Ye ti Manda 11
Ke Lege ti Vorongo ti Wataka!
Satan na ayingo sioni ti lo aye pepe si mo sala na Nzapa. Ala ye ti gboto azo kue na gbe ti Nzapa tongana ala lingbi ti sala ni. Ala tara ti sala ni tongana nyen? Vorongo ti wataka ayeke mbeni oko lege ni. (2 aCorinthien 11:13-15) Mbeni lege ti vorongo ayeke ti wataka tongana a fa pepe tâ tene so alondo na yâ Bible. Lege ti vorongo ti wataka ayeke tongana mbeni faux-billet, a lingbi ti kpa tâ ye, me a yeke gi senge kugbe. A lingbi ti ga na wusuwusu mingi na mo.
Atene ti mvene ti lege ti vorongo alingbi ti nzere lâ oko pepe na Jéhovah, Nzapa ti tâ tene. Na ngoi so Jésus ayeke giriri na ndo ti sese, mbeni bungbi ti vorongo aye ti fâ lo. Ala bi bê ti ala so vorongo ti ala ayeke mbilimbili lege ni. Ala tene: “E yeke ti Babâ ti e oko, Lo so ayeke Nzapa.” Jésus ayeda na ala? Pepe! Lo tene na ala: “I yeke ti babâ ti i diable.” (Jean 8:41, 44) Laso, azo mingi abi bê ti ala so ala yeke voro Nzapa, me biani ala yeke sala na Satan nga na ayingo sioni ti lo!—1 aCorinthien 10:20.
Legeoko tongana mbeni keke so abuba awe alë asioni lê ti keke, lege ti vorongo ti wataka alë azo so asala aye ti sioni. Sese asi singo na wusuwusu ndali ti aye ti sioni so azo asala. E ba ye ti pitan, tiri, nzi, komandema ti ngangu, fango zo, na gbungo wali na ngangu. Mingi ti azo so asala aye ti sioni so ayeke na yâ ti mbeni lege ti vorongo, ye oko, lege ti vorongo ti ala apusu ala pepe ti sala ye ti nzoni. Ala lingbi ti duti andeko ti Nzapa gi tongana ala zia ti sala aye ti sioni.—Matthieu 7:17, 18.
Lege ti vorongo ti wataka afa na azo ti sambela ayanda. Nzapa atene a lingbi e sambela ayanda pepe. Ye so ayeke na lege ni. A yeke nzere na mo tongana mbeni zo asala tene na mo lâ oko pepe, me lo sala tene gi na foto ti mo? Zo so alingbi ti duti tâ kamarade ti mo? Oko pepe! Jéhovah aye si azo asala tene na lo, pepe na mbeni yanda wala foto, so ayeke na fini oko pepe.—Exode 20:4, 5.
Lege ti vorongo ti wataka afa so a yeke sioni pepe ti fâ azo na ngoi ti bira. Jésus atene giriri so andeko ti Nzapa ayeke ndoye tele na popo ti ala. E yeke fâ pepe azo so e ndoye ala. (Jean 13:35) A yeke même nzoni pepe ti tene e fâ azo ti sioni. Tongana awato ti Jésus aga ti gbu lo, lo zia lege pepe na adisciple ti lo ti tiri ndali ti lo.—Matthieu 26:51, 52.
Lege ti vorongo ti wataka afa so azo ti sioni ayeke ba ande pasi na yâ enfer ti wâ. Ye oko, Bible afa so siokpari ague na kui. (aRomain 6:23) Jéhovah ayeke Nzapa ti ndoye. Fade mbeni Nzapa ti ndoye ayeke sala pasi na azo teti lakue lakue? Oko pepe! Na yâ ti Paradis, fade lege ti vorongo ayeke duti gi oko, lege so Jéhovah ayeda na ni. (Apocalypse 15:4) Fade a yeke lungula biaku alege ti vorongo kue so aluti na ndo ti atene ti mvene ti Satan.