Mo yeke sara kusala na buku Comment raisonner?
1. Na lege ti nyen bazengele Paul na Jésus afa ye na azo?
1 Bazengele Paul asara ngangu ti “wa [azo] na lege ti Mbeti ti Nzapa”. (Kus. 17:2, 3; 18:19). Na sarango tongaso, lo mû tapande ti Jésus, so ngoi na ngoi asara kusala na aversê nga na atapande ti mû maboko na azo so ayeke mä lo ti hinga ye so bê ti Nzapa aye (Mat. 12:1-12). A leke buku Comment raisonner à partir des Écritures ti mû maboko na e ti sara legeoko.
2. Tongana nyen ti leke tere ti e na lege ti buku Comment raisonner ti to nda ti lisoro nzoni na azo?
2 Lege ti leke akozo tënë ti lisoro: Na lembeti 9-15 ti buku Comment raisonner à partir des Écritures, mo yeke wara atënë ti tongo nda ti lisoro na zo so alingbi ti pusu lo ti manda Bible. Tongana mo manda na mo sara kusala na atënë nde nde ti tongo nda ti lisoro so, mbilimbili na ngoi so mo yeke fa tënë lakue na yâ ti territoire, a yeke sara si mo yapu mingi na mo yeke to nda ti lisoro nzoni na azo. Mo lingbi ti diko atënë ni tâ gi na yâ ti buku ni tongana mo yeke fa tënë na lege ti singa wala na yanga ti asinga so a zia na yanga ti gbagba ti ada so a ye zo kirikiri alï dä pëpe. (Bâ nga brochure Lege ti To Nda Na ti Ngbâ ti Sala Alisoro na ndo Bible.)
3. Nyen la ayeke na lembeti 16-24 ti buku Comment raisonner so ayeke mû ande maboko na e na fango tënë?
3 Ye ti sara na gbele atënë ti kangango lege na lisoro: Ngbanga ti nyen mo gi ti hinga kozoni atënë ti kangango lege so azo ayeke tene na yâ ti territoire ti mo na mo mû angbonga kete ti bi lê na lembeti 16-20 ti hinga lege ti kiri tënë na ni pëpe? Ambeni zo ni asara nzapa ti Bouddha, ti Hindou, ti Juif, wala ti Islam? Tongana a yeke tongaso, atënë so ayeke na lembeti 21-24 alingbi ti mû maboko na mo.
4. Tongana nyen ti sara kusala na buku Comment raisonner tongana zo ahunda tënë wala lo bi mbeni tënë ti dengo gaba na ndo ti tënë ti Nzapa?
4 Lege ti kiri tënë na hunda ti azo: Buku Comment raisonner alingbi nga ti mû maboko na e tongana zo ahunda na e mbeni tënë wala lo bi mbeni tënë ti dengo gaba na ndo ti tënë ti Nzapa. Mo lingbi gi ti tene na zo ni so mo yeke na mbeni nzoni sango na ndo ti tënë ni na mo sigigi na buku Comment raisonner ti mo. Teti so a zia ali ti tënë ni alingbi na molongo ti agere-mbeti, zi ni na kota li ti tënë so mo bâ so mo lingbi ti wara sango so mo ye na yâ ni. Na pekoni, bâ hio ahundango tënë so gere ni akono na avuko. Tongana mo wara ni hio pëpe, bâ index so ayeke na hunzingo ti buku ni. Tongana mo wara sango ni awe, diko ni tâ gi na yâ ti buku ni. Tongana lisoro ni ayeke na ndo ti mbeni versê, peut-être mo yeke wara ni na lembeti 445 na gbe ti li ti tënë “Textes bibliques souvent mal compris.”
5. Ambeni lege ti sara kusala na buku Comment raisonner ayeke so wa?
5 Ambeni lege ti sara kusala na ni: Ambeni ayeke na buku Comment raisonner na tere ti ala na place ti kua wala na ekole si a mû maboko na ala ti kiri tënë na ahunda tongana, ‘Ngbanga ti nyen si mo sara matanga pëpe?’ Amaseka alingbi ti wara asango na gbe ti ali ti tënë “Création” na “Évolution” ti mû maboko na ala ti leke adevoir ti ala ti ekole. Mo ye ti gue ti bâ mbeni zo ti kobela wala mbeni zo so sewa ti lo akui? Tënë so ayeke na gbe ti li ti tënë “Encouragement” alingbi ti mû maboko na mo ti dë bê ti lo na lege ti Mbeti ti Nzapa. Buku Comment raisonner ayeke nga na anzoni sango so alingbi ti mû maboko na ala so ayeke leke adiskur nga ala so ayeke mû li ni na bungbi ti fango tënë.
6. Nyen la e zia na gbele e ti si dä na ngoi so e yeke fa tënë?
6 Ye so e zia na gbele e ti si dä na ngoi so e yeke fa tënë ayeke pëpe ti fa na azo so e hinga ye mingi nga ti mû gi asango pëpe. Me, e ye ti sara lisoro na ala nzoni na lege ti Mbeti ti Nzapa. Tongana e sara kusala nzoni na buku Comment raisonner, e fa so e sara hange na tënë so e yeke fa.—1 Tim. 4:16.