Mo dabe mo na ni?

Dikongo anuméro ti Tour ti Ba Ndo so asigigi ade ti ninga pëpe anzere na mo mingi? Tongaso, bâ wala mo lingbi ti kiri tënë na ahundango tënë so ge:

• Biblia Polyglotta Compluti ayeke lani nyen, na ngbanga ti nyen a yeke mbeni kpengba ye?

A yeke lani mbeni Bible so a sû ni na ayanga nde nde, na so a pete ni na masini. A sala ni na acolonne nde nde ti tene a yôro na yâ ni ambilimbili tënë ti yanga ti Hébreu, Grec na Latin nga na ambeni mbage ti yanga ti Araméen. Bible so a sû ni na ayanga nde nde so ayeke mbeni kozo kapa so a mû ni ti tene a sigigi na atënë ti yanga ti Hébreu tâ na lege ni.​—15/4, lembeti 28-31.

• Na lege wa e lingbi ti zia ngia na bê ti Nzapa?

Teti so lo yeke tâ zo so ayeke na fini, Jéhovah ayeke na ngangu ti gbu li na ti sala ye. Lo yeke “Nzapa so ayeke na ngia” na lo yeke wara ngia ti sala si ye so lo leke na bê ti lo ti sala aga tâ tënë (1 Timothée 1:11, NW; Psaume 104:31). Tongana e gi ti hinga tâ nzoni mingi abibe ti Nzapa, fade na oko ngoi ni e yeke hinga nga tâ nzoni mingi ye so e lingbi ti sala ti zia ngia na bê ti Lo.​—15/5, lembeti 4-7.

• Ngbanga ti nyen David azia lani lege na wali ti lo Mical ti duti na yanda ti da?

Tongana Gbia Saül aleke tënë na lingo ti fâ David, Mical amû maboko lani na lo ti kpe. Lo mû mbeni yanda ti da, so peut-être akpa mbeni koli, lo zia yanda ni na ndo ti tange na lo kanga tele ni na bongo. So Mical abata lani mbeni yanda ti da na popo ti akungba ti lo afa so peut-être lo mû bê ti lo kue pëpe na Nzapa. Peut-être David ahinga ye oko pëpe na ndo yanda ti da so wala lo kanga lê na ndo ni ndali ti so Mical ayeke molenge ti Gbia Saül (1 Chronique 16:25, 26).​—1/6, lembeti 29.

• Ndia ti Nzapa so a mû na ndo mênë agboto lê lani na ndo ti tâ tënë wa?

Na lege ti tënë so lo tene ni lani na peko ti Kota Moa, na so lo tene ni na yâ Ndia ti Moïse nga na ndia so a wara ni na yâ buku ti Kusala 15:28, 29, Nzapa agboto lê na ndo sandaga so andu tënë ti mênë ti Jésus so ayeke yuru. A yeke gi na lege ti mênë so si a lingbi ti pardone siokpari ti e na ti tene e duti na siriri na Nzapa (aColossien 1:20).​—15/6, lembeti 14-19.

• Bible afa so Jésus asala lani amiracle oke?

Tondo ti aÉvangile asala tënë ti amiracle 35 so Jésus asala ni. Me, a fa pëpe tâ wungo ti amiracle kue so Jésus asala ni, so na popo ni a yeke wara ambeni miracle so lo sala me so a fa tënë ni na gigi pëpe (Matthieu 14:14).​—15/7, lembeti 5.