Abungbi so ‘apusu e ti duti na ndoye na ti sara anzoni kusala’

NA YÂ ti angu ngbangbo mingi, awakua ti Jéhovah ayeke sara abungbi na mbeni lege so a leke ni nzoni. Na Israël ti ândö, akoli kue ayeke gue ka na Jérusalem ndali ti akota matanga ota (Deut. 16:16). Na ngoi ti akozo Chrétien, congrégation ti aChrétien ayeke sara lani abungbi lakue, mingi ni na da ti ambeni ita (Phm. 1, 2). Laso, e yeke sara abungbi nga na akota bungbi ti lango oko na ti lango ota. Me ngbanga ti nyen la awakua ti Nzapa ayeke sara abungbi? Kozoni kue, a yeke ngbanga ti so abungbi ayeke kota mbage ti vorongo so e yeke voro na Nzapa.—Ps. 95:6; aCol. 3:16.

² Abungbi ayeke ga nga na aye ti nzoni na azo so ague dä. Lakue, a si na mbasambala Matanga ti Akpangba, a yeke tene na azo ti Israël a tene: “Mo bungbi azo ni, akoli, awali, amolenge nga na awande so asara kodro na yâ ti agbata ti mo, si ala mä ni, ala manda ti hinga Jéhovah Nzapa ti ala na ti kpe mbeto ti lo, nga ala sara kue ti sara ye alingbi na atënë kue ti Ndia so.” (Deut. 31:12). A yeke polele so mbeni kota raison so ndali ni e yeke sara abungbi ayeke ti tene ‘Jéhovah afa ye’ na e (És. 54:13). Abungbi ayeke mû nga lege na e ti hinga terê nzoni, ti wa terê na popo ti e nga ti kpengba mba.

ABUNGBI TI CONGRÉGATION

³ Adisciple so abungbi lani ndo oko na peko ti Pentecôte ti ngu 33 amû bê ti ala kue na afango ye ti abazengele, na “lâ na lâ, na beoko ala yeke gue lakue na temple”. (Kus. 2:42, 46). Na pekoni, tongana aChrétien ayeke bungbi terê lani ti voro Nzapa, ala yeke diko atënë ti Nzapa so a sû na gbe ti yingo ti lo, so na popo ni a yeke wara ambeti so abazengele nga na ambeni disciple nde asû ni (1 aCor. 1:1, 2; aCol. 4:16; 1 aThes. 1:1; Jacq. 1:1). Ala yeke sambela nga lani na ngoi ti abungbi ni (Kus. 4:24-29; 20:36). Ngoi na ngoi, ala yeke fa peko ti aye so asi na yâ ti kua ti missionnaire (Kus. 11:5-18; 14:27, 28). Ala yeke sara tënë na ndö ti aye so Mbeti ti Nzapa afa nga na gango tâ tënë ti aprophétie so a sû na gbe ti yingo ti Nzapa. Ala yeke wara awango na ndö ti anzoni sarango ye so a lingbi aChrétien aduti na ni nga na ndö ti vorongo Nzapa na bê kue. A wa lani azo kue ti tene ala sara kua ti fango nzoni tënë mingi.—aRom. 10:9, 10; 1 aCor. 11:23-26; 15:58; aÉph. 5:1-33.

⁴ Laso, e yeke sara abungbi ti e ti aChrétien tongana ti so abazengele ayeke sara lani. E yeke sara ye alingbi na wango ti Bible so ayeke na aHébreu 10:24, 25, so atene: “Zia e bi lê na ndö ti mba . . . , e zia pëpe lege ti guengo lakue na bungbi ti e, tongana ti so ambeni zo ayeke sara ka, me e wa terê na popo ti e nga e ngbâ ti sara ni mingi ahon ti kozo, so ala bâ lango ni ayeke pusu nduru.” Na lâ ti nda ni so ayeke ngangu so, e yeke tâ na bezoin ti wango so e yeke wara na ngoi ti abungbi so e yeke sara lakue, tongaso si e lingbi ti ngbâ ti kpengba na lege ti yingo nga ti ngbâ be-ta-zo na Nzapa (aRom. 1:11, 12). E aChrétien ti laso e yeke na popo ti asioni zo so sarango ye ti ala ayeke gï kirikiri. E ke aye so Nzapa ake nga e ke anzara ti dunia so (aPhil. 2:15, 16; Tite 2:12-14). Biani, e ye mingi ti bungbi na amba ti e awakua ti Jéhovah ahon ti duti na mbeni ndo nde (Ps. 84:10). Nga, mbeni ye so alingbi ti mû maboko na e mingi ahon mandango Mbeti ti Nzapa nga na sarango lisoro na ndö ni ayeke dä ape. Zia e bâ abungbi nde nde so a leke ni ndali ti nzoni ti e.

BUNGBI TI NDA-YENGA

⁵ Kozo mbage ti bungbi ti nda-yenga ayeke mbeni diskur so a mû ni ndali ti azo kue. Peut-être ti ambeni zo ni, a yeke kozo gango ti ala na bungbi ni la. Diskur ayeke mbeni kota mbage ti kobe ti yingo so afini zo nga na awafango tënë ti congrégation abezoin ni.—Kus. 18:4; 19:9, 10.

⁶ Christ Jésus, abazengele ti lo nga na azo so ala na ala ayeke sara lani kua ayeke mû lani mara ti adiskur so a yeke sara laso na yâ ti acongrégation ti aTémoin ti Jéhovah. Kite ayeke dä ape so Jésus ayeke lani kota wamungo diskur so ahon atanga ni kue na ndö ti sese. Azo atene lani na ndö ti lo, atene: “Mbeni zo asara tënë tongaso lâ oko pëpe.” (Jean 7:46). Lo yeke tene tënë tongana zo so ayeke na komandema, na a pika bê ti azo so ayeke mä lo mingi (Mat. 7:28, 29). Ala so asara ye alingbi na tënë ti lo awara aye ti nzoni mingi na pekoni (Mat. 13:16, 17). Abazengele ti lo amû lani tapande ti lo. Na Kusala 2:14-36, a sara tënë ti mbeni kpengba diskur so Pierre amû na lâ ti Pentecôte ti ngu 33. Ye so lo fa so apusu azo saki mingi ti sara ye alingbi na ni. Ambeni ngu na pekoni, ambeni zo aga aChrétien na peko ti so ala mä fango tënë so Paul afa na Athènes.—Kus. 17:22-34.

⁷ Legeoko nga laso, azo kutu mingi awara aye ti nzoni na lege ti adiskur so a yeke mû ka ni na anda-yenga oko oko na yâ ti acongrégation nga na ati so a yeke mû ni na ngoi ti akota bungbi ti lango oko na ti lango ota. Amara ti adiskur tongaso ayeke mû maboko na e ti ngbâ lakue ti dengi mê na afango ye ti Bible nga ti gbu ngangu na yâ ti kua ti Royaume. Tongana e tisa azo so asara nzara ti tâ tënë nga na azo kue ti ga ti mä adiskur ni so, e lingbi ti sara si azo mingi ahinga akozo fango ye ti Bible.

⁸ Adiskur so a yeke mû asara tënë na ndö ti aye nde nde. Na tapande, ambeni diskur ni alingbi ti sara tënë ti mbeni kota fango ye ti Bible nga na mbeni prophétie, amama-ndia ti Bible, awango so andu dutingo ti sewa, atënë so andu akoli na awali so asara mariage awe, akpale so amaseka ayeke tingbi na ni nga na anzoni sarango ye so aChrétien adoit ti duti na ni. Ambeni diskur ni asara tënë na ndö ti apendere ye so Jéhovah acréé na yâ ti dunia. Ambeni agboto lê na ndö ti nzoni tapande ti mabe, ti sarango ye na mbeto pëpe nga na dutingo be-ta-zo ti azo so a sara tënë ti ala na yâ ti Bible, nga a luti na ndö ti ye so e lingbi ti manda dä laso.

⁹ Ti wara aye ti nzoni mingi na lege ti adiskur so, a lingbi e dengi mê nzoni, e zi Bible ti e tongana wamungo diskur ni afa mbeni versê ti dikongo ni, nga e mä lo na ngoi so lo yeke diko ni nga lo yeke fa ndani (Luc 8:18). Tongana e mä yâ ti aye so a yeke fa na e so nzoni, e yeke leke ande na bê ti e kue ti gbu ngangu aye so e manda nga ti sara ye alingbi na ni.—1 aThes. 5:21.

¹⁰ Tongana awamungo diskur ayeke dä, kite ayeke dä ape so congrégation ayeke wara diskur yenga oko oko. Fani mingi, a yeke hunda na ambeni wamungo diskur ti ambeni congrégation so ayeke nduru ti mû diskur. Tongana kpale ti azo ti mungo diskur ayeke dä, a yeke sara kue ti tene a mû ambeni diskur na ngoi kue so lege ayeke dä.

¹¹ Use mbage ti bungbi ti nda-yenga ayeke mandango Tour ti Ba Ndo. Na ngoi ni so, a yeke sara lisoro na ndö ti a-article ti Tour ti Ba Ndo ti mandango ni na lege ti ahundango tënë na akiringo tënë. Na lege ti Tour ti Ba Ndo, Jéhovah ayeke mû na e kobe ti yingo na ngoi so alingbi.

¹² Fani mingi, a-article so e yeke manda ayeke fa tongana nyen ti sara ye alingbi na amama-ndia ti Bible na yâ ti gigi ti e ti lâ na lâ, na a yeke kpengba aChrétien ti kpe “yingo ti dunia so” nga na asarango ye so ayeke sioni (1 aCor. 2:12). A yeke na yâ ti a-article ti Tour ti Ba Ndo ni si a yeke zi nda ti atënë so andu akota fango ye ti Bible nga na aprophétie. Ye so ayeke sara si azo kue ayeke gue na li ni na yâ ti tâ tënë nga ayeke ngbâ ti tambela na ndö ti lege ti azo ti mbilimbili (Ps. 97:11; aProv. 4:18). Ti gue na Mandango Tour ti Ba Ndo nga ti mû acommentaire na ngoi ni alingbi ti aidé e ti duti na ngia na yâ ti beku ti fini dunia, so Jéhovah amû zendo ni, so mbilimbili ayeke duti dä (aRom. 12:12; 2 Pi. 3:13). So e yeke bungbi legeoko na aita ti e, a yeke aidé e ti lë lengo ti yingo nga ti duti na nzara mingi ti sara na Jéhovah na bê ti e kue (aGal. 5:22, 23). A yeke kpengba mabe ti e si e ngbâ ti gbu ngangu na yâ ti atara, na a yeke leke e ti tene e duti na “mbeni nzoni fondation so [e] lingbi ti leke ye na ndö ni kekereke” tongaso si e “gbu fini so ayeke tâ fini ni biani.”—1 Tim. 6:19; 1 Pi. 1:6, 7.

¹³ Nyen la e lingbi ti sara ti wara ye ti nzoni mingi na lege ti kapa ti kobe ti yingo so? A yeke nzoni e leke abungbi ti e kozo, na sewa wala e oko, e bâ atënë ti yâ ti aversê kue so a fa atënë ti yâ ni pëpe. Na ngoi ti bungbi ni, a yeke nzoni e mû acommentaire na lege ti atënë ti e wani. Ye so ayeke sara si tâ tënë alï na yâ ti bê ti e, na a yeke mû nga lege na amba ti e ti wara aye ti nzoni tongana ala yeke mä atënë ti mabe ti e so e yeke fa ni na gigi. Tongana e duti kpô e mä acommentaire so aita ti e ayeke mû, e yeke wara ande aye ti nzoni na ngoi ti mandango ye ni yenga oko oko kue.

BUNGBI TI MILIEU TI YENGA

¹⁴ Yenga oko oko, acongrégation ayeke sara mbeni bungbi na Da ti Royaume. Iri ti bungbi ni so ayeke Kusala ti e nga na gigi ti e ti Chrétien. Bungbi ni so ayeke na ambage ota, na a leke ni ti aidé e ti ga awakua ti Nzapa so “alingbi biani”. (2 aCor. 3:5, 6). Nze oko oko, a yeke zia akapa nga na ambeni ye ti mandango ni na yâ ti Mbeti ti bungbi: Kusala ti e nga na gigi ti e ti Chrétien. A yeke wara nga na yâ ti Mbeti ti bungbi: Kusala ti e nga na gigi ti e kode ti sarango na alisoro na fango tënë.

¹⁵ Iri ti kozo mbage ti bungbi ni ayeke Anzoni ye so ayeke na yâ ti Bible. Mbage ni so ayeke aidé e ti hinga ambaï ti yâ ti Bible nzoni mingi, nga ti bâ aye so e lingbi ti manda dä. Na yâ ti mbage ti bungbi ni so, a yeke mû mbeni diskur, a yeke diko Bible nga a yeke sara lisoro na ndö ti mbage ti Bible ti yenga ni. Na yâ ti Mbeti ti bungbi: Kusala ti e nga na gigi ti e, a zia afoto so ayeke fa ye na e na ndö ti ambaï ti Bible nga a zia ambeni place so ayeke senge ti tene e sû ambeti dä. Ni la, tongana e manda aye ni nzoni, a yeke aidé ande e na yâ ti gigi ti e nga na yâ ti kua ti e ti fango tënë, tongaso si e ‘lingbi na yâ ti ye kue, e wara aye kue so e yeke na bezoin ni ti sara na nzoni kusala kue.’—2 Tim. 3:16, 17.

¹⁶ Iri ti use mbage ti bungbi ni ayeke Maï akode ti fango tënë ti mo. A leke ni ti mû lege na azo kue ti tara terê ndali ti kua ti fango tënë nga ti maï akode ti ala ti fango tënë na ti fango ye. A yeke mû adevoir na a-élève nga a yeke fa avidéo so na yâ ni a fa kode ti sarango na alisoro. Mbage ti bungbi so ayeke aidé e ti ‘hinga ti sara tënë tongana ti azo so a fa ye na ala, tongaso si e hinga mbilimbili tënë so e lingbi ti tene ti kiri tënë na zo so awoko.’—És. 50:4.

¹⁷ Iri ti ota mbage ti bungbi ni ayeke Gigi ti e ti Chrétien. Na yâ ti mbage so, a yeke fa na e tongana nyen ti sara ye alingbi na amama-ndia ti Bible na yâ ti fini ti e ti lâ oko oko (Ps. 119:105). Mbeni kota mbage ti bungbi so ayeke Mandango Bible ti Congrégation. Legeoko tongana ti Mandango Tour ti Ba Ndo, a yeke sara Mandango Bible ti Congrégation na lege ti hundango tënë na kiringo tënë.

¹⁸ Nze oko oko, tongana mbeni Mbeti ti bungbi: Kusala ti e nga na gigi ti e aga, coordinateur ti bungbi ti a-ancien wala mbeni ancien so ayeke aidé lo, a yeke mû ngoi ti lo ti bâ aye ni nzoni nga ti leke kapa ni. Yenga oko oko, mbeni ancien so ahinga ti fa ye nzoni na so bungbi ti a-ancien ayeda na lo la ayeke mû li ni na bungbi ni. Lo yeke gi nga ti bâ si bungbi ni akomanse na l’heure nga ahunzi na l’heure, nga lo yeke gonda a-élève so asara adevoir na lo yeke mû wango na ala.

¹⁹ Tongana lakue e leke terê ti e kozo ti gue na bungbi ti Kusala ti e nga na gigi ti e ti Chrétien na e mû mbage dä, a yeke sara si e yeke hinga Bible nzoni, e yeke mä yâ ti amama-ndia ti Bible ni, e yeke wara ngangu ti fa nzoni tënë nga e yeke wara anzoni kode ti sarango adisciple. Ti azo so ague na bungbi me so ade ti wara batême ape, ala nga kue ayeke wara ye ti nzoni na lege ti bungbingo legeoko na aita so aye terê nga na lege ti alisoro so a yeke sara so ayeke kpengba zo. Ti aidé e ti leke terê ti e ndali ti bungbi ni so, e peut ti sara kua na Watchtower Library, JW Library^®, Bibliothèque ti Watchtower na ndö ti Internet (tongana a yeke dä na yanga ti kodro ti mo) nga na bibliothèque ti Da ti Royaume. Na yâ ti bibliothèque ti Da ti Royaume ni, mo yeke wara ambeti so aTémoin ti Jéhovah asigi na ni, Index des publications de la Société Watch Tower, Mbeti ti sarango na recherche ndali ti aTémoin ti Jéhovah, aBible so ayeke na ambeni yanga ti kodro nde nde, concordance, dictionnaire nga na ambeni mbeti nde so apeut ti aidé mo. Zo apeut ti sara recherche na yâ ti bibliothèque ni so kozo na bungbi wala na peko ti bungbi.

ABUNGBI TI FANGO TËNË

²⁰ Na angoi nde nde ti yâ ti yenga wala na anda-yenga, agroupe ti awafango tënë ayeke mû mbeni kete ngoi ti sara na bungbi ti fango tënë. Mingi ni, a yeke sara abungbi ni so na ndo ti ambeni ita wala na ambeni ndo so alingbi. A lingbi nga ti sara ni na Da ti Royaume. Tongana a kangbi yâ ti agroupe ni kete kete, na ando nde nde na yâ ti aterritoire, a lingbi ti duti ngangu ape na awafango tënë ti gue hio na place ti bungbi ti fango tënë nga na yâ ti aterritoire. Ye so ayeke sara si a yeke kangbi yâ ti awafango tënë hio, nga ala yeke gue hio na territoire. A yeke mû nga lege na surveillant ti groupe ni ti bâ ndo nzoni mingi na ndö ti azo ti yâ ti groupe ti lo. Atâa so aye ti nzoni ayeke ga na pekoni tongana agroupe ni asara abungbi ti ala nde nde, ambeni ye alingbi ti sara si agroupe ni kue asara bungbi place oko. Na tapande, na yâ ti yenga, tongana gï mbeni kete wungo ti awafango tënë la ayeke sigi na fango tënë, a lingbi ti duti nzoni ti bungbi agroupe ni kue place oko na yâ ti Da ti Royaume wala na mbeni ndo nde so alingbi. Tongana a sara tongaso, wafango tënë oko oko ayeke wara mbeni zo ti tene lo na lo afa tënë. Congrégation ni alingbi nga ti soro ti tene na alango ti matanga ti dunia so, agroupe ni kue abungbi terê na Da ti Royaume. Congrégation ni alingbi nga ti soro ti tene agroupe ni kue asara bungbi ti fango tënë place oko na peko ti Mandango Tour ti Ba Ndo.

²¹ Tongana agroupe ni asara abungbi ti ala na ando nde nde, asurveillant ti groupe ni la ayeke mû li ni na abungbi ti fango tënë ni. Ngoi na ngoi, mbeni surveillant ti groupe alingbi ti hunda na adjoint ti lo wala na mbeni ita-koli so ayeke na anzoni sarango ye ti mû li ni na bungbi ni so. Ita so amû li ni ayeke leke terê ti lo ti tene ala sara lisoro na ndö ti mbeni ye so alingbi ti mû maboko na ala na fango tënë. A yeke kangbi yâ ti azo ni ti tene ala gue na fango tënë, nga mbeni ita oko na popo ti ala ayeke sambela. Aita ni ayeke gue hio na yâ ti territoire. Abungbi ti fango tënë ni ayeke ninga penze-ngbonga oku ti si na mbasambala. Me tongana a sara bungbi ni na peko ti bungbi ti congrégation, a yeke nzoni a sara ni gï nduru. A lingbi abungbi ni akpengba azo so aga nga afa na ala ye so a lingbi ala sara tongana ala gue ti fa tënë. Afini wafango tënë wala ala so ayeke na bezoin ti mungo maboko alingbi ti sigi na terê ti awafango tënë so ayeke na anzoni kode, tongaso si a mû maboko na ala.

AYE SO A LEKE NDALI TI ABUNGBI SO A SARA NA YÂ TI AFINI CONGRÉGATION WALA AKETE NI

²² Tongana wungo ti adisciple ayeke gue na li ni, acongrégation nga kue ayeke ga gbani. Mingi ni, a yeke surveillant ti circonscription la ayeke tokua demande ti sigingo na mbeni fini congrégation. Ye oko, na ambeni ngoi, akete groupe alingbi ti bâ so a yeke duti nzoni mingi tongana ala bungbi oko na mbeni congrégation so ayeke nduru mingi na ala.

²³ Na ambeni ngoi, a lingbi ti si so gï aita-wali la ayeke na yâ ti ambeni kete congrégation. Tongana a yeke tongaso, ita-wali so ayeke sambela na gbele congrégation wala so ayeke mû li ni na abungbi ni ayeke kanga ye na li ti lo, a lingbi na ye so Bible ahunda (1 aCor. 11:3-16). Mingi ni, ita-wali ni ayeke duti dutingo na lo yeke bâ ndo na mbage ti azo so aga. Aita-wali ayeke mû adiskur pëpe na ngoi ti abungbi. Me ala yeke diko ambeti so bungbi ti Jéhovah asigi na ni nga ala yeke sara tënë na ndö ni, wala ti sara ni na ambeni lege nde, ala lingbi ti sara ni na lege ti lisoro wala démonstration. Filiale ayeke soro mbeni ita-wali ni oko ti bâ lege ti aye na popo ti filiale na congrégation ni na ti mû li ni na abungbi. A si na mbeni ngoi, tongana a wara aita-koli so alingbi ti sara ni, ala la ayeke sara akua ni.

AKOTA BUNGBI TI LANGO OKO

²⁴ Ngu oko oko, a leke ti tene acongrégation so ayeke na yâ ti mbeni circonscription oko asara akota bungbi ti lango oko, na ala yeke sara ni fani use na yâ ti ngu oko. Angoi ni so ayeke angoi ti ngia, na a mû lege na azo kue so aga ti sara si “ndoye so ayeke na bê ti [ala] amaï.” (2 aCor. 6:11-13). Bungbi ti Jéhovah ayeke leke akota mama-tene ti akota bungbi so nga na ambage nde nde ti akapa ni alingbi na mbilimbili bezoin ti aita. Ti fa aye ni, a yeke mû adiskur, a yeke sara adémonstration, a yeke haka peko ti aye so asi, a yeke sara adémonstration so na yâ ni gï mbeni zo oko la ayeke sara tënë nga a yeke hunda atënë na azo. Awango tongaso, so a mû tâ na ngoi ni, ayeke kpengba azo kue so aga. Akota bungbi so azi lege na afini disciple ti wara batême, ti fa so ala mû terê ti ala na Jéhovah awe.

AKOTA BUNGBI TI LANGO OTA

²⁵ Fani oko na yâ ti ngu oko, a yeke sara ambeni kota bungbi so azo ayeke gue dä mingi. Mingi ni, a yeke akota bungbi ti lango ota, a yeke bungbi acongrégation ti gbâ ti acirconscription. Afiliale so ayeke kete alingbi ti bâ so a yeke nzoni ti tene acongrégation kue, so ayeke na yâ ti territoire so ayeke na gbe ti afiliale ni, asara kota bungbi ni so na ndo oko. Na yâ ti ambeni kodro, lege so a yeke leke na akota bungbi ni alingbi ti duti nde na ti ambeni alingbi na kodro oko oko wala alingbi na ye so bungbi ti Jéhovah afa. Ngoi na ngoi, na yâ ti ambeni kodro, a yeke sara a-assemblée internationale wala akota bungbi so ayeke nde, aTémoin saki mingi mingi ti akodro nde nde alingbi ti gue dä. Teti angu mingi, azo mingi amä tënë ti nzoni tënë ti Royaume grâce na publicité ti akota bungbi ti aTémoin ti Jéhovah so.

²⁶ Ti awakua ti Jéhovah so amû terê ti ala na lo, akota bungbi so ayeke mbeni ngoi ti kota ngia so asara si ala voro Jéhovah beoko. A yeke sara si ala kiri amä yâ ti tâ tënë nzoni mingi. Na ngoi ti ambeni kota bungbi ni, a yeke sigi na afini mbeti ndali ti mandango ye zo wani, ti mandango ye na congrégation, wala ti sara na kua na fango tënë. Azo ayeke wara nga batême na ngoi ti akota bungbi ni. Akota bungbi ayeke sara si e maï na lege ti yingo. Akota bungbi so afa na gigi so biani awakua ti Jéhovah ayeke na yâ ti mbeni sewa ti aita so ayeke na ndö ti sese kue so amû terê ti ala na Nzapa awe, so asarango ye ti ala afa so ala yeke adisciple ti Jésus Christ.—Jean 13:35.

²⁷ E yeke wara ngangu ti sara ye so Jéhovah aye tongana e gue na abungbi ti congrégation nga na akota bungbi so awakua ti Jéhovah ayeke sara ka. A yeke bata nga e si asioni ye ti yâ ti dunia so abuba mabe ti e ti Chrétien ape. Mara ti abungbi so ayeke mû gloire na Jéhovah nga ayeke mû gonda na lo (Ps. 35:18; aProv. 14:28). E lingbi ti kiri singila so Jéhovah aleke mara ti angoi so ti mû lege na awakua ti lo so amû terê ti ala na lo awe ti wara dengo bê na lege ti yingo na ngoi ti nda ni so.

KOBE TI SEIGNEUR

²⁸ Ngu oko oko, a si na lango so Jésus Christ akui na ni, acongrégation ti aTémoin ti Jéhovah na yâ ti dunia kue ayeke bungbi ti sara Dango bê na kuâ ti Christ, wala Kobe ti Seigneur (1 aCor. 11:20, 23, 24). Ti awakua ti Jéhovah, bungbi so ayeke kota ahon tanga ti abungbi kue so ala yeke sara na yâ ti ngu oko oko. A hunda mbilimbili na e kue ti sara Dango bê na kuâ ti Christ so.—Luc 22:19.

²⁹ Lango ti Mémorial ayeke tï ka na lango ti Pâque so a sara tënë ni na yâ ti Bible, a yeke ye so afa ni na yâ ti Mbeti ti Nzapa (Ex. 12:2, 6; Mat. 26:17, 20, 26). Pâque ayeke lani matanga ti dango bê na sigingo ti azo ti Israël na Égypte na ngu 1513 kozo na ngoi ti e. Na ngoi ni so, Jéhovah azia lango 14 ti kozo nze ti calendrier ti ala tongana lango so a lingbi ala te molenge ti taba ti Pâque na ti tene ala sigi na gbe ti ngbâa na Égypte (Ex. 12:1-51). a Jérusalem a yeke hinga lango ti Mémorial ni na dikongo alango 13 na peko ti kozo sigingo ti fini nze na popo ti hunzingo ti nze ti mars ti si na tongo nda ti nze ti avril. Mingi ni, lango ti Mémorial ayeke tï na kozo lango so nze ni ayeke sigi kue na lê ti nduzu.

³⁰ Matthieu 26:26-28 afa peko ti tënë ti yanga ti Jésus wani na ndö ti lege so a lingbi a sara na Mémorial. A yeke pëpe mbeni matanga so a hunda ti sara mbeni ye so ahon gbungo li ti zo na ngoi ni; me a yeke mbeni kobe, so ayeke mbeni fä, so ala so a soro ala ti ga ahéritier legeoko na Jésus Christ na yâ ti Royaume ti yayu ayeke te ni (Luc 22:28-30). A wa tanga ti aChrétien kue nga na ala so asara nzara ti tâ tënë ti ga na Dango bê na kuâ ti Christ ni, me ala yeke ga ti bâ gï ni bango. Gango ti ala ayeke fa so ala bâ na nene ni ye so Jéhovah Nzapa aleke, na lege ti Molenge ti lo Jésus Christ, ti ga na ye ti nzoni na azo kue. Alango kete kozo na Mémorial ni, a yeke mû mbeni diskur so ayeke nde ti zia nzara ti Mémorial nga na ti mandango Bible na yâ ti azo.

³¹ A-Témoin ti Jéhovah ayeke ku ka kungo na ngia angoi ti abungbi ti ala, teti so a yeke na ngoi ni so la si ala yeke “bi lê na ndö ti mba ti pusu mba ti duti na ndoye na ti sara anzoni kusala”. (aHéb. 10:24). Ngbâa be-ta-zo so ayeke sara ye na ndara ayeke nduru ti leke abungbi tongaso ti lingbi na abezoin ti e na lege ti yingo. A wa awakua ti Jéhovah kue nga na azo so asara nzara ti tâ tënë ti sara kue ti bâ nzoni na lege ti aye so a leke ti tene e sara abungbi lakue. Tongana awakua ti Nzapa afa so ala bâ na nene ni mingi aye so Jéhovah aleke na lege ti bungbi ti lo, ala yeke ngbâ beoko. Kota ye ni kue ayeke so, e yeke mû gonda na Jéhovah nga e yeke mû gloire na lo.—Ps. 111:1.