Tongana azo ayeke na yanga-da ti ala pëpe
1. Tongana e yeke fa tënë da na da, kpale wa e yeke wara ni mingi?
1 Na ando mingi, a ga ngangu ti wara azo na yanga-da. Na “lâ ti nda ni” so, aye asara si azo mingi asara kua ngbonga mingi gi ti wara na kobe ti yanga ti ala (2 Tim. 3:1). Ambeni ayeke na yanga-da pëpe ngbanga ti so ala gue ti vo ye wala ti sara ambeni ye nde. Tongana nyen e lingbi ti fa nzo tënë na azo tongaso?
2. Tongana nyen e lingbi ti sara kue ti kiri ti bâ azo so e wara ala na yanga-da pëpe?
2 Mû note nzoni: Kozo ye ti sara ayeke ti mû note ti azo so ayeke na yanga-da ti ala pëpe. A yeke nzoni mingi ti sara ni tongana mo yeke fa tënë lakue na yâ ti territoire ti mo. Mo yeke sû iri ti lege ti ndo so mo fa tënë dä? wala numero ti territoire ni? iri ti mo nga na lango ni? Mo lingbi ti zia place na lê ti mbeti ni ti tene a kiri a sû ambeni tënë dä tongana mo wala mbeni wafango tënë nde akiri ti bâ azo so mo wara ala kozo na da ti ala pëpe. Tongana mo hunzi ti fa tënë na yâ ti territoire ni awe, girisa pëpe ti mû mbeti ni na zo so ayeke na territoire ni. Me mo lingbi ti bata ni tongana lo yeda ti tene mo kiri mo bâ azo so mo wara ala na da pëpe. Mû mbeni mbeti ni nde ti sû iri ti azo kue so ayeda ti tene mo kiri mo bâ ala.
3. Aye wa e lingbi ti sara ti fa tënë na azo so e wara ala na yanga-da ti ala pëpe?
3 Tara ti kiri na mbeni ngoi nde: Peut-être ambeni zo so mo wara ala na yanga-da pëpe na asenge lango alingbi ti duti dä na alakui wala na anda-yenga. Mo lingbi ti leke yâ ti kapa ti mo ti kiri ti bâ ala na ngoi so alingbi? (1 aCor. 10:24). Tongana lege ayeke dä pëpe, mo lingbi ti mû note ti azo so mo wara ala pëpe na mbeni wafango tënë so alingbi ti kiri na mbeni ngoi nde.
4. Tapande wa afa nene ti kiri ti bâ azo so e wara ala na yanga-da pëpe?
4 Bâ mbeni ye so asi so afa nene ti kiri ti bâ azo so e wara ala na yanga-da pëpe. Na peko ti so awafango tënë ague fani mingi na yanga-da ti mbeni wali teti ngu ota na ala wara lo pëpe, mbeni lâ ala tingbi na lo. Andâ wali ni ayeke ku na yâ ti ngoi so kue ti tene mbeni Témoin aga amanda Bible na lo, ngbanga ti so ândö lo yeke manda Bible kozo si lo ga na ndo ni so.
5. Na ngoi wa a bâ so a hunzi ti sara mbeni territoire awe?
5 Hunzi territoire ni: Na ngoi wa a bâ so a hunzi ti sara mbeni territoire? Mingi ni, a yeke na ngoi so a sara kue ti fa tënë kamême na da oko oko kue. A lingbi ti duti nzoni ti zia tract wala mbeni ngbene périodique na yanga-da ti azo so e wara ala pëpe. Tongana a yeke na yâ ti territoire so a fa tënë dä mingi pëpe, e lingbi ti zia mbeti ni si azo so ayeke hon na lege abâ ni pëpe. A yeke nzoni a hunzi territoire ni na yâ ti nze osio. Na pekoni, a lingbi a kiri na ni na ita so ayeke bâ lege ti aterritoire ti tene lo zia ni na lê ti ambeti ti lo.
6. Ngbanga ti nyen a yeke nzoni e gi ti fa nzo tënë na azo kue na yâ ti territoire ti e?
6 E ye si azo mingi awara lege ti di iri ti Jéhovah si ala sö fini ti ala (aRom. 10:13, 14). Tënë ni abâ nga azo so e wara ala na yanga-da ti ala pëpe na ngoi ti fango tënë da na da. Legeoko tongana bazengele Paul, gi ti duti “témoin ti Tene-nzoni ti grâce ti Nzapa.”—Kus. 20:24.