Bɔ Ɔkɔboka Wɔ Maa Ekosũa Nikyee Yé Ɔ
Sɛ esũa nikyee a, ɛkɔyɛ sɛɛ né anya so mvasoɛ?
Ɛnnɛ, ɔyɛ se kyɛ yekonya mmerɛ pẽe bɔ yɛkɔfa yekosũa nikyee ɔ. Yede, yɛkɔyɛ sɛɛ né yafa mmerɛ kãa bɔ yɛfa yesũa nikyee ne yayɛ adwuma yé? Bɔ olimoa, sɛ esũa nikyee a, nnɛpere wɔnwo, na mmom to wɔ boase. Yeti, sũa nikyee kãa bie bɔ ɛkɔhora ɔ. Sɛ ɛyɛ sɔ a, wɔ wora ngofi bɔ asũa ne. Ɛhẽne te pá tra kyɛ ekosũa nikyee pẽe bɔ ɛngɔkae enu kõmaapɛ pó ɔ.
Ɛkɔyɛ sɛɛ na afa wɔ mmerɛ ayɛ adwuma yé? (Ɛfe. 5:15, 16) Edwirɛ hemɔ kɔboka wɔ:
Kenga Bible ne daa biala. (Edw. 1:2) Sɛ ɛpena kyɛ ɛhyɛ yebo kenga Bible ne a, Bible kengalɛ nwo nhyehyɛɛ bɔ bayɛ bama yɛ wɔ dapɛen afĩa adesũa nanu ne, ɛkɔhora kɔfa ɛhẽne kɔyɛ adwuma.
Ɛwɛnelɛ Waen ne Kristofoɛ Abrabɔ adesũa nwomaa ne, dimoa sũa ye wɔ awuro kora né ahɔ asafo nhyiamu bo. Sɛ ɛkɔ koso a, ɛyɛ a bɔ mmɔden ma mmuayɛɛ.—Edw. 22:22.
Bɔ mmɔden kenga Ɛwɛnelɛ Waen bɔ yɛfa yɛkɔ asɛnga ne. Afei koso, vidio ne nningyein ahoroɛ bɔ bɛfa begua jw.org so ne, ɛyɛ a nea.
Nningyein bɔ esũa ne, yɛ yenwo nhwehwɛmuɛ. Ebie yeɛ ole kyɛ, sɛ esũa nikye na sɛ edwirɛ bie kye w’adwene, anaa ɛpena kyɛ ɛte Bible nu dwirɛ bie bo a, ɛkɔhora kɔyɛ yenwo nhwehwɛmuɛ. Afei koso, ɛkɔhora kɔyɛ ɔhaw bie bɔ wato wɔ nanwo nhwehwɛmuɛ wɔ asafo nwomaa ahoroɛ nu.