Ye ti manda na ndo fandara na tâ be-ti-molenge
MBENI ye so asi giriri na yâ ti fini ti Gbia David afa polele kangbi so ayeke na popo ti tâ be-ti-molenge na fandara. Ye ni asi na peko ti so David amû Jérusalem na lo sara si a ga kota gbata ti lo. David abâ lani Jéhovah tongana tâ Gbia ti Israël. Teti so na ngoi ni kâ, a leke Arche ti Nzapa ti dabe ti azo ni so Nzapa ayeke na popo ti ala, David aleke ye si a ga na Arche ni na yâ ti gbata ni. Gango na Arche ni ayeke kota ye mingi na lê ti David si lo fa ngia ti bê ti lo na gbele azo kue na ngoi so lo yeke mû peko ti aprêtre so ayô Arche ni. Azo ti Jérusalem abâ gbia ti ala ‘asara ngia’ na ‘adodo na ngangu ti lo kue’.—1 Chronique 15:15, 16, 29; 2 Samuel 6:11-16.
Ye oko, Mical, wali ti David, amû mbage ti lo na kota ngia so pëpe. Lo bâ ndo na fenêtre na lo bâ David so ayeke gonda Jéhovah, me ye so David asara ti gonda Jéhovah anzere na lo pëpe na Mical “ake lo na bê ti lo.” (2 Samuel 6:16). Ndani nyen si Mical asara ye tongaso? Âmanke so lo yeke molenge ti Saül, kozo gbia ti Israël, nga fadeso lo yeke wali ti use gbia ni asara si Mical ane tere ti lo ahon ndo ni. Peut-être lo bâ so a yeke na lege ni pëpe ti tene koli ti lo so ayeke gbia afa ngia ti bê ti lo tongana ti asenge zo. Tënë so lo tene na David na ngoi so lo kiri na yanga-da afa tongana nyen Mical ayeke lani na bibe ti fandara. Lo he David, lo tene: “Laso gbia ti Israël ayeke na gloire mingi! na lê ti aboi-wali ti aboi ti lo, lo tambela senge legeoko tongana zo senge [‘buba zo’, Tene ti Nzapa, Kozo Mbouki] so atambela na tere senge.”—2 Samuel 6:20.
Na mango tënë so, David asara nyen? David asuku na Mical na lo tene na lo so Jéhovah ake babâ ti lo Saül awe na Lo ye ni. Nga lo kiri lo tene: “Fade mbi ga sioni ahon so, fade mbi ga senge na lê ti mbi mveni; me aboi-wali so mo sara tënë ti ala, fade ala yekia mbi.”—2 Samuel 6:21, 22.
Biani, David aye ti ngbâ ti sara na Jéhovah na tâ be-ti-molenge. Bibe ti David so amû lege na e ti hinga nda ni so Jéhovah atene lo yeke “zo so bê ti [Ni] aye lo”. (Kusala 13:22; 1 Samuel 13:14). Ti tâ tënë ni, David amû gi pendere tapande ti zo so ayeke na tâ be-ti-molenge ahon azo kue, so ayeke Jéhovah Nzapa. Mbeni ye so a yeke nzoni ti bâ ayeke so tongana David atene na Mical “fade mbi ga senge na lê ti mbi mveni”, lo sara kusala na mbeni tënë ti yanga ti Hébreu so a yeke mû ni ti fa lege so Nzapa ayeke bâ na azo. Atâa so Jéhovah ayeke kota ahon azo kue ti dunia, Psaume 113:6, 7 afa lo tongana zo so ‘azia lê ti Lo [wala azia kota ndo ti lo na ngoi so lo yeke sara ye na mbage ti mbeni senge zo] ti bâ ye so ayeke na yayu na ye so ayeke na sese. Lo yä wanzinga so ayeke na yâ pupu-sese, na zo so ye amanke lo mingi, na lo yeke na ndo ti koga, Lo yä lo.’
Teti so Jéhovah ayeke na tâ be-ti-molenge, a yeke na lege ni so lo ke azo so ‘lê ti ala abâ ndo na fandara’. (aProverbe 6:16, 17). Ndali ti so Mical asara ye na fandara nga lo ne pëpe gbia so Nzapa asoro, lo wara pasa pëpe ti dü molenge na David. Lo kui sân molenge. Ye so asi na lo so afa na e mbeni kota ye. A lingbi azo kue so aye ti wara nzobe ti Nzapa amä wango so: “I yü tâ be-ti-molenge na popo ti i tongana bongo, teti Nzapa ake azo ti kpengba-li [“azo ti baba”, Fini Mbuki 2001], me Lo mû grâce na azo so ayeke na tâ be-ti-molenge.”—1 Pierre 5:5.