E yeke fâ gbada ti bira so aluti ngangu
1 Teti angu ngbangbo mingi, na lege ti afango ye ti wataka nga na atënë ti handa, Satan akanga bê nga na bibe ti azo mingi. Lo sara si atënë mingi tongana tënë ti Nzapa oko na yâ ota, ti âme so akui pëpe na ti enfer ti wâ amû ndo. Lo sara nga si azo ayeke na kite na ndo ti Wasarango dunia nga na ndo ti tâ tënë ti Bible. Tënë ti mara na ti yango kodoro na nduzu ayeke nga ambeni kota ye ti kangango lege na azo ti wara lumière ti tâ tënë (2 aCor. 4:4). Tongana nyen e lingbi ti sara ti zi mara ti atënë tongaso, so alï mingi na bê ti azo?—2 aCor. 10:4, 5.
2 Atënë ni agbu bê mingi: Atënë ti nzapa so azo amä na bê na ni aninga ayeke sara ngangu mingi na ndo ti bê ti ala. Ambeni amä na bê na afango ye so, so ayeke na lege ni pëpe, na ngoi so ala de kete. Ti mû maboko na azo tongaso, a yeke nzoni ti sara tënë na lege so afa so e ne bango ndo ti ala.—1 Pi. 3:15.
3 E lingbi ti ne azo tongaso na ziango lege na ala ti fa na e aye so ala mä na bê dä na ngbanga ti nyen ala mä na bê na ni (Jacq. 1:19). Peut-être ala mä na bê ngangu so âme akui pëpe ngbanga ti so afami ti ala so ala ye ala mingi akui, na ala yeke na nzara ti kiri ti bâ ala. Wala ala ye ti sara amatanga ngbanga ti so ala ye angoi tongaso ti duti legeoko na sewa ti ala. Ti dengi mê ti mä tënë ti ala ayeke mû lege na e ti hinga atënë ti bê ti ala nga ayeke mû maboko na e ti kiri tënë na ala mbilimbili.—aProv. 16:23.
4 E mû tapande ti Jésus: Jésus azia mbeni nzoni tapande na e na ngoi so lo kiri tënë na mbeni maître ti Ndia. Lo mû gi kiringo tënë ni hio pëpe, ye so koli ni alingbi ti ke ni ngbanga ti so tënë ni agbu bê ti lo mingi. Nde na so, Jésus agboto lê ti lo na ndo ti Mbeti ti Nzapa, lo hunda na lo ti fa bibe ti lo dä; na lege ti mbeni toli, lo mû maboko na lo ti hinga ye ti sara na nda ni.—Luc 10:25-37.
5 Tâ tënë ti Mbeti ti Nzapa alingbi oko pëpe na afango ye ti nzapa ti wataka so alï bê ti azo ngangu (aHéb. 4:12). Tongana na be-nze-pepe e fa na azo tâ tënë na lege so alingbi ti ndu bê ti ala, fade e yeke mû maboko na ala ti ke atënë ti wataka na ti yeda na tâ tënë so alingbi ti zi ala.—Jean 8:32.