɔyɛ sɛɛ na afa afutue he ayɛ adwuma? Kyɛ ahãa ɛkɔfa w’adwene kosie afoforɛ sintɔ so ne, fa w’adwene sie subaen pá bɔ bele ye naso. Kyɛ ahãa daa ɛne aliemaamɔ bɔ bɛte wɔ nnamvo ngome kɔbɔ ne, bɔ mmɔden kyɛ ekonwu aliemaamɔ bɔ baha ne koso yé. Odikyɛ yɛbɔ mmɔden koso yetutu sona nu nyiyimuɛ adwene biala bɔ yɛlé ye nabo.—Kenga 1 Petro 2:17.a
3. Sɛ ɛne eliema Kristoniɛ bie nya edwirɛ a, nzu yeɛ odikyɛ ɛyɛ ɔ?
Kõyɛlɛ wɔ yenu, nakoso ɛhene ngyerɛ kyɛ yɛte pɛ. Ɔtɔ mmerɛ bie a, yɛkora yedi yeliemamɔ hwamɔ, anaa yɛyɛ bɛ nikye maa ɔha bɛ. Yeti Nyameɛpiri Dwirɛ kã kyire yɛ kyɛ “yɛhɔso . . . yɛfa yɛhyehyɛ yɛnwo,” osa faboka so kyɛ: “Kyɛbɔ Yehowa fa kyɛ ɛmɔ ne, ɛmɔkoso ɛmɔyɛ sɔ ala.” (Kenga Kolosefoɛ 3:13.) Yɛfõ Yehowa mmerɛ pẽe, nakoso ɔfa kyɛ yɛ. Yeti ɔnea atẽe kyɛ yɛkoso sɛ yeliemamɔ yɛyɛ nikye bie a, yɛkɔfa yɛkɔhyɛ bɛ. Sɛ enwui kyɛ ayɛ ebie nikyee bɔ ɔttemayé a, dimoa tu agyirɛ fasiesie edwirɛ bɔ wawa ne.—Kenga Mateo 5:23, 24.b
SUA PẼE BOKASO
Pena atẽe ahoroɛ bɔ ɛkɔhora kɔfa so kɔmaa asomdwee ne kõyɛlɛ kɔtena asafo nanu ɔ.
Nzu yeɛ ɛkɔyɛ kɔfa kɔpena asomdwee ɔ?
4. Di sona nu nyiyimuɛ so
Yɛpena kyɛ yɛdɔ yeliemamɔ mukoraati. Nakoso yɛbɔ yɛnwo mmɔden kora, na yahora yɛne ebie bɔ ɔsono y’amammerɛ abɔ. Nzu yeɛ ɔkɔhora kɔboka yɛ, na yaanyɛ nyiyimuɛ ɔ? Kenga Asomafoɛ Ne Nnwumaa 10:34, 35, na susu nzɛmmisa hemɔ anwo:
Yehowa dé mmenia ahoroɛ mukoraati to nu kyɛ y’Adanzefoɛ. Ɛkɔyɛ sɛɛ na ahora asuesua Yehowa wɔ kyɛbɔ ɛte ngã wɔ mmenia bɔ ɔsono b’amammerɛ nanwo ɔ?
Sona nu nyiyimuɛ ahoroɛ beni yeɛ ɔwɔ nekaa bɔ ɛwɔ ne bɔ ɛpena kyɛ, ɛtwẽ wɔnwo fi yenwo ɔ?
Kenga 2 Korintofoɛ 6:11-13, na susu nzɛmmisa he anwo:
Esusu kyɛ nzu yeɛ ɛkɔhora kɔyɛ, na apingyé eliemamɔ mmienzua ne mmrasua bɔ ɔsono b’amammerɛ ne ɔ?
5. Fi w’ahõne nu fa bɔne kyɛ, na pena asomdwee
Yehowa fi y’ahõne nu fa yɛ bɔne kyɛ yɛ, ɔmva yenwo kyɛ ɔnyɛ yɛ bɔne ne, yeti yenwo nhia kyɛ yɛfa ye bɔne yɛ kyɛ ye. Kenga Edwein 86:5, na susu nzɛmmisa hemɔ anwo:
Sɛɛ yeɛ Yehowa fa yɛ bɔne kyɛ yɛ koraa ɔ?
Nzuati yeɛ wɔnye sɔ ye bɔne fakyɛ ne ɔ?
Tebea ahoroɛ beni anu yeɛ ɔkɔhora kɔyɛ se kɔma yɛ kyɛ, yɛne afoforɛ kɔtena asomdwee nu ɔ?
Yɛkɔyɛ sɛɛ na y’ahora yasuesua Yehowa na yahɔso yɛne yeliemamɔ atena wɔ kõyɛlɛ nu ɔ? Kenga Anyandera 19:11, na susu nzɛmmisa he anwo:
Sɛ ebie fõ wɔ maa ɛfɛ yaa a, nzu yeɛ ɛkɔhora kɔyɛ kɔfa kosiesie tebea ne ɔ?
Ɔtɔ kyẽa a, yɛfõ afoforɛ. Sɛ tebea bɔ ɔte sɔ si a, nzu yeɛ ɛkɔhora kɔyɛ ɔ? Bɔ VIDIO ne, na susu nzɛmmisa bɔ ɔtoaso nanwo.
Wɔ vidio nanu ne, nzu yeɛ aliemaa brasua ne yɛle fa penane asomdwee ɔ?
6. Fa w’adwene sie subaen pá bɔ aliemaamɔ lé ye naso
Sɛ yɛne yeliemamɔ mmienzua ne mmrasua bɔ a, yenwu subaen pá bɔ bele ye ne, ɔne bɛ sintɔ ahoroɛ. Yɛkɔyɛ sɛɛ na yafa y’adwene yasie subaen pá bɔ bele ye naso? Bɔ VIDIO ne, na susu nzɛmmisa bɔ ɔtoaso nanwo.
Nzu yeɛ ɔkɔhora kɔboka wɔ maa ɛkɔfa w’adwene kosie subaen pá bɔ eliemamɔ mmienzua ne mmrasua lé ye naso ɔ?
Yehowa fa y’adwene sie subaen pá bɔ yele ye naso. Kenga 2 Beresosɛm 16:9a, na susu nzɛmmisa he anwo:
Sɛ enwui kyɛ Yehowa afa y’adwene asie subaen pá bɔ ele ye naso a, sɛɛ yeɛ ɔmaa ɛte ngã ɔ?
Dɛngyɛmmoɛ bɔ ɔyɛ nyemene po ne, mvomsoɛ wɔ yenwo, nakoso yemukoraati sĩ ne, ɔsombo. Sɔ ala yeɛ yeliemamɔ koso bɛtte pɛ, nakoso bɛ sombo bɛma Yehowa
EBIEMƆ KÃ KYƐ: “Kora bɔ ngɔfa ebie mvomsoɛ ngɔhyɛ ye ne, sana ɔyɛ nikyebie bɔ okyire kyɛ wanu yenwo ɔ.”
Nzuati yeɛ odikyɛ yenya ɔpɛ kyɛ yɛkɔfa afoforɛ mvomsoɛ yɛkɔhyɛ bɛ ɔ?
YEMUABƆLƐ
Sɛ ɛfa eliemamɔ mvomsoɛ kyɛ bɛ, na ɛda ɔdɔ ali kyire bɛ a, ɛkɔboka maa kõyɛlɛ kɔtena asafo nanu.
Ndimu
Ɛkɔyɛ sɛɛ na ahora ali sona nu nyiyimuɛ so?
Sɛ dwudwolɛ ba ɛne eliema Kristoniɛ bie afĩa a, nzu yeɛ ɛkɔyɛ ɔ?
Kyɛbɔ Yehowa fa afoforɛ bɔne kyɛ bɛ ne, nzuati yeɛ ɛpena kyɛ esuesua ɔ?
NEA ƐHE KOSO
Nea kyɛbɔ Yesu mvandonwo ahoroɛ nanu kõ kɔhora kɔboka wɔ maa, ɛkɔyakyi atɛn bɔ ebu afoforɛ ne ɔ.
Sɛ yɛte nga kyɛ yɛyɛlle bɔne biala pó a, aso odikyɛ yɛpa kyerɛ anaa?
“Sɛ Ɛpa Kyerɛ A—Ɔfa Asomdwee Ba” (The Watchtower, November 1, 2002)
Nea kyɛbɔ mmienzua nyɔ bie bɔ benyine wɔ maen bɔ bemmu bɛbɔ ɔsono bɛnwonaen kɔla, suane kyɛ bɛkɔla ɔdɔ ali bekohyire bɛnwo ɔ.
Sua kyɛbɔ ekosiesie ɛne afoforɛ afĩa dwudwolɛ kora, na wasɛkye asomdwee bɔ ɔwɔ asafo nanu ne ɔ.
“Má Ɔdɔ Boka Wɔ Ma Esiesie Ɔhaw Ahoroɛ” (The Watchtower, May 2016)
a Ayieleɛ Dwirɛ 6 nea kyɛbɔ ɔdɔ kã Kristofoɛ maa bɛbɔ mmɔden kyɛ, bɛngɔterɛ anwonyerɛ bɔ ɔkora sa nu ɔ.
b Ayieleɛ Dwirɛ 7 ne kyirekyire kyɛbɔ ekosiesie edwirɛ bɔ ɔfa adwuma ɔne ngratasɛm nwo ɔ.