E lingbi ti manda ye na ndö ti Nzapa na lege ti aprophète ti lo

ABRAHAM

Nzapa asara kangbi na popo ti azo ape nga lo ye ti iri tënë nzoni na ndö ti ala.

Nzapa amû zendo lani na prophète Abraham so “na lege ti [lo] a yeke iri tënë nzoni ande na ndö ti asewa kue ti sese.”—Genèse 12:3.

Nyen la e manda? Nzapa aye tâ e mingi nga lo ye ti iri tënë nzoni na ndö ti asewa kue, so ti tene akoli, awali nga na amolenge kue so amä yanga ti lo.

MOÏSE

Nzapa ayeke sara nzoni bê nga lo yeke iri tufa na ndö ti azo so asara kue ti hinga lo.

Nzapa so ngangu ti lo ahon angangu kue amû lani na prophète Moïse ngangu ti sara akota miracle. Me Moïse asambela lani Nzapa lo tene: “Fa na mbi lege ti mo, tongaso si mbi hinga mo, na mbi ngbâ ti nzere na lê ti mo.” (Exode 33:13). Nzapa amä lo na lo mû na lo hingango ye mingi nga lo mû lege na lo ti hinga alege nga na asarango ye ti lo. Na tapande, Moïse amanda so Nzapa so acréé aye kue ayeke “Nzapa so asara nzoni bê na zo nga so abâ mawa ti zo.”—Exode 34:6, 7.

Nyen la e manda? Tongana e sara effort ti hinga Nzapa nzoni, lo yeke iri tënë nzoni na ndö ti e, atâa e yeke koli, wali wala molenge. Lo fa na e na yâ ti Mbeti ti lo tongana nyen ti voro lo nga tongana nyen la lo ye mingi ti iri tënë nzoni na ndö ti e.

JÉSUS

E peut ti wara anzoni ye so angbâ lakue so Nzapa amû zendo ni tongana e manda ye na ndö ti Jésus nga na ndö ti aye so lo tene na lo sara.

Mbeti ti Nzapa afa aye mingi na ndö ti Jésus nga na aye so lo fa. Nzapa amû lani na lo ngangu ti sara akota miracle, na tapande ti sava awaziba, awabuburu nga na ala so gere ti ala abuba. Lo zingo même lani akuâ. Na lege ti ye so lo sara lani so, lo fa apendere ye so Nzapa ayeke sara ande ndali ti azo kue. Jésus afa ye so e oko oko kue e lingbi ti sara ti wara anzoni ye so, lo tene: “Ti wara fini ti lakue lakue, a lingbi ala gi ti hinga mo, mo oko tâ Nzapa, nga na lo so mo tokua lo, Jésus Christ.”—Jean 17:3.

Jésus ayeke bâ lani mawa ti azo, lo ye ala nga lo yeke sara ye na nzoni bê na ala. Akoli na awali, amaseka na ambakoro, ayeke ga lani na mbage ti lo ti fa so ala yeda na tënë so lo tene lani na ala lo tene: “Ala manda ye na mbage ti mbi, ndali ti so mbi yeke sara ye na ngangu pëpe nga mbi sara terê ti mbi kete, na ala yeke wara dengo bê ndali ti ala wani.” (Matthieu 11:29). Nde na ambeni zo ti ngoi ti lo lani so ayeke sara ye na lege ni ape na awali, Jésus asara ye na ala na nzoni bê, nga lo ne ala.

Nyen la e manda? Jésus aye tâ lani azo mingi, na lo zia na e nzoni tapande so afa tongana nyen la a lingbi e sara ye na amba ti e.

JÉSUS LA AYEKE NZAPA APE

Mbeti ti Nzapa afa so “Nzapa ayeke biani gï oko” na so Jésus Christ ayeke gï senge watokua ti Nzapa (1 aCorinthien 8:6). Jésus atene lani polele so Nzapa ayeke kota ahon lo na so Nzapa la atokua lo lani na sese.—Jean 11:41, 42; 14:28.a