Sara kusala na akode so aga na ye ti nzoni
1. Nyen la e manda na lege ti akozo Chrétien so asara kusala na akode nde nde?
1 Akozo Chrétien afa lani nzoni tënë na azo so ngobo ti sarango ye ti ala nga abungbi ti vorongo nzapa ti ala ayeke nde nde (aCol. 1:23). Atâa so tënë so ala fa aluti gi na ndo ti Royaume ti Nzapa, ala sara kusala na akode nde nde ti lingbi na dutingo ti azo so ala fa tënë na ala. Na tapande, na ngoi so lani Pierre asara tënë na aJuif so abâ na nene ni Mbeti ti Nzapa, lo to nda ti tënë ti lo na tenengo peko ti tënë ti prophète Joël (Kus. 2:14-17). Nga, bâ lege so Paul apika patara na aGrec tongana ti so a fa pekoni na Kusala 17:22-31. Laso, azo ti ambeni territoire ayeda so Bible ayeke tënë ti yanga ti Nzapa, na ye oko akanga lege na e pëpe ti sara kusala na ni na ngoi so e yeke fa tënë da na da. Ye oko, a lingbi e sara ye na ndara na ngoi so e yeke fa tënë na azo so aye tënë ti Bible pëpe wala azo so aye tënë ti bungbi ti vorongo Nzapa pëpe wala azo so ayeke na yâ ti bungbi ti vorongo nzapa so ayeke ti aChrétien pëpe.
2. Tongana nyen e lingbi ti sara kusala na ambeti so e yeke fa na tënë ti mû maboko na azo so abâ Bible na nene ni nga na azo so aye ni pëpe?
2 Sara kua nzoni na ambeti so e yeke fa na tënë: Ambeti so e yeke fa na tënë na ngu ti kusala so ayeke changé ande lakue na yâ ti anze use use na e yeke sara kusala mingi na apériodique, atract nga na abrochure. Atâa tongana azo ti territoire ti e amä na bê na Bible pëpe, e lingbi lakue ti gi na yâ ti apériodique, atract, wala abrochure mbeni tënë so peut-être ayeke nzere na ala na e fa ni na ala. Peut-être e diko mbeni versê ti Bible pëpe wala e sara tënë ti Bible pëpe na kozo tingbingo na zo ni, me tongana zo ni asara nzara ti tënë ni na ngoi so e kiri ti sara vizite na lo, e yeke gi ti mû maboko na lo ti mä na bê so Nzapa la asara ye kue nga ti mä na bê na Bible. Me, tongana e yeke fa tënë na ndo so azo ni abâ Bible na nene ni, e lingbi ti sara kusala na ambeti ti e nga na akode so alingbi na ni. Atâa ambeti so a yeke fa na tënë na nze ni ayeke so wa, e lingbi ti fa buku Bible afa wala brochure Mä Nzapa wala Mä Nzapa si mo wara fini ti lakue lakue. Kota ye ni ayeke ti sara kusala na mbeni kode so ayeke ga na aye ti nzoni.
3. Na lege wa bê ti azo ti territoire ti e ayeke tongana sese?
3 Leke sese ni: Bê ti zo ayeke tongana sese (Luc 8:15). Ti ambeni sese a lingbi a leke ni fani mingi kozoni awe si ngongoa ti tâ tënë so a lu na yâ ni gunda ni alï sese na amaï. Akozo Chrétien alu lani ngongoa ti tâ tënë nzoni na yâ ti amara ti sese nde nde, na ala wara ngia mingi na pekoni (Kus. 13:48, 52). E lingbi ti wara ye ti nzoni tongana ti ala tongana e gbu li ti e nzoni na kode so e yeke sara na kusala.