Sara kusala nzoni na ngoi ti mo na fango tënë
1 Kusala ayeke biani mingi ti sara na yâ ti fango tënë, na ngoi angbâ mingi pëpe (Jean 4:35; 1 aCor. 7:29). Tongana e leke tere ti e nzoni nga e leke mbeni nzoni kapa ti kusala kozoni, e lingbi ti sara kusala nzoni na ngoi so e bata ndali ti fango tënë.
2 Leke tere ti mo: Kozo ti gue na bungbi ti fango tënë, bâ wala mo yeke na ambeti ti sara ande na kusala nga hinga na li ti mo tënë so mo yeke tene. Na peko ti so bungbi ni ahunzi na lege ti sambela, gue gi na fango tënë ni. Ye so ayeke mû lege na mo nga na azo so mo na ala ayeke fa tënë ti sara kusala mingi na yâ ti ngoi so ala mû ti fa tënë.
3 Tongana a soro mo ti mû li ni na bungbi ti fango tënë, to nda ni gi na ngbonga ni. Sara bungbi ni nduru a hon penze-ngbonga 15 pëpe. Kozoni si mo hunda na azo ni ti gue, zia si zo oko oko ahinga zo so lo yeke fa tënë na lo nga ndo so lo yeke gue ti fa tënë dä.
4 Na ngoi ti fango tënë: Tongana bungbi ti fango tënë ahunzi awe, ngbâ na peko senge pëpe me gue hio na territoire. Tongana lege ayeke dä, sara kue ti to nda ni na fango tënë da na da kozoni ti gue ti sara avizite nga na a-étude. Tongana mo leke ti hunzi fango tënë hio, sara tënë ni na ita so amû li ni. Lo lingbi ti leke ti tene mo fa tënë na mbeni ita so dutingo ti mo na ti lo ayeke oko.
5 Tongana mo kiri ti sara avizite, mo lingbi ti kpe ti tambela senge senge na bango ala so ayeke na mbeni vaka oko kozo ti gue ti bâ ala so ayeke na mbeni nde. Tongana lege ayeke dä, pika singa na azo so mo leke ti bâ ala ti hinga biani wala ala yeke duti ande na yanga-da.—aProv. 21:5.
6 E yeke laso na yâ ti ngoi ti kota fango le-kobe na lege ti yingo (Mat. 9:37, 38). Na yâ ti ngoi kete fade kusala so ayeke hunzi. Ni la, ye so e leke na bê ti e ayeke ti sara kusala mingi na ngoi so e mû ndali ti fango tënë.