Mo peut ti wara anzoni ye so angbâ lakue so Zo so acréé e amû zendo ni

Nzapa amû lani zendo na prophète Abraham so na lege ti mbeni hale ti lo “amara kue ti sese” ayeke wara ande anzoni ye (Genèse 22:18). Hale ni so ayeke zo wa?

A sara nduru na ngu 2 000 awe, Nzapa amû lani na Jésus so ayeke mbeni hale ti Abraham ngangu ti sara akota miracle. Amiracle so afa so zendo so Nzapa amû lani na Abraham alingbi ti ga na ndö ti amara na lege ti Jésus.—aGalate 3:14.

Amiracle ti Jésus amû lege na azo ti bâ lo tongana zo so Nzapa asoro lo ti ga na anzoni ye na azo. A fa nga tongana nyen la Nzapa ayeke sara ande kua na lo ti ga na anzoni ye so ayeke ngbâ teti lakue lakue. Bâ tongana nyen la amiracle ti Jésus afa apendere sarango ye ti lo.

Jésus asara lani ye na nzoni bê: Lo sava azo ti kobela.

Mbeni lâ, mbeni zo ti buruma avoro yanga na Jésus ti sava lo. Jésus andu lo na lo tene: “Mbi ye!” Droit, buruma ti koli ni ahon.—Marc 1:40-42.

Jésus amû lani ye na azo: Lo mû kobe na azo so nzara asara ala.

Jésus aye lani ti zia azo ahon na nzara ape. Fani use, lo mû kobe na azo saki mingi na lege so lo sara si kete wungo ti mapa na susu aga gbani (Matthieu 14:17-21; 15:32-38). Na peko ti so azo ni ahunzi ti te ye, yâ ti ala kue asi na tanga ti kobe ni angbâ.

Jésus abâ lani mawa ti azo: Lo zingo akuâ.

“Mawa” asara lani Jésus na lo zingo oko molenge-koli ti mbeni wali-mua na kuâ, so mbeni zo ti bâ lege ti lo ayeke dä ape.—Luc 7:12-15.