Kode ti fango tënë na table wala poussette
Ti fa tënë na table wala poussette ayeke mbeni pendere kode ti ga na azo ti nzoni bê na yâ ti tâ tënë (Jean 6:44). Ni la, a wa lani a-ancien ti leke ti tene a fa tënë na ando so azo ayeke hon dä mingi so ayeke na yâ ti territoire ti ala. Ndali ti so apoussette wala atable ni ayeke ngbâ na ndo oko ape, mingi ni, e yeke na bezoin pëpe ti hunda akota zo ti kodoro si e zia ni na ndo so e ye ti zia ni dä. Azo wa la alingbi ti fa tënë na ni? A yeke aita so ayeke sara ye na ndara, so ayeke sara ye na nengo tere, nga so ayeke na pendere kode ti sarango lisoro. Aye so mo lingbi ti sara na ye so mo lingbi ti sara pëpe so ayeke na gbe ni ge alingbi ti mû maboko na aita ti fa tënë nzoni na table wala poussette.
Ye so mo lingbi ti sara:
• Fa so mo bi bê na azo ni, yamba ala, nga mû maboko na ala. Ambeni wafango tënë ayeke he ngia kete na ngoi so ala yeke bara azo ni. Tongana mbeni zo so ayeke hon na lege ayeke bâ ndo na mbage ti table ti ambeti ni wala poussette ni, mo lingbi ti tene: “Mo lingbi ti mû mbeni mbeti tongana mo ye.”
• Luti ayo kete na table wala poussette ni. Na ambeni ndo, aita abâ so ti luti nduru na table ni aga na ye ti nzoni. Ambeni abâ ti ala so ti sara tongaso ayeke sara si azo ayeke na mbeto ti ga na tere ti table wala poussette ni, tongaso ala luti ayo kete na table wala poussette ni. Tongana mbeni zo aga nduru na tere ti table wala poussette ni, ala yeke tara ti sara lisoro na lo, ala yeke hunda lo, “Mo hunda tere ti mo na tënë so lâ oko awe?”
• Tongana lege ayeke dä, mo lingbi ti sara kua na Bible fani mingi.
• Ti azo so amû ambeti ti e, fa na ala so e yeke manda Bible na azo na lege ti ambeti tongana Bible afa nyen. Hunda na zo ni ti fa na lo vidéo Ndani nyen ti manda Bible? na ndo ti téléphone wala tablette ti mo.
• Tongana lege ayeke dä, sû adresse ti azo so tënë ni anzere na ala. Tongana zo ni alango na yâ ti territoire ti mo ape, sû mbeti hio na lê ti formulaire Veuillez suivre l’intérêt (S-43) na mû ni na secrétaire ti congrégation ti mo.
Ye so mo lingbi ti sara pëpe:
• Sara ye na azo na ngangu ape, tongana mbeni zo ake ti mä mo, forcé lo ape, son songo na ndo ti lo ape, wala duti na tere ti table ni tongana mbeni sentinelle ape.
• Bâ kode ti fango tënë so gi tongana mbeni lege ti kangbi ambeti ti e pëpe. Ni la, tongana e yeke fa tënë, ye so e yeke gi ayeke ti to nda ti manda Bible na mbeni zo, tongaso, a yeke nzoni e tara ti to nda ti lisoro na azo ni.
• Kanga lege na azo ti bâ table ni wala poussette ni ape wala sara lisoro ahon ndo ni ape na ita so mo na lo ayeke fa tënë. Tongana mo ye ti téléphoné, a yeke nzoni mo gue ayo na table wala poussette ni.
• Kpe ti dë gaba na mbeni zo so aluti na ndo ti bango ndo ti lo. Tongana zo ni aluti nganganga na ndo ti bango ndo ti lo, a yeke nzoni ti zia lo ti hon na mbeni ndo nde.