Chapitre Bale Use na Mbasambala

Jéhovah Adeba Nzoni Vorongo so Ayeke na Sioni Oko Pepe

Esaïe 66:1-14

1. Akota li ti tene wa a gboto lê na ndo ni na yâ ndangba chapitre ti Esaïe, na a kiri tene na ahundango tene wa?

NA YÂ ndangba chapitre ti Esaïe, a sala si ambeni kota li ti tene ti buku ti prophétie so asi na kota mbage ti ala, na a kiri tene na angangu hundango tene mingi. Na popo ti atene so a gboto lê na ndo ni a wara dutingo kota ahon kue ti Jéhovah, kengo ndo so lo yeke na ni na mbage ti ndendia, lekengo na bê ti lo kue ti se azo ti sioni, na ndoye nga bingo bê ti lo teti abe-ta-zo. Na ndo ni, a kiri tene na ahundango tene so ge: Ye wa azia kangbi na popo ti tâ vorongo na ti wataka? E lingbi ti hinga biani tongana nyen Jéhovah ayeke se ande awandendia so atene ala yeke nzoni-kue na ngoi so ala yeke sala sioni na azo ti Nzapa? Na tongana nyen fade Jéhovah ayeke deba nzoni azo so angbâ be-ta-zo na lo?

Kelele ti Vorongo so Ayeke na Sioni Oko Pepe

2. Atene wa Jéhovah atene na ndo kota ti lo, na atene so aye pepe ti tene nyen?

² Ti to nda ni, prophétie ni agboto lê na ndo kota ti Jéhovah: “L’Eternel atene tongaso, Yayu ayeke trône ti Mbi, na sese ayeke mbata ti gere ti Mbi; da so i ye ti sala teti Mbi ayeke tongana nyen? ndo ti wo tele ti Mbi ayeke na ndo wa?” (Esaïe 66:1) Ambeni zo aba so prophète ni aye ti pusu aJuif ti zia lege ti lekengo temple na Jéhovah na ngoi so a kiri na mara ni na kodoro ti lo. A yeke tongaso pepe; Jéhovah mveni ayeke mu yanga ande ti tene a kiri a leke temple ni. (Esdras 1:1-6; Esaïe 60:13; Aggée 1:7, 8) Tongaso, versê so aye ti tene nyen?

3. Ngbanga ti nyen a yeke na lege ni so a fa sese tongana “mbata ti gere” ti Jéhovah?

³ Kozoni kue, a lingbi e ba nda ni so a fa sese tongana “mbata ti gere” ti Jéhovah. So ayeke pepe mbeni tene ti zonga. Na popo ti atongoro ngbundangbu mingi ti ndagigi, gi sese oko si a di iri ti lo nde tongaso. Teti lakue lakue, fade sese ti e aduti nde mingi, teti a yeke ge si Molenge ti Jéhovah Ngengele oko afuta kota ngele, na a yeke ge si fade Jéhovah afa na gigi mbilimbili ti kota yanga-ti-komande ti lo na lege ti Royaume ti Messie. A yeke biani na lege ni so a hiri sese mbata ti gere ti Jéhovah! Mbeni gbia asala kusala na mbata ti gere so ti ma na ndo trône ti lo so ayeke na nduzu nga na pekoni tongana ndo ti wo gere ti lo.

4. (a) Ngbanga ti nyen lege ayeke dä oko pepe ti tene mbeni da na ndo sese aduti ndo ti wo tele ti Jéhovah Nzapa? (b) Tene “aye so kue” aye ti tene nyen, na a lingbi e tene nyen na nda ni na ndo vorongo Jéhovah?

⁴ Biani, mbeni gbia ayeke duti lakue pepe na ndo mbata ti gere ti lo, na Jéhovah nga aduti lakue pepe na ndo sese so. Biani, même ayayu so lê aba, so akono mingi, alingbi na lo pepe! Tongaso asenge da kue na ndo sese alingbi pepe na Jéhovah, ti duti tongana tâ da teti lo. (1 aGbia 8:27) Trône ti Jéhovah nga ndo ti lo ti duti ayeke na yâ ndo ti yingo, ye so afa nda ti tene “ayayu” so a sala na kusala na Esaïe 66:1. Versê so aga na pekoni amu lege na e ti gbu nda ti tene ni: “‘Na aye so kue tïtî mbi mveni si asala, si aye so kue asi,’ so ayeke tene so Jéhovah atene.” (Isaïe 66:2a, NW) Tara ti ba Jéhovah na salango maboko ti lo na ngoi so lo fa “aye so kue,” aye oko oko kue na yayu nga na ndo sese. (Esaïe 40:26; Apocalypse 10:6) Teti lo yeke Kota Wasalango ndagigi kue, lo lingbi na mbeni ye so ahon senge da so a mu na lo. Lo lingbi na mbeni ye so ahon gi senge vorongo so ahanda lê ti zo.

5. Tongana nyen e yeke fa so e yeke ‘na vundu na yingo ti e afâ awe’?

⁵ Mara ti vorongo wa alingbi na Gbia ti Ndagigi? Lo mveni lo tene na e: “Tongaso, zo so fade mbi bi lê ti mbi na ndo lo a yeke lo so ayeke na vundu na yingo ti lo afâ awe nga lo dö na lo dö na gbele tene ti mbi.” (Isaïe 66:2b, NW) Biani, bê ti mbilimbili ti wavorongo ni ayeke kota ye teti vorongo so ayeke na sioni oko pepe. (Apocalypse 4:11) A lingbi zo so avoro Jéhovah ayeke “na vundu na yingo ti lo afâ awe.” So aye ti tene Jéhovah aye e duti na ngia pepe? A yeke tongaso pepe, lo yeke “Nzapa so ayeke na ngia,” na lo ye si awavorongo lo aduti na ngia nga. (1 Timothée 1:11; aPhilippien 4:4) Ye oko, e kue e yeke sala siokpari fani mingi, na a lingbi e ba pepe asiokpari ti e tongana senge ye. A lingbi “vundu” asala e ndali ni, vundu asala e so e gue yongoro na ambilimbili lege ti Jéhovah. (Psaume 51:19 [51:17, NW]) A yeke nzoni e fa so ‘yingo ti e afâ awe’ na gbiango bê ti e, na tiringo ngangu na anzala ti siokpari ti e, nga na sambelango Jéhovah ti wara pardon.​—Luc 11:4; 1 Jean 1:8-10.

6. Na lege wa a lingbi atâ wavorongo ‘adö na gbele Tene ti Nzapa’?

⁶ Na ndo ni, Jéhovah abi lê na mbage ti azo so ‘adö na gbele tene ti lo.’ So aye ti tene lo ye e dö na mbito na ngoi kue so e diko atene ti lo? Pepe, nde na so, lo ye si e ba ye so lo tene na kota mbito nga na kota yekiango ndo. Na bê kue, e gi wango ti lo, na salango kusala na ni ti fa lege na aye ti fini ti e kue. (Psaume 119:105) E lingbi ti “dö” nga na lege so e sala mbito ti bibe ti ke yanga ti lo, ti buba tâ tene ti lo na lege ti angobo ti salango ye ti azo, wala na bango ni na nene ni pepe. Mara ti bango ndo ti tâ be-ti-molenge tongaso ayeke kota ye teti vorongo so ayeke na sioni oko pepe. Me vundu ni ayeke so a yeke ngangu ti wara ni na yâ sese ti laso.

Jéhovah Ake Vorongo ti Ndendia

7, 8. Tongana nyen Jéhovah aba senge vorongo ti awandendia ti lege ti vorongo?

⁷ Na ngoi so Isaïe ayeke ba azo so aduti na fini na ngoi ti lo, lo hinga nzoni so azo mingi pepe ayeke na dutingo so Jéhovah agi na yâ awavorongo lo. Ndali ni, Jérusalem so ake tene ti mabe alingbi na fango ngbanga so aga ndulu ti tï na ndo lo. Ba tongana nyen Jéhovah aba vorongo so ayeke na yâ ni: “Zo so afâ bagara ayeke tongana zo so afâ zo; zo so amu molenge ti ngasangbaga na sadaka ayeke tongana zo so afâ go ti mbo; zo so amu offrande ayeke tongana zo so amu mênë ti gaduru na offrande; zo so azö yombo ti libano ayeke tongana zo so ahiri tene nzoni na ndo yanda. Biani, ala ye lege ti ala mveni, na âme ti ala awara ngia na ye ti sioni mingi ti ala.”​—Esaïe 66:3.

⁸ Atene so adabe e na atene ti Jéhovah so a sû ni na yâ kozo chapitre ti Esaïe. Na yâ ni Jéhovah atene na azo ti lo so ague kirikiri, so asenge kusala ti vorongo ti ala anzere na lo pepe, me nga a sala biani si mbilimbili ngonzo ti lo aga kota teti awavorongo ni ayeke awandendia. (Esaïe 1:11-17) Legeoko nga, fadeso Jéhovah ahaka a-offrande ti ala na asioni kengo ndia. Sadaka ti ala ti koli-bagara ti ngele ngangu ayeke dë nga bê ti Jéhovah pepe legeoko tongana fango zo ti ala adë be ti lo pepe! A haka ambeni sadaka nde na mungo tongana sadaka ti mbeni mbo wala gaduru, anyama so ayeke sioni na gbe ti Ndia ti Moïse na a lingbi biani pepe ti mu na sadaka. (Lévitique 11:7, 27) Jéhovah azia si a se pepe mara ti ndendia ti vorongo tongaso?

9. Tongana nyen mingi ti aJuif akiri tene na adango bê so Jéhovah amu na lege ti Isaïe, na ye wa ayeke si ande biani na nda ni?

⁹ Jéhovah atene fadeso: “Fade Mbi leke ye so fade afuti ala, na Mbi sala si ye so amu mbito na ala aga na ndo ala; teti tongana Mbi hiri ndo, zo oko ayeda pepe; tongana Mbi sala tene, ala mä pepe; me ala sala ye so ayeke sioni na lê ti Mbi, na ala ye ye so Mbi wara ngia dä pepe.” (Esaïe 66:4) Isaïe alingbi la ni biani ti tene atene so na bê kue. Teti angu mingi, lo duti gbakuru ti kusala ti Jéhovah, na ‘hiringo’ nga na ‘salango tene’ na azo ti Jéhovah. Prophète ni ahinga nzoni mingi so, tongana a mu azo ni kue, zo oko ayeke mä tene pepe. Teti so ala ngbâ ti sala sioni, fade a yeke se ala biani. Fade Jéhovah asoro biani sengo ala na lo ga na aye so amu mbito na ndo azo ti lo so ake tene ti mabe.

10. Asalango ye ti Jéhovah na mbage ti Juda afa na e nyen na ndo bango ndo ti lo na mbage ti Chrétienté?

¹⁰ Chrétienté ti laso asala mara ti aye tongaso, so Jéhovah awara ngia dä pepe. Vorongo yanda ambumba na yâ a-église ti lo, na ndo ti a-estrade ti lo amokonzi ni agonda asenda-ndara na angobo ti salango ye so ague nde na Tene ti Nzapa, nga gingo ti wara ngangu ti poroso ague na lo ti lï mingi na yâ songo ti pitan na lege ti yingo na amara ti sese. (Marc 7:13; Apocalypse 18:4, 5, 9) Tongana ti so a yeke la ni teti Jérusalem ti giriri, mbilimbili sengo ndo so alingbi na Chrétienté, mbeni “ye so amu mbito,” ayeke ga biani na ndo lo. Mbeni oko ti anda ti tene so sengo ndo ti lo ayeke si biani ayeke lege so lo sala ye na mbage ti azo ti Nzapa.

11. (a) Ye wa akiri akono siokpari ti a-apostat na ngoi ti Isaïe? (b) Na lege wa azo so aduti na fini na ngoi ti Isaïe atomba abe-ta-zo ‘teti iri ti Nzapa’?

¹¹ Isaïe akiri atene: “I mä tene ti L’Eternel, i so tele ti i adö tongana i mä tene ti Lo: Aita ti i so ake i, so atomba i teti iri ti Mbi, ala tene, Zia L’Eternel awara gloire si e lingbi ba ngia ti i! me a yeke ala so fade kamela agbu ala.” (Esaïe 66:5) “Aita” ti Isaïe, afon lo wakodoro, ayö kungba so Nzapa amu ti sala kusala na place ti Jéhovah Nzapa na ti duti na gbe ti kota yanga-ti-komande ti lo. Siokpari so ala sala na salango tongaso pepe ayeke sioni mingi biani. Me ye so akiri akono asiokpari ti ala ayeke so ala ke azo so ayeke be-ta-zo na so ayeke na tâ be-ti-molenge, tongana Isaïe. A-apostat so ake abe-ta-zo na atomba ala teti so ala sala kusala na place ti Jéhovah Nzapa na bê kue. A yeke na lege so si a tomba azo ni ‘teti iri ti Nzapa.’ Na oko ngoi ni, awakua ti Jéhovah ti wataka so atene ala sala kusala na place ti lo, na salango kusala na wâ na atene so akpa ti vorongo, tongana “Zia L’Eternel awara gloire.”a

12. Atapande ti ngangu so awavorongo ti ndendia asala na ndo awakua ti Jéhovah ayeke so wa?

¹² Kengo ndo so vorongo ti wataka ayeke na ni teti azo ti vorongo so ayeke na sioni oko pepe ayeke mbeni fini ye pepe. A yeke mbeni gango tâ tene ti prophétie so ayeke na Genèse 3:15, so a sala giriri tene ti yongoro kengo tele na popo ti hale ti Satan na Hale ti wali ti Nzapa. Jésus atene na adisciple ti lo so a sa yingo na ndo ti ala ti kozo siècle so ala nga ayeke ba pasi na tïtî afon ala wakodoro, tombango ala na yâ asynagogue nga salango ngangu na ala juska même ti tene ala kui. (Jean 16:2) Ti ngoi ti laso a yeke tongana nyen? Na tongo nda ti “lâ ti nda ni,” azo ti Nzapa aba la ni oko salango ngangu so na gbele ala. (2 Timothée 3:1) Kâ na ngu 1914, Tour ti Ba Ndo afa peko ti Esaïe 66:5, na tenengo: “A lingbi ti tene so asalango ngangu kue so atï na ndo azo ti Nzapa alondo na azo so atene ala yeke aChrétien.” Oko article ni atene nga: “E hinga pepe wala ala lingbi ti sala ye ahon ndo ni na ngoi ti e, ti zia e nde na tanga ti azo, ti futi bungbi ni, peut-être ti fâ e mveni.” Atene so aga biani tâ tene na nda ni! Ngoi kete na pekoni so a sigigi na atene so, salango ngangu so bungbi ti amokonzi ti lege ti vorongo ayeke na gunda ni, aga ngangu mingi ahon na ngoi ti Kozo Bira so Amu Sese Kue. Me a zia kamela na lê ti Chrétienté, gi tongana ti so a fa ni kozoni. Tongana nyen?

Mbeni Kiringo Ye na Place ni so Aga Hio nga Fade Fade

13. Na yâ kozo gango tâ tene ni, “wuluwulu alondo na kodoro” aye ti tene nyen?

¹³ Isaïe atene na lege ti prophétie: “Wuluwulu alondo na kodoro, mbeni yanga asala tene na yâ Temple, a yeke yanga ti L’Eternel so afuta awato ti Lo.” (Esaïe 66:6) Na yâ kozo gango tâ tene ti atene so, “kodoro” ni ayeke Jérusalem, ndo so temple ti Jéhovah ayeke dä. “Wuluwulu” ni aye ti tene totongo ti bira so a mä na yâ gbata ni tongana aturugu ti Babylone aga na bira na ndo ni na ngu 607 K.N.E. Ye oko, ti gango tâ tene ti laso ayeke tongana nyen?

14. (a) Malaki afa nyen kozoni na ndo gango ti Jéhovah na temple ti Lo? (b) A lingbi na prophétie ti Ézékiel, ye wa aga na pekoni so Jéhovah aga na temple ti lo? (c) Lawa Jéhovah na Jésus agi yâ ti temple ti yingo, na tongana nyen ye ni andu azo so atene ala sala kusala teti vorongo so ayeke na sioni oko pepe?

¹⁴ Atene so na yâ Esaïe ague legeoko na atene ti prophétie use, oko ayeke na Ezéchiel 43:4, 6-9 na mbeni ayeke na Malachie 3:1-5. Ézékiel na Malaki afa kozoni tene ti mbeni ngoi so na yâ ni Jéhovah Nzapa aga na temple ti lo. Prophétie ti Malaki afa so Jéhovah aga ti gi yâ ti da ti lo ti vorongo so ayeke na sioni oko pepe na ti sala kusala tongana Walekengo ye nzoni ahon, na kengo azo so afa lo na lege ni pepe. Suma ti Ézékiel afa Jéhovah na lindango na temple nga na hundango si a zi mara ti asalango pitan na yanda nde nde kue.b Na yâ gango tâ tene ti laso ti aprophétie so, mbeni kota ye asi na yayu na ngu 1918, so andu vorongo Jéhovah. A ba so Jéhovah na Jésus agi yâ ti azo kue so atene ala sala kua teti vorongo so ayeke na sioni oko pepe. Gingo yâ ti aye ni ague ti si na ndangba kengo Chrétienté so abuba awe. Ti adisciple ti Jésus so a sa yingo na ndo ti ala, gingo yâ ti aye so aduti mbeni kete ngoi ti lekengo ala nzoni ahon, so kiringo ti leke ye na lege ti yingo aga na loro na pekoni na ngu 1919.​—1 Pierre 4:17.

15. Dungo wa a sala tene ni kozo, na tongana nyen ye so aga tâ tene na ngu 537 K.N.E.?

¹⁵ A fa tâ na lege ni kiringo ti leke ye na yâ versê ti Esaïe so aga na peko: “Kozoni si gua ate wali, lo dü molenge; kozoni si songo ni aga, lo dü molenge-koli. Zo nyen amä tene tongaso giriri? zo nyen aba ye tongaso? Fade a dü sese na lâ oko? fade mara asigigi fade fade? teti tongana gua ate Sion, fade fade lo dü amolenge ti lo.” (Esaïe 66:7, 8) Teti aJuif so ayeke angba na Babylone, atene so awara mbeni pendere kozo gango tâ tene. A kiri a fa Sion, wala Jérusalem, tongana mbeni wali so ayeke dü molenge, me dungo ni so ayeke nde mingi! A yeke na loro mingi, a si fade fade, lo dü kozoni si agua alingbi ti te lo. Fango peko ti ye so alingbi biani. Kiringo ti dü azo ti Nzapa, tongana mbeni mara so ayeke nde, na ngu 537 K.N.E. ague na loro mingi nga a si fade fade si a ba ni tongana ye ti kpene. Biani, a londo na ngoi so Cyrus azi aJuif na gbe ti ngba ti si na ngoi so mbeni tanga ti azo so ayeke be-ta-zo akiri na kodoro ti ala, ye so kue atambela gi na yâ ti anze kete! So tâ kota kangbi na aye so ague ti si na kozo dungo mara ti Israël! Na ngu 537 K.N.E., a hunda la ni pepe ti dema na mbeni gbia so asala kpengba-li ti zi azo ni, a hunda nga pepe ti kpe mbeni sioni bungbi ti aturugu, nga ti duti na yando teti angu 40.

16. Na yâ gango tâ tene ti laso ti Esaïe 66:7, 8, Sion aduti fä ti nyen, na tongana nyen a kiri a dü ahale ti lo?

¹⁶ Na yâ gango tâ tene ti laso, Sion aduti fä ti “wali” ti Jéhovah ti yayu, bungbi ti lo ti azo ti yingo ti yayu. Na ngu 1919, “wali” so aduti na ngia ti ba dungo amolenge ti lo so a sa yingo na ndo ti ala na ndo sese tongana mbeni bungbi ti azo, mbeni “mara.” Fini dungo so aga na loro na fade fade.c Gi na yâ anze kete, azo so a sa yingo na ndo ti ala, tongana mbeni bungbi, alondo na yâ dutingo so kusala ayeke dä pepe ti si na mbeni so fini asi singo na kusala, nga ala yeke sala kusala mingi na yâ “sese” ti ala, ndo ti kusala ti yingo so Nzapa amu na ala. (Apocalypse 11:8-12) Na ngoi ti buru ti ngu 1919, ala sala même tene ti sigingo ti mbeni fini mbeti-sango ti mu maboko na Tour ti Ba Ndo. Na iri ti L’Âge d’or (fadeso Réveillez-vous!), fini mbeti so ayeke la ni mbeni fä ti kiringo ti mu ngangu na azo ti Nzapa nga ti kiringo ti leke ala teti kusala.

17. Tongana nyen Jéhovah adë bê ti azo ti lo so ye oko alingbi pepe ti kanga lege na lo ti sala ye so lo leke ti sala na ndo Israël ti yingo?

¹⁷ Mbeni ngangu na yâ ndagigi alingbi oko pepe ti kanga lege na kiringo ti dü na lege ti yingo so. Versê so aga na pekoni afa na gigi pendere mingi bibe so: “L’Eternel atene, Fade Mbi sala si lâ ti dungo aga, na fade Mbi ke ti sala si a dü molenge ni? Nzapa ti mo atene, Mbi so Mbi sala si wali adü molenge, fade Mbi kanga yâ ti lo?” (Esaïe 66:9) Legeoko tongana ti so a lingbi pepe ti kanga lege na dungo molenge tongana dungo ni ato nda ni awe, legeoko nga a lingbi pepe ti kanga lege na kiringo ti dü Israël ti yingo, tongana a to nda ni awe. Tâ tene, kangango lege ayeke dä la ni, na fade a lingbi ti duti mingi ahon na yâ ngoi so ayeke ga. Me gi Jéhovah oko si alingbi ti kaï ye so lo to nda ni, na lo sala so lâ oko pepe! Ye oko, tongana nyen Jéhovah asala ye na azo ti lo so a kiri a mu ngangu na ala?

Batango Ndo ti Jéhovah na Ndoye

18, 19. (a) Pendere tapande wa Jéhovah asala na kusala, na tongana nyen a lingbi na azo ti lo so aduti na ngba? (b) Tongana nyen tanga ni so a sa yingo na ndo ti lo laso awara nzoni na lege ti batango ndo nga mungo kobe na ndoye?

¹⁸ Aversê osio so aga na pekoni afa na mbeni pendere lege batango ndo ti Jéhovah na ndoye. Kozoni kue, Isaïe atene: “I duti na ngia legeoko na Jérusalem, na i sala ngia ngbanga ti lo, i kue so i ndoye lo; i duti na tâ ngia legeoko na lo, i kue so i toto na vundu ngbanga ti lo; si i lingbi nyon me alingbi na nzala ti i, me ti lo so alungula vundu; si i lingbi nyon mingi, na i wara ngia teti kota gloire ti lo.” (Esaïe 66:10, 11) Jéhovah asala kusala ge na tapande ti mbeni wali so amu kobe na kete molenge ti lo. Tongana nzala asala mbeni foroto, lo toto ngangu. Me tongana a ga na lo ndulu na me ti mama ti lo ti te kobe, vundu ti lo agbian aga nzerengo tele na ngia. Legeoko nga, a zi na loro tanga ti aJuif so ayeke be-ta-zo na Babylone na yâ dutingo ti mawa ti ga na yâ dutingo ti ngia na ti nzerengo tele tongana ngoi ti zingo ala na ti kiringo na ala aga. Fade ala duti na ngia. Fade a kiri a mu fini gloire na Jérusalem na ngoi so a kiri a leke ni na azo akiri dä. Na mbage, fade gloire ti gbata ni awara awakodoro ti lo so ayeke be-ta-zo. Na ndo so nga, fade a kiri a mu na ala kobe ti yingo na lege ti bungbi ti aprêtre so asala kusala.​—Ezéchiel 44:15, 23.

¹⁹ Israël ti yingo nga awara deba nzoni na lege ti gbâ ti kobe na peko ti kiringo na lo na ndo ti lo na ngu 1919. A londo ngbele ye kâ, kobe ti yingo so a mu na lege ti “ngba ti be-ta-zo na ti ndara” angbâ ti sua lakue. (Matthieu 24:45-47, NW) Ye so aduti biani mbeni ngoi ti lungulango vundu na ti ngia teti tanga ni so a sa yingo na ndo ti lo. Me ambeni deba nzoni nde ayeke dä.

20. Tongana nyen Jérusalem awara adeba nzoni na lege ti “ngu so amu sese,” na ngoi ti giriri nga na ti laso?

²⁰ Prophétie ni akiri atene: “L’Eternel atene tongaso: Ba, fade Mbi mu siriri na lo tongana ngu so asua, na fade Mbi mu gloire ti amara na lo tongana ngu so amu sese; fade i nyon me ti Jérusalem, na fade lo yö i na kate ti lo, na lo sala ngia na i na ndo likuni ti lo.” (Esaïe 66:12) Ge, a bungbi tapande ti batango molenge legeoko na tapande ti gbâ ti adeba nzoni so ayeke sua, “ngu so asua” na “ngu so amu sese.” Fade Jérusalem awara deba nzoni pepe gi na lege ti gbâ ti siriri ti Jéhovah, me nga na lege ti “gloire ti amara,” so asua ti ga na mbage ti azo ti Nzapa na adeba nzoni ala. So aye ti tene fade azo ti amara ayeke ga na mbage ti azo ti Jéhovah. (Aggée 2:7) Na yâ gango tâ tene ti giriri, mbeni wungo ti azo alondo na amara na abungbi na Israël, na ala ga aJuif so ayeke aprosélyte. Ye oko, mbeni gango tâ tene ti kota ahon ayeke si na ngoi ti e mveni tongana “azo mingi so asi singo. . . ti amara kue, ti akete mara kue, ti azo nde nde kue, na ti ayanga nde nde kue,” biani mbeni ngu so amu sese kue ti azo, abungbi na tanga ti aJuif ti yingo.​—Apocalypse 7:9, NW; Zacharie 8:23.

21. Na lege ti pendere fango peko ti ye, a fa tene ti dengo bê wa na nzobe kozoni?

²¹ Esaïe 66:12 asala nga tene ti ndoye ti mama, salango ngia na molenge na ndo likuni nga yongo lo na ndo kate. Na yâ versê so aga na pekoni, a fa na gigi oko bibe so legeoko na mbeni gbiango ti ye na loro. “Legeoko tongana mbeni koli so mama ti lo angbâ lakue ti lungula vundu ti lo, legeoko nga fade mbi ngbâ lakue ti lungula vundu ti i; nga ti Jérusalem, fade a lungula vundu ti i.” (Isaïe 66:13, NW) Molenge ni ayeke fadeso “koli,” mbeni biazo. Me mama ti lo aglisa pepe nzala ti dë bê ti lo na ngoi ti vundu.

22. Tongana nyen Jéhovah afa na gigi kpengba na ngangu ti ndoye ti lo?

²² Na mbeni lege so agboto zo, Jéhovah afa ngangu na kpengba ti ndoye ti lo teti azo ti lo. Même ndoye ti ngangu ahon ti mama ayeke gi kete fä ti kota ndoye ti Jéhovah teti abe-ta-zo ti lo. (Esaïe 49:15) So kota ye ti tene aChrétien kue afa na gigi mara lengo so ti Babâ ti ala ti yayu! Bazengele Paul asala ni la ni, na tongaso lo zia mbeni pendere tapande teti a-ancien na yâ kongrégation ti aChrétien. (1 aThessalonicien 2:7) Jésus atene la ni so ndoye teti aita ayeke duti kota ye so amu lege ti hinga na adisciple ti lo.​—Jean 13:34, 35.

23. Fa peko ti dutingo ti ngia ti azo ti Jéhovah so a kiri ala na ndo ti ala.

²³ Jéhovah afa na gigi ndoye ti lo so asala kusala. Na lege so, lo kiri lo tene: “Fade i ba ye so, na fade bê ti i aduti na ngia, na bio ti i akpengba tongana fini pele; fade L’Eternel afa ngangu ti tïtî Lo na aboi ti Lo, na fade ngonzo agbu Lo na tele ti awato ti Lo.” (Esaïe 66:14) Mbeni wagingo nda ti yanga ti Hébreu atene so tene “fade i ba ye so” aye ti tene na ndo kue so angba, so ayeke kiri, abi lê ti ala dä na yâ kodoro ti ala so a kiri a leke ni, “ala ba gi ngia.” Fade ala sala ngia biani, na kota ngia mingi na ndo tene so a kiri ala awe na kodoro ti ala so ala ndoye mingi. Fade ala ba so ala kiri awara ngangu, mo ba mo tene abio ti ala akiri akpengba, a wara ngangu tongana pele na ngoi ti printemps. Azo kue ayeke hinga ande so dutingo ti deba nzoni so aga, pepe na lege ti ngangu ti zo, me na lege ti ‘tïtî Jéhovah.’

24. (a) Tene ti nda ni wa mo yeke na ni tongana mo ba aye so asi, so andu azo ti Jéhovah laso? (b) A lingbi e leke na bê ti e ti sala nyen?

²⁴ Mo ba tïtî Jéhovah na kusala na popo ti azo ti lo laso? Zo ti sese oko pepe alingbi fade ti kiri na vorongo so ayeke na sioni oko pepe. Zo ti sese oko pepe alingbi fade ti leke ti sala si azo ti ngele ngangu kutu mingi ti amara abungbi na tanga ti abe-ta-zo na yâ kodoro ti ala ti yingo. Gi Jéhovah Nzapa oko si alingbi ti sala mara ti aye tongaso. Afä ti ndoye ti Jéhovah so amu na e nda ti tene ti duti na kota ngia. Zia e ba lâ oko pepe ndoye ti lo tongana senge ye. Zia e ngbâ lakue ti ‘dö na gbele tene ti lo.’ Zia e leke na bê ti e ti duti na fini alingbi na akpengba-ndia ti Bible na ti wara ngia na yâ salango na Jéhovah.

[Akete tene na gbe ni]

[Foto na lembeti 395]

“Aye so kue tïtî mbi mveni si asala”

[Foto na lembeti 402]

Fade Jéhovah akono juska na Sion “gloire ti amara”