‘I ndoye Jéhovah, i abe-ta-zo ti lo kue’
A yeke sala ande matanga ti dabe na kuâ ti Jésus na lango 4 ti avril
1 A sala ngu mingi awe, tongana Ukraine ayeke lani na gbe ti komandema ti acommuniste, lê ti akota zo ti kodoro ni ayeke gi na ndo aita, mbilimbili tongana lango ti dabe na kuâ ti Jésus aga ndulu, ngbanga ti so ala yeke na beku ti hinga ande ndo ti salango bungbi ni. Lani, a yeke lakue mbeni kpale, teti akota zo ti kodoro ni ahinga lango so matanga ni alingbi ti duti dä. Aita alingbi ti sala nyen? Dû ayeke na gbe ti da ti mbeni ita-wali so ngu ayeke dä. Teti so akota zo ti kodoro ni aku pëpe ti tene azo abungbi tele dä, aita aleke mbeni estrade na ndo ti ngu ni so agbu zo na likuni ti lo. Li ti ndo ni ayo na nduzu mingi pëpe, na a lingbi ala ba li ti ala na dutingo na ndo estrade ni. Atâa so kue, zo oko abuba pëpe yâ ti Mémorial so kongregation ni asala na ngia.
2 Na salango kue ti bata komandema ti sala matanga ti kuâ ti Jésus, aita ti e ti Ukraine afa pendere mingi ndoye ti ala teti Nzapa (Luc 22:19; 1 Jean 5:3). Na ngoi kue so e yeke na gbele akpale na yâ fini ti e, zia mara ti atapande tongaso amû ngangu na e ti leke na bê kue ti ga na matanga ti Kobe ti Seigneur na lango 4 ti avril. Na salango tongaso, e yeke fa so atënë ti bê ti e ayeke oko na ti wasungo psaume so ahe na bia: “O, i ndoye L’Eternel, i azo ti Lo kue ti nzobe [“abe-ta-zo ti lo kue”, NW ].”—Ps. 31:24.
3 Mû maboko na ambeni zo ti kono ndoye teti Nzapa: Ndoye teti Nzapa ayeke pusu e nga ti tisa ambeni zo ti sala matanga ni legeoko na e. Supplément ti Kusala ti Royaume ti février awa e oko oko kue ti sû na mbeti iri ti azo so e leke ti tisa ala na Mémorial. Mo yeke gue ti bâ zo oko oko kue, so ayeke na lê ti mbeti ti mo, ti tisa ala? Mû ngoi ti fa na ala nda ti matanga ni. Tongana, na nzobe, mo dabe ti ala na lango nga na ngoi ti Mémorial ni, nga tongana a hunda ti sala tongaso, mo tene na ala ti gue legeoko na mo, fade ye so alingbi ti pusu ala ti ga.
4 Na ngoi ti bungbi ni, sala kue ti yamba azo so ayeda na tisango ndo ti e, na sala si tele ti ala anzere. Tongana nyen mo lingbi ti mû maboko na ala ti kono ndoye ti ala teti Jéhovah? Duti ndulu ti kiri tënë na ahundango tënë ti ala nga ti hunda ti manda Bible na ala, tongana lege azi ti sala tongaso. Tisa ala ti ga na abungbi ti e ti yenga oko oko. Mbilimbili a-ancien ayeke gi ande ti bi bê na aChrétien so azia lege ti fa tënë, so aga na matanga ni. Ala lingbi ti leke ti gue ti bâ ala na ti wa ala ti kiri ti fa tënë. Ala lingbi peut-être ti sala lisoro na ala na ndo atënë so a fa na yâ diskur ti Mémorial ni.—aRom. 5:6-8.
5 E kono ndoye ti e mveni teti Jéhovah: Gbungo li na ndo matabisi ti kota ngele alingbi ti sala si e kono ndoye ti e teti Jéhovah na Molenge ti lo (2 aCor. 5:14, 15). Mbeni Témoin so ayeke gue na Mémorial teti ngu mingi awe atene: “E yeke ku Mémorial kungo. A yeke mbeni ye so ngu oko oko e yeke bâ ni na nene ni ahon ti kozo. Mbi dabe ti mbi na ngoi so mbi yeke luti na yâ da ti batango akuâ a sala ngu 20 awe. Mbi yeke bâ babâ ti mbi so mbi ye lo mingi na mbi ga ti bâ nene ti kota ngele. Kozoni, a yeke mbeni tënë so ayeke gi tongaso na li ti mbi. Mbi hinga aversê kue so andu kota ngele na mbi hinga tongana nyen ti fa nda ni! Me gi ti so mbi bâ tâ na lê ti mbi sioni ti kuâ, ge la si bê ti mbi asi na ngia ndali ti ye so a yeke sala ande teti e na lege ti kota ngele so.”—Jean 5:28, 29.
6 Na ngoi so lango ti matanga ti ngu so ayeke ga ndulu, mû ngoi ti leke bê ti mo ndali ni (2 Chron. 19:3). Gbu li na ndo ye so a leke nde teti dikongo Bible na ngoi ti Mémorial, so ayeke na yâ Gingo nda ti Tënë ti Nzapa lâ oko oko—2004 nga na ndo Calendrier 2004. A nzere na ambeni zo ti kiri ti bâ achapitre 112-116 ti buku Koli so ahon na ngoi ti mandango ye na sewa ti ala. Ambeni nde akiri agi nda ti tënë ni na lege ti ambeti so bungbi ti ngbâa be-ta-zo na ti ndara amû ni (Mat. 24:45-47). E kue, e lingbi ti zia tënë ti matabisi ti kota ngele na yâ sambela so e sala na bê kue (Ps. 50:14, 23). Biani, na ngoi ti Mémorial, zia e ngbâ lakue ti gbu li na ndo ndoye ti Jéhovah teti e, na e gi alege ti fa na gigi ndoye ti e teti lo.—Marc 12:30; 1 Jean 4:10.