E Fa Iri ti Jéhovah na Akusala ti Lo

¹ “I mu merci na L’Eternel; i di iri ti Lo. Fa tene ti kusala ti Lo na popo ti azo. . . . Zia bê ti ala so agi L’Eternel aduti na ngia.” (Ps. 105:1, 3) Wasungo psaume so asû atene so awara ngia mingi ti sala tene na azo na ndo Jéhovah nga na ‘akusala’ ti lo. Akusala wa? Biani ala so andu pendere dutingo ti Nzapa tongana Gbia nga na “nzo tene ti salut so aga na lege ti lo.”​—Ps. 96:2, 3, NW; 145:11, 12.

² Na ngoi so e ga ndulu na Matanga ti Dango Bê ti ngu 2001, e yeke na anda ti ye mingi ti sala ngia na ndo akusala so Jéhovah asala teti e. Tongana nyen? Kobe ti Seigneur ayeke, na kite oko pepe, matanga ti kota ahon teti atâ Chrétien kue na yâ ngu oko oko. Mbeni ngoi nde alingbi na ni pepe tongana a ba kota ni, nda ni, wala salango ni. So ayeke ngoi teti e kue ti dabe na ye so Jéhovah nga na Jésus asala ti mu aye teti salut ti e. Kite ayeke pepe so na ngoi ti Matanga ti Dango Bê, e yeke ku tâ na lege ni ti ba so asala ye mingi ahon na yâ kusala ti fango tene, tongana e fa “nzo tene so amu salut”!

³ Fade mo yeke mu kusala ti pionnier auxiliaire? Na nze ti avril so ahon, aita-koli na aita-wali mingi ahon ti kozo amu kusala ti pionnier auxiliaire. Na ngu so, e lingbi ti sala si anze ti mars na ti avril aduti nde na lege ti kota kusala na yâ fango tene? Nze ti mars ayeke na laposo oku, na avril ayeke na layenga oku. Na lekengo ti sala kusala na anda-yenga kue, ndapelele ti si na lakui, awafango tene mingi so asala kusala ti ngoi kue aba so ala lingbi ti mu kusala ti pionnier auxiliaire. Ti wara angbonga 50 so ahunda na yâ nze ni, a lingbi mbeni pionnier auxiliaire awara angbonga 12 yenga oko oko. Ba nzoni aprogramme so amu na yâ ti encadré na lembeti 4. Fade mbeni oko ti ala alingbi na dutingo ti mo? Tongana a lingbi pepe, peut-être mo lingbi ti leke mbeni programme ti mo mveni ti mu kusala ti pionnier auxiliaire na anze ti mars na avril so.

⁴ A lingbi a-ancien ato nda ni fadeso ti mu wâ nga ti lu na yâ bê ti aita nzala teti kota kusala ti fango tene so. Na ngu so ahon, na yâ ti mbeni kongrégation so a-ancien na aserviteur ti mungo maboko ni kue amu kusala ti pionnier auxiliaire, azo 64 na popo ti awafango tene 121 amu kusala ti pionnier auxiliaire na avril! Kongrégation ni awara nga ngia ti ba awafango tene omene so ade ti mu batême pepe ti to nda ti bi rapport ti ala na mars nga na avril. Biani, mbeni ngoi ti nzoni ahon ayeke pepe teti amolenge nga na afini zo ti hunda na a-ancien wala ala lingbi kue awe ti to nda ti mu mbage ti ala na yâ kusala ti fango tene na gbele azo kue.

⁵ Ngangu mingi so e sala aga na adeba nzoni: Akongrégation so azia na gbele ala ambeni ye na asala ngangu kue ti sala ni awara adeba nzoni mingi. Na ndo so a lingbi ti sala ni, ambeni kongrégation alingbi ti bi bê mingi ti hunzi aterritoire so afa tene dä mingi pepe, na batango lê na ndo alege nde nde ti fango tene, wala na gbotongo lê na ndo fango tene na lege ti singa, so ayeke anzoni lege ti wara azo so ayeke na yanga-da pepe na azo so a yeke ngangu ti si na ala.

⁶ A lingbi kobela na gango mbakoro akanga biani lege na azo ti bi tele ti ala mingi ahon na yâ kusala? Teti azo kue pepe. Na tapande, mbeni ita-wali ti ngu 86 so ayeke na kobela ti cancer amu kusala ti pionnier auxiliaire na avril atä agere ti lo so asuku mingi. Fango tene na lege ti singa amu lege na lo ti mu mbage kue na yâ kusala ti fango tene, so na lege ni lo sepela Jéhovah mingi ahon. Ye so amu wâ mingi na lo nga na kongrégation ni.

⁷ E leke tele nzoni teti Matanga ti Dango Bê: Na ngu so, Matanga ti Dango Bê ayeke tï na lango 8 ti nze ti avril. Teti a yeke mbeni dimanche, lege alingbi ti duti dä teti azo mingi ahon ti ga. Azo alingbi ti ga mingi ahon ti kozoni tongana e sala ngangu ti (1) ga na Matanga ni e mveni nga na ti (2) tisa azo ti bungbi legeoko na e na Matanga ti Dango Bê ni. A lingbi e tisa azo wa?

⁸ Ba na yâ ambeti so mo sû na ndo kusala ti fango tene ti wara a-iri ti azo so afa na gigi nzala ti tâ tene, atä so mo kiri ti ba ala lakue pepe. Ayenga use wala ota kozoni na Matanga ti Dango Bê ni, mu ngoi ti mo ti sala vizite na azo so kue na ti mu mbeti ti tisango ala na Matanga ni. Tongana dutingo ti mo amu lege na mo ti sala ni, hunda na azo so aye ti ga ti mu ala na kutukutu.

⁹ Na yâ ti ambeni kongrégation, a yeke sala kusala pepe na ambeti kue ti tisango azo na Matanga ti Dango Bê ni. A lingbi asecrétaire ti kongrégation abata si amu ambeti ti tisango azo na Matanga ni na aita na ngoi so alingbi si awara lege ti kangbi ala kue. Peut-être mo ye ti sû wala ti pika na masini ngbonga nga ndo so a yeke sala na Matanga ni na gbe ti mbeti ti tisango azo. Wala peut-être mo yôro na tele ni mbeni kete mbeti so afa adresse ti Da ti Royaume tongana a yeke ndo so si ayeke sala ande Matanga ni dä. Tongana mbeni ye ti dango bê, mingi ni a lingbi a mu mbeti ti tisango azo na Matanga ni na maboko ti zo ni mveni.

¹⁰ Glisa pepe aita so azia ti fa tene: A yeke mbeni ye ti mungo ngia tongana mbeni wamandango Bible amu tele ti lo na Jéhovah na afa ni na lege ti batême na yâ ti ngu. Ye oko, ngu oko oko, ambeni na popo ti e azia ti bungbi na e, na ala zia lege ti fa na azo iri ti Jéhovah nga na akusala ti lo. E yeke na anzoni nda ti ye ti bi bê na ndo ni. Atä so mingi ti aita so azia ti fa tene azia lege ti tâ tene pepe, peut-être ala zia ti fa tene ndali ti suingo bê, akpale ti ala mveni, wala ambeni gingo bê ti fini. (Mat. 13:20-22) Ala so awoko na lege ti yingo ayeke na bezoin ti wara mungo maboko ti kiri na yâ ti kongrégation kozoni si bungbi ti aye ti Satan amene ala. (1 Pi. 5:8) Na ngoi ti Matanga ti Dango Bê so, e ye ti sala ngangu kue ti mu maboko na aita kue so azia ti fa tene me so dutingo ti ala angbâ nzoni ti kiri ti mu mbage ti ala na yâ fango nzo tene.

¹¹ A lingbi secrétaire ti kongrégation afa na ita so amu li ni na yâ ando ti mandango buku iri ti aita kue na yâ bungbi ti ala so azia ti fa tene. Fade Komite ti Kusala ti Kongrégation ayeke mu li ni ti leke ti sala vizite pastorale na aita kue so azia ti fa tene. Tongana a ba so mbeni zo ayeke wara nzoni tongana amanda Bible na lo mbeni, fade surveillant ti kusala ayeke leke ye ti mu maboko, na pekoni so lo ba ambeni membre ti komité ti kusala na ndo zo wa alingbi mbilimbili ti sala ni. Atä so a hunda pepe ti tene mandango ye ni aninga, ita so a soro lo ti sala ni alingbi ti diko ngbonga ni, afini vizite ni nga na mandango Bible ni.

¹² Na avril so ahon, mbeni ita-wali so afa tene da na da amu ambeti na mbeni pendere koli na lege. Koli ni afa so wali ti lo ayeke mbeni Témoin so azia ti fa tene. Lo hunda ndo so Da ti Royaume ni ayeke dä na lo tisa ita-wali ni ti sala vizite na lo nga na wali ti lo. Tongana ye ti pekoni, koli ni na wali ti lo ague na bungbi ti peko na ala yeda ti tene a manda Bible na ala.

¹³ E duti ndulu ti sala si kusala ni amaï! Wasungo psaume so atene a lingbi e fa iri ti Jéhovah nga na akusala ti lo akiri atene: “Sala bia na Lo, sala bia ti sepela Lo; sala tene ti kusala ti kpene ti Lo kue. I sala gloire na iri ti Lo ti nzoni-kue.” (Ps. 105:2, 3) Zia e fa na gigi gingo bê ti e teti kota iri ti Jéhovah nga na ‘apendere kusala’ ti lo na konongo ngangu ti e na yâ kusala ni, na salango si ngoi ti Matanga ti Dango Bê so aga kota ahon atanga ni kue!

[Encadré na lembeti 4]

Alege nde nde ti wara angbonga 12 yenga oko oko na yâ kusala ti pionnier auxiliaire

Lango Angbonga

Lundi 1 2 − −

Mardi 1 − 3 −

Mercredi 1 2 − 5

Jeudi 1 − 3 −

Vendredi 1 2 − −

Samedi 5 4 3 5

Dimanche 2 2 3 2

Ngbonga ni kue: 12 12 12 12

Mbeni oko ti aprogramme so alingbi na mo? Tongana a lingbi pepe, ngbanga ti nyen pepe ti leke programme ti mo mveni?