Ye ti Manda 13

Ye ti Magie na Likundu Ayeke Sioni

Satan aye si mo sala ye ti magie. Azo mingi ayeke mu asadaka na akotara wala ayingo ti bata tele ti ala na sioye. Ala sala tongaso ngbanga ti so ala yeke na mbito ti angangu so alondo na ndo ti ayingo. Ala yeke yü mara ti awaraga nde nde. Ala yeke nyon wala ala yeke kpaka tele ti ala na “ayorö” so aba atene ayeke na ngangu ti magie. Na yâ ti da ti ala wala na gbe ti sese, ambeni zo ahonde ambeni ye so ala bi bê ti ala so a yeke na angangu ti bata zo. Ambeni ayeke sala kusala na “yorö” so ala tene mbeni ngangu ti magie ayeke na yâ ni, teti ala mä na bê so fade a yeke sala si dengo buze, a-examen ti ekole, wala gingo ti mu wali wala koli atambela nzoni.

Nzoni ye ahon ti bata tele ti mo yongoro na Satan ayeke ti wara Jéhovah tongana ndeko ti mo. Jéhovah Nzapa na a-ange ti lo ayeke ngangu mingi ahon Satan na ayingo sioni ti lo. (Jacques 2:19; Apocalypse 12:9) Jéhovah ayeke na kota nzala ti fa ngangu ti lo teti nzoni ti andeko ti lo, ala so aduti be-biani na lo na yâ ye kue.—2 Chronique 16:9.

Tene ti Nzapa atene: “A lingbi i sala magie pepe.” Jéhovah ake ye ti magie na likundu ngbanga ti so asalango ye so alingbi ti zia mbeni zo polele na gbe ti ngangu ti Satan Diable.—Lévitique 19:26, NW.