Fango Ye so Akpengba Pepe Ayeke Nzoni Ahon
1 Ngbanga ti nyen fani mingi awafango tene so ade pendere ayeke gboto lê ti azo so ala fa tokua ti Royaume na ala? Mbeni nda ti tene ni ayeke so tene ti ala akpengba pepe. Ambeni wafango tene alingbi ti ba so ti fa tene nzoni mingi a hunda ti duti na mbeni fango ye so a leke na kode. Ye oko, ye afa so mbeni fango ye so akpengba pepe na so ayeke polele ayeke nzoni ahon.
2 Jésus afa tene ti Royaume ti Nzapa na mbeni lege so akpengba pepe nga polele, na lo fa na adisciple ti lo ti sala tongaso. (Mat. 4:17; 10:5-7; Luc 10:1, 9) Lo sala kusala na akozo tene, ahundango tene, nga na atapande so akpengba pepe ti gboto lê ti azo so amä lo na ti ndu bê ti ala. (Jean 4:7-14) E yeke sala nzoni tongana e manda tapande ti lo nga tongana e fa aye so ayeke ngangu pepe ti gbu nda ni.
3 “Nzo tene ti royaume” ayeke tokua so e yeke fa. (Mat. 24:14, NW) Salango kusala na Royaume tongana ngbongboro tene ti mo ayeke mu ande maboko na mo ti bata si afango ye ti mo akpengba pepe. Sala tene ti aye so andu azo so amä mo. Mingi ni, tene ti sewa ti ala agbu bê ti awali mingi ahon atene ti poroso. Ye so mbeni babâ ayeke bi bê dä kozoni ayeke kusala ti lo nga na nzoni duti ti sewa ti lo. Apendere abi bê ti ala na ndo kekereke ti ala; ambakoro, na ndo nzoni seni nga na nzoni dutingo ti ala. Fani mingi, azo abi bê ti ala mingi na aye so asi na yâ kodoro ti ala ahon ye so asi na yâ akodoro so ayö. Na peko ti so mo sala lisoro awe na ndo aye so andu azo kue, gboto lê na ndo adeba nzoni so azo so amä yanga ayeke wara ande na gbe ti komandema ti Royaume ti Nzapa. Andulu tene so akpengba pepe na so a soro ni nzoni na lege ti mbeni versê alingbi ti duti nzoni lege ahon ti zingo nzala ti zo so amä mo.
4 Mo lingbi ti to nda ti mbeni lisoro tongaso:
◼ “Biani mo yeda so akobela mingi so a lingbi ti kaï ni pepe asala sana na azo. Me mo hinga so Nzapa amu zendo so fade na yâ ngoi kete lo yeke hunzi akobela nde nde kue, nga na kui?” Zia zo ni akiri tene, na pekoni diko Apocalypse 21:3, 4.
5 Na lege ti afango ye so ayeke polele na so akpengba pepe, ndu bibe na bê ti azo mingi ti territoire ti mo, na mungo maboko na ala ti manda ye na ndo Jéhovah nga na ndo beku ti wara fini ti lakue lakue.—Jean 17:3.