E yeke na ngia ti tisa mo

PEUT-ÊTRE mo hon na tere ti Da ti Royaume ti aTémoin ti Jéhovah ti ndo so mo yeke dä, na mo hunda tere ti mo ti hinga ye so ala yeke sara kâ. Mo hinga so azo kue alingbi ti gue na abungbi ti ala so ala yeke sara ni yenga na yenga? Ala yeke yamba na ngia azo so aga na abungbi ti ala.

Ye oko, mo lingbi ti hunda tere ti mo na ambeni tënë. Ngbanga ti nyen aTémoin ti Jéhovah ayeke sara bungbi? Nyen la ala yeke sara na ngoi ni so? Nga, nyen la azo so aga na so ayeke aTémoin ti Jéhovah pëpe atene na ndo ti abungbi so?

“I bungbi azo kue”

Ngbene ye na ngoi ti giriri, azo ayeke bungbi oko ti voro Nzapa na ti manda ye na ndo ti lo. A sara ngu 3 500 tongaso awe, Nzapa atene na azo ti Israël: “I bungbi azo kue, akoli, awali, amolenge, na awande so ayeke na kodoro ti i, si ala mä tënë so, ala manda, ala kpe mbeto ti L’Éternel Nzapa ti i, na ala bata na ala sara na lege ti tënë kue ti Ndia so.” (Deutéronome 31:12). Tongaso, na Israël, a fa lani na amaseka nga na akota zo ti voro Jéhovah Nzapa na ti mä yanga ti lo.

Ngu 1 500 tongaso na pekoni, na ngoi so congrégation ti aChrétien abâ gigi, azo angbâ lani ti bâ so abungbi ayeke kpengba ye na yâ ti tâ vorongo. Bazengele Paul atene: “Zia e bi lê na ndo ti mba ti pusu mba ti duti na ndoye na ti sara apendere kusala, e kpe bungbi ti e pëpe, tongana ti so ambeni zo ayeke sara ka, me e wa tere na popo ti e.” (aHébreu 10:24, 25). Legeoko tongana ti so songo ti azo ti sewa ayeke kpengba mingi tongana ala mû ngoi ti duti ndo oko, songo ti azo so aye ti sara na Nzapa ayeke kpengba mingi tongana ala yeke bungbi oko ti voro lo.

Ti gue oko na ati ândö so Bible afa, aTémoin ti Jéhovah ayeke bungbi fani use yenga na yenga na yâ ti aDa ti Royaume ti ala. Abungbi so amû maboko na azo so aga dä ti bâ na nene ni akpengba-ndia ti Bible, ti gbu nda ni nga ti sara ye alingbi na ni. Na ndo kue so lege ayeke dä ti sara ni, kapa ti mandango ye so ayeke gi oko, na nda ti abungbi oko oko kue ayeke dä. Kozo na abungbi ni nga na hunzingo ni, azo so aga ayeke ‘kpengba tere na popo ti ala’ na lege ti anzoni lisoro (aRomain 1:12). Bungbi oko oko kue ayeke tambela tongana nyen?

Kota diskur

Kozo bungbi so mingi ti azo ayeke gue dä ayeke diskur so azi nda ti Bible, so a leke ni ndali ti azo kue, so mingi ni a yeke sara ni na nda-yenga. Jésus Christ ayeke mû lani adiskur. Mbeni oko ti adiskur so ayeke Fango ye na ndo ti hoto, so azo mingi ahinga ni (Matthieu 5:1; 7:28, 29). Bazengele Paul asara tënë lani na azo ti Athènes (Kusala 17:22-34). Tongana ti Jésus na Paul, aTémoin ti Jéhovah ayeke sara mbeni bungbi so na ngoi ni a sara mbeni diskur so a leke ni ndali ti azo kue, na so ti ambeni zo ni a yeke kozo ti ala ti ga la.

Bungbi ni ayeke to nda ni na bia so a he na yâ ti mbeti ti bia E sepela Jéhovah na abia ti e.a Azo kue so aye ti luti na ti he bia so alingbi ti sara ni. Na peko ti mbeni nduru sambela, mbeni kpengba wamungo diskur ayeke fa tënë teti penze-ngbonga 30. (Bâ encadré “Adiskur so ayeke mû maboko na azo kue.”) Diskur ti lo aluti tâ gi na ndo ti Bible. Wamungo diskur ni ayeke hunda fani mingi na azo so ayeke mä lo ti zi Bible ti ala na ti bâ akpengba versê ni na ngoi so lo yeke diko ni. Tongaso, a yeke nzoni ti tene mo ga na Bible ti mo wani wala mo lingbi ti hunda mbeni Témoin ti Jéhovah ti gi na mo Bible kozo si bungbi ato nda ni.

Mandango Tour ti Ba Ndo

Na yâ ti mingi ti acongrégation ti aTémoin ti Jéhovah, a yeke manda Tour ti Ba Ndo na peko ti diskur; mandango ye so aninga ngbonga oko; na ngoi ni, a yeke sara lisoro na ndo ti mbeni tënë ti Bible so na yâ ni a yeke hunda atënë, na azo so aga ayeke kiri tënë. Bungbi so awa azo so aga ti sara ye tongana ti azo ti Bérée ti ngoi ti Paul, so ala yeke ‘tâ nduru ti yeda na tënë ni na ngoi so ala wara ni, na ala yeke gi nda ti Mbeti ti Nzapa nzoni’.​—Kusala 17:11.

Mandango Tour ti Ba Ndo ni ato nda ni na bia. Atënë so zo so amû li ni ayeke sara lisoro na ndo ni nga na ahundango tënë ni ayeke na yâ ti Tour ti Ba Ndo ni. Mbeni Témoin ti Jéhovah alingbi ti mû na mo Tour ti Ba Ndo ni. Ambeni article so e manda ade ti ninga pëpe ayeke so: “Ababâ na amama, ala fa ye na amolenge ti ala na ndoye,” “I kiri sioni pëpe na zo so asara sioni na i” nga “Nda ni so apasi kue aga nduru ti hunzi.” Atâa so a yeke manda ye so na lege ti hundango tënë na kiringo tënë, azo so aye alingbi ti sara acommentaire, na mingi ni azo so ayeke sara ni ayeke ala so adiko article ni na aversê ti yâ ni na ala gbu li ti ala kozoni awe na ndo ni. Bungbi ni ayeke hunzi na bia na sambela.​—Matthieu 26:30; aÉphésien 5:19.

Mandango Bible ti Congrégation

Lakui oko na yâ ti yenga oko oko, aTémoin ti Jéhovah ayeke kiri ti bungbi na Da ti Royaume ti ala ti sara mbeni bungbi so ayeke na ambage ota, na so aninga ngbonga 1 na penze-ngbonga 45. Kozo mbage ti bungbi ni ayeke Mandango Bible ti Congrégation, so aninga penze-ngbonga 25. A yeke mû maboko na azo so aga ti hinga ye mingi na ndo ti Bible, ti leke bibe ti ala nga na bango ndo ti ala nga ti ga anzoni disciple ti Christ ahon ti kozo (2 Timothée 3:16, 17). Legeoko tongana ti Mandango Tour ti Ba Ndo, a yeke sara bungbi so na lege ti hundango tënë na kiringo tënë na ndo ti mbeni tënë ti Bible. Azo so aye alingbi ti sara acommentaire. A yeke manda ye ni na yâ ti mbeni buku wala mbeni brochure so aTémoin ti Jéhovah asigigi na ni.

Ngbanga ti nyen a yeke sara kua na ambeti so azi nda ti Bible na ngoi ti bungbi so? Ândö giriri, gi dikongo Mbeti ti Nzapa alingbi pëpe. “[A] fa nda ni si azo ahinga nda ti ye so a diko na ala.” (Néhémie 8:8). Na yâ ti ngu so ahon, abuku so azi nda ti mbeti ti Ésaïe, Daniel nga na Apocalypse amû maboko na azo so aga na bungbi so ti gbu nda ti ambeti so.

Ekole ti Kusala ti aChrétien

Na peko ti Mandango Bible ti Congrégation, a yeke sara Ekole ti Kusala ti aChrétien. Mbage so ayeke ninga penze-ngbonga 30 na ayeke mû maboko na aChrétien ti maï “kode ti fa ye na zo.” (2 Timothée 4:2). Na tapande, a si na mo so molenge ti mo wala kamarade ti mo ahunda tënë na mo na ndo ti Nzapa wala na ndo ti Bible na mo bâ so a yeke ngangu ti kiri tënë na lo? Ekole ti Kusala ti aChrétien alingbi ti fa na mo tongana nyen ti sara kusala na Bible ti kiri tënë nzoni na ahundango tënë so akpengba. Tongaso, e lingbi ti sara ye ague oko na atënë ti prophète Ésaïe so atene: “Seigneur L’Éternel amû na Mbi yanga so ahinga ti sara tënë, si Mbi lingbi hinga lege ti sara tënë nzoni na zo so anze.”​—Ésaïe 50:4.

Ekole ti Kusala ti aChrétien ato nda ni na mbeni diskur so aluti na ndo ti mbage ti Bible so a wa azo ti diko ni na yâ ti yenga ni. Na pekoni, zo ti mungo diskur ni atisa azo so aga ti sara anduru commentaire na ndo ti aye ti nzoni so ala wara na yâ ti achapitre ti Bible so ala diko ni. Na peko ti lisoro ni, azo so azia iri ti ala na Ekole ni ayeke sara adevoir so a mû na ala.

A yeke hunda na a-élève ni ti diko mbage ti Bible na ndo ti estrade wala ti fa tongana nyen ti fa na zo mbeni ye so Bible afa. Na peko ti devoir oko oko kue, mbeni wamungo wango so ahinga kusala ti lo ayeke gonda élève ni; awango ti lo aluti na ndo ti atënë ti yâ ti buku Wara nzoni na lege ti Ekole ti Kusala ti aChrétien. Na pekoni, na lingo, lo lingbi ti mû na élève ni ambeni wango na ndo ti aye so élève ni alingbi ti sara ti maï.

A yeke sara adevoir ti mbage so hio na peko ti tere. A leke ni ti mû maboko na élève ni nga na azo kue so aga, so aye ti maï kode ti dikongo ye ti ala, ti sarango tënë ti ala nga na ti fango ye ti ala. Na peko ti Ekole ti Kusala ti aChrétien, a yeke he mbeni bia so atënë ti yâ ni aluti na ndo ti mbeni versê ti Bible, ti gue na Bungbi ti Kusala.

Bungbi ti Kusala

Ndangba mbage ti bungbi ni ayeke Bungbi ti Kusala. Na lege ti adiskur, adémonstration, atënë so a hunda na mbeni ita nga na lisoro na azo, azo so aga ayeke manda tongana nyen ti fa aye so Bible afa biani. Kozo ti tene Jésus atokua lani adisciple ti lo ti fa tënë, lo bungbi ala na lo fa na ala anzene nzene ye so a lingbi ala sara (Luc 10:1-16). Na pekoni so lo leke ala nzoni awe ti fa tënë, ala wara aye ti nzoni mingi na fango tënë. Na nda ni, adisciple ti Jésus afa na lo peko ti aye so ala wara (Luc 10:17). Fani mingi, adisciple ni afa na amba ti ala peko ti aye so ala wara.​—Kusala 4:23; 15:4.

Bungbi ti Kusala aninga penze-ngbonga 35. A yeke wara kapa ni na yâ ti mbeti-sango, Kusala ti Royaume so asigigi nze na nze. Ambeni li ti tënë so asigigi dä ade ti ninga pëpe ayeke so: “Vorongo Jéhovah na sewa,” “Nda ni so e yeke kiri fani mingi” nga “Mû tapande ti Christ na yâ fango tënë ti mo.” Mbage so ayeke hunzi na bia, na a yeke hunda na mbeni membre ti congrégation ti sara sambela ti nda ni.

Ye so azo so aga atene

Azo ti congrégation ayeke yamba nzoni mingi azo so aga. Na tapande, André ayeke mä lani asioni tënë mingi na ndo ti aTémoin ti Jéhovah. Me na ngoi so lo ga ti kozo ni na bungbi, bê ti lo apika ti bâ so a yamba lo na ngia. André atene: “A nzere na mbi mingi ti duti kâ. Bê ti mbi apika ti bâ so azo ni ayeke yamba zo na ngia na ala bi bê ti ala na mbi mingi.” Ashel, mbeni maseka-wali ti kodoro ti Canada atene nga oko tënë so: “Bungbi ni anzere mingi! A yeke ngangu pëpe ti tene zo agbu nda ti ye so a yeke fa.”

José ayeke na kodoro ti Brésil. Na ndo so lo yeke dä, a hinga lo tongana zo ti gingo yanga. Atâa so kue, a tisa lo ti ga na bungbi na Da ti Royaume. Lo tene: “Azo so ayeke na Da ti Royaume ni ayamba mbi na ngia, atâa so ala hinga so sarango ye ti mbi ayeke nzoni pëpe.” Atsushi, so alango na Japon adabe ti lo, na lo tene: “Ti tâ tënë ni, na ngoi so mbi gue ti kozo ni na bungbi ti aTémoin ti Jéhovah, mbi bâ so mbi yeke ti mbi nde na ala. Atâa so kue, na pekoni mbi bâ so ala yeke tongana tanga ti azo kue. Ala sara kue si mbi yapu.”

E yeke na ngia ti yamba mo

Tongana ti so atënë so azo atene ge afa, guengo na abungbi na Da ti Royaume alingbi ti ga na mo aye ti nzoni. Mo yeke manda ande ye na ndo ti Nzapa; nga na lege ti ye so a yeke fa kâ na ndo ti Bible, Jéhovah Nzapa ayeke fa ande na mo ye so mo lingbi ti sara si mo “ga nzoni”.​—Ésaïe 48:17.

A hunda pëpe ti futa mbeni ye si zo ague na abungbi ti aTémoin ti Jéhovah, nga a yeke hon pëpe na sembe ti bingo nginza na popo ti azo. Mo ye ti gue na bungbi na Da ti Royaume ti ndo so mo yeke dä? E yeke na ngia ti tisa mo ti sara ni.

[Kete tënë na gbe ni]

[Encadré na lembeti 30]

Adiskur so ayeke mû maboko na azo kue

A soro adiskur so na yâ ti ali ti tënë nde nde so alondo na Bible na so wungo ni ahon 170. Na popo ni a yeke wara ali ti tënë tongana:

◼ Lege so azo abâ gigi: Tënë ni agbu bê ti mo?

◼ Bango ndo ti Nzapa na ndo mariage nga na bungbingo koli na wali

◼ Nzapa ayeke futi azo so ayeke futi sese

◼ Tongana nyen ti hon ndo ti agingo bê?

◼ Gigi ti e ayeke gi so awe?

[Foto na lembeti 30]

Kota diskur

[Foto na lembeti 30]

Mandango “Tour ti Ba Ndo”

[Afoto na lembeti 31]

Mandango Bible ti Congrégation

[Foto na lembeti 31]

Ekole ti Kusala ti aChrétien

[Foto na lembeti 32]

Bungbi ti Kusala