Atënë so azo ahunda

Tongana ti so 1 Samuel 19:12, 13 afa, ngbanga ti nyen David, wakua be-ta-zo ti Jéhovah, azia lege na wali ti lo Mical ti duti na mbeni yanda ti da?

Kozoni, zia e bâ hio aye so angoro tënë so. Tongana wali ti David amä so Gbia Saül aleke tënë na lingo ti fâ David, lo sala ye fade fade. Bible atene: “Mical asala si David azu na fenêtre, lo sigigi, lo kpe, lo hon biani. Mical akamata mbeni yanda ti da [so akpa mbeni koli], na lo zia yanda ni na ndo ti tange, lo kanga li ni na bongo ti kuä ti [tele ti] ngasa, na lo kanga tele ni na bongo.” Tongana awatokua ti Saül aga ti gbu David, Mical atene na ala: “Lo yeke na kobela.” Kode so asala si mbage ti ngoi so a mû ti gi na David ahon, na tongaso David awara lege ti kpe.​—1 Samuel 19:11-16.

Ambeni gingo ye na gbe ti sese afa so na ngoi ti giriri, a yeke bata yanda ti da gi pëpe ti sala kua na ni na yâ vorongo, me nga ti leke ambeni tënë na lege ti ndia. Ândö, ayanda ti da ayeke legeoko tongana mbeni mbeti ti terrain wala mbeti so mbeni zo asû ti fa mbilimbili zo so ayeke wara ye na peko ti kuâ ti lo. A bâ so na yâ ti ambeni ye, ti duti na mbeni yanda ti da alingbi ti mû lege na mbeni koli ti wara akungba ti babâ ti wali ti lo tongana lo kui. Ye so alingbi ti fa ngbanga ti nyen, na mbeni ngoi kozoni, Rachel amû ayanda ti da ti babâ ti lo, nga ngbanga ti nyen babâ ti lo aye mingi ti wara ayanda ti da so. Na yâ tapande so, Jacob, koli ti Rachel, ahinga ye so wali ti lo asala pëpe.​—Genèse 31:14-34.

Tongana azo ti Israël aga mbeni mara awe, ala wara aKomandema Bale-oko, so use komandema ni ake lekengo ayanda na kuru go (Exode 20:4, 5). Na pekoni, prophète Samuel aye ti sala tënë ti ndia so tongana lo tene na Gbia Saül: “Kengo tënë ayeke sioni legeoko tongana gingo bendo, na kpengba-li ayeke legeoko tongana siokpari na sambelango ayanda.” (1 Samuel 15:23). Ndali ni, a lingbi ti tene so na Israël, yanda ti da ayeke pëpe mbeni ye so amû lege ti hinga na zo so ayeke wara aye ti peko ti mbeni zo tongana lo kui. Ye oko, a lingbi ti tene so ngbele ngobo ti salango ye ti aJuif so angbâ lani na yâ ti ambeni sewa ti azo ti Israël (aJuge 17:5, 6; 2 aGbia 23:24). So Mical abata lani mbeni yanda ti da na popo ti akungba ti lo afa so lo mû bê ti lo kue pëpe na Jéhovah. Peut-être David ahinga ye oko pëpe na ndo yanda ti da so wala lo kanga lê na ndo ni ndali ti so Mical ayeke molenge ti Gbia Saül.

Bibe ti David na ndo mungo tele kue na Jéhovah asigigi na yâ atënë so: “L’Eternel ayeke kota, na a lingbi azo asepela Lo mingi, a lingbi azo akpe mbito ti Lo ahon anzapa kue. Anzapa kue ti azo ayeke ayanda senge, me L’Eternel asala ayayu.”​—1 Chronique 16:25, 26.

[Foto na lembeti 29]

Use komandema ti aKomandema Bale-oko ake na kuru go lekengo mara ti yanda ti da so

[Lingu ti foto ni]

Foto ti buku The Holy Land, Vol. II, 1859