Zia Beku na Ngangu ti Jéhovah
1 Teti anda ti tene mingi, e yeke na bezoin ti zia beku na Jéhovah. Fango nzo tene “na sese kue so azo ayeke dä” ayeke mbeni kusala ti dongo bê. (Mat. 24:14, NW) E yeke tiri bira lakue na mitele ti e so ayeke mbilimbili-kue pepe. (aRom. 7:21-23) Na ndo ni, “e tiri . . . na [azo so ngangu ti ala ahon ngangu ti azo] so akomande bingo ti sese so.” (aEph. 6:11, 12) Biani, e yeke na bezoin ti mungo maboko. Tongana nyen e lingbi ti wara ngangu so alondo na Jéhovah?
2 Na lege ti sambela: Jéhovah ayeke ndulu ti mu yingo ti lo ti nzoni-kue so ayeke na ngangu mingi na awakua ti lo so ahunda ni. (Luc 11:13) Ziango bê atia mo na yâ kode ti mo ti fa tene da na da, na ndo lege, wala na singa? Mo yeke na mbito ti fa tene na lege kue so azi? Azo so asala nzala ti tene ni lakue pepe na yâ territoire akiri na wâ ti mo na peko? Mo yeke sala nyen, tongana a sala ngangu na ndo mo ti bele tene ti mabe wala ti zia be-biani ti mo? Zia beku na Jéhovah. Sambela ti wara ngangu.—aPhil. 4:13.
3 Na lege ti manda ye mo mveni: Legeoko tongana e yeke wara ngangu na tengo kobe ti mitele, tongaso nga e yeke wara ngangu na tengo lakue kobe ti Tene ti Nzapa na ambeni mbeti ti “ngba ti be-ta-zo na ti ndara.” (Mat. 4:4; 24:45, NW) Tongana a hunda na lo la ni ye so amu maboko na lo ti gbu ngangu na yâ angu mingi so lo sala lo oko na da ti kanga ti Chine sân Bible, Stanley Jones atene: “E lingbi gbu ngangu na yâ mabe. Tâ tene, a lingbi e manda ye kozoni. E lingbi pepe ti wara ngangu na yâ bê ti e tongana e manda ye pepe.”
4 Na lege ti guengo na bungbi: Na ngoi ti mbeni bungbi ti aChrétien ti kozo siècle, Judas na Silas ‘awa aita na tene mingi, na ala sala si ala kpengba.’ (Kus. 15:32) Legeoko nga laso, ye so e yeke mä na ngoi ti abungbi ayeke kono bê ti kiri singila ti e teti Jéhovah, a kpengba mabe ti e, na a pusu e na kusala. Abungbi asala si e yeke wara tele lakue na ‘afon e na yâ kusala teti royaume ti Nzapa,’ so aga ‘ye ti mungo maboko so akpengba e.’—aCol. 4:11.
5 E yeke na bezoin ti wara mungo maboko na yâ “ngoi ti kpale na ti ngangu” so. (2 Tim. 3:1, NW) Na ndo ala so awara ngangu so alondo na Jéhovah, e hinga biani so: “Fade ala ma na nduzu na kpangbi tongana angualo; fade ala kpe, me ala nze pepe; fade ala tambela, me ngangu ti ala awe pepe.”—Es. 40:31.