Lango so a zia nde ti hunda azo ti manda Bible na ala
1 Ti to nda ni na janvier, fade kongregation oko oko asoro mbeni nda-yenga oko na yâ ti nze, peut-être kozo nda-yenga ni, gi ti hunda azo ti manda Bible na ala. A lingbi ti duti ande mbeni samedi wala dimanche, alingbi na ye so ala bâ ayeke nzoni ndali ti awafango tënë. Na lango ni so tongana azo ake ti yeda ti tene a manda Bible na ala, awafango tënë alingbi ti mû na ala buku Bible afa wala afini périodique. A yeke nzoni a-ancien na aserviteur ti mungo maboko kue aleke tere ti ala ti mû mbage mingi na kapa so na ti mû maboko na awafango tënë ti to nda ti manda Bible na azo.
2 Fade Komité ti Kusala ti kongregation ayeke bâ lango wa ti mbeni nda-yenga a lingbi ti mû ni ti hunda azo ti manda Bible na ala. Ngoi na ngoi, a lingbi a dabe ti awafango tënë tongaso si ala leke tere ti ala na ala sara ngangu ti hunda azo ti manda Bible na ala na fango tënë da na da, nga na ngoi so ala yeke gue ti bâ azo so asara nzara ti tënë ni.
3 Lege ti leke tere: E lingbi ti wara wango na ndo ti alege nde nde ti to nda ti manda Bible na azo na yâ ti supplément ti Kusala ti Royaume ti février 2006, nga na lembeti 5 ti brochure Lege ti To Nda Na ti Ngbâ ti Sala Alisoro na ndo Bible. Ambeni alingbi ti sara kusala na tract Mo ye ti hinga tâ tënë? wala mbeni nde. E yeke nga na Kusala ti Royaume ti août 2007, so na lembeti 3, amû wango na ndo ti lege ti to nda ti manda Bible na ngoi so e kiri ti bâ azo so e zia na ala apériodique. Fade a leke kapa ti tene a-ancien na aserviteur ti mungo maboko amû li ni ti sara bungbi ti fango tënë nduru teti penze-ngbonga 10 ti si na 15; fade ala mû wango oko wala use na ndo ti lege ti to nda ti manda Bible na azo wala ala sara démonstration na ndo ni.
4 Biani, a yeke azo kue pëpe si ayeke yeda ti manda Bible wala ti ngbâ ti sara ni aninga. A lingbi ye so akanga lege na e pëpe, ngbanga ti so Jéhovah la ayeke iri azo so ayeke tongana angasangbaga na yâ ti bungbi ti lo (Jean 6:44). Kusala ti e ayeke gi ti lu alê ti tâ tënë pëpe, me nga ti lu ni na ti zia ngu na ndo ti ye so gere ni agbu sese awe, na ye so andu nga mandango Bible na azo so aye tënë ni. Na sarango tongaso, e yeke sara kusala maboko na maboko na Nzapa.—1 aCor. 3:9.