Kota kapa ayeke duti ande dä na 16 octobre ti hunzi na 12 novembre!

¹ “Bungbi ti nzapa ti wataka aga nduru ti hunzi!” So ayeke kota li ti tënë ti Asango ti Royaume No. 37. A yeke kangbi ni ande na ndo lê sese kue na tongo nda ti nze ti peko. Ti londo na kozo lango ti octobre ti si na lango 15 ni, e yeke kangbi ande Tour ti Ba Ndo na Réveillez-vous! Na lundi 16 octobre ti si na dimanche 12 novembre, e yeke bi ande tere ti e mingi na yâ ti mbeni kota kapa ti kangbingo Asango ti Royaume No. 37. Na alango ti samedi na dimanche, e yeke kangbi ni ande legeoko na Tour ti Ba Ndo na Réveillez-vous!

² Azo wa alingbi ti mû mbage ti ala dä? A yeke nzoni azo kue so ayeke fa nzo tënë asara kue ti mû mbage ti ala dä. Ambeni alingbi ti mû kua ti pionnier auxiliaire. Mo yeke na amolenge wala awamandango Bible so ayeke gue na li ni na lege ti yingo? Wa ala ti pusu nduru na a-ancien ti tene ala bâ wala ala lingbi ti fa tënë awe. A yeke nzoni a-ancien awa awafango tënë so adë na yâ kusala ti ala ti kiri ti fa tënë. Peut-être, a lingbi ti leke ti tene ala fa tënë legeoko na aita so akpengba.

³ A tokua Asango ti Royaume No. 37 na akongregation kue ti tene awafango tënë kue nga na apionnier awara ni. Ala oko oko kue alingbi ti wara wungo ni 50 wala ahon so. Ala so angbâ ti manda Bible na so ade afa tënë pëpe, ala lingbi ti wara ni 5 ti tene ala kangbi ni na sewa ti ala nga na akamarade. A lingbi awafango tënë adiko lakue wungo ti Asango ti Royaume so ala yeke zia ni na azo na ala sû ni na peko ti mbeti ti rapport ti ala ti octobre na novembre. Secrétaire ti kongregation ayeke sara ande calcul ti Asango ti Royaume kue so a zia ni na tîtï azo, na lo tokua ni na filiale na nda ti nze ti octobre na novembre. Tongana kapa ni ahunzi awe si ambeni tract ni angbâ, aita alingbi ande ti sara kusala na ni na yâ ti fango tënë ti ala.

⁴ Tënë wa e lingbi ti tene? Tongana e si na yanga-da ti zo, e tene tënë nduru, tongaso si a mû lege ti kangbi Asango ti Royaume ni mingi. E lingbi ti tene: “E yeke kangbi mbeti so na ndo lê sese kue na azo senge senge. Ti ti mo la, diko ni.” A yeke peut-être nzoni ti tene e duti na bozo na tere ti e pëpe. Sû iri ti azo kue so asara nzara ti tënë ni.

⁵ Tongana nyen e lingbi ti kangbi ni na yâ ti territoire ni kue? Ahon ti tene e kangbi Asango ti Royaume ni na lege, zia e kangbi ni mingi na ngoi so e yeke fa tënë da na da nga na ando ti dengo buze. Azo so e wara ala na yanga-da pëpe, e mû note ti ala na e sara kue ti kiri ti bâ ala na mbeni ngoi nde. A to nda ni na lundi 6 novembre, e lingbi ti zia mbeni tract ni oko na yanga-da ti azo so e wara ala pëpe. Ye oko, tongana territoire ti kongregation ni akono mingi, si a lingbi ti hunzi ni kue pëpe na yâ ti ngoi so a mû ndali ti kapa ni, a-ancien alingbi ti bâ si a zia na ngoi ti kapa ni kue atract ni na ayanga-da ti azo so a wara ala pëpe.

⁶ Futingo ti “Kota Babylone” ayeke pusu nduru nduru. A lingbi azo asigigi na yâ ni kozoni si a futi lo kue kue kue (Apoc. 14:8; 18:8). E leke tere ti e ti mû mbage mingi na yâ ti kota kapa so, si azo kue ahinga atene bungbi ti anzapa ti wataka aga nduru ti hunzi!