Tënë teti ala so ayeke mû li ni na Bungbi ti Kusala
A to nda ni na Kusala ti Royaume so, a yeke yapu atënë ti yâ ti kapa ti Bungbi ti Kusala. Awango nga na adango bê so e yeke sara tënë na ndo ni ge ayeke zia ambeni sango na ndo ti article “Lege ti leke Bungbi ti Kusala” so asigigi na yâ ti Kusala ti Royaume ti mai 2009 nga a yeke fa tënë mbilimbili na ndo ni.
◼ Diskur: A yeke mbeni diskur so aluti na ndo ti mbeti so a fa ni awe, na azo so aga ayeke mû mbage na ni pëpe. A yeke nzoni wamungo diskur ni aluti mingi gi na ndo ti aye so ayeke mû ande maboko nzoni na congrégation.
◼ Hundango tënë na kiringo tënë: A yeke tongana ti Mandango Tour ti Ba Ndo. A to nda ni na nduru tënë na a hunzi na nduru tënë nga ahundango tënë ndali ti aparagraphe ni kue ayeke dä. A lingbi zo so amû li ni adiko tënë ahon ndo ni pëpe. Tongana ngoi ayeke dä a lingbi ti diko akota versê ti yâ ni. A lingbi a diko aparagraphe ni pëpe me gi tongana a hunda na yâ ti Kusala ti Royaume ni.
◼ Lisoro: A yeke mbeni diskur so azo so aga ayeke mû mbage dä kete. Wamungo diskur ni ayeke diko tënë gi lo oko ngbii pëpe, wala lo yeke hunda gi tënë na aita juska na nda ni pëpe.
◼ Démonstration na hundango tënë na zo: A yeke ita so ayeke sara mbage so la ayeke leke aye ndali ti démonstration ni, me a yeke nzoni lo la lo sara démonstration ni pëpe. A yeke nzoni azo so lo yeke soro ala aduti azo so alingbi nga anzoni tapande. Na tongana lege ayeke dä, lo na ala kue alingbi ti leke ni alango mingi kozo. A yeke na lege ni pëpe ti soro afini wafango tënë na awafango tënë so ayeke na kode mingi pëpe ti sara démonstration ti fa tongana nyen a lingbi zo afa tënë gi ngbanga ti tene a bâ ala na ndo ti estrade, atâa so ambeni ti ala alingbi ti duti zo so ita ni ayeke fa tënë na lo. A yeke nzoni azo ti sarango démonstration ni aturnê peko pëpe na azo so aga. Ti ala so a yeke hunda tënë na ala, a lingbi ala gue na ndo ti estrade si ala kiri tënë ahon ti tene ala ngbâ gi na place ti ala. A yeke nzoni ti tara peko ti adémonstration na ahundango tënë ni. Tongana ngoi ti bungbi ni angbâ mingi pëpe, a lingbi ita ni akiri na atënë ti lo nduru me lo zi pëpe adémonstration wala ahundango tënë ni. Kozo ti tene awakua ti mungo maboko asoro azo ti tene a sara démonstration wala ti tene a hunda tënë na ala, a lingbi ala bâ ni legeoko na coordinateur ti bungbi ti ancien wala na mbeni ancien nde.
Tongana a si so mbeni mbage ti ye so a fa na yâ ti Kusala ti Royaume ayeke nde na ati so afa ge, a lingbi a sara tâ gi tongana ti so a fa. Tongana a sara Bungbi ti Kusala tongana ti so a fa ge, aita so amû li ni ayeke sara si “ye kue atambela na lege ni nga na yâ ti wusuwusu pëpe.”—1 aCor. 14:40.