Bungbingo azo ti yanga nde nde kue
1 Tënë ti Nzapa ayeke ga tâ tënë! Azo ti “yanga nde nde kue ti amara” ayeke yeda na tâ vorongo (Zach. 8:23). Tongana nyen aTémoin ti Jéhovah ayeke mû maboko na azo ‘ti kete mara kue, azo nde nde kue, na ti yanga nde nde kue’ ti ga nzoni na gbele Jéhovah, na beku ti sö kuâ na “kota ye ti vundu”?—Apoc. 7:9, 14.
2 Bungbi ti Nzapa akiri tënë: Wabatango Bungbi asala ti tene a leke ambeti so aluti na ndo Bible na ayanga ti kodoro 380 tongaso, si azo na ndo sese kue alingbi ti hinga mbilimbili kota ti nzo tënë. Ti leke na ti sigigi na ambeti na ayanga ti kodoro mingi tongaso ayeke mbeni kota kua. A hunda ti leke gbâ ti bungbi ti awakode so alingbi ti kiri peko ti ambeti ni na ayanga nde, ti mû maboko na ala ti kiri na peko ti ambeti ti e na ayanga ti kodoro so kue, ti sigigi na ni, na ti tokua ni. Ye oko, ayeke awafango tënë ti Royaume oko oko si ayeke sala kota kua ni, ala so ayeke gue na tokua ti Bible so alingbi sö fini ti azo.
3 Yeda na kpale so alingbi ti ga na pekoni: Biani, na ando kue laso, a yeke wara kamême gbâ ti azo so ayeke tene ayanga ti kodoro nde nde. Ti fa nzo tënë na azo so, awakua ti Nzapa mingi mingi ayeke sala ngangu ti manda yanga ti Chinois, ti Russe, ti Espagnole wala ambeni yanga ti kodoro so azo ayeke tene na yâ territoire ti ala. Ambeni ayeke manda yanga ti awambongi ti Amerika wala ti France. Na Afrika, a fa nzo tënë na ayanga ti kodoro nde nde mingi. Ambeni zo so amä tënë na ndo Jéhovah lâ oko pëpe, wala so ahinga ye lâ oko pëpe na ndo Bible ayeke yeda fadeso na tâ tënë ti Mbeti ti Nzapa.—aRom. 15:21.
4 E lingbi ti sala ngangu ahon ti kozoni ti fa nzo tënë na azo ti territoire ti e, so alondo na mbeni kodoro nde? (aCol. 1:25). Akongregation mingi ayeke leke programme ti fa tënë na abungbi ti awande so ayeke na yâ ti aterritoire ti ala. Ti komanse, ambeni wafango tënë amanda mbeni yanga ti kodoro, si ala lingbi fa mbeni kete tënë tongana: “Bala ala. Mbi yeke na mbeni nzo tënë teti ala [Na pekoni, ala yeke zia mbeni tract wala brochure so ayeke dä na yanga ti kodoro ni]. Mbi zia ala awe.” Biani, Jéhovah ayeke deba nzoni na ndo mara ti kete tongo nda ti tënë tongaso!
5 Tokua ti Royaume agboto azo ti akodoro na ti ayanga ti kodoro kue. Zia e gbu lege kue so azi ti fa ni na ala.