Atënë so i hunda
◼ E lingbi ti sala nyen ti bata tâ ngbonga so a mû ti sala na abungbi ti kongregation?
Ngoi ayeke hon hio mingi tongana e yeke mû mbage na ambeni ye ti nzoni legeoko na akamarade ti e. Nda ni la, a lingbi ti duti mbeni kpale ti mû li ni na ambage ti bungbi na yâ ngoi so a mû ndali ni. Ye wa alingbi ti mû maboko na e?
To nda ni na ngbonga ni. Tongana kongregation kue abungbi na ndo oko, a yeke nzoni ti tisa azo so aga ti duti penze-ngbonga oko wala use kozoni si kapa ni ato nda ni. Ye so alingbi ti sala si bungbi ni ato nda ni na ngbonga ni nga na lege ni (Zo-ti. 3:1). Tongana a ndu abungbi so wungo ti azo ayeke mingi pëpe, na tapande abungbi ti fango tënë, a lingbi a to nda ni na ngbonga ni, ahon ti ngbâ ti ku azo so ayeke ga na peko.
Leke tele nzoni. Mbeni nzoni lege ti sala ye na yâ ngoi ni ayeke ti leke tele kozoni. Bata polele na li nda ti diskur wala devoir ti mo. Gi ti hinga angbongboro tënë ni, na gboto lê na ndo ni. Kpe ti hon yongoro na kota tënë ni na fango anzene nzene tënë kue so ayeke kota ye pëpe. Bata si atënë ti mo akpengba pëpe. Tongana adémonstration wala hundango tënë na ambeni zo ayeke na yâ mbage so a mû na mo, leke ala kozoni. Gi ti bâ ngoi ti mo tongana mo yeke manda ni na kota go.
Kangbi yâ ti atënë ni. Wala devoir ti mo ayeke mbeni diskur wala lisoro na azo so aga, a yeke duti nzoni ti kangbi yâ ti atënë ni na ambage nde nde. Fa ngoi oke mo lingbi ti mû teti mbage oko oko, na sû ni na tele ti lembeti so mo leke devoir ti mo na ndo ni. Bâ lakue ngbonga ni na ngoi so mo yeke sala devoir ti mo. Na tongo nda ti lisoro ti mo na azo so aga, kpe gbanda so ayeke ti zia lege na gbâ ti akiringo tënë na yâ kozo mbage ni, si na nda ni, mo hon na loro na ndo akota tënë so ayeke ga na peko. A lingbi azo so ayeke mû li ni na Mandango Tour ti Ba Ndo azia mbeni ngoi so alingbi ti bâ ahundango tënë ti dango bê na nda ti mandango ye ni. A lingbi nga ala sala hange si ala hon pëpe ndo ti ngoi so a mû teti bia na sambela ti nda ni.
Hunzi na ngbonga ni. Tongana mbeni bungbi ayeke na ambage mingi, na tapande Bungbi ti Kusala, a lingbi zo oko oko ahinga nzoni ngoi so lo yeke to nda ti mbage so a mû na lo nga na ngoi so lo yeke hunzi na ni. Ye wa a lingbi ti sala tongana bungbi ni ayeke gue ti hon ngoi ni? A lingbi mbeni ita oko wala ambeni ita aduti ndulu ti kiri na wungo ti ngoi ti ala na peko na gbotongo lê na ndo angbongboro tënë ni nga na zingo ambeni nzene nzene tënë so ayeke kota mingi pëpe. Ti duti na kode ti sala tongaso ayeke fä ti mbeni wafango ye so alingbi.
E kue so e ga, e lingbi ti mû maboko na ita so amû li ni na mungo atâ kiringo tënë ni na ndulu tënë. Tongaso, e kue e lingbi ti mû mbage ti e ti sala si abungbi atambela “mbilimbili na lege ni.”—1 aCor. 14:40.