Gbiango totongo ti go

TONGANA mo luti na ndo ti akota tënë, ye so ayeke mû maboko na azo so ayeke mä mo ti gbu nda ti tënë ti mo. Me tongana go ti mo atoto nde nde na mo gbian loro ti salango tënë ti mo, diskur wala devoir ti mo alingbi ti nzere mingi na mê ti azo. Mingi ahon so, a lingbi ti mû maboko na azo so ayeke mä mo ti bâ tongana nyen tënë so mo yeke tene agbu bê ti mo. Lege so mo mveni mo yeke bâ na devoir ti mo alingbi ti sala ye na ndo lege so ala yeke bâ na ni. Ye so ayeke tâ tënë atâa mo yeke sala tënë na ndo ti estrade wala na mbeni zo na fango tënë.

Go ti azo ayeke mbeni pendere ye ti sala na kusala so totongo ni alingbi ti gbian nde nde mingi. Tongana a sala kusala na ni nzoni, a lingbi ti mû wâ na mbeni diskur, ti ndu bê, ti zingo atënë ti bê ti zo nga ti pusu lo ti sala ye. Ye oko, mo lingbi ti sala ye so pëpe gi na fango na ndo mbeti ni ndo so a lingbi mo gbian totongo ti go ti mo wala loro ti salango tënë ti mo. Tongana a yeke tongaso, go ti mo ayeke toto ande tongana ti mo mveni pëpe. Ahon ti mû wâ na devoir ti mo na ti sala si a ga pendere, a lingbi ti sala si tele ti azo so ayeke mä mo anzere pëpe. Biani, gbiango totongo ti go so alingbi na ni alondo na bê.

Tongana a sala kusala na ni na ndara, gbiango totongo ti go ayeke gboto ande lê ti azo senge senge pëpe na ndo zo so ayeke sala devoir ni. Nde na so, a yeke mû ande maboko na azo so ayeke mä lo ti gbu nda ti tënë so lo yeke fa.

Sala si go ti mo atoto ngangu wala kete. Mbeni lege ti gbian totongo ti go ti mo ayeke ti sala si a toto ngangu wala kete. Me a lingbi mo sala ni pëpe na mbeni lege so aga gi oko ye lakue. Ye so alingbi ti ba yâ ti tënë so mo yeke tene. Tongana mo zia go ti mo atoto ngangu fani mingi, ye so alingbi ande ti nzere na azo pëpe.

A yeke nzoni go ti mo atoto ngangu wala kete alingbi na tënë ti devoir ti mo. Tongana mo yeke diko mbeni tënë so ahunda na zo ti sala ye hio, tongana ti so a yeke na Apocalypse 14:6, 7 wala Apocalypse 18:4, wala mbeni ye so afa na gigi ye so zo amä na bê na ni kue, tongana ti so a yeke na Exode 14:13, 14, a yeke nzoni ti zia go ti mo atoto ngangu. Legeoko nga, tongana mo yeke diko mbeni ngangu tënë ti fango ngbanga na yâ ti Bible, tongana mara ti so ayeke na Jérémie 25:27-38, tongana mo gbian totongo ti go ti mo, ye so ayeke sala ande si ambeni tënë ayeke sigigi polele ahon atanga ni.

Bâ nga ye so mo zia na gbele mo ti si dä. Mo ye ti pusu azo so ayeke mä mo ti sala ye? Mo ye ti sala si angbongboro tënë ti mo asigigi polele? Go so atoto ngangu, tongana a sala kusala na ni na ndara, ayeke mû maboko ti si na aye so. Ye oko, gi senge konongo ngangu ti totongo ti go ti mo alingbi pëpe ti sala si mo si na ye so mo zia na gbele mo. Tongana nyen? Peut-être a hunda ti tene mo zia wâ nga na atënë ti bê na yâ ye so mo yeke tene ahon ti kono ngangu ti totongo ti go ti mo. E yeke bâ ande ye so na yâ ye ti manda 11.

Tongana a sala kusala na ni na ndara, go so atoto kete alingbi ti sala si azo ayeke ku kungo ye so mo ye ti tene. Me mingi ni a lingbi mo ne go ti mo hio na pekoni. Mo lingbi ti kiri na ngangu ti totongo ti go ti mo na gbe ni nga na oko ngoi ni ti ne ni ti fa gingo bê wala mbito. Mo lingbi nga ti kiri na ngangu ti totongo ti go ti mo na gbe ni ti fa so tënë so mo yeke tene ayeke kota ye pëpe tongana a haka ni na ye so angoro ni. Ye oko, tongana go ti mo ayeke toto lakue gi kete, ye so alingbi peut-être ti fa so mo hinga mbilimbili pëpe ye so mo yeke tene wala a gbu bê ti mo kue pëpe, wala mo bi bê ti mo biani na ni pëpe. Biani, a hunda ndara ti zia si go atoto kete mingi.

Gbian loro ti salango tënë ti mo. Na yâ salango tënë ti lâ oko oko, atënë ayeke sigigi na bê ti ala mveni na ngoi so e yeke fa atënë so ayeke na yâ ti li ti e. Tongana atënë ti bê ti e ayeke kota mingi, e yeke ndulu ti sala tënë na loro. Tongana e ye si azo adabe ti ala mbilimbili na ye so e tene, salango tënë ti e ague yeke mingi.

Ye oko, a yeke afini wamungo diskur mingi pëpe si ayeke gbian loro ti salango tënë ti ala. Ngbanga ti nyen? Ala yeke leke peko ti salango tënë ti ala nzoni mingi. Ala sû peut-être atënë ni kue na mbeti. Atâa tongana diskur ni ayeke manuscrit pëpe, ala manda atënë ni kue na li ti ala. A sala si loro ti aye kue so ala tene ayeke gi oko. Ti manda ti sala tënë na lege ti mbeni plan ayeke mû ande maboko ti hon ndo ti wokongo so.

Kpe ti gbian na ngangu loro ti salango tënë ti mo tongana mbeni deku so akpe na loro na ngoi so lo bâ mbeni nyau. Nga, sala tënë lâ oko pëpe na loro mingi si atënë ti mo asigigi polele pëpe.

Ti zia si loro ti salango tënë ti mo aduti nde nde, gi pëpe ti sala tënë tongaso: ti sala tënë hio hio nga na pekoni yeke, lakue tongaso. Ahon ti sala si tënë so mo yeke fa akiri aga pendere mingi, kode ti mungo diskur tongaso ayeke buba ande ni. A lingbi ye so mo yeke tene, atënë ti bê so mo ye ti tene asigigi nga ye so mo zia na gbele mo ti si dä si ayeke na gunda ti gbiango loro ti salango tënë ti mo. Zia si loro ti diskur ti mo ahon ndo ni pëpe. Ti fa atënë so agbu bê, sala tënë na loro, legeoko tongana ti so mo yeke sala lâ na lâ. A lingbi ti duti nga tongaso tongana mo yeke sala tënë ti aye so ayeke kota ye mingi pëpe, wala mo yeke fa peko ti aye so ahunda pëpe ti fa anzene nzene tënë dä. Ye so ayeke sala ande si aye nde nde ayeke duti na yâ ti devoir ti mo, na mo yeke kpe ti tene diskur ti mo ni ane nengo. Na mbeni mbage nde, mingi ni, a hunda ti sala tënë yeke tongana a ndu atënë so ane, angbongboro tënë nga na akota mbage ti devoir ni.

Gbian lege so go ti mo ayeke toto. Tara ti bâ so mbeni zo ayeke pika mbeni gbakuru ti mozoko teti ngbonga oko tongaso. Na ngoi ni kue, mozoko ni ayeke toto gi oko, kozoni na loro mingi, nga na pekoni lo pika ni yeke yeke. Totongo ti mozoko ni nga loro ni agbian, me lege so lo pika na ni agbian pëpe, ye so asala si “mozoko” ni atoto pendere na mê ti zo pëpe. Legeoko nga, tongana lege so go ti e ayeke toto agbian pëpe, fade go ti e ayeke toto pendere na mê ti azo pëpe.

A lingbi zo ahinga so yango go na nduzu wala kiringo ni na gbe ni ayeke sala pëpe oko kusala na yâ ayanga ti kodoro kue. Na yâ ti ayanga ti kodoro tongana Sango, tongana zo ayä go ti lo na nduzu wala lo kiri na ni na gbe ni, nda ti mbeni tënë alingbi ti gbian. Ye oko, atâa na yâ mara ti ayanga tongaso, ambeni ye ayeke dä so zo alingbi ti sala si go ti lo atoto nde nde mingi. Lo lingbi ti gi ti leke nzoni ndo so a lingbi lo yä go ti lo na nduzu wala ti kiri na ni na gbe ni na ngoi so lo yeke bata si atënë oko oko ayeke toto tongana ti so a yeke toto ka na yanga ti kodoro ni. Na lege so, lo lingbi ti sala si tënë so ayeke toto ka na nduzu akiri atoto mingi na nduzu, nga tënë so ayeke toto ka na gbe ni akiri atoto mingi na gbe ni.

Même na yâ ti ayanga ti kodoro so ayeke tongana Sango pëpe, yango go na nduzu wala kiringo ni na gbe ni alingbi ti fa na gigi atënë nde nde so ayeke na yâ ti li ti zo. Na tapande, mo lingbi ti yä kete na nduzu totongo ti go ti mo, nga na oko ngoi ni mo kono ngangu ti totongo ti go ti mo ti luti na ndo akota tënë. Wala, yango go na nduzu wala kiringo ni na gbe ni alingbi ti fa konongo nga yongo ti ye. Tongana zo ahunzi mbeni tënë na lo yä go ti lo na nduzu, ye so ayeke fa so lo yeke hunda mbeni tënë. Na yâ ti ambeni yanga ti kodoro nde, ye so alingbi ti hunda ti sala tënë na gbe ni.

A lingbi ti fa na gigi atënë so agbu bê na salango tënë na nduzu. Vundu na gingo bê alingbi ti hunda ti sala tënë na gbe ni. Atënë ti bê, so a fa ni ge, ayeke ti so ayeke mû maboko na zo so ayeke sala devoir ti ndu bê ti azo. Tongana mo ye ti fa ni na gigi, tene pëpe gi atënë ni. Sala kusala na go ti mo na mbeni lege so afa so mo tene ni na bê ti mo.

Ndo so a to nda ni dä. A lingbi gbiango totongo ti go ato nda ni na ndo wa? A yeke na ngoi so mo yeke soro atënë teti devoir ti mo. Tongana mo fa gi nda ti tënë wala mo mû gi wango, mo yeke wara ande lege pëpe ti zia aye nde nde na yâ salango devoir ti mo. Tongaso, bâ plan ti mo nzoni na sala kue si mo wara aye so ayeke mû lege ti sala si devoir ni ayeke na apendere ye nde nde dä nga afa ye na zo.

Mo yeke sala ye ande tongana nyen tongana a si na mbeni ngoi na yâ ti devoir ti mo, mo bâ so a lingbi mo sala mbeni ye nde teti so yâ ti devoir ni ayeke gboto gbotongo? Gbian kode so mo yeke fa na ye ni. Tongana nyen? Mbeni lege ni ayeke ti zi Bible, ti tisa azo ni ti zi ti ala nga na ti diko mbeni versê ahon ti sala gi tënë. Wala ahon ti fa gi mbeni tënë, sala si a ga mbeni hundango tënë, nga luti kete ti gboto lê ti azo ni. Yôro na yâ ni mbeni senge tapande. So ayeke akode so awamungo diskur ti kode ayeke sala na kusala. Me atâa kode ti mo ayeke tongana nyen, mo lingbi ti sala kusala na a-oko kode so na ngoi ti lekengo devoir ti mo.

Na yâ ti mbeni devoir, a lingbi ti haka gbiango totongo ti go na mbeni ye so asala si kobe anzere. Tongana mo sala kusala na ni mbilimbili nga alingbi na ni, fade nzerengo ti devoir ti mo kue ayeke sigigi nga tele ti azo so ayeke mä mo ayeke nzere.